<< 台北車頭附近 | 回blog首頁 | 月娘 - 台南車頭 >>

October 4,2009

台灣人ê中秋


中秋，是 1 个國際性 ê 節日，包括：韓國、越南、台灣、中國攏有 teh 做，聽講日本有 tsi̍t 寡所在嘛過中秋，毋過，過中秋好親像毋是 tsîng-kah-tann 台灣人ê共同記憶，比論：昨昏佇 2009 台語詩人大會台南場，就聽著作家陳明仁講伊毋知中秋 kap 台灣人有啥關係。


暗時轉台北了後，tsiah 聽著阮爸 kā 阮講伊做囡仔 ê 時，中秋是食麻糬 kap 芋粿 khiau（阮爸是民雄人），換話來講，tann 咱四常看--著 ê 月餅，真有可能是二次大戰了後 ê 文化輸入，是中國國民黨欲 kā 台灣文化中國化 ê 影響之一，犯勢根本毋是咱台灣人自本ê風俗！（我 tsit-ê 講法有問題，多謝玉君指正，請參考本文 ē-kha ê 回應）


我 tsa 昏有食著 1 塊麻糬，按算 tse 了後 ê 中秋節，無欲 koh 刁工綴人食月餅，毋過欲刁持食麻糬 kap 芋粿 khiau 來慶祝，慶祝咱台灣 ê 中秋節。


Posted by lausenghian at 樂多Roodo! │16:08 │回應(7) │引用(0) │文化
樂多分類：文字創作 工具：編輯本文
Ads by Roodo! 

引用URL

http://cgi.blog.roodo.com/trackback/10176955
回應文章

但是月餅是清朝的台灣地方志就有記載的風俗。我臆平常人無呷是因為這需要較幼的手路佮技術，而且閣愛落重本款材料，毋是一般人佇厝內會家已做的呷物。而且肉餅攏是買來送人，家已人過節就呷麻糬就好矣。
Posted by 轉貼Arkun ê補充 at October 4,2009 16:28

施俊州
Taokara káⁿ ē 是「番」?


Seng-hian Lau
M̄ 知--neh，民雄 hia 古早是平埔 Hoanya ê 打貓社，若 Hoanya 是上早漢化 ê 平埔原住民之一，日本人來 ê 時，Hoanya 就已經 beh 無--去-a，所以欲稽考阮兜 ê 血統，實在真 oh....恐驚仔連調日本時代 ê 家甲簿仔嘛無才調揣著線索。


Yujun Yang
民雄人呷麻糬閣有一个民俗的傳說，說是欲予土地公粘嘴鬚。


Seng-hian Lau
玉君，是按呢--ooh，我無聽--過，敢會使加講--寡，毋閣，阮莊--裡是真信土地公--ê，阮 ê 土地公，毋是一般 ê「福德」，是「山神土地公」，阮阿嬸講，土地公會來巡莊，行過 ê 時，會 khi-khok khi-khok 出聲，koh 有 1 葩紅紅 ê 土地公火....ah，這實在足心適，我以後一定欲 kā 寫--出-來。另外，土地公火有 koh-khah 大港--ê，是暗時規个衝去 lih 天--ni̍h，紅 huánn-huánn 足光足光，阮二叔細漢顧牛睏外口，攏有看--見。


Yujun Yang
但是月餅是清朝的台灣地方志就有記載的風俗。我臆平常人無呷是因為這需要較幼的手路佮技術，而且閣愛落重本款材料，毋是一般人佇厝內會家已做的呷物。而且肉餅攏是買來送人，家已人過節就呷麻糬就好矣。


Seng-hian Lau
多謝玉君補充！ ^^


王昭華
我有印象！中秋節阮阿媽嘛會買麻糬(菜市仔有賣)，毋是像這馬一細塊一塊細的，是一大袋、一大碗公，欲食才攑箸挖，若咧挖麥芽膏安呢，一丸白白黏佇箸，才kō白糖粉佮土豆粉。我嘛感覺足奇怪，是安怎中秋節愛食麻糬，敢是佮月宮的兔仔樁米有關係？


