2008-8 月份文章 顯示方式:簡文 | 列表

August 31,2008

海角七號


我 m̄-bat 電影,m̄-koh 就我 ê 淺見,好看 ê 電影有 2 款,1 款是 ē hō͘ 人想足濟--ê,足有內涵 ê 電影,1 款是無足深層 ê 啟示,m̄-koh thang 做足讚 ê 藝量 ê 電影,有 hō͘ 人笑 kah 足暢 ê 藝量,mā 有 hō͘ 人哭 kah 足 tháu ê 藝量,另外 koh 有哭 kuà 笑--ê,若《海角七號》--leh,我認為是第 2 款。


我真 kah 意電影內底幾 ā 種語言 sio 濫 tsham ê suí,tú-tú 好本片放送 tsìn 前,有放 1 片香港片 ê 預告片,內底 lóng 講廣東話,tse hō͘ 我雄雄意識著語言現實對藝術作品 ê 影響,親像廣東話實際上 tī 香港 iáu 足有活力,iā 香港 phah ê 電影,m̄ 管市場 kap 觀眾 tī toh 位,香港話 lóng ē 真自然就透過電影傳去到所有觀眾 ê 耳 khang--ni̍h;台灣話--leh,台灣話已經 1 跤 hāⁿ 入棺材--a,用目今 ê 時代做背景 ê 電影,自然真 oh 有足闊 ê 空間 hō͘ 台灣話 thang 表現。


我心內知知--leh,我所寫 ê 故事內底,濟濟明明是現代 ê 場景,he 對話 kap 文件 suah 用台灣話、文,tī 現此時 ê 現實 ē-kha,算是另外 1 種「理想的」ê 神話 iā-kú-káⁿ!


電影內底 hit 張真可惡、m̄-koh 寫 kah put-tsí-á lè-táu ê 日文批,是另外 1 ê hō͘ 我 tsiaⁿ 欣賞 ê 所在,m̄ 知有批 ê 全文 thang 看--無。


Tsit 齣影戲,hō͘ 我 uì 半中 nuâ 開始直直流目屎,記 tî--ni̍h,差不多 tshiau 無看影戲哭 kah tsiah 淒慘--ê-a,若 m̄ 是不時有插 kuá 笑詼 ê 段落,我恐驚 á ē 哭 kah 十三天外--去。


出--來 ê 時去厠所 (tshè-só͘),tī 鏡--ni̍h 看著 ka-tī ê 兩蕊目 tsiu 紅 kah bē 輸去 tò͘ 著紅墨水,若 beh 問我是 siáⁿ-mih 因端 koh siáⁿ-mih 起致,對 1 齣好看、m̄-koh 屬 tī 第 2 種類 ê 電影來講,我 mā 無才調說明。


Kiám-tshái 是寂寞所致?

Posted by lausenghian at 23:05回應(3)引用(0)電影

August 29,2008

拜四暗


連紲兩工 tshia-pua̍h-píng teh 準備拜四早起 ê thematic relations in syntax 簡報,兩暗 ê 睏眠時間加加--起-來 khah 無步平 ê 1 暗。


今 á 早起簡報了,去所--ni̍h 開研討會籌備會,了後 tī 研究室作 sit,暗頭 á 去考法語班第 1 期結業測驗,列位,按呢聽--來 lín 應該 ke-ke 減減知影我今 á 日有 juā thiám--a-ho͘ⁿh,想 bē 到--neh,tī 考試 tsìn 前,原本底想講 beh 上轎 tsiah leh 縛跤歹看,to 咱若有縛總是 khah 贏無,自按呢 kā 法語課本 kap 宿題 the̍h 來緊讀緊做,結果讀無半點鐘,人就 phak tī 桌頂昏昏死死--去-a,m̄-tsiah ē 無啥準備就去考試。


無啥準備 ê 人 lóng bē niau 毛,kā 考卷頂 kuân ē-hiáu 寫--ê 寫寫--leh,bē-hiáu 寫--ê mā ka tsu̍t tsu̍t--leh,就交 hō͘ 先生--a,做全班第 1 ê 離開教室,ia̍h hit 時 tsūn 約其略 á 7 點 40,離自本下課 ê 時間有 khah 早 beh 2 點鐘 hiah 濟。


正常 ê 人 tsit-tang-tsūn 絕對是 tsông 轉去厝--ni̍h o͘ⁿ-o͘ⁿ siàng 大眠--ê,kan-kan-á 我 to m̄ 是正常人,我心內真 m̄ 願,hioh 熱 beh suah--a,我 suah iáu teh 過 tsit 種無天理慘 ê 艱苦日子,tī tsit-ê tài 淡薄 á 暫停感覺 ê 暗暝,koh khah 按怎 thiám,我 mā beh 做 siau-tháu 足心願--lah! Tú 好心內一直記 tiâu ing 暗是戲園放送 Katyn ê 上尾暗,離開法語中心了後,suî tiàm 圖書館用電腦 sió 查,知 9 點 15 有 1 場,自按呢心肝 lia̍h 坦橫 gông-gông sîn-sîn ka 坐公車 lōng--過。


