2005年11月21日 14:28

廣播劇
《臉兒甜如糖》

2000年香港電台第2台《風騷快活人》節目首播。


【人物】

唐家祥 (張家輝)
丁艷 (趙學而)





【第一集】

【第一場:唐 VO】
聽講話家下時啲幫人睇風水掌相嘅人好發,
你梗有咁聽講過,
係咪呀?
我都聽講話係呀,
所以當我嘅履歷表上面,
已經有齊保險經紀眼鏡店sales酒店waiter及多間電訊公司嘅手提電話營業員,
即係企喺渣甸坊地鐵口全球最貴租嘅果汁檔前唔停口講零機價嗰啲呀;
甚至係星探,
即係都係企喺渣甸坊地鐵口全球最貴租嘅果汁檔前,話你有資格做model嗰啲呢;
當我連星探都做埋嗰陣,
我決定走去學睇相。

我嘅人生都算積極喇啩,
做足咁多樣咯喎係咪吖。

無論如何,
我打算開展我新嘅一頁,
走去咗跟天雲居士學風水術數占卦算命。
天雲居士你哋唔識呢,
好嘢嚟㗎,好犀利㗎,
曾經去過尼泊爾取經㗎,
不過佢話佢為人低調,
先冇咁多人識咁解唧。
如果唔係,
以佢嘅功力,
分分鐘紅咗好耐都未可料。
佢唔輕易收徒弟㗎噃,
不過佢見佢個侄係我同學,
先至肯收。
你有冇個同學嘅阿叔係啲大師呀居士呀咁吖?
要去埋尼泊爾取經咁巴閉喎?
冇吖嘛!

所以你都唔好話,
呢啲就係緣份,
整定係你就係你。
我好聰明㗎,
師傅講嘅。
佢重讚我個人有慧根,
一點就明,
所以唔夠一年我就學滿師,
自己出嚟掛正招牌做生意。
不過,
唔知點解,
硬係冇乜生意。
我都執過晒的風水擇晒好日,
都係拍烏蠅。
好在我個人識得未雨綢繆,
乜嘢車牌我都考過,
所以,得閑咪幫人替工,
揸下的士幫補下咁囉。
不過今日生意就差咗啲,
硬係冇乜客咁嘅。
今日落咁大雨,
照計好多人都鍾意搭的士㗎。
講起落雨呢,
你有冇睇過今年幅春牛圖?
上面嗰個耕田仔呢……

【第二場:的士車廂】
(緊接第一場)
丁: 綠燈喇重唔開車?
唐: 咦?咦?小姐,你幾時上車㗎?
丁: 食懵你呀,的士佬,我上咗車好耐㗎咯噃。
唐: 係?幾時呀?你喺邊度上車㗎?
丁: ……駱克道囉。
唐: 駱克道呀?我有落到灣仔咩?……喂駱克道咁長,即係近邊度呀?
丁: 杜老誌道口呀。
唐: 我今日邊有去到灣仔唧?
丁: 咁我真係喺灣仔上車都重有花假嘅。
唐: 係?……你話去邊㗎?
丁: 唔……北角燕雲樓吖嘛。
唐: 燕雲樓?喺北角邊條街呀?
丁: 燕雲樓你都唔識呀?你都好打有限喇你。
唐: 嘩!阿姐,你講嘢都幾趣緻㗎噃。嗰度咁多躉樓,我點知道你講邊躉呀。
丁: 話你見識少就真係冇錯㗎。燕雲樓呀,夜總會嚟㗎,去親嗰度登台嘅,都係大歌星嚟㗎。我家陣就去唱喇。
唐: 你係大歌星?
丁: 好話,蜜糖歌后丁艷。
唐: 乜嘢話?蜜糖都係歌后,咁我都係花生醬歌王唐家祥咯。
丁: 我都冇你咁好氣呀。打得響個招牌叫蜜糖歌后,就梗係因為我人靚歌甜啦,重有呀,我嘅首本名曲《臉兒甜如糖》,唱到街知巷聞,你話,我係咪孭得起叫蜜糖歌后有餘吖。
唐: 《臉兒甜如糖》?
丁: 唔。
唐: 唱到街知巷聞?
丁: 係「定」啦。
唐: 唱K唔覺眼噃。
丁: 係?唔曉呀?好哇,咁咪家下時唱過你聽囉。
【播崔萍《臉兒甜如糖》】
唐: (驚慌)你……你明明坐後面……點解你隻眼瞄一瞄就可以開到部唱機㗎?
丁: 哈哈……


