December 20,2016

免錢ê禮物

你講欲佮我交換禮物
Lak袋仔貯磅子,袂做得禮物
你講禮物愛看誠心
上好ê禮物—免錢
免錢ê禮物,有當時仔上貴氣

十二月二四平安暝
公園闊莽莽ê草埔
你叫我著面向下跤
仆蹛塗跤
地球就是你欲予我ê禮物
我跤手開開,攬甲絚絚絚
這个禮物太近毋過太重
我抱伊袂贏
換我吩咐你面向頭頂
倒予坦笑
天就是我欲予你ê禮物
你愛目睭擘金,看予足真足真
這个禮物太遠又閣真輕
你手摸伊袂著

好佳哉咱ê禮物
佇天際線相交phuáh
上重佮上輕
上近佮上遠ê兩項禮物
咱ê手嘛佇天際線相交phuáh
咱攏有上好ê聖誕禮物

lausenghian發表於 樂多16:18回應(0)引用(0)文學 │標籤:聖誕節,禮物,

November 29,2016

問詩


寫詩若是無病咧假佯哼呻
幸福ê人kám假了會成
若毋是正經疼甲到角
詩句kám會hiah鑿--人

寫詩若是破病艱苦哀出聲
康健ê人kám掠會著hit款心情 (tsiânn)
Kám講著愛孤老敏感
詩句tsiah會kâng唌

人愛甲熱phut-phut
詩神就來做菁仔欉
就是愛揣人ê心碎鹽鹽
伊tiang時tsiah學會曉得定

假使寫詩著愛和詩神盤撋
詩ê內底
覕--ê到底是tsiâ

lausenghian發表於 樂多20:35回應(0)引用(0)文學

November 22,2016

阿莉思佇怪奇地的冒險(第一章一部份)

阿莉思佇怪奇地的冒險
Lewis Carroll; John Tenniel 原著
第一章:跋落兔仔空
[紅字的部份是尾仔有參考足英台小組討論做修改的部份,錄音就無閣照咧重錄矣]

佇溪仔邊坐踮怹阿姊邊仔,阿莉思強強欲感覺siān矣,閣無代誌做:有一半擺仔伊去偷siam怹姊仔咧讀的冊,都無看著頂懸有圖抑是對話,「無敆圖抑是對話的冊是有啥路用?」阿莉思按呢想。

毋才伊家己佇心內考慮(熱天予伊愛睏閣戇神戇神,總是伊有儘量咧想)做雛菊(tshu-kiok)花環的快樂敢有值得伊peh起身去挽花,才咧想爾爾,無張持有一隻目睭粉紅仔色的白兔仔倚過來。
這嘛無算真特別的代誌,就準阿莉思聽著兔仔家己對家己講「阿娘喂!我咧欲袂赴矣!」的時,嘛無想講這有偌離經(後來伊想著,是有感覺彼陣愛真著驚才著,毋過當當彼時都也感覺蓋正常),是兔仔對伊䘥仔的橐袋仔撏一粒錶仔出來看,了後趕咧lōng,阿莉思才雄雄想講伊自來毋捌看兔仔穿掛橐袋仔的䘥仔,閣對內底撏錶仔,自按呢好玄甲欲害,徛起來,綴兔仔tshuànn過曠埔,拄拄好會赴看著伊跳落去籬仔下跤的一个大空兔仔空。

阿莉思嘛跳落去,攏無小考慮講伊是欲按怎有才調閣對彼內底出來。

兔仔空入去直挵挵有親像塗壙空(thôo-khòng-khang),了後規个削直落去,這个變化太雄狂,毋才阿莉思佇落落去袂輸無底深坑進前全無時間想講愛擋恬。毋知是這个深坑有影足深,抑是伊落著蓋慢,伊佇落落去這中間有真濟時間看四箍輾轉,想看紲落來會發生啥物代誌。頭起先,伊有向落去看覓,想欲知影落去有啥物,總是太烏佇咧攏看無物件,了後伊就看這深坑的四爿邊,注意著規个攏有鬥櫉仔佮冊架仔佇咧,一四界看會著地圖佮圖掛佇壁杙。伊經過一个架仔的時對頂懸提一罐物件落來,罐仔的貼紙寫講「柳丁醬」,結果內底空空予伊真失望。伊無愛共這个罐仔擲落去,驚會摃死下跤的啥人,只好共下入去伊經過的一个櫉仔。

