<< Hō-ló 正音 nò·-toh | 回blog首頁 | Chit 擺２２８，咱佇網路頂相牽！ >>

February 19,2006

干證大理概


書皮
頂禮拜 tī 冊店看 tio̍h chit 本冊，感覺真好玄（hòⁿ-hiân），soà 手 kā the̍h 起來掀，che 冊名真驚--人，m̄-koh 究真是 1 本歷史主題 ê 冊，2 ê 號做 Jean Strengers kap Anne Van Neck ê Belgien 歷史學者，chhoā 讀冊 ê 人 hoan 頭做夥看相連 soà 兩百冬 ê 1 ê 「社會現象」：對手淫 1 ê 咒讖 kap 驚惶。


讀 chit 本冊 ê 感覺，就親像看 tio̍h 另外 1 ê lia̍h 尪婆 2 ê 運動，人類 ê 理性到底有外 koân、智慧有外深，讀 leh 讀 leh，有影 ē 袂克得 beh 僥疑 (giâu-gî)。


Hām「lia̍h 尪婆運動」 比--起來，對 手淫 ê 非理性 lún-neh 3 ，的實 (tek-si̍t) koh-khah hàm；lia̍h 尪婆 koh thang 講是基督教會起氣 4了後煽動--ê，nā 人類社會對手淫 ê 誹謗 kap 驚惶，根本是宗教、科學、政治界 lóng-chóng kēng-sio-oá ê 大運動。


冊 chi̍t 起 khiàn 有 chē-chē 專家學者做干證 (kan-chèng) 講手淫ē 按怎 kā 健康 chè-thoah、ē 按怎害人短命，講講歸大堆，你 nā tī hit-ê 時代，是信 ia̍h m̄ 信？Tú-tng kui-ê 社會 lóng 起狂，kā 1 件代誌講 kah 生真活掠 (chheⁿ-chin oa̍h-lia̍h) ê 時，hiah-ê 「干證」，kám iáu ē 有機會做理性 ê 分拆？


Che tō 是「干證」ê 本質 kám m̄ 是--leh？講 khah 遠--leh，哲學上有討論講「tio̍h-ài 有外 chē 例 chiah 有夠信憑講 1 件代誌是真--ê」，kāng 款道理，tng lán 聽 tio̍h 教會、廟寺、宗教團體等等 chiâⁿ 熱性 kā lán 做干證，講 in 中間發生按怎 tú 按怎 巧奇（khá-kî）ê 代誌 ê 時陣，請永遠 ē 記得 1862 年法國 Dupanloup 主教 tī 1 本講教育 ê 冊內底做 ê 干證：


「我有 bat 看過 1 ê hō· chit 款惡質（手淫）侵入 ê 學校，hit-ê 校長有接受我 ê 建議，kā 69 ê (手淫) gín-á 黜學 (lut-ha̍k)。I 按呢做有救 i ê 學校。Taⁿ hit-ê 學校已經 chiâⁿ-chò 法國上 chē 學生 兼 上 kài 興旺 ê 學校內底 ê 1 間--ah！」


Chit-ê 干證看--起-來是 m̄ 是真有說服力--leh？

1 Masturbate tī Hō-ló 內底上 chia̍p 講做「phah 手銃」，mā 有 khah 孽--ê thiau-kang kā 號做「5 ê 扑 1 ê 」、「chiⁿ 豆奶」kap 「liù lān」--ê，總--是 chiah-ê 講法 lóng khah 合 tī cha-po·，nā chit 本冊 ê 討論並無男女 ê 制限，chhoē 過來 chhoē 過去，mā kan-taⁿ thang 用「手淫」來表示。chit-ê 詞華語 kap 日語 lóng 有，欠點是詞本身有 bái ê 價值判斷 tī 內底。


2 華語講巫婆。


3 懍懾；華語講恐慌。


4 華語講得勢。

Posted by lausenghian at 樂多Roodo! │00:19 │回應(1) │引用(1) │罔話
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/1141280
引用列表:
Taokara的《雙倒水別莊（新）》，今仔日有出一篇《干證大理概》，當中有講著一寡lio̍h-á 咔臊（chho）、 咔薟（hiam
「茄」佮「蟯」【鹭水芗南-闽南语部落】 at February 19,2006 23:45
回應文章
走去 chhoē 英文 Wikipedia ê "masturbation"，想 beh 看內底字源（Etymology） ê 解說，chín khó·-pih tī 下跤 hō· 大家參考：

The word masturbation is believed by many to derive from the Greek word mezea (μεζεα, "penises") and the Latin turbare ("to disturb"). A competing etymology based on the Latin manu stuprare ("to defile with the hand") is said by the Oxford English Dictionary to be an "old conjecture". The esoteric and little-used synonym manustupration is similarly derived from manus stuprare.

照按呢來看，英文 ê "masturbate / masturbation" 字源 tō 是對「男性」ê 行放做根頭--ê，講--起-來，nā mài chhap 上蓋原底 ê 意思，「扑手銃」kap「liù-lān」mā ē-sái 用來做 khah 大 ê 使用。(masturbate 窮實意思 tō 是 liù-lān...)
Posted by Taokara at February 19,2006 12:11
  


回最上方