【第一集完】





【第二集】

【第一場:唐 VO】
我好驚呀,
呢個坐喺我的士上面,
話自己係蜜糖歌后丁艷嘅女人,
十成十係鬼……係係係女鬼嚟㗎,
紅色旗袍呀,
猛嘢嚟㗎。

【第二場:的士車廂】
(緊接第一場)
丁: 喂你想緊啲乜嘢嘢呀?
唐: (非常驚恐)你連我諗緊乜都知呀?!
丁: 我睇得出你想緊一啲嘢,但係又唔知你真係想緊啲乜咁啫。
唐: (稍為放心)哦,係呀?……乜你咁渣㗎,
丁: 要學好耐㗎,好辛苦㗎。
唐: 喂老老實實,我同你無仇無怨,你唔好搞我啦,唔該借歪啦。
丁: 我真係有嘢要搵你幫手㗎。
唐: 你要我燒乜嘢畀你,我燒畀你啦。
丁: 燒你個死人頭!我想你幫我搵個人。我冇佢地步呀,得個名寫喺呢張紙仔度,重係……你做乜唧,拎住啦。
唐: 你躉低先啦,你躉低我會攞。
丁: 真係好人都畀你激壞呀。嗱。
唐: 啲字咁肉酸嘅,真係鬼畫符喎。
丁: 係呀?我唔曉呀,我以為啲雞腸係咁嘅。
唐: Bern…..(看不清楚)咩呀,Bernard Liao,Bernard Liao係嘛?(恍然大悟)哦Bernard Liao,我知,同好多明星呀嗰啲做形象指導嗰個呀。
丁: 佢做乜嘢㗎話?
唐: 同好多明星做形象指導呀。
丁: 即係做乜唧?
唐: 即係教人著衫,扮靚呀嗰啲咁囉。
丁: 都應該㗎喇。
唐: (驚慌)你……搵佢去……報到呀?

【第三場:陰間】
(緊接第二場)
(sfx:陰間)
黃: 你報咗到啦嘛!
丁: 你係邊個?
黃: 我你都唔識?你都好打有限喇你。
丁: 你都冇解嘅,乜解究要識你呀,又唔見你識我?
黃: 你講你係丁艷下嘛?蜜糖歌后下嘛?我知!咁又點吖。呢度唔講藝名㗎,何翠娟!四屆影后林黛落到嚟,我都係叫佢程月如㗎咋。呢啲過眼雲煙啫。對我好啲啦,唔係下世編你去做烏蠅。
丁: 哦!我知喇,你係孟婆。
黃: 孟婆就整孟婆茶,等你飲咗之後忘記前塵往事嘅唧。我係黃婆,孟婆啲金蘭姊妹,專係安排下世投胎做乜咁嘅。
丁: 係?咁我下世投胎做乜呀?
黃: 過得去㗎,你今世本來就係大歌星,可惜你為情所困自尋短見……
丁: 真係?咁我唔死住咯。
黃: 你鋪話法吖,自尋短見即係自動棄權啦,咁就冇得返轉頭㗎喇,好在你都有做好心,借晒啲私己畀你個姊妹金晶晶個仔醫病。
丁: 就之前一晚借嘅咋喎。
黃: 係呀,好彩你趕得切做返件好事囉。雖則個蘇蝦後尾都冇咗。
丁: 吓?個蘇蝦冇咗嗱?陰功咯,晶晶一定好傷心「定」喇。
黃: 都係過眼雲煙啫。
丁: 咁個蘇蝦投咗胎未呀?
黃: 就至投咗之嘛,條命……麻麻地啦,你好啲,好心有好報,可以做返個紅歌星,紅足三十年。
丁: 紅足三十年?

