2011-7 月份文章 顯示方式:簡文 | 列表

July 28,2011

雄雄做一睏老


昨昏佇台北轉運站頭前,予一个查某囡仔閘--落-來,欲推銷筆佮轄包仔,伊問我講去新竹創啥,我應講我佇遐讀冊。結果,伊煞掠我金金相,意思是我ê歲頭看起來無 sîng... 

這是自昨--日予警察當做「老人」了後,第二擺予人「看破跤手」--ah,講--起-來也奇也怪,tsîng-kah-tann,我一直攏是予人誤會做高中生抑大學生--ê,thài-thó會無ti無tang規个變老款--去,這到底是啥原因?

當然,尾--a我就袂giàn kā交關 墨

Posted by lausenghian at 15:26回應(0)引用(0)罔話

July 26,2011

鐵馬煦號


Beh倚晝出門,行去車路對面ê亭仔跤beh牽車,一時間煞揣無,心內想講:「tann害--ah,koh beh開錢--ah!」好佳哉車無拍毋見,是予人牽去hē踮人行道墘。

鎖tsiah拄開,牽車beh起行,雄雄兩个警察騎oo-tóo-bái停佇路邊,hiàm我kioh:『先生!過來一下』我想講tsit站仔都也無犯案,極加是不時tsông紅燈,免驚!就行倚--過,當時仔,是in捎一張貼紙beh kā我ê鐵馬煦號(ù-hō)--lah!

Tsit件代誌khah歡喜ê部分,是我倚--過了後,hit个少年警察就一直佮我làu台語,聽著伊tsiah誠懇,我規个心情sū-pu-líng-giang!即時真愛配合。是講,tse嘛予我想著講:「kám會是我變較臭老--ah!人無閣當做我是少年仔,無beh kap我“tsiàng kőo-ì“--ah?」

Tse鐵馬煦號ê技術真進步,貼起lih了後,過三工,he號(碼子)就ē家己食入去鐵--裡,我單寫好交--伊,he賊頭koh直直講:「按呢kán無蓋利便?攏毋免去派出所!」有影!技術jió-toh,koh蓋便民--oo!按呢,我tsit隻漚古tōng-lián-á就加較毋驚hông斧--去-ah!!!

(窮實心內另外有OS:做賊頭tsiânn辛苦,ûn街閣著四界招人kā鐵馬煦號,tse拍算嘛是in ê業績 .........)

Posted by lausenghian at 12:05回應(2)引用(0)罔話

July 14,2011

Tio̍h培養人


台灣ê大學設立台文系所已經有幾若冬,毋過少年tsit輩,特別是uì台文系所出業ê人,有偌濟比例去做台文相關ê頭路(出版,編輯,媒體等等),或者是利用工課以外ê時間投入台文運動(寫作,評論,閱讀,遊說,行街頭等等),我所知--ê,是比例真低,人額蓋少,按呢,台文運動未來欲按怎有後注(āu-tù)--leh?

有一寡工課,凡勢毋免特別ê培養hām訓練,就有才調hē手隨紲接,總--是,嘛有hit款需要一段時間tsiah有法度熟手ê穡頭,比論:文字編輯(愛對書寫熟行(si̍k-hâng),對用字一致化有耐性koh有執行ê能力),tsit款工課,是台語文出版(包括冊kap定期刊物)tsham文學比賽攏真需要ê人才,tann,kám有20或者是30外歲ê少年人咧受tsit款ê訓練,隨時會用得起來kā工作延續--落-去?

一个運動欲行會久長,人是關鍵,tsit代人會過--去,而且人世間ê變化毋是咱會當pān-phue--ê,按怎佇運動ê過程中,沓沓仔培養接手ê少年輩,是咱袂使無去致意ê一項重要任務。

Posted by lausenghian at 17:06回應(2)引用(0)語言
 [1]