2008-6 月份文章 顯示方式:簡文 | 列表

June 30,2008

TP 2.11


相信真濟人已經慣 sì 用劉杰岳兄開發 ê TP(Taiwanese Package)tī MS-WORD 輸入羅馬字,自 KIP 公佈台羅了後,上大 ê 影響是 TP 原底標調符 ê 位置 kap KIP--ê 無 siâng ê 問題,致使 TP 所輸出 ê 台羅無 lóng 合 tī KIP ê 規範。考慮 tse 了後咱 beh 做資料 tshiau-tshuē、整理,調符位置 ē-tàng 一致當然是上理想。感謝劉杰岳兄所 phah ê 底蒂,koh 答應原底 ê 程式做修改,mā 感謝林裕凱老師 khai 時間、費心神完成 tsit 項 khang-khuè,taⁿ ta̍k-ê thang 緊來試用 TP 新版,mā kā 使用過程中發現 ê 問題報 hō͘ 林裕凱 iah 劉杰岳兩位,thang ka siageh kah ka-nn̂g。


TP 2.11 ê 位址 kap 相關說明

Posted by lausenghian at 9:35回應(1)引用(0)語言

June 28,2008

迷思


原本底有 phah 算 beh kā 翻做 Holo--ê,m̄-koh taⁿ 無 tsit lō 時間,有興趣 ê 人 tsiah 連過去讀就好,原文是中文,先 tshiàng 明:內容是不止 á 無聊--oh:基督信仰的迷思

Posted by lausenghian at 23:45回應(0)引用(0)哲學

「表音」kap「表意」ê 本質?


中國朋友 GnuDoyng 用電子批寄 ē-kha tsit 段不止 á 心適 ê 文字 hōo 我:



【英文】


Fi yuo cna raed tihs, yuo hvae a sgtrane mnid too. Cna yuo raed tihs?



Olny 55 plepoe out of 100 can. I cdnuolt blveiee taht I cluod aulaclty uesdnatnrd waht I was rdanieg. The phaonmneal pweor of the hmuan mnid, aoccdrnig to a rscheearch at Cmabrigde Uinervtisy, it dseno't mtaetr in waht oerdr the ltteres in a wrod are, the olny iproamtnt tihng is taht the frsit and lsat ltteer be in the rghit pclae. The rset can be a taotl mses and you can sitll raed it whotuit a pboerlm. Tihs is bcuseae the huamn mnid deos not raed ervey lteter by istlef, but the wrod as a wlohe. Azanmig huh? yaeh, and I awlyas tghuhot slpeling was ipmorantt! If you can raed tihs forwrad it.



我 beh kap ta̍k-ê 分享--ê,是 kui 段文字 beh uá 上尾 ê 位 á:


This is because the human mind does not read every letter by itself, but the word as a whole.


若 tsit-ê 講法有正確,咱 thang koh 想看「表意」kap「表音」文字 kám tsiâⁿ-si̍t 有 hiah 大 ê tsing-tsha?

Posted by lausenghian at 10:25回應(2)引用(0)語言

June 26,2008

足恐怖 - 牛五翻譯


『讓偶屬囉吧~』哭


Hennh,tse 就是我想 beh 講 ê 話,tann 機器式翻譯 ê 發展,猶原 iáu tī 真低路 ê 狀態。


食第 2 ê 頭路 ê 時,頂司 ta̍k 禮拜開會 ē 要求 suî 人報告 1 篇當週 ê Economist,hit 當 tsūn 除了英文閱讀能力有淡薄 á 進步,koh 學著 1 件代誌:


咱若是心肝結 kui 球,m̄ 免 lim 酒 sip--tsi̍t-ē sip--tsi̍t-ē juā bái 你 kám 知 舌


只要 kā 1 段英文貼入去 Dr.Eye ê kui 段翻譯 hōo 翻做中文,就 ē 有足 kok-pih 兼激五仁 ê 笑詼走出來 kā 你 lāng,he 約其略是 3、4 冬前 ê 代誌--a kám m̄ 是?(我對 hit tsām-á kap koh khah 早 ê 記持有大損 tn̄g,無足確定時間),無 lia̍h 講 tann tse 技術 kāng 款無足 tsing 差。


Poh 是我 khah 久無用 tsit 款 ke-si,無--tsiá,是按怎我 koh 感覺牛五翻譯 leh 裝 siáu--ê ê 程度有 khah 厲害 babelfish--leh?


