在羅馬愛上挪威公主 + 英雄

系到埝其實系咪要改……又真系可以唔駛改。
系咪都無乜點郁動，我地都系羅馬，
都系羅馬愛上挪威公主先…… 但3月8日之后，我地就唔只得公主一個……
多咗件，
已經有名有姓，有曬出世紙，仲未親身遇上（相唔出得，因為有 copyright)。
公主爹已經嫌佢個挪威名難讀，已經有個乳名出黎 （都系挪威名不過系1個音節）
我就想見到之后相處幾日先決定個中文系點。

我地呢輪都系到求神拜佛希望3月8日平安抵埗。過海關樣樣都順利。
之后公主同佢都要去驗DNA，希望佢地兩只小鬼都ok。我就可以安樂。

我12月開始已經聯絡咗超過20個breeder…… 最后有1個落實已經好好彩。
我第一次見到佢的時候，我地兩個已經好鐘意佢，
但唔知道人家肯唔肯俾我地。
因為驚個 breeder 唔俾，所以就搵定多幾只都叫合意的貓先，
攞定聯絡。但最后得佢同另一只仲有聯絡可以傾的 breeder。
我就日日系到自己埝，我要呢只，我要呢只。
最后真系成真。（Positive thinking 真系有用咖！）
另一只系挪威，因為意大利要求多好多嘢（杜蟲同蚤的證書），
所以只貓要留系 breeder 到的時間長好多，個 breeder 又要出門。
時間夾唔到，所以唔俾我地。
傾好價錢，其實都無傾，個 breeder 的價錢好公道。
仲要比系意大利的貓平，靚同血統好……唔會阿至阿咗多多無理要求，
非常專業的 breeder。（其實聯絡果甘多個，大部分都好專業，意大利……唉）
系傾時間的時候出錯咗些許嘢（時間問題），但對方系非常合作同包容，
個 breeder 連邊日同貓貓打乜做乜已經有張 list 俾我地睇，
個個星期都有相（自動，我無問）。
我地俾訂金都好爽手。我又無乜問題問佢地，基本上會擔心有D傳染病，
但我見佢地分開D貓（因為實在好多）一貓一室，個機會其實低好多。
仲要俾獸醫檢查咗先可以出文件，最多系我到場 check 多幾樣（都系獸醫到偷師甘耐……有D嘢學到)獸醫已經叮囑我有兩樣一定要摸清楚就 ok。


中途其實拉鋸時間非常長，唔系價錢……系搵資料，點入境同出境，包括人同貓。
麻煩咗好多朋友做人同寵物出入境的調查。
自己又上網用D唔正的意大利文去理解D要求…… 其實意大利政府網站……
唉……最后系去 EU 個站搵咗一輪再返意大利個站睇……

人的出入境問題：

公主爹要唔要用 passport 去哥本哈根 (因為11月過咗期）？
溫達老豆話要，因為佢剛好去過要用 passport 入境…… 仲有丹麥唔系歐盟，因為唔系用歐元……
我其實幾驚，本來話不然我自己去帶貓貓翻來，但公主爹又唔想，但個 passport 過期，唔用得，到時系機場去上唔到機點算……我就系甘逼公主爹去整passport 之余就開始搜刮資料……
住系歐洲的朋友們都話應該唔駛（有親身經驗）。我就定少少……又走去搵網上資料。

結果如下：
EU 個官方網站話唔駛，因為系神根，無邊境檢查，所以唔會檢查 passport。但要有效的身份證明文件就 ok。方便如有需要檢查可用。

意大利官方網站：只要有有效的護照或身份證就可以。
但身份證……邊款又無寫……

哥本哈根機場：唔要求出示 passport 過海關，不過唔排除會需要檢查，所以如果有 passport 就最好帶系身，身份證都可以。但神根國家的航班系同其他非神根國家的大樓，所以基本上唔查。

結論1：
公主爹好開心，因為公主娘唔再依依鵝鵝要佢去整 passport，佢只要去搞掂系依家張爛紙型身份證可以用就得。再唔系整另一款卡仔有sim都好似唔要成個月甘耐。

結論2： 溫達老豆老點！！！無 common sense 咖～！丹麥系最早果批歐盟成員國…… 都唔知道佢點可以做投資顧問……唔用歐元就唔系歐盟……

備注：我可以用身份證（但張爛紙，我唔系好信佢……唔好話丹麥啦）或 passport 出境意大利或入境丹麥，入境（意大利）一定要有staying permit。我比較乖，所以文件都無過期。