「按呢honnh!」阿莉思家己佇心內想,「像按呢落落去一擺了後,我定著會感覺對樓梯輾落來根本無算啥!等我若轉去,怹毋就會感覺我有夠勇敢的勇敢!按怎講咧,就準我對厝尾頂跋落來(這是真有可能的),我嘛袂提來講予人聽!」

直直落落去,直直落落去,直直落落去。這款落法敢攏無出尾的時?「到這陣我毋知跋落幾英哩深矣?」伊大聲講。「我定著是來佇真倚地球中心的所在矣。我看覓一下:按呢就是四千英哩落來,我想是按呢--」(咱看會出來阿莉思佇教室上課有學一寡仔這款的物件,雖罔無人咧聽,所以講這陣都毋是展伊的智識的流擺,總是講出來餾一下嘛是袂䆀)「--著,彼个距離是有正確佇咧--毋過我嘛是會想欲知影我這陣是到啥物經度抑緯度矣?」(阿莉思對經度抑是緯度無啥概念,總是共掠做排祉的字詞咧講。)

無偌久伊閣講:「毋知我會跋迵過規粒地球袂!設使我對頭向下面咧行路的人陣中央飛出來,彼會偌仔爾仔心適啊!我想講這號做「礙逆」--「(伊嶄然仔歡喜這陣無人咧聽,因為這字聽起來都無啥對同)」--毋過我應該愛問怹彼个國家的名是啥honnh。阿姆,歹勢,遮是Niu-jí-lán抑是澳洲?(伊那講那想辦法行禮--佇半簾懸咧跋落去閣想欲跍跤行禮!你想敢做會到?)「伊會共我看做一个偌仔爾仔毋捌代誌的查某囡仔啊!袂用得,用問的無效,無的確我會看著佗位有寫咧。」

直直落落去,直直落落去,直直落落去。無別項代誌通好做矣,毋才阿莉思無偌久閣開始講:「娜下昏暗會足心悶我,我應該想著這點的!」(娜是貓仔)「我希望怹佇伊三點茶的時會記得伊的牛奶碟仔。娜,心愛的,我希望你有綴我落來遮!恐驚仔半空中是無鳥鼠仔,毋過你凡勢會掠著密婆啊,密婆真成鳥鼠仔honnh。是講毋知貓仔敢有咧食密婆?」到遮來阿莉思開始變甲足愛睏,伊閣對家己講落去,親像咧陷眠:「貓仔敢有咧食密婆?貓仔敢有咧食密婆?」有時仔講做:「密婆敢有咧食貓仔?」就是因為不管佗一个問題伊攏無法度回答,伊欲按怎問就無遐要緊矣。伊感覺伊咧啄龜,嘛拄開始咧眠夢,夢見伊佮娜手牽手咧行,閣足慎重對娜講:「Tann,娜,講正經的:你捌食密婆無?」無張持,Phóng!Phóng!伊落佇一堆樹椏佮焦葉仔頂,無閣跋落去矣。

lausenghian發表於 樂多10:44回應(1)引用(0)文學 │標籤:台語,翻譯,愛莉絲夢遊仙境

August 8,2016

August 3,2016

July 26,2016

July 21,2016

October 10,2015

《Tshi-bá-gōo醫生》(『齊瓦哥醫生』)第一節試譯


(對 藍英年、谷羽翻譯的中文版第一節 翻做台文)

