2011-4 月份文章 顯示方式:簡文 | 列表

April 28,2011

聖經詮釋學實例


我想 beh tshuā 操,hōo 逐个 khah 知影聖經詮釋學 (tshuan-sik-ha̍k) 按怎做實際 tik ê 操作,下跤 (ē-kha) 舉死刑做例。



【背景】:Tī 逐个 lóng 無 lia̍h 講死刑有問題 ê 時代。

【講法】

羅馬人書 13:1-4:(紅皮聖經譯本)

「每一个人 tio̍h 順從政府 ê 官員。因為權柄 lóng 是 tuì 上主來--ê,又 koh 現在 tsiah-ê 官員也是上主所安排--ê。所以反抗權柄是背逆上主 ê 命令;背逆 ê 人家己 ē 受定罪。因為做好 ê 人 m̄ 驚長官,只有做歹 ê 人 tsiah ē 驚。你 ài 做一个 m̄ 驚有權柄 ê 人--無?若 ài,tio̍h 做好事,伊就 ē kā 你嘉獎。因為伊是上主 ê 僕人,為著恁 ê 利益 teh 工作。但是你若做歹代誌,tio̍h 驚伊;因為伊帶劍 m̄ 是無目的--ê。伊是上主 ê 僕人,對做歹 ê 人來執行上主 ê 刑罰。」

所致講,國王、政府,是上帝 tī 地--裡 ê 代表,執行上帝 ê 權,自然有權用刑罰(包括死刑),來處罰做歹代誌 ê 人。

【背景】:人民 kap 政府中間 ê 關係重 koh 定義,人權受著重視、個人主義大興,死刑受著攻擊 kap 質疑。

【講法】:

創世記 9:4(巴克禮譯本):「獨獨有活命 ê 肉,就是有 kânn 血--ê,恁 m̄-thang 食。」

性命是上帝所創造--ê,性命 ê 主權 tī 上帝 ê 手--裡,上帝 to 無 ài 咱食血、無尊重伊對活命 ê 主權--ah,況兼是咱 hē 手去取人 ê 性命--leh!!!咱人無 tsit 个權!!!關係 tse ê 經文,ē-sái 講聖經內底四界 lóng 是,咱凊彩 koh 舉兩个例:

約伯記 12:10(巴克禮譯本):「一切動物 ê 命,kap 人類 ê 喘氣,lóng tī 伊 ê 手。」

傳道書 8:8(巴克禮譯本):「無人 ē 管伊 ê 活命,將活命留--leh,也無人 ē 管死 ê 日.....」

所以,就準是君王,是政府,是掌權者,也無資格結束啥物人 ê 性命,因為,上帝 tsiah 是活命 ê 主宰,上帝 tsiah 有對人性命 ê 主權!!!



Án-ne,不管時代 ê 潮流按怎變,價值觀按怎改移,只要咱有心,總是有法度引經文來 tuè,hōo 咱 ê 信仰 kap 聖經,tuè ē 著時代,甚至變做主流價值觀 ê 引 tshuā 者!

差不多無 hit 號無法度引用聖經來支持 ê 主張,精差咱 beh iah m̄ niā-niā。

Ē 真諷刺--無???Ia̍h 者是講:真實用???

Posted by lausenghian at 19:32回應(2)引用(0)罔話

Tio̍h iah m̄-tio̍h?


拜一句法專題 ê 課,除了討論論文,先生講天地皮算是上課 ê boo-ná-suh,也 tsit 禮拜 ê 主題接紲頂禮拜 ê 影戲《賽德克‧巴萊》,講起著原住民;伊講為著 beh 了解 hit 个歷史背景 kap 相關 ê 資訊,伊開真濟時間去揣日本時代、Hoo-lan 時代 ê 資料來讀,內中,關係原住民,伊自頭 kah 尾有一件代誌真無法度諒解,就是出草(刣人頭,華語:『馘首』),也伊 mā tī 網路頂看一寡關係「kā 野蠻人"教化"」ê 討論,有兩款觀點 teh 做對頭。
...繼續閱讀

Posted by lausenghian at 12:51回應(0)引用(0)文化

April 20,2011

聲 ê 旅行


徛 tī 湳地吼海
雖 bóng 跤釘入去烏烏黏黏 ê 塗--裡
聲猶原
湠去到海 tsīnn 來去倒 ê 國界線
跳索仔
無張持 kenn 一下跋跋--倒
密入去水--裡了後
開一lìn 一 lìn ê 泱是花
倒照 khóng 色 ê 天
遠遠 ê 山青青
一瓣仔一瓣 tòo 色
一瓣仔一瓣開去 kah
遠遠遠 ê hit 爿海墘

Posted by lausenghian at 12:12回應(2)引用(0)罔話

第三者是 koh 按怎?


一齣號做『犀利人妻』ê 連續劇,tī 社會上歕風攇柴,對「第三者」ê 怨恨 hām 對敵,像雄火燒 kah 嶄然仔 mé。毋過,凡勢 tsit 件代誌 kánn tio̍h 顛倒頭來講,tsit 齣戲會 tshìng kah 掠袂 tiâu,檢采就是「戲劇」本身有 tuè 著社會 ê 主流思想,真合市場 ê 喙路所致,人講卵生雞、雞放卵--lah。

Tsit 號「拍夥計」ê 風氣,在我來看,干焦是一種對「婚姻」ê 偶像崇拜 niā-niā。Tshím 想,男女朋友若無法度做伙,tshé-tshé leh kám 無準拄好?若無法度鬥陣,或者是有 koh 較好 ê 選擇,beh 分開、beh 同齊,是有啥物著抑毋著?結婚,究真就是一个形式而已,kán tio̍h kā 看做一種「特別無仝」ê 感情形態?事實上,就是 tsit 款對婚姻 ê 執迷,tsit 个戇社會,才會一直輕視未婚者佮離婚者,kám 講毋是?
...繼續閱讀