貓的出入境問題：

連 breeder 系丹麥都研究下，但主要都系要睇意大利有乜要求。
意大利對丹麥要求唔高，對挪威（好似芬蘭同瑞典都系）就麻煩要多2樣嘢。注意系講歐盟之間，如果系美國同英國入歐盟境的要求就唔同（雖然英國都系歐盟，但麻麻煩煩）
基本上出境前要有

1.系出發前的有效日數已經打了狂犬病防疫針（丹麥寫21日，意大利寫有效）
甘點知道意大利的有效系幾多日先得咖……
問獸醫，獸醫話21日，不過唔知道有無同另一條法例出的時候改咗
新法例，所有貓狗入境必須滿3個月（最后查核系90日，同12周3個月有分別咖）
有D文檔寫30日，所以費事出錯同 breeder 講咗30日。
最后連大學D文件都睇埋，確定系21日……（如果到時系海關話唔夠30日，21日唔俾入，我一定攞獸醫大學文件俾佢睇！）又有D文檔話要有2針（breeder 話俾一針，第二針 俗稱 booster 唔包）甘我話唔知道系咪一定要有 booster，但未免麻煩，要求打埋 booster。最后因為要等狂犬病（貓要夠11周大先可以大）過針夠日子，足夠時間可以打埋 booster。breeder 話打埋曬所有加幾多錢就得了。甘都好，唔理果針系唔系必須，booster 到3個月大打就最好。

2.EU passport 基本上系政府發出的文件，證明系打咗乜防疫針。

3.Microchip 其實貓會2007年1月1日都已經生效，所有有血統書的貓都要有 microchip， 響應EU 的動物歐洲境內流動要求。

入境意大利要唔要搵獸醫檢查…… 好似唔要，系 export 要……
仲要預約，預先將文件郵寄同打稅。
好似系只要過海關的時候，俾個 EU passport 佢的note down 個號碼。
但有人話根本掂行掂過無人理……

哥本哈根系機場出境要唔要獸醫檢查……等 breeder 問，
我寫 mail 去問無回復，不過就甘睇好似系無……系入境會查……非常奇怪……
兩個歐洲國家做嘢方法掉轉 gee……
但都唔奇……意大利點會有人甘得閑查，到當日一定系公主爹帶仔，
如果系我帶一定俾人查！

機票同酒店
其實可以選擇 cargo 貓貓自己坐飛機黎……不過我地唔想。
佢得90幾日大，自己坐飛機驚佢唔掂。（仲要轉機，費事唔見咗佢仲大鑊）
都系陪住佢好D，我地安心D。當去哥本哈根1日游
機票連貓回程個位都訂埋，俾埋錢。
再唔訂就貴到飛起。
羅馬到哥本哈根只有2間航空公司有直航。（奇怪到唔可能再奇怪）
如果唔系其他的航空公司都要1stop（有2 stop) 5個鐘頭……下……
要只貓坐5個鐘頭轉一程
唔好搞…… 轉機可能系兩間航空公司，甘個貓座位可能要分開再俾……
錢唔系問題，但點解要1stop，米蘭又唔駛……米蘭反而多2間可以選擇 （不過一間唔肯運寵物）！

訂機票
公主爹打電話去問，3月8日回程機有無位俾貓貓（要 confirm 有先可以同 breeder 約時間同日子）。
都系果D自動回復電話，要你按1字去邊，2字去（仲要段分鐘收我地錢！）
佢按咗要意大利文的服務員，等咗好一陣（公主爹話loop 咗兩次條 music 3 個廣告）。
點知道俾個德國佬佢，唔通收線又再打過咩……
公主爹問講英文得唔得。對方話可以。
甘就掉咗個電話俾我講…… 點解，公主爹識英文，不過佢講得慢過我，
請記得電話費好鬼貴，佢費事成個鐘頭都搞唔清楚。
加上佢知道我無心機同人講電話……所以一定可以好快收線。

我：請問3月8日有哥本哈根到羅馬班飛有無位俾貓。
航空公司：有
我：我地兩個人，要系電話訂買我地的位定可以上網訂？
航空公司：可以上網訂完打返黎訂貓個位。
我：點俾錢？
航空公司：需要信用卡，可以用mast...
我：visa 得了嗎？
航空公司：得。
我：只貓要唔要預先 check in。
航空公司：起飛前2個鐘頭到機場 check in 就可以。
我：唔該 （好似聽到有聲…… 不過無理）
收線。