送上山頭的人陣規路那唱《安魂曲》那行。就準人陣擋恬,怹的跤步、馬蹄佮風聲嘛袂輸猶原咧唱《安魂曲》。

路裡的人讓路予送山的人,嘛數(siàu)算怹的花箍,並且佇邊仔拍十字。好玄的人kheh入去人陣裡,問講:「是啥人欲落土?」怹得著的回答是:「Zhivago。」「就是按呢喔。按呢阮知。」「毋是老爺,是夫人。」「攏相仝啦。希望伊較緊升入去天堂。這喪禮有影有夠排祉的啦。」

送出山的人陣上尾仔干焦影一下,就去到頭前看袂著去矣。獨獨聽見「主的土地、宇宙和宇宙中的所有生靈」的歌聲。神父那拍十字那向Maria Nikolaevnah的身軀頂掖塗。逐家開始唱〈虔誠的靈魂〉。

紲落來就不止仔無閒矣。棺材蓋崁起去,用釘仔釘予牢,下入去墓壙。四枝塗鍘(thôo-tshiah)緊猛向墓壙掖黃塗沙,塗落落去的聲就若親像疏閬疏閬的雨落佇地上。目一下nih一門新墓膨起來矣。一个十歲的查埔囡仔peh上墓龜。

送山的人陣沓沓仔四散,人定定會有一種麻痺的感覺,這个時陣peh上老母墓龜的查埔囡仔有話欲講。

伊頭擔起來,目睭看著茫茫渺渺,對墓龜向曠闊的秋天空埔佮修道院的圓拱頂nih-nih看。掛一支啄鼻仔的面變形矣。頷頸伸長矣。若是野狼親像伊按呢,就是即時欲喉叫矣。查埔囡仔雙手共面掩咧,開聲吼。對面飛來的雲將冷吱吱的雨點掖踮伊的手佮面。一个穿拍襉束䘼烏教袍(phàu)的人行來墓前。這个人是死者的兄弟,是這个哭甲足悽慘的查埔囡仔的阿舅──還俗的神父Nikolay Nikolayevich Vedenyapin。伊行去查埔囡仔的頭前,共伊tshuā走。

lausenghian發表於 樂多11:41回應(0)引用(0)文學 │標籤:齊瓦哥醫生,zhivago

September 8,2015

有路用tsiah thang講


若講著「歹睏」tsit个症頭-對我來講tse是久年病,所擺我是蓋有經驗--ah。Tsit个歹睏--leh,毋是睏袂去,是睏ka-tsuē了後會因為tshiah-ia̍h直直精神,一瞑醒欲數十擺,有影予人tsàn袂牢,啊閣較害ê是:愛睏藥仔kah尾--à煞袂行氣,就是按呢,醫生講欲停藥,我嘛據在伊停,橫直to也無較縒!

歹睏欲按怎?自按呢我一直咧揣打揲ê法度,揣a̍h揣,tsit幾若月日,我咧試靜坐。
...繼續閱讀

lausenghian發表於 樂多15:14回應(0)引用(0)罔話

August 1,2015

若是按怎拄按怎,啥人會想欲...



自來若講著娼妓ê問題,抑是性產業合法化,就會聽著一款講法,號做:「咱呔會無愛予怹有另外ê頭路thang做?若是怹有選擇,啥人會想欲賣肉--leh?」Tsia-ê話,佇無偌久進前,閣佇一齣電視連續劇ê廣告內底聽--著。

就是今仔日無張持去想著tsia-ê話其實怪怪,毋才會來寫tsit篇。毋過,欲講我感覺tse話佗位怪進前,希望逐家愛先有寡背景智識,關係「性產業合法化」佮「性工作者ê工作權佮保障」,tse是真有學問佇--leh-ê,若無經過較深ê討論佮思考,獨獨用直覺咧huâ算,較ke嘛是tsia一空、hia一空,問題了了,也tsit篇無拍算欲餾tsia-ê舊議題,有興趣ê人會用得家己揣資料來消化。
...繼續閱讀

lausenghian發表於 樂多13:29回應(0)引用(0)哲學

April 16,2015

麵豬蚵靠



「麵豬蚵靠」毋是夜市仔內底ê點心,嘛毋是啥mih新ê料理,伊是一款生活方式,這个生活方式是有一个號做「態度」ê老母。

有人掠做「麵豬蚵靠」是在佇人ê精光tòng戇,我咧看to也毋是;「麵豬蚵靠」ê人無必然就無夠巧,「麵豬蚵靠」內底雖罔有手面趁食、出力咧換羹頓--ê,毋過檢采坐辦公桌仔,看著真gâu激頭殼ê人閣較濟。