Seng-hian Lau
阮爸昨暗 koh 有講：食麻糬 ê 原因，是因為月娘內底 hit 隻玉兔，就是 teh tsing 麻糬--lah！ XD


Yujun Yang
中秋个月餅佇台灣文獻叢刊頂面就會當揣著真濟。若講起土地公火，自明朝時就定定佇小說內面讀著，譬論講散赤的秀才對土地公廟前經過，有人看著土地公火兩葩出來給送，就知影即人後擺會中狀元。
你是民雄佗一莊？


Yujun Yang
我第一擺聽學生講月娘頂面个兔子leh摏麻糬，差一點仔昏倒。叫是是彼支ＸＸ麻糬的廣告影響少年人的想法，後來才知影原來在地確實有即種講法。


Seng-hian Lau
東湖仔松仔跤（松仔腳）。土地公火佇阮遐毋是小說--喔，是實拄實ê代誌...
Posted by 轉貼討論 at October 4,2009 16:37

王昭華
恁遐的土地公，有可能是外星人喔...

Yujun Yang
東湖仔松仔跤我知影，騎車時會經過。但是只注意過蘇府王爺廟，猶未看過土地公廟。

Yujun Yang
即陣黑陰黑陰，若無實在應該出來騎車，揣看覓仔今年有幾支土地公枴，看土地公廟內底有人拜麻糬否。

＝＝＝＝
Seng-hian Lau
昭華姊--a，你 ê 想法 kap 我初初聽著 tsit-ê 代誌 ê 時相仝 XD

土地公廟 tī leh 細條路內底，小小 1 間廟，除了祖厝內底 ê 觀音佛祖以外，就是山神土地公，kap 出大埕了後車路邊 ê 戴代王公（一般講就是戴潮春），若蘇府王爺阮無去拜。
＝＝＝＝

Yujun Yang
啊，我記毋著矣，我會經過彼間廟就是戴代王公無毋著。
Posted by 轉貼討論 at October 4,2009 16:43

Seng-hian Lau
昭華講了正確！麻糬就是按呢挖來食--ê，毋是做好勢 1 塊 1 塊--ê。 ^^
Posted by 轉貼討論 at October 4,2009 16:51

Yujun Yang
為著欲＂建立台灣的主體性＂，我以早嘛定定攏會kah部分的風俗認定是台灣特有的，毋是中國傳來的。但是看的冊愈濟，加上去過中國幾若擺，我的假設一一證明是錯誤的。彼陣實在真失志。即馬若有人問我啥乜中秋風俗是台灣家已發展出來的，恐怕只賰＂烘肉＂即項矣。


Seng-hian Lau
XD 玉君按呢講真有意思....
Posted by 轉貼討論 at October 4,2009 17:01

Tong-Bok Ngo
我是感覺講,毋通因為按呢著來失志啦,有一位較倚台獨的法國漢學家對我講過,美國仔講英語, 但是敢有人會承認家己毋是American? 佇Belgium,逐家嘛佇學法國文學,讀Dumas, père,嘛無人會認為家己是法國人.政治共文化本來著是兩回事啦!


Seng-hian Lau
東牧兄，失志是無，是講，上好文化頂懸，會當做中心，親像美國按呢，雖罔是新國家，毋過變做Anglo-Saxon ê文化中心，按呢較會當確保本身ê主權。
台灣若會當做 Pan Souther Min ê文化中心，是真好！
是講，中國彼爿敢有人中秋食麻糬，請教玉君！！！


Yujun Yang
政治共文化是兩回事這我嘛知影，只是有真濟人頭殼無清楚，所以才會一直想辦法欲揣一个說法來教育人。

福建人嘛呷麻糬，這是我確定知影的。但是敢有佇中秋特別呷麻糬的風俗，我愛閣查看覓。


Seng-hian Lau
日本人嘛食麻糬，日語講「moti」（もち），雖然in ê麻糬佮咱--ê食法無仝，毋閣呼音真 sio-siâng，做法嘛相倚。In是過年ê時陣食，別ê時間敢有食，我毋知。
Posted by 轉貼討論 at October 4,2009 21:32

Yujun Yang
目前查會著的是浙江有真濟所在佇中秋呷麻糬
http://www.19lou.com/forum-1566-thread-17606137-1-1.html
http://blog.19lou.com/10450620/viewspace-1580670
Posted by 轉貼討論 at October 5,2009 12:02
  


回最上方