上網分開2次訂，因為由哥本哈根到羅馬得1張特價（17歐元）之后已經系正價60歐元。所以分開訂。如果果日早上訂仲有兩張系特價……唉，算，一張都好。網上訂好之后就打電話去訂貓的位。又唔知道做乜，又俾翻個德國佬公主爹…… 又系我……

我：3月8日哥本哈根到羅馬，訂票號碼 xyz1234 要定一個貓位。
航空公司：個名系咪 S ..... E ......
我：系
航空公司：ok,只貓連個運輸用的箱超過唔超過5kg（你唔早問……）
我：唔過（其實可能有機會過……但唔理），只貓要入 cabin 唔要 cargo 位，30歐元果種（一早系網站睇坐）。
航空公司：（無反映）
我：喂!
航空公司：系…… 唔該信用卡號碼同……
我： (一連串的數目字）。
航空公司：15分鐘內會 email 一張你用咗30歐元的發票，不過唔會寫系貓的位，但你到check in  的時候佢地會知道咖啦。
我：唔該
收線……

公主爹無同我做stopwatch 睇下我有無破記錄……

本來公主爹想搵D一站式的網站連機票同酒店（我公司）都可以訂，
但發現系唔可以。
因為貓個位一定要打電話去航空公司訂，加上唔系間間航空公司肯運寵物(米蘭 easyjet 就唔俾寵物上機）。所以系甘睇都無用，要去航空公司睇先有用。有D航空公司連幾多錢都唔寫（Swiss 同lufthansa)，要打電話去問。問過D酒店加飛機的網站(無問公司D人，費事俾佢地知道甘多嘢），話都系要我地訂完之后打電話去俾佢地，等佢地再打電話去問航空公司…… 甘我不如信自己好過。

酒店就搵間系機場附近平平地，可以接待貓貓的，雖然幾個鐘頭，但無謂到時先發現間酒店系唔接待寵物，擺去邊到好（又系自己寫 mail 去問清楚）？都系自己訂，我公司話有折扣（機票加酒店）……但我自己訂仲平果公司個折扣價，因為機票公司無呢間平航空公司。酒店……個價錢貴過我自己訂，包曬之后打折仲貴過我地甘訂（連買貓貓個位）仲要1stop 6個鐘頭……咪玩。

貓的運輸箱
間航空公司要求的 size 好細，基本上所有箱都50cm 起碼，佢地要求47cm深30cm闊27cm高。屋企果個已經唔系大，都53cm 35cm 33cm。要搵果個……
睇曬……得D袋可以有甘細，選擇唔多仲鬼甘貴（因為好多袋都唔可以 fully closed 就唔可以用）。最后獸醫有一個，皮的入面有絨毛墊，原價70歐元，老友價35歐元。有見到系布面但軟趴趴的要20歐元（我驚個袋軟過頭，有乜事情保護唔到只貓）……香港其實多好多選擇，不過無理由系香港訂郵寄過黎甘過分……

羅馬機場的車位
點解連車位都要訂？唔訂到時無位，就要捱貴車場租金。
系機場附近原來有4間公司可以平過系停系機場入面，
仲有有D系包埋由停車場去機場的穿梭車。
不過只限長停（超過1日）依家訂11歐元2日（包穿梭車）……
如果系機場入面……哈……哈……28歐元一日！！

我系到埝……仲有無嘢漏……貓廁所有一個新的，
遲D先買多2個有蓋的…… 貓飯碗水兜要買（其實屋企好多碟可以用），
已經預約咗獸醫3月14日做第一次檢查。
FL 唔知道帶唔帶到上機，帶到就帶過去上飛機前搞掂（都要問下獸醫得唔得因為之前3、4日打microchip，剛好 FL 個位好近……）

貓箱可以遲D先買個新的，貓繩（行街用）要買多條（獸醫得D狗用的無貓用）。
貓糧…… 應該系自己煮，有一只可以頂下，
但覺得麻麻，又要請獸醫食多兩餐飯。
入境的指定動作文件同之外，總有血統書、轉會紙，同……合約，系有貓的買賣合約，唔系個個國家的 FIFe 都有（意大利就無……動議過要整……但無人會睬），但丹麥真系好好，保障雙方真感動。
已經問埋意大利的貓會轉會點做，到時要郵寄血統書同張轉會紙去都靈總部到轉落公主爹名下同系意大利有貓貓的血統書登記（唔登記貓貓的仔女無得攞血統書）。
聽日要去網上刮下邊到可以兌換歐元 to 丹麥克朗。

你覺得我有無嘢漏，有就話聲我聽唔該！