咱講「麵豬蚵靠」毋是戇,論真是「無要無緊」怹後生,「無要無緊」這款態度生tsia-ê囝,精神ê時就是親像干樂按呢戇戇仔踅,就準怹踅ê姿勢無仝,「食飯」踅、「作穡」踅、「便所」踅、「運動」踅、「sē神仔」踅...橫直tse踅--ê是一粒柴箍,內底種著「無要無緊」ê基因。

毋才會看日頭對窗仔門tshiō甲規間便所光iāⁿ-iāⁿ,嘛袂想beh紲手將電火禁予hua;聽人提醒講較停仔愛注意啥貨,柴頭無耳袂曉聽;小可正經--ê、有關大多數人ê議題,怹慣勢目睭放瞌;hām怹個人倚身較無底代--ê,計當做無khuàiⁿ。

若拄著這款因為「無要無緊」紲變做「無感無覺」ê人,心內頭一个浮--出-來ê印象就是:「Aih,麵豬蚵靠!」

總--是有一項咱sian毋通誤會:一寡活著拘束、見古ê人,不時要意愛遵趁he、愛細膩tse,人起一个攔頭,伊就緊咧夯旗軍仔,款勸人愛做好,毋過是按怎號做好伊講無路來;苦勸人毋好做歹,問伊這是佗位咧bái伊煞gâi-gâi;tse算是「麵豬蚵靠」ê變種,因為怹行做tsām-gâm、可惜心肝放放,親像欲死袂活按呢,論真,是規身軀死giān-giān較好,a̍h是做有身無魂ê僵屍較贏--leh?

Thài-thó欲問按呢?好好仔人毋做,欲予「麵豬蚵靠」!

lausenghian發表於 樂多08:12回應(0)引用(0)罔話

February 6,2015

阿媽tsài-tsián


























劉賴柔(1920年10月14 ~ 2015年1月20)
這篇是2月11告別式欲唸ê奠文(祭文)初稿

阿媽,這个時陣是你平常時仔睏晝的時間,你欲離開進前彼幾若月日,定定坐咧就目睭瞌瞌咧歇睏,毋知阮按呢吵吵鬧鬧,會害你無眠袂。 是講,阮知影你袂對阮歹面腔,因為自來阮毋捌聽你共阮做孫仔的歹喙過,你攏是用唸的,一直講一直講,有機會就共阮講了閣再講,講甲阮會驚會畏。若翻頭斟酌共想起來,你上有氣口的時,就是佇阮話捎咧烏白練的時陣,你會對阮喝(hat)彼句:「捾一支喙!」抾起這,你就無別款罵人的話矣。

按呢共想起來,阿媽你有影足有氣質,性地足好,細漢阿叔講,你佇覆鼎金做囡仔的時,阿祖就真惜你,是阿祖个糖霜丸仔。是講,予人惜命命的查某囡仔,若佇現今的社會,加加減減會去帶著「公主病」,毋過阿媽你若是公主,定著是全世界上骨力的公主,毋但佇田裡共阿公鬥作穡,閒冬時仔閣去做散工趁外路仔共厝內鬥相添。
...繼續閱讀

February 3,2015

敢袂足奇怪-?

