May 20,2006
走閃會社 (第 4 pha)
花枝--ê 無 teh gōng，伊自來 tō gâu 講三色話、食四面風 ê 人，chi̍t-ē 看有 khah 硬斗，隨看風駛帆。
「Ai-ioh！柯～--sàng～，」花枝--ê 換笑面 khah 緊人起羊眩，kui-ê 人 oá--過-來 面是 kiōng-beh phēng ùi 柯--ê ê 胸坎，柯--ê 雄雄去 hō· nai--chi̍t-ē，起 ka-lún-sún 險 un 落去塗 kha。
「柯--sàng，人 gún 是足有誠意 beh 解決代誌--ê-lah，無，chit 擺配合宣傳 ê 相片交 hō·你 hoa̍t-lo̍h，無夠 ê 部份，lán 才做夥來想辦法--lah。」
唱片商為 tio̍h beh 宣傳新曲盤，除去正常 ê 步數：安排歌星 chiūⁿ 電視節目、hām 電台 chhiâu 時間放送歌曲以外，有時陣 ē thiau-kang kā chi̍t-koá 步平看 bē-tio̍h ê 明星相片；聽 bē-tio̍h ê 明星消息放 hō· 媒體，來 lā 話頭，橫直 nā mài 做了 siuⁿ 過頭，去傷 tio̍h 明星 ê 形象，媒體 thàn-tio̍h 收視率，唱片商 thàn-tio̍h 免錢 ê 廣告，你好我 iā 好，ta̍k-ê lóng 歡喜。
明星 nā 是大身 koh 滾龍，chit-má tng 紅 hit 款--ê，chiah-ê 「假仙無張持 hông hip-tio̍h」 ê 相片 tō 有價數--ah，beh 先交 hō· toh-chi̍t 間 媒體，tio̍h 比看 siáⁿ 人 khah 敢 hoah 價，橫直 1 張幾 ā 百萬 ê 相片，對電視台來講，kan-taⁿ 是幾秒鐘 á ê 廣告收入 niā-tiāⁿ，nā khah 大間 ê 雜誌社，1 期雜誌 ê 廣告收入 tō m̄-nā--ah，m̄-chiah 媒體 lóng 真大手面。
因為 Lena chit 2 冬是 chhèng kah lia̍h bē-tiâu，chit 號生理 koh ke 真有利頭，hòng 兼 伊 24 點鐘有「柯氏走閃會社」負責出入，外口根本真 oh hip 有伊 ê 相，頂擺放--出-去 hit 張 Lena hām 大官虎 ê 後生做夥食飯 ê 相片，因為搶市，後--來起 kah 7 百萬才成交，chiah-ê 收入 lóng-chóng 是花枝--ê kap Lena 對分，唱片商因為驚紅牌歌星 m̄ 簽約，有 khah 輸勢，kan-taⁿ 出主意 thàn 宣傳 ê 利益 niā-tiāⁿ。
柯--ê 聽 tio̍h chit-ê 好 khang--ê，是 chhùi 笑目笑心頭起地動，伊一面 teh 想 時到 beh 按怎刁價，thang poé hō· lak-tē-á tīⁿ 飽飽，一面 teh 想 beh 按怎 koh ke lián--koá。
「花枝--ê，tō 看你 chiah 誠懇--ah，我有影無話講，有影是流行天后 ê 中人，有夠 a-sá-lih--ê-lah，是講 chit 張相片 ê 錢，Hoe-lê--ê hia iáu m̄ 知 beh the̍h 外 chē 走--leh，我看 kek-ke 是 thang tú 進前 ê 數(siàu) niā-tiāⁿ。」柯--ê sió 頓 teⁿ--chi̍t-ē 才 koh 講：「kám 講對 taⁿ 開始，chit 條生理你 beh 總 hō·我 baū--sìm？」柯--ê ná 講，ná 奸臣 á 笑，笑 kah 大腹肚桶 chùn--leh chùn--leh。
「Chháu！柯--ê，你 m̄-thang 軟塗深掘 你！Bóng gām 想--lah，lín 娘 lóng 免食飯--hioh！」花枝--ê 面 loa̍h--落-來，心內 teh 想 beh 按怎刣曲柴（thâi-khiau-chhâ）。
水晶對玻璃，柯--ê mā 知影有風 m̄-thang 駛盡帆，nā beh 刣，當然是 lia̍h hit 隻 Hoe-lê-á 來刣，伊心內早 tō 有 phah-tat--ah，kan-taⁿ 欠花枝--ê tìm 頭 niâ。
「花枝--ê，我 bē kap 你搶 hit 碗飯--lah，m̄-koh 你 nā 肯 kap 我合作，咱定著 ē-tàng 食 tio̍h koh khah phong-phài。」
花枝有 beh 聽，伊知影 chit-kho· Lena bē 一直 tī 台灣 chhèng--落-去，koh 伊按呢 新鞋踏倒蹬 (teⁿ)，用錢 ná 用水，出問題是緊 choa̍h 慢 ê 代誌，「chit-kho· 柯--ê bē 得失--得，」伊暗靜 (àm-chīⁿ) teh 想，「萬不二nā 伊 心肝 lia̍h 坦橫，Lena ê 演藝性命隨時 ē 結束，不如趁機會 hām 柯--ê saⁿ 擺撥 (pái-poah)，báu chi̍t-koá-á 米母 (bí-bú)。」
引用URL
http://cgi.blog.roodo.com/trackback/1638464
回應文章 
頭 1 段「taⁿ 看 thui 硬 á 有 khah 硬斗，隨看風駛帆。」，「thui 硬」kap「有 khah 硬斗」重 tha̍h，改做「chi̍t-ē 看有 khah 硬斗，隨看風駛帆。」
第 6 段「外口根底真 oh hip 有伊 ê 相」，「根底」是名詞，chia 用「根本」khah 好。
上尾段「萬不一 nā 伊 心肝 lia̍h 坦橫」，改做「萬不二 nā 伊 心肝 lia̍h 坦橫」，聽講「萬一」tō 是「萬不二」，無「萬不一」chit 號講法。
第 6 段「外口根底真 oh hip 有伊 ê 相」，「根底」是名詞，chia 用「根本」khah 好。
上尾段「萬不一 nā 伊 心肝 lia̍h 坦橫」，改做「萬不二 nā 伊 心肝 lia̍h 坦橫」，聽講「萬一」tō 是「萬不二」，無「萬不一」chit 號講法。
Posted by 刪正記錄 2006-06-06
at June 6,2006 15:50
![[Syndicate this site]](http://cdn.rimg.tw/images/blog/rss.gif "Syndicate RSS feed"){kind=small}
![[Syndicate this site]](http://cdn.rimg.tw/images/blog/atom.gif "Syndicate ATOM feed"){kind=small}