【第四場:的士車廂】
(緊接第三場)
唐: 紅足三十年?咁堅?
丁: 黃婆係咁講㗎。(不忿)做乜嘢唧,你家陣好唔信咯噃。喂,以我明眸皓齒嘅樣貌,出谷黃鶯嘅歌喉,加上我嘅蕙質蘭心冰雪聰明,我紅咁耐係應份㗎噃。
唐: 係。咁……你都咁好命咯,重唔趕去投胎?
丁: 我就係唔想咁呀。
唐: 點解呀?
丁: 紅足三十年喎,咁咪即係做足三十年囉?唔……我唔想捱死一世呀,求其有兩年大紅大紫跟住急流勇退做少奶奶,歎世界,咁咪重架勢?


【第五場:陰間】
(緊接第四場)
(sfx:陰間)
黃: 邊有得咁揀㗎?你又唔係真係做好多善事。
丁: 咿……冇第二條命揀嗱?
黃: 點到你話揀就揀㗎。
丁: 做下好心啦,留意下啦,我唔介意等多陣㗎。
黃: 邊有話等下就得嘅唧,冇㗎。你唔好等咁耐呀,你喺度等一陣,陽間就過咗好多年㗎喇。
丁: 你係咪要錢唧?我報夢叫金晶晶燒啲過你啦。
黃: 我係呢啲貪贓枉法嘅人嚟咩!
丁: 咁……咁……你啦我想下法子啦,我今世都已經好命苦㗎喇,識著個男人又冇本心……(感懷身世痛哭)
黃: 哎呀你喊乜唧你。
丁: 想到傷心處,你話有乜辦法唔喊得一句句吖。
黃: 咁男人又真係冇個好人。
丁: 你係女人都唔幫我,我……都唔願做人喇……
黃: 唔做人,唔通真係去做烏蠅咩?
丁: (驚覺)做烏蠅?(一時害怕)啊……(繼續痛哭)
黃: 陰功咯……
丁: (繼續痛哭)
黃: 揀呢,就唔係真係冇得揀嘅。
丁: (忽然冷靜)吓?
黃: 乜嘢都唔使做,一出世就做千金小姐。
丁: 真係?
黃: 可惜,你唔掂吖……
丁: 吓?
黃: 我前排就係畀太多唔合資格嘅人做千金小姐,搞到個上流社會烏煙瘴氣,好多啲千金小姐都失禮死人,我畀閻羅王鬧呀。
丁: 我品性好好㗎噃。
黃: 弊在冇儀態呢。
丁: 吓?
黃: 嗱,畀個機會你喇。
丁: 真係?


【第六場:的士車廂】
(緊接)
唐: Bernard Liao就係你個機會呀?
丁: 我旨意晒佢㗎喇。
唐: 你搵佢做乜呀?
丁: 我搵佢教我做千金小姐咯。
唐: 即係……學做名媛呀嘛。就你呀?
【第二集完】





【第三集】

【第一場:唐 VO】
千金小姐!
呢個丁艷講嘢,真係聽到耳都側埋。
原來一心做名媛呀嘛,
早講吖,我以為佢搵我做替死鬼。
求其啦,最緊要快啲甩身就真。
(故作高調)我幾經辛苦……
(平實)其實都唔係好辛苦啫,
我只不過係託一個係周刊度做會計嘅前度女友,
叫佢幫我問佢啲記者同事,
咁就搵到嗰個Bernard Liao嘅office地址。
做名人幾冇保障呀嗬。
我日光日白冇落雨,夾住把遮,
坐喺佢個reception兩粒鐘,終於見到Bernard Liao,
一個著住黑色透視通花冇袖恤衫,
但係衫領,係白色豹紋皮草嘅男人。

【第二場:Bernard辦公室】
丁: (好奇)唐先生呀,請問你佢係咪個身好熱,但係條頸又好凍咁呢?
唐: (粵劇腔)丁小姐,請問你又何出此言咁呀?
丁: 嘻,點解你講嘢咁娘嘅?