【翻譯D. H. Lawrence ê詩〈Won't It Be Strange-?〉】

敢袂足奇怪?Tng-tong護士將拄出世ê紅嬰仔抱來
hō͘榮影ê老爸,hō͘伊看嬰仔he細細个仔、有網仔花草、青青ê跤
tse跤是beh出力kò尻脊後ê水--ê
a̍h是hō͘伊看hit蕊屬tī野鵝仔gîn-òⁿ-òⁿ、圓lìn-lìn、帶野性、活跳跳ê目睭
uì無盡尾ê天kap海看倒出--來
或者是tng-tong伊háu一聲殺膽ê細聲鳥仔聲
tse聲是屬tī徛起蹛冰山,一下叫會傳去kah Nile河hit爿岸--ê-

Tng-tong做老爸--ê講:Tse to毋是我ê!
某--à,你是tuì佗生tsit隻怪物仔--出-來-ê?-
仝時天頂敢會有撇翼ê風聲,掛一港冷風吹--來?
敢會he飛kah懸懸懸看攏袂著ê天鵝叫歌
鑿破伊ê耳鏡?
啊伊自按呢著直直聽hit个回答永世代無煞

lausenghian發表於 樂多13:44回應(0)引用(0)文學

December 25,2014

反年歲主義


無照恁設想咧穿插
無照恁設想來生活

因為年歲毋是我ê框殼
我無做伊ê監囚
年歲是我ê跤踏
是性命ê跤路頂懸
伐--過-ê
He一塊一塊tsū路ê石枋仔
抾去tsia
伊啥míh to毋是

就是tsit條性命有伊ê主人家
伊主心定無要意he庸庸(iông-iông)--ê是按怎咧過
Kuàn-thài怹ê逐个十冬
阮無拍算beh tshāi路關牌
據在伊三--冬五--冬
嘛毋免走揣參考點
囡仔時代ê純真
做人豚仔ê理想
以外
我心內無別條貫串ê路線

無照恁設想咧穿插
無照恁設想來生活

因為年歲毋是我ê框殼
面容、心tsiâⁿ佮價值觀
Tsiâu無做伊ê監囚
年歲是我ê跤踏
是性命ê跤路頂懸
伐--過-ê
He一塊一塊tsū路ê石枋仔
頭前hit塊
參頭起先hit一塊
做恁佇我身軀頂畫痕
總--是我,會猶原是我

lausenghian發表於 樂多13:15回應(0)引用(0)心內話 │標籤:新詩,,台語,母語,台語詩,ageism,母語詩

December 11,2014

鄭兒玉牧師轉--去-ah






















以早teh整理《教會公報》ê語料ê時,bat看著鄭兒玉牧師ê作品,hit款感覺真奇,因為tse白話字ê文獻,作者差不多lóng無tī世間--ah,m̄-koh上無,lán知鄭牧師iáu tī--leh,伊少年ê時寫ê白話字ê文章,lán看ē著,mā bat親目睭看見伊本人。 

鄭牧師今仔日beh暗仔轉--去-ah,無koh kap lán做伙--ah,koh來,我就m̄知讀著白話字文獻ê時,有佗一位作者是kah taⁿ猶原在生--ê-ah。

希望你安歇,鄭牧師;我真愛〈台灣翠青〉你替蕭泰然ê曲填ê詞,he是我心目中正港lán ê國歌。

lausenghian發表於 樂多20:27回應(0)引用(0)心內話

November 1,2014

翻點ê挐絮話(jû-sù-uē)

                          聽 錄 音 檔
翻點ê暝
暗靜仔盤過窗仔口
巷路ê燈
偷偷仔探頭siam--咱
你睏交睡--ah,心肝--ê
我對跤脊後攬--你
手siâm佇你ê頷頸
兩尾捅鬚袂定著ê蛇

熱--人ê暗暝
冷凊軁過心肝íⁿ仔
巷路ê電報柱
徛直thuh佇烏sìm-sìm ê天
是烏絨幼仔罩罞
我偌爾仔sannh心
燒氣激酒  落帶hiàn个雨
頭殼內有一塊冰角
Hah燒了後  水直直津