是講,機器翻譯技術 ē 做 kah tsiah tak-kha̍p,thang 知語言有影是奧妙,iáu 有真大 ê 空間 thang 好究 khàm--leh。

Posted by lausenghian at 23:10回應(0)引用(0)罔話

June 25,2008

補償 ê 心理


就 tsún 報告 koh-khah 按怎寫 bē 出--來,學期尾同學 beh 約出去 hong-so--tsi̍t-ē,我 mā 是 ē phe 命去參加,因為,自幼稚園讀 kah 大學出業,我 lóng 一直足疏忽 kap 同學 ê 關係,tann koh 轉來讀冊,雖 bóng 我猶原 m̄ 是 hit 款好面前 khiā ê kioh-siàu,m̄-koh 有 1 種足想 beh kap 同學 khah 親 tshiang ê 意向,算是補償 ê 心理。


坐 tī Winnie Bear 邊--a,i 提醒我足濟代誌,有影真有參考價值,m̄-koh 我仝款想無實際 ê 步數去 liú-la̍k,kah 尾--a,mā 是 tio̍h 做上 bái ê phah 算,kā ka-tī 講「千算萬算,m̄ 值得天一劃!」天 beh 按怎劃,beh 劃好劃 bái,看破自然的 khah bē 心 gîng。


人生短短--a,m̄ 免想萬項事 beh 足心願,僅僅求過了有意義,有 phah-piànn--過就好。

Posted by lausenghian at 23:33回應(2)引用(0)心內話

June 24,2008

「我愛--你」ê 句法樹

Gua ai li e parsing tree
有人按呢解 sueh:


「愛/ài」是 1 ê 2-place predicate,i tio̍h 有 2 ê arguments,tann tsit 句無合文法 ê 因端,是因為 i 欠 external argument,有 1 ê theta-rolesaturated,違反 theta criterion


I 緊駁喙:m̄-tio̍h!Tse 明明是 teh 表現 subject-in-VP hypothesis,tann tsit 欉樹 á 是 D-structure ê 情形,你無注意著動詞「愛」ê hit-ê argument iáu tī 動詞組內底([Spec, VP]),是 i 無 suá 出去 tiàm [Spec, IP] ê 位置 niā-tiānn。


我講:kah 若是按呢,請問:


第一、「我/guá」kám suá ē 出--去,koh kám 有必要 suá--出-去?Suá kap m̄ suá ē 去影響著「我」the̍h case iah bē? 若無  the̍h 著 case,「我」kám ē 欠 visibility,自按呢無才調收著動詞「愛」ê theta-role (agent)?


第二、節點「I」ê ē-kha,是 siánn-mih 時態,是過去、tsit-má、或者是將來?Tsia 無明顯 ê 動詞 inflection,咱 beh 按怎看待?


第三、上 kuân ê hit 層是 CP,CP 是 barrier,無人 ē-tàng governing from outside,bē-sái 就是 bē-sái!按呢 kám m̄ 是 tsám-jiân-á hāi?

Posted by lausenghian at 22:42回應(0)引用(0)哲學

June 23,2008

1 ê 靈魂 1 口井


1 ê 靈魂 1 口深 long-long ê 井,hiat 石 thūn 井 bē 滿,kan-taⁿ tân 無停 suah haiⁿ-tshan 缺欠 ê 運聲。

Posted by lausenghian at 8:50回應(9)引用(0)哲學

June 21,2008

堅心 ka 揀 1 pîng


(Hōo 朋友 ê 1 張批)


重點是你按怎看待你 ê 信仰?