【第三場:唐 VO】
我竟然畀一個五十年代嘅人話我娘,
我嘅內心係絕對嘅唔好受。
不過,fine,
大男人唔同女人計較嘅,
而且,
佢taste都唔合格,
唔係又使乜要搵人指導佢吖。


【第四場:Bernard辦公室】
Bernard: (冷淡,囂張)你求先係咪同我講嘢呀?
唐: 冇呀,冇出過聲呀。
Bernard: 你就係Sharon Chow個朋友呀?
唐: 係呀係呀,嗰個靚女ball場記者呀。
Bernard: 唔係好靚啫,靚就入到娛樂圈啦。唔好講佢喇……啊你唔好話返畀佢知喎。
唐: 當然,一定。
Bernard: 你……(嘲笑)點呀?簽咗邊間呀?不過有人肯簽你咩?……sorry冇心吓……你想我幫你執到有人肯簽你咁呀?好大工程喎,你有排執喎,你睇你頭髮又娘衫又娘夾住個男裝手袋重無端白事拎住把遮,(厭惡)咿……我要收好貴㗎噃。
唐: 你講完嗱。
Bernard: 你唔講嘢之嘛。


【第五場:唐 VO】
我唔知呢個咁囂嘅人,
有幾識得教人有儀態。
喺我眼中有儀態嘅人應該係有埋修養。
但係我冇理佢咁多,
我都係幫手。
所以,
我粒聲唔出,
打開咗把遮。
今次丁艷唔使好似上次咁,
用對眼開著部唱機嚟到證明佢係一隻鬼。
佢今次喺把遮度走出嚟已經好煞食喇。

【第六場:Bernard Liao辦公室】
(緊接)
Bernard: (嚇個半死)我我我……你……。


【第七場:唐 VO】
Bernard Liao跌咗喺梳化劈大個口講唔到嘢之後,
到我有機會講嘢,
將件事簡單講一次。
當然呢個麻煩嘅丁艷會加把口啦。
雖則話驚啫,
Bernard Liao呢啲讀過下書嘅人,
都有幾毫子理智嘅。


【第八場:唐 VO】
Bernard: 我唔係唔肯幫手,只係擔心,我未做過呢種client,我驚我自己做得唔好啫。
丁: 你話你未做過乜嘢話?
唐: 佢講西洋話呀,即係客人咁解。
Bernard: 喂老老實實,佢一啲咁簡單嘅英文……啊唔係,西洋話呀嗬……佢連呢啲咁簡單嘅西洋話都唔識…..你26個字母串唔串得齊吖?
丁: 你講乜家科呀?
Bernard: 嗱嗱嗱你睇,咁你好難同我呢啲……番書仔溝通㗎喎you know。
丁: 廖先生,你…..
Bernard: 唔好叫我中文名,叫我Bernard或者Mr. Liao得喇,
丁: 咁阿Bern勒先生,請問你……
唐: 你驚冇錢收咋啩,佢大把陰司紙㗎噃。
Bernard: (驚恐)你唔好講啲咁嘅嘢得唔得呀!
丁: Bern勒先生,我都唔想為難你。其實我身世好可憐㗎……


【第九場:唐 VO】
我覺得丁艷絕對係一個聰明嘅女人。
唔好忘記我係識睇相㗎。
你睇佢眉清目秀眼珠黑白分明,
個人蠢極都有限啦,
重有,
佢連閻羅王個手下黃婆都得掂,
全靠佢識得出動一個女人最利害嘅武器,
即係喊。
我嗰個做周刊嘅前度女友,
當日佢撇我嗰陣,
都係出動喊……
其實係佢識咗第二個噃,
但係佢喊,
咁我哋就和平分手。
女人一喊就好掂,
即使攻擊嘅對象都係女人都一樣掂。
所以,我一見丁艷喊,
我就好放心,
靜靜雞走咗。
今趟掂啦,
諗住甩身喇,
我成個禮拜冇見丁艷喇,
直至,
嗰晚我又走去揸夜更的士……