對你ê愛情
自頭殼碗斟入去血筋
沓沓仔注去到規身軀
毛管空湠澹
起交懍恂
倚--你
欲閣較倚--你
一直到咱ê距離
著用負數siàu算為止

我袂賭強硬愛欲共暝留--咧
橫直暗暝ê河溪是你目睭ê監囚
我會tshuànn過in去拜訪逐粒星
閣再講
你若精神伸圇  喙角tshìng懸
日頭是欲按怎袂予hiàu上天--咧

翻點ê暝
愛情幔雞母皮
毛管ê毛(mn̂g)
袂咬根探頭tsīnn--你
你睏交睡--ah,心肝--ê
你ê毛管含牢牢--ê
是袂定著ê蛇無siàu算
你敢是咧欲精神--ah
你精神ê時
天就會光
你精神ê時
日頭欲著急peh上圓車車ê山崙
你快精神--lah
心愛--ê

lausenghian發表於 樂多18:36回應(0)引用(0)文學 │標籤:,台語,poem,母語,台語詩,poetry,taiwanese

October 11,2014

補搭



「將活物創予死,心內會躊躇、會艱苦袂?有人連挼死一隻狗蟻都會毋甘,有人咧,逐工刣豬刣牛,煞攏無tsùn-būn著,啊若刣人,是天理不容个,抾起受訓練殺敵个兵仔,刣人刣著蔥脆閣紲手个,頭殼定著有問題。」希峇麗徛佇警衛隊總部任務中心上頭前,共伊个隊員按呢講。

希峇麗是警衛隊頭一个查某隊長,三十歲彼跤兜,伊差不多逐工咧刣人,毋過伊佮伊个警衛隊員有揀人刣,較簡省講,就是「加圇人」才是正港个人,怹袂去kāng伊,啊若是「破扑人」,彼是有人形爾爾,刣怹是親像清潔隊員清糞埽、執行任務、拄好爾爾;論真講,這个進步个時代,有破扑个人攏是遐个赤跤羅漢、流民十一哥,怹是「問題」,需要「結果擲拺」。

「破扑人毋是人,怹是咱人類个渣滓!咱刣怹,毋是咧刣人,是咧救世!」希峇麗講上尾這幾句話个時,目睭攏無轉睔,逐字攏出力帶重聲,親像撼仔摃釘仔撼著猛力閣對點。

日頭懸山,破扑人欲來矣,怹日時覕佇境界外、曠野裡暗糝个所在,等城市幔暗暝个烏衫,怹就會暗靜仔走入來覓食个,破扑人是世界逐所在共同个大問題,根據市政府个統計,怹對治安佮衛生攏造成真大个威脅,毋才政府會佇警察以外,另外成立警衛隊,專門負責暗暝巡邏,若看著破扑人,免躊躇,開銃就共彈死,了後通知清潔隊來處理身屍。

彼一暗,怹佇市中心發現一个烏影,叫伊擋括煞直直走,怹逐去甲一條無尾巷,逼來佇壁角,有影是一个破扑人,希峇麗銃攑咧相準,伊開銃个時目睭連nih一下都無,銃機仔拄tiau落去爾爾,破扑人雄雄喝一聲「希峇麗!」希峇麗掣一趒,自按呢愣去,毋過銃子隨貫過破扑人个頭額,另外一銃是伊个隊員開个,佇倒爿胸坎心臟遐一空對對,這个破扑人目睭無瞌,直直相希峇麗,了後蝹落塗跤,「伊汰會知影我个名?」希峇麗都猶咧睡神咧,伊个隊員已經咧連絡清潔隊通報位置矣。
...繼續閱讀