Huān-sè 是人 siuⁿ 過頭 thiám,huān-sè 是我 ê 心 iū-koh 死--a,看 tsit 齣濟濟人受感動 ê 影戲,我 suah àn 頭 kah 尾心內 tsiâu 無動無 tâⁿ,mài 講咱目屎斷半滴--lah,根本是連目頭 sió khioh sio 倚 to 全無--leh,硬 beh 我講,恐驚 á kan-taⁿ ē-kha tsit 2 ê m̄-tsiâⁿ 感想:


1.
若有人認為 Katyn、228、Hitler 屠殺猶太人等等 ê 慘 tsheh 代無要無緊,我咒 tshàm in 去親身 hőng 磨拖、受刣 死,tī 死--ni̍h 去體會 in ê 想 tâⁿ!


2.
用銃彈頭殼 ká-ná 是 1 種緊 mé koh bē 拖 tshiân ê 死法,足值得參考--ê,我想 beh ài 1 支銃。

Posted by lausenghian at 1:08回應(5)引用(0)罔話

August 26,2008

恐怖 ê 樹林 á


拜四句法研讀,除去 beh 討論冊內底 ê 1 章,mā 輪著我報告另外 1 篇文章。


今 á 日 leh 讀 ê 時,tú 開始是愈讀愈 siūⁿ 氣,因為作者 kā kui 大堆資料 khioh khioh 做伙,整理出 1 條 koh 1 條 ê 規則,kui-ê 感覺就是:tse 是 siáⁿ-mih àu-kó͘ 文章--lah? 是寫來 beh 騙稿費--ê-sio?  Tī formal ê 領域--ni̍h,tsit 款做法 kan-taⁿ 是 descriptive adequacy,是無 siáⁿ 要緊 ê 文獻,讀著是足想 beh ka phiaⁿ tàn-hìⁿ-sak--ê。


無 lia̍h 講人作者無 teh gōng,上尾 1 ê section 開始做歸納分析,10 外頁 ê 紙面是 1 欉 suà 接 1 欉 ê parsing tree,樹 á tsit 款 mi̍h-kiāⁿ 雖 bóng 無 teh 罕見,m̄-koh tsiah-ê 樹 á 是不止 á koh 樣,無 1 欉是我現階段 ê 智識 ē-tàng 理解--ê,也無 juā 久我就 tī hit kui 大 phiàn ê 樹林 á--ni̍h 失路,讀--lueh 是直直起烏暗 hîn。


是--lah,我想作者是有達成 explanatory adequacy ê 要求--lah,m̄-koh i beh 解 sueh ê 對象 m̄ 是淺學 ê 拙者也 kú 敢。


是講 tsit 聲 hāi--a,拜四看 beh 按怎 khiā tiàm 台 á 頂報告 tsiah 好。

Posted by lausenghian at 23:33回應(0)引用(0)罔話

August 24,2008

無 sîng


聽講有 bē 少大粒 lu 去捶烏豆,問 hit-ê 展覽--ni̍h 是按怎全無提起 in ê 名姓 kap 作品。


無 sîng--lah! Ka-tī 認為銜頭 tio̍h tàu 1 字「家」ê 人,對名聲 tsiah-ni̍h-á 興,bē 免得 hō͘ 人對 in ê 動機 kap 性地起 giâu 疑。

Posted by lausenghian at 16:22回應(0)引用(0)文學

August 23,2008

就按呢


我 ē-tàng 講 siáⁿ? 人 kám ē-tàng kā 1 ê 人變做另外 1 ê「uì 心--ni̍h 感覺 i 是 kāng 款」ê 人而且改 kah i 歡喜甘願--sìm?


無想 beh koh kap 你 tsèⁿ-tshuì--a,就親像 tsiaⁿ 貧惰 koh kap tsit-ê 世界分會 tsi̍t 樣。


C'est tout.

Posted by lausenghian at 22:27回應(0)引用(0)quasi-twitter

August 22,2008

Iáu teh 拚


1.
暗頭 á 總算 kā 稿件寄--出-去-a,誠心 ǹg 望華斌 hia 有收著雙位 ê 數額,koh,若有機會我一定 beh khau 洗 suan 笑文○會主委,敢找館長 ê 麻煩,我絕對無放 i suah!