【第十場:唐 VO】
(緊接第九場)
丁: 唐家祥!……(失聲痛哭)
【第三集完】





【第四集】

【第一場:唐 VO】
我都話最棹忌女人喊㗎啦,
重要個女人係丁艷。
我都唔之行咩嘢衰運。
我有自己check返啲流年,
睇下係咪話我今年有麻煩。
但係,又冇吖。
我好小心㗎喇,
重複計咗幾次㗎喇。
照計,冇理由重有錯㗎喎。
家下,呢隻丁艷喊苦喊忽咁‘dut’咗喺我後面,
我唯有嗱嗱聲‘kem’咗旗佢,
梗係啦,唔通重載客咩?
唉,重一心諗住將丁艷掟咗去Bernard Liao嗰度,
就乾手淨腳。
(呼喊)我幾時至可以甩得身呀?

【第二場:的士車廂】
丁: 唐家祥呀!我……啊……(失聲痛哭)
唐: 我唔識教你做名媛㗎喎老老實實。
丁: 我唔做名媛!我唔做人喇。
唐: 你依家已經唔係人嚟㗎喎?你又試話唔做人?唔做人你做得啲乜呀?
丁: 我……點知唧?哎呀總之……我個心好亂呀。
唐: 你搵我都冇用㗎。
丁: 我唔搵你搵邊個至得?
唐: 咪……搵返你嗰個……黃婆囉,佢至係做嗰瓣㗎嘛。係咪?嗱,你去邊度問佢就腳啲呀?至多兜埋你去嗰度囉。和合石唔呀?定係鑽石山呀哥連臣角咁呀?
丁: 使乜咁麻煩唧?要返去我捐落地下咪得囉。
唐: 咪得囉,你都識咯咁,咁你重唔捐?
丁: 哎呀,人哋都未諗清楚呀。你畀我個心定下先啦。
唐: (哀求)你幾時先定到呀?我依家‘kem’晒旗咁等你㗎,唔同你呀蜜糖歌后,我要搵食㗎。
丁: 做乜唧?你唔睇見人哋好傷心㗎咩?
唐: 好喇好喇。
丁: (可憐)……你好討厭我呀?
唐: 唔係。
丁: 嗰個Bern勒好衰㗎。
唐: 係喎?點解呀?你冇講到喎。
丁: 我又唔想喺人背後講人閑話。
唐: 哦!我知喇。佢……咸濕你呀?
丁: 黐線!咁又冇。(逞強)但係我唔知佢有冇咁想過噃。想過唔奇呀。
唐: 咁你做呢行嘅係都冇所謂啦。
丁: (氣憤)喂你講咩嘢呀?我係歌星嚟㗎你估我係舞小姐呀?
唐: 對唔住對唔住。
丁: 不過話時話吖,我做返歌星都唔錯吖,話晒我都人靚聲甜吖嘛係咪先?
唐: 係啩。
丁: 我天份高唔使學得咁辛苦吖嘛?況且,紅足三十年喎,黃婆講嘅等如官府講嘅,冇錯㗎嗬?風水佬就呃你十年八年啫,紅足三十年,都好威吖。咦你係識睇相㗎噃,你幫我睇下我係咪真係紅足三十年?
唐: 我唔識睇下一世㗎喎。
丁: 哦。……不過黃婆都應該信得過㗎嗬?
唐: 都應該係嘅。
丁: 好,等我又試想下先?係呢,你依家去邊呀?
唐: 等你囉。
丁: 等我做乜呀?
唐: 等你喊完然之後落車囉,我呢更做咗幾枝旗咋。
丁: 唔好做啦。不如你帶我去街吖?
唐: 你自己去到夠囉。你重好啦,唔使用腳行嘅,重快過我揸車,飄下飄下飄去邊都得啦。
丁: 嚟吖,我想搵個人陪我咋。我今日唔開心吖嘛。
唐: 我聽日重要返工㗎。
丁: 你睇相嘅即係自己做老闆啦,咁到黃朝白晏先至起身都冇相干啦。
唐: 就係咁至要醒定啲呀。我已經冇乜生意㗎喇,一陣眼釣晒魚咁同人批命批錯晒咪死?
丁: 批錯鬼知咩?鬼都唔知啦。嚟啦!行啦!你唔使驚要拎住把遮四圍走咁麻煩喎,依家天黑唔使㗎喇,去邊都得㗎喇。吖去邊好呢?不如去避風塘食炒蜆吖?依家重有冇避風塘㗎?