August 18,2014

做伴



咱揀這條較無人行ê路
暗靜仔行
當原初咱窮實心內驚驚
跤步ná伐

路kám有出尾ê時
牽著a̋n-ân ê手
kám會終其尾放--開
心kám袂gâu僥蟶
煦著燒hut-hut ê身軀
kám袂落尾手tshìng消

咱揀這條較無人行ê路
勻勻仔行
越頭已經看無起行ê位仔
頭前猶閣迵去kah天際線

用手牽做一个圓箍無盡尾
相攬迒過兩條身魂ê閬縫
咱揀這條較無人行ê路
寬寬仔行
咱猶原欲行
咱猶原咧行

August 15,2014

騎跤踏車


下跤tsit捾lò-lò長毋是用寫詩ê心情來寫--ê,tse是按算做rap ê詞,毋過tsîng寫好to也無著手去做音樂佮錄音,taⁿ suán--loh,就貼佇tsia後--日tsiah看按怎。



我欲去學校 我騎著跤踏車
因為跤踏車走袂去 去予我騎著--ah (騎著--ah!)
我是講我若見擺咧騎跤踏車
咧騎跤踏車 佇東區竹塹城
跤踏車無食油 油起價攏袂驚
若流汗咱就tsâng水 就袂臭kiânn-kiânn
若跤痠咱就歇睏 白茶啉予焦
若公車欲倚來 直直pa pa pa

公車个ùn-tsiàng你是咧按怎 merde!
阮已經lím-lím騎咧路墘仔 merde!
你閣直直khînn來到底欲創啥 merde!
欲靠站嘛毋免掠阮去輸贏 merde!

跤踏車騎咧 四界bo̍k-bo̍k泅
這二手閣雜牌仔 走相jiok攏走輸
毋才自來阮無咧快車道拼注
無ta-uâ he駛車个阮欲閃都袂赴
大个你嘛小拜託咧 目睭peh予金
這車就毋是愛人仔 阮無欲予你唚
你車就有掛e̋n-jín 欲走也緊緊
小讓咧是會按怎 阮性命嘛金包銀

公車个ùn-tsiàng你是咧按怎 merde!
阮已經lím-lím騎咧路墘仔 merde!
你閣直直khînn來到底欲創啥 merde!
欲靠站嘛毋免掠阮去輸贏 merde!

檢采是ùn-tsiàng ní-sàng心情無啥giang
走車足忝 暗時閣拚暝工
伊嘛走想欲去挵總統府
假大扮做城隍tsang水鬼來相拄
唉哎 若按呢生 毋就是thui軟仔
Hennh啦 就是欲食你 無你是欲按怎
好啊 我氣落去到地 嘛會佮你拚
逐家若落車 看啥人會較精(tsiann)

公車个ùn-tsiàng你是咧按怎 merde!
阮已經lím-lím騎咧路墘仔 merde!
你閣直直khînn來到底欲創啥 merde!
欲靠站嘛毋免掠阮去輸贏 merde!

你有kioh-siàu做你去揣大粒lu个來輸贏!

lausenghian發表於 樂多13:31回應(0)引用(0)心內話

August 1,2014

相戰

一透早
我已經佇重紅ê天露頂散步
苦楝公
伸死白ê手骨tīn-tōng-tīn-hiànn
猶原咧phah-phik
昨暗拆破耳空鬼仔ê銃聲
津津--落-來
Lak蹛遠兜
已經行割禮koh用火洗禮ê耳葉仔
聽袂著 聽袂著

攏tio̍h怪哆囉滿ê黃金溪
水泱閃爍印做lè-táu ê帖仔
若無--者
Thài會有一陣死對頭來咧赴會
慈悲ê減口王 殺膽ê lám跤siàu
死忠ê反背者 有撙節ê粗魯人
大道公hām媽祖婆相攬相唚
Pue̍h--出-來 tu̍h--入-去
喉叫 挽掣
銃子tsuānn對性命ê出尾

In獨獨無放帖予--我
就跳舞蹔破我ê眠床
壁堵袂輸章牌一排一排sak-sak--倒
自本按算目睭掩--咧
聽袂著 聽袂著
Kuàn-thài伊囡仔喘氣ê血臊hiàn
無疑悟介錯(kha̋i-siá-khuh)beh借我ê頭殼碗斟酒
只好破腹
破in開nā-nā ê腹肚
證明我無做奴ê勇敢