Posted by lausenghian at 7:32回應(1)引用(0)文化

April 16,2011

按怎看待改變


Facebook 頂懸,一位朋友舉越南話 ê 例,來批評一寡學者對台語漢字/本字 hām 語音 ê 稽考,伊主張咱 mài hiah 見古,比論:「姊」ê 越南話講做「chị」,寫做台羅是「tsih」,照漢語聲韻學是入聲,無合 tī 漢字聲韻,總--是越南人嘛無 kā 當做誤 tânn,講 beh 正音。Tsit 个朋友就自按呢主張講台語嘛 tio̍h 取現代人 ê 語音做標準,因為語言是 ē tuè 時間演變--ê。

我 kā 應講:毋過,現代人 ê 語音變了真緊,若有影攏照 tsit-má 少年人 ê 台語呼音,台語應該參華語仝款是一个 tsiâu「無入聲」、攏「無濁音」ê 語言,按呢敢好?

現此時真濟少年人,「我/guá」攏講做「uá」,「囡仔/gín-á」攏呼做「ín-á」,濁音韻頭 lóng 落落--去,若入聲--leh,mài 講「h」韻尾 ê 第四、第八調 bē 曉分,連「p, t, k」都嘛倒床,teh beh 去塗州賣鴨卵--a。

問題是,咱按怎看待 tsit 號變化,有 beh 據在 in 按呢「變--落-去」--無?

我 ê 朋友講:tse 是無 ta-uâ ê 結局,歸尾 tsit 款 tsua̍h 音嘛是會做主流。

是--lah!終其尾 ē 變主流是一款可能,毋過,自按呢就順風駛船 kánn 是另外一回事!按怎號做順風駛船?真簡單,kah 若按算 tsiah-ê 呼音 ē 變做主流,按呢,台語教學材料(包括教科書),tann 就 thang 好攏照少年仔 ê 呼音來寫、來標,mài koh 滾 lìng--a!按怎???

無量講 tsit 个朋友 ê 回答是:tse 愛看編寫者是啥人來決定,若是編寫權落 tī 取新 ê 呼音 ê 人 ê 手頭,自然改了了;若是猶原踮「保守派」ê 手頭,教學定著是用「古典」ê 音。

伊按呢講,我部份贊成--lah!無毋著,文學經典 kap 語言標準本來就是 hit 个時代有權力 ê 人 teh 主張 teh 決定--ê,咱看美國烏人 ê 英語真時行,rap 佮 Hollywood ê 電影內底都也不時聽 ē 著烏人英語,毋過,烏人英語就是無法度出現 tī 美國 ê 學校 hām 英語教科書內底,就準 in 現任 ê 烏人總統 teh 講話,都嘛愛學白人主流 ê 呼音佮詞彙,是按怎???

因為,這究真是「權力」teh主張,毋是「人額」teh主張。

台語現此時濟濟呼音 ê 改變,並毋是單純為著「講話呼音較利便」(親像連詞「kap」變讀做「kah」ê例),毋管是入聲尾落--去,或者是濁音韻頭消失,計計是受華語 ê 影響,有權力者透過體制、教育、媒體、法律等等,hōo 華語來制壓台語,hōo 台語 tī leh 滅無進前,先變款,tsit 號變化,就是政治「權力」所造成--ê,也伊 kiau 一个族群語言 tuè 時間所產生 ê 自然呼音變化,本質上 kài 無仝 tī--leh。

我想,就是因為對 tsit 个變化背後 ê「權力」/「權力者」真不目(袂爽--啦!),我無啥愛 beh tuè 伊去變化、或者是接受 tsit 號變化。也任何一个 beh 攑順風旗 ê 人,lóng 應該先問 he 風是 àn 佗位來--ê,了後,tsiah 來徛旗 khah 定當。

Posted by lausenghian at 21:06回應(2)引用(0)語言

April 6,2011

辛卯清明


lun-piann-kauh
有 hiah-nī 久無食著潤餅 kauh--a!Tsit tsuā tuè 阿爸、阿母去打貓,兩工上無食 beh 十 kauh。

今年食潤餅,發覺講阿嬸 in 開始有 teh kā 飯做伙 kuah--入-去,tse 是較早無--ê,毋過,tsa-hng 聽台南北門 hia ê 朋友講,in 自早就連大麵做伙 kauh 來食--ah,按呢看--起-來,包飯 mā 無 tsiok 奇怪--lah!

語言 ê 方面,有聽著連大漢阿嬸 tsit 款四常講台語、取台語做主要語言 ê 人,to 開始用「ma / mah」做句尾疑問助詞,tse 當然是受著 tī 台北食頭路 ê 叔輩小妹 in ê 影響。Tsit 个用法,古早廈門話就有,m̄-koh 現此時 ê 台灣話 suah 是 uì 台灣華語吸收,變做一款真怪巧 ê 復古.....

另外,tsûn--年 tsiah uì 阿媽 hia 聽著伊講「tshinn-miâ」(清明),兩字攏取白話音,拍算是 khah 倚泉腔 ê 講法,今年,連阿媽 to 講「tshing-bîng」--a,語言 ê 變化,thài-thó ē tsiah 緊,bē 按算--得。

阿媽九十外歲--a,比頂擺看著伊 ê 時,koh ke tsiok 老。

Posted by lausenghian at 13:48回應(2)引用(0)文化
 [1]