June 3,2011 22:58

具體ê想法


接 suà 頭前 hit 篇文章,tann kā 一寡 hām 友志踮 facebook 討論 ê 內容整理 tī tsia。

第三波 ê 台語文運動,uì 1980 年代 kah tsit-má beh 30 冬--a,目今,根據調查,台灣國族認同已經超過 6 成(有 ê 調查甚至超過 7 成),毋過,台語文認同 kám 有一成???恐驚仔是無--neh!!!有恐怖--無!!!Tsit 个情況,對咱 kám 無啟示???若照現此時 ê 方式 koh 行--落-去,ē 活--bē???

逐个愛有心理準備,迎接(ngiâ-tsih)一个無台灣在地語言(Taiwanese languages) ê 台灣新國家!!!

台語 ē 滅無--去-bē?咱看客語按怎死,台語就有可能 ē 按怎死。歷史上,客語人口 mā bat 佔20% hiah 濟,今仔日--leh,kám 有 10%(我是講語言人口,毋是族群人口),客家少年人中間,kám 揣有一半有才調用客語開講、做演講 ê 人?我想是無--lah!李勤岸教授 bat 引文獻講:一个語言,若使用 ê 人口,無 kah 總人數 ê 75%,按呢,就會沓沓仔消風,直直死--去,一直 kah 規个滅無。 客語人口已經滅 kah 賰無一半--a,koh 來,ē 愈來愈緊爾爾。 Á 台語--leh,講一句較歹聽--ê,beh tī 台灣 ê 路--裡聽著少年人用台語開講,bē 輸罕得幾時尼姑做滿月--leh,張復聚醫師 ê 朋友親身來 tī 台北建國高中(台灣排名上懸 ê 高級中學),刁工踮大門口徛一點鐘久,觀察學生 ê 語言使用,結果,一點鐘中間,學生出出入入,teh 開講、討論 ê 真濟,毋過,內底 suah 聽無一句台語,全全華語!!!恁想,照 tsit 个 pān 勢,台語 kám 湠 ē 過二十冬? 毋才講,咱策略愛改,無--者,實在看袂著未來!


咱想看 māi,咱辦文學比賽,一般人毋知嘛毋 tshap,咱出冊,一般人毋賣嘛毋看,咱做台語認證,一般人毋考嘛毋 hiù!!!咱用 tsiah 濟資源,suah kap 一般人攏接 bē 著線!!!我咧想,咱應該愛先 kā 資源集中,先拚行銷!!!等一般人有認同,才來出冊、做考試認證、辦比賽,按呢,自然活水一直入--來,文化資本再生產 ê 形式才會建立,運動才會有氣力,路才行會久長!!!

過去有 ê 行銷手法,受著社會主流價值 ê 批評,親像『奇檬子』『只要是我喜歡,有什麼不可以!』,毋過,suah 變做少年人、新世代ê主流,結果大興! 咱若欲創造話題,上無,嘛愛得著某一个有影響力 ê 族群 ê 迴響(上好是少年人),若是,連少年人都無 beh hiù--咱 ê 時,有影失敗--ah,因為,正面 ê 論述差不多攏無湠去 kah 箍仔外,就準咱得著新聞焦點,毋過無佔著新領土(凡勢顛倒失去一寡舊領土)。 

另外,hit 款較新派、會吸引少年人、koh tsiok 龜怪,ē 引起媒體注意 ê 活動,親像:相連 suà「快閃」(flash mob),嘛是會當考慮--ê。 Beh 按怎「快閃」,親像蹛青紅燈 ê 路口跳熱舞,唱台語rap、攑牌仔等等(愛詼諧、愛親切、愛趣味),若一擺閣一擺發生,koh phoo 上 youtube,自然,就會引起風潮.....

另外,集合一陣人,做伙做一个 youtube 頻道,若有技術支援,hōo 影片 ê 品質 mài siuⁿ bái,內容 kap 台語有牽連,重點是:愛奇、愛怪、愛痟、愛『無釐頭』,愛做 kah hōo 少年人 ē 用 facebook 分享,用 email 傳 hōo 朋友看,若有法度,影片一支一支出--來,自然嘛會變做新聞。 總--講一句,若無夠奇怪、無夠離經,少年人就 bē 感覺 cool,少年人是無 teh 管啥物「大道理」--ê,in 就是愛心適、愛時行按呢,咱愛 uì tsit 个方向去想去做,才會有台語 ê 少年世代出--來,按呢做,嘛較贏辦演講比賽、影片比賽、寫作比賽.....(辦 hiah-ê siuⁿ 過正常 ê 比賽,媒體根本都毋報,一般人嘛罕得知影!) 