一透早
我已經佇重紅ê天露頂散步
上帝公
伸死白ê手骨tīn-tōng-tīn-hiànn
猶原咧phah-phik
昨暗拆破耳空鬼仔ê喉叫聲
津津--落-來
Lak蹛遠兜
已經行割禮koh用血洗禮ê良心仔
看袂著 看袂著

lausenghian發表於 樂多21:30回應(0)引用(0)文學 │標籤:,台語,母語,台語詩,台語文學,母語文學

July 13,2014

母語還母語,國家還國家


我前就捌寫一篇文章講起tsit个想法,較束結來講,就是母語運動佮國家認同是兩件代誌;國家認同毋免(嘛無應該)佮母語縛做伙,事實上,若照Benedict Anderson ê理論,「認同」ê對象本來就無必然愛是「事實」,「hông創造--出-來ê項mi̍h」(Hobsbawm講ê「人發明ê傳統 / the invented tradition」)是真濟國家「國家認同」ê來源,台灣佮「中華民國」佇tsit方面來講,根本毋是啥mih特殊ê例。

窮實通世間對殖民地獨立ê國家,加加減減攏會拄著仝tsit个問題。按怎講--leh?人咧講ê「殖民後」(post-colonial)其實就是因為「殖民者」已經離開,毋過體制並無「離開」所造成ê狀況。 

舉巴西做例,in ê殖民主葡萄牙人走--ah,毋過,巴西kám有規个將體制改換,徹底脫離葡萄牙ê殖民政治?我想是無,in基本上猶原採取葡萄牙式ê法律佮行政系統,掌握權力--ê,就是hia-ê葡萄牙殖民時代ê既得利益者,閣來,上基本ê語言--leh,in ê通行語猶原是葡萄牙語,雖然in ê人口明明是歐洲參本地原住民ê a̋i-nóo-khoo (hybrid)做大多數,總--是,in ê在地語言佇殖民後並無tsiâⁿ做通行語,顛倒是殖民者ê語言繼續咧做high language,甚至變做巴西國家認同象徵ê語言! 

咱嘛會用得講,tsit-má ê巴西,其實是一个「無殖民母國ê殖民體制」,in雖然主權獨立,毋過,殖民者ê影響、殖民者予in ê號佮khî,並無離開,而且凡勢永遠都無法度剝甲離離離。 

閣講--一-擺:我ê看法是,語言保存佮復振,無可能(嘛毋通)佮台灣ê政治主權議題縛做伙--ah! 

...繼續閱讀

June 4,2014

冤枉



啥人叫伊
Tsông入去殿堂
煞凊凊彩彩
無要無緊

赤身露體無愛妝thānn
也罷
上無學鳥仔叫歌
予人歡喜愛聽


柴捎咧直破
牛聲馬喉
無按算在內个後現代
Kánn是冤仇人欲來侵門踏戶

搜身軀都白話白汫
閣無紮音樂个味素
予人掠做是
分屍拆腿个毋成散文
結果 詩形銃決

lausenghian發表於 樂多22:51回應(0)引用(0)文學

May 23,2014

無正常ê海豬仔腦



設使「失眠」是睏了無夠ê意思,tshím想,「失眠」會較好過「無眠」,to「失眠」ê時,「睏眠」是極加kan-tann拍毋見一部份,較贏攏總拍無--去咧「無眠」kám毋是?人講:「怨無,無怨少」,就是tsit个意思,毋過,「睏」tsit件代誌干干仔佮別項無仝,伊kánn是缺欠較慘tsiâu無。 會記得捌佇新聞紙讀著一个婦人人ê故事,伊無眠已經數十冬久,啊to也活著好勢好勢,醫生是逐款愛睏藥仔試了了,就是無才調予伊睏,記者講伊真困擾,總--是,新聞內底,無進一步解說伊是按怎會感覺困擾。 ...繼續閱讀

lausenghian發表於 樂多16:14回應(0)引用(0)心內話