【第三場:唐 VO】
我結果帶咗丁艷去卡拉OK。
我覺得丁艷應該睇下,
依家一大班人搵定落腳,
係喺卡拉OK食生果盤,
而唔係去避風塘食炒蜆,
重有,我諗佢好應該去睇下佢啲後輩依家唱成點。

【第四場:卡拉OK】
丁: 我喺下面聽講有個小妹妹叫鄧麗君嘅,話佢唱得好好㗎噃,呢度有冇呀?

【第五場:唐 VO】
丁艷真係有幾度散手,
好多歌畀佢聽一次,
跟住再撳“重唱”佢就識得跟住唱返出嚟。

【第六場:卡拉OK】
丁: 我想唱多次《多得他》呀唔該。唔該晒。

【第七場:唐 VO】
不過,唔會再有第二次㗎喇。
一個人霸一間房真係好樣衰。
梗係啦,其他人唔會見到佢㗎嘛,
所以,蜜糖歌后丁艷東山復出,
都係得我一個聽眾。


【第八場:Bernard辦公室】
Bernard: 乜鬼嘢歌后吖,呃你咋傻仔。

【第九場:唐 VO】
我走返去搵Bernard Liao,
睇下佢有冇辦法可以搞返掂丁艷,
等佢嗱嗱聲學成返去舊時嗰度,
唔使畀佢‘lur’我再去卡拉OK。
估唔到,原來丁艷,
唔係乜嘢大歌星。


【第十場:Bernard辦公室】
Bernard: 佢係咪畀隻首本名曲你聽吖?
唐: 係呀,叫咩……
Bernard: 《臉兒甜如糖》吖嘛,唔係佢唱㗎,嗰個係崔萍嚟㗎,依家播畀你聽都得呀。(播崔萍《臉兒甜如糖》)……嗱,人哋就真係大歌星喇。
唐: 聽落又好似把聲有啲唔同……(存疑)但係會唔會呢啲錄音耐得滯……
Bernard: 佢認咗唔係佢喇。佢係就係叫蜜糖歌后丁艷,但係以前係人都叫歌后㗎啦。佢唱咗兩晚就自殺死咗咯,點紅唧?
唐: 你逼佢招供㗎?
Bernard: 冇呀,我教佢著衫化妝儀態餐桌禮儀同埋簡單英文應對,我其實都係敷衍教佢啲皮毛嘢,睇過下報紙都識嗰啲,但係佢好common sense嘅嘢都唔識。即係飲湯唔應該有聲嗰啲呀。你話係咪‘’死我吖。鬧佢兩句,佢就自己爆晒出嚟咯,唔關我事㗎。其實你諗下吖,真正嘅名媛係講內涵講修養,邊有速成㗎?
唐: 咁,唔通唔理佢呀?
Bernard: 佢練精學懶之嘛?紅足三十年都嫌辛苦,使乜可憐佢唧?你咪學風水嘅,識唔識捉鬼㗎?唔識咪求其搵個叻啲嘅、法力高強嘅捉鬼咗佢咪算囉。
唐: 咁,即係搵我師傅呀?
【第四集完】





【第五集】

【第一場:Bernard VO】
我好憎人呃我。
就算係一隻鬼,呃我都唔得,我都好憎。
我唔會因為丁艷係一隻鬼就買佢怕,
況且,佢好似唔係好法力高強啫,
我識咁多人實搞掂佢囉。
我的而且確有諗過好好哋教好呢個丁艷,
話晒都係一個挑戰,
將一個五十年代26個英文字母都講唔齊嘅女人,
教到佢變成見得世面嘅名媛,
講出嚟都威啦……如果講得出嚟嘅話。