親像我,我並無相信上帝真張 tî teh「控制」萬項事到 hiah 幼,所以我 bē 去替上帝 tshuē 原因,mā bē 去替上帝想藉口;若 tú 著 bái ê 結果,我 beh 感覺 siūnn 氣就 siūnn 氣,beh 艱苦就艱苦,我 bē 去 kā 上帝拖出來做藤牌,mā bē 用上帝來 am-khàm ka-tī 正港 ê 想法 kap 感受。
...繼續閱讀

Posted by lausenghian at 23:53回應(0)引用(0)哲學

張身勢,he m̄ 是本人 ê sutailuh


接著花旗國 khà--來 ê 電話,真 o-ló 我銅旗敢設 tio̍h 敢倒 ê 行 pàng,tse hām tsìn 前幾 ā 通電子批 sio-siâng,lóng hō͘ 我感覺真意外。


講了 siuⁿ 超過 ê 代誌,khiā 出來會失禮、做 pué 會,在我來想是就事 huân  事 teh liú-la̍k,差不多是免 ke 考慮 ê hē 項,就 tsún 有 1 工我變做銀河帝國 ê 首相,我 mā 猶原 ē 按呢來處理 tsiah tio̍h。
舌


因為,我上討厭張身勢、激空氣 ê 人--ah,m̄ 管 in 是的實足有地位 kap 成就也好,或者是靠勢年歲 beh 使派也罷,tī 我 ê 目 tsiu 內,人若愈激蔘 á 氣,是愈 hō͘ 我替 in 感覺 lak 臉 niā-tiāⁿ。


人 koh khah 按怎,mā 只不過是 1 ê「人」,倒 1 撇正 1 la̍t,beh ke 妝是 ke 漏氣--ê。


一直 iáu ē 記得有 2 位老先生,為著學術上 ê khió-kak,tī 上課、論文、著作 kap 網站頂 kuân 直直 tshuē khang tshuē 縫 teh tsau-that 對頭,獨獨 ka-tī 有誤 tâⁿ ê 位 á 是 tsèⁿ 死 m̄ 認,想--起-來,he 僅僅是 beh 維持 in 貴氣 ê 身份地位,tī in ê 心--ni̍h,面水 koh khah 按怎 mā beh 抹粉假出 hit hō 全無破 phà ê 樣相。


Siuⁿ 幼稚--ah-lah!

Posted by lausenghian at 9:22回應(0)引用(0)心內話

June 17,2008

Thài-thó ē 按呢


暗頭 á beh 去 Mà-khuh 食暗兼讀冊 ê 時,buē-tsîng 到有想著聖經內底 ê 1 ê 譬喻:「有掖種--ê 出去掖種,掖 ê 時,‧‧‧‧‧有 ê ka-la̍uh tī 石格 ê 地,土淺 ê 位‧‧‧」(可 4:3, 5;Barclay)


Tú-tsiah teh 讀《Kàu-hoē Kong-pò》準備明 á 載 ê 報告,suah tú 起 khiàn 就去讀著 tsit-ê 譬喻,聖經 hiah 大本,beh tsiah tú-tn̄g ê 機率是無 kuân;雖 bóng《Kong-pò》是 teh 講信仰,若我--leh,我是用 tsit-ê 譬喻 teh 想全無干涉 ê 另外 ê 代誌,總--是 tsiah-ni̍h tshàu-tú-khàm,m̄ 知 beh 按怎解 sueh‧‧‧‧‧


Poh 是時間 kap 空間 ê 關係 tsiann 實 m̄ 是按咱人 ê 直覺按呢,第 4 度「空間」hit-ê 未來,ē 因為某 mih 起致有才調「去」到位,或者是去 iáⁿ--著也 kú 敢‧‧‧‧‧‧‧‧

Posted by lausenghian at 23:54回應(0)引用(0)心內話
 [1]  [2]  [3]  [最終頁]