2.
To-do list tsiah 減 tsit 1 項 á--lioh,恐怖 ê 8 月尾猶原是 hiah-ni̍h-á 恐怖,m̄ 知影 beh 按怎 tsiah 有才調平安順 sī,kan-taⁿ 知有 tsiah-ni̍h 濟 khang-khuè,tsiah-ni̍h 濟 assignment kap 宿題,tsiah-ni̍h 濟意外,taⁿ iáu kha̍p 我無倒,iáu teh 拚--leh。(等若倒--lueh 就 tiām-tsih-tsih--a)



3.
M̄ 管按怎,9 月初一定 beh 去 toh 位 bih--幾-工-a,無人 ē-tàng 阻止--我!


Posted by lausenghian at 23:57回應(0)引用(0)quasi-twitter

August 20,2008

無代誌


Ing 暗轉去 a-pah a 母 hia 食飯,1 碗飯 bē-tsîng 食 suah 症頭 koh leh giâ,明明足想 beh koh ngeh 菜來食,suah 吞 bē 落--去,koh 直直起 ài 吐,sió tùn-teⁿ--tsi̍t-ē,心理 kap 身體 sio-ián,尾--a 無 i 法,只好拚勢 kā tshun ê 白飯 pê 了準 suah。

Tī a-pah a 母面頭前,tī 同學、老師、朋友 ê 面頭前,我足慣勢維持看--來好好 ê 款式,m̄ 是驚 in 煩惱,是足貧惰解 sueh,mā 無想 beh 聽「約伯 ê 朋友」hit 款 ê 安慰 kap 苦勸。

Posted by lausenghian at 21:51回應(0)引用(0)心內話

Lan--a ê 話


(略),hit 時 tsūn 阮 iáu m̄ 知影 siáⁿ-mih 號做「愛情」,‧‧‧‧‧就是經過 tsiah-ni̍h 濟代誌了後,mā m̄ 敢講阮就 bat--a,是講,世間 kám 真正有人 bat?  愛情,kám 完全 kap 理性無干涉?經過理性 tik ê 計算 tsiah 決定--ê kám iáu 算做是愛情?‧‧‧‧‧‧‧‧愛情,kám 一定 tio̍h ài 有無法度 tsih 載 ê「感動 iah 感覺」?Koh tsit 款「感動 iah 感覺」kám 就 ē 直透 tī-leh,永遠 lóng bē 轉化 ia̍h-tsiá 是 tshìng 消?愛情,kám 有影 bē-īng 得 tsiâu 無別人 ê 祝福 kap tsham-tshap?


Aih!我 m̄ 知--lah!我 kan-taⁿ 知影,若準「愛情」tsit 兩字有登記專利,獨獨 ē-tàng 用 tī 男女之間,按呢做恁講我 kap A 鐵無 sio 意愛--lah!是講,‧‧‧‧‧‧‧‧,「用字派詞」是算 siáⁿ siâu-phīⁿ?Kám 講咱人若 kā 丹桂花改號做臭 phú-á 花,就有才調改變 i ê 本質 kap 芳氣--sím?

Posted by lausenghian at 5:18回應(0)引用(0)文學

用筆


若 iáu 有氣力 tsu̍t--lueh,tsit 支筆除去 gia̍h 來寫心適 ê 故事,tio̍h 永遠為弱勢者出聲,做強權 ê 對敵!


強權 m̄ 是 kan-taⁿ tī 國際上存在,強權就是現便 teh huāⁿ 家坐大位 ê 權力結構、意識型態、價值判斷!


做 1 ê 都市 sông,我無才調寫田莊 ê 人情 kap 光景,受黨國教育 ê 窘逐,huān-sè 我 mā 無足 gâu 處理歷史 ê mê-mê-kak-kak;m̄-koh,我直透 beh kap hiah-ê「家己 tshia bē 顛」(自以為是),bē 堪得理性檢驗無打緊,koh 足興去 phik 害弱勢者 ê 權勢 piⁿ-pui̍h,親像傳統社會價值、教會主流信仰、áu 蠻 ê 政治信條 t.t.,lóng 想 beh 用筆尖 ka tu̍h 破!


Tsit-ê 故事除去人類永久 ê 悲劇 kap 運命 ê 合奏,就 suà 接〈11哥〉,繼續為弱勢之一 ê 同性戀出聲!

Posted by lausenghian at 4:32回應(0)引用(0)文學

※○§◎●●●※○§◎●●●※○§◎●●●


Uì 學校轉來 kā 身軀 kap 衫洗好 ê 暗時 10 點外,人已經 thiám--kah,兩工淺眠,腹肚 iau-iau,連行路 to phiân-phiân-uat-uat,beh 做 siáⁿ lóng 無元氣,倒 tī 眠床頂,lóng 無 pān-phue 拖磨 tsiah tú beh 開始。
...繼續閱讀

Posted by lausenghian at 2:52回應(0)引用(0)罔話
 [1]  [2]  [3]  [最終頁]