Tsiah-ê代誌,有值得咱用「經營一个刊物」ê 資源佮氣力來投入,只要咱創意 khah 贏--人,品質無輸--人(進前新聞報啥物 youtube 影片,攏 thang 做參考),絕對有才調殺出一條生路!!!較要緊--ê,是愛做予久長!!!(若有影做出一个勢面,凡勢就有尻川鬥柄--ê beh 贊助)

一來二去,咱需要「痟人」佮「鬼才」,來佮少年人 puâⁿ-nuá! Tsia-ê 代誌攏免開大條錢,咱需要--ê 是人,就親像我講--ê,一陣「痟人」kap「鬼才」,有才調得著少年人 kap 媒體 ê 注目,koh 有才調一直 kā tsit 个心適性延續--落-去,按呢,就有機會 tī 內底偷偷仔藏咱 beh 飼--in ê 資訊。 

愛偌龜怪,我 koh 舉一个例:咱若有法度揣十對翁仔某(佮男女朋友),輪流佇大城市 ê 車路口,趁紅燈 ê 時,徛 tī 斬木仔線(『斑馬線』)相攬相 tsim,另外有人攑大字牌仔,寫「台語你足媠,我「"愛"講台語!」,錄影,傳起 lih youtube,一个城市做了,換一个城市,影片小可後製,創予詼諧、痟痟,mài 正式、mài 講道理,按呢,絕對會真 tshìng! 或者是,做一支短片,用足詼諧 ê 方式,教人按怎 kap 台語 sio-tsim,親像兩个人 tak 喙鼓按呢。『台台親嘴指南』..... 

我 teh 想,若是我,我無愛 hit 款 tsiok 臨時、tsiok 凊彩 ê 方式,beh,咱就成立一个團體,而且爭取一个公司/基金會 ê 贊助,一月日或者是兩月日有一个活動/做一支影片,成本(包括工讀、企劃、後製),絕對 bē 超過編印一期台語文雜誌,按呢,做 ê 人 tsiah 做 ē 興、做 ē 久長。

咱需要網路、創意專業 ê 人,thang kā 咱講愛按怎做、設計,tsiah 較有機會大時行;咱需要一陣少年人,提供意見、做 in 發揮,咱事後,愛有制度來檢討,是按怎 tsit 个活動無夠出名,是按怎 tsit 支影片點閱率無夠 pān-phue ê 數額,是按怎媒體攏無反應..... 按呢,有目標、有制度來運作,若做半冬 koh 做袂起--來,咱就大檢討,規个收擔。

第二款會當做 ê 工課:有人氣 ê blog 或者是 content farm。 網路頂,攏有一寡 blog,流量驚死人濟,一工有幾若千人去看,親像:

http://yoko1978.pixnet.net/blog (tsiok 敢講、足詼諧)

嘛有彼款較嚴肅,毋過吸引濟濟固定讀者,一工嘛是成百成千ê點閱者ê blog,親像: 

http://sophist4ever.pixnet.net/blog
http://www.wretch.cc/blog/cliquer

我 teh 想:奇--ah!!!咱台語箍仔,包括少年--ê,敢無人有才調創出 tsit 款 ê blog?共筆(共同創作)嘛會使--ah! Tsit 號 blog 甚至用華語寫嘛無要緊,重要--ê 是,愛好看,毋管是足敢講 siânn 人來看,或者是足有內容會吸引少年學生,抑是講足濟實用資訊、好看 ê 圖等等(嘛會使結合youtube ê 影片工課),咱愛 kā 人氣衝 hōo tsiok 懸,了後,才 tsiok 有技巧 tik(親像蛇 hiah 活骨),kā 咱 beh 傳達 ê 資訊藏--入-去。 我嘛希望 tse 是有資源支持--ê,有人付稿費、版面設計費、維持費,相信一月日嘛用較無編印一期台語印物 ê 錢,毋過,若有影做有--起-來,就是上好 ê 武器!!! 等流量若到一定ê程度,才來做廣告(google adsense 等等),或者是置入性行銷攏 ē 用--得,時到,嘛會使資源獨立,做足久長。

執行面來講,咱 ê 人若歹勢做一寡奇奇怪怪 ê 活動或者是表演,無要緊,用工讀 ê 方式招人來做--ah!!!橫直咱 beh 愛--ê 是好 ê 成果/產品,而且,koh 較按怎開,嘛比辦一个比賽較俗,而且宣傳 ê 效果 koh-khah 大。 親像按呢,每一个想法,攏做企劃案,做專業評估、討論、修改,編大概 ê 預算、人力,去執行,了後檢討,做後一个案 ê 參考! Beh 做,一定愛先看人按怎做,是按怎 ē hiah 出名,了後,確定細節,sian 毋 thang hōo 影片內容變做 teh kā 人 khau 洗、或者是 teh 說教!!!無--者,就準出名,嘛會變負面效果!!! 咱一定愛 tsiok 奸巧、tsiok 有計智!!!

  • 您可能有興趣:

    創詞試看māi - cynic(al)
    lausenghian 發表於樂多回應(2)引用(0)語言編輯本文
    樂多分類:文字創作切換閱讀版型 │昨日人次:0 │累計人次:455

    引用URL

    http://cgi.blog.roodo.com/trackback/15756383

    回應文章

    Guá Play One.
    | 檢舉 | Posted by pektiong at June 4,2011 01:14

    Play One是啥?
    | 檢舉 | Posted by Taokara at June 4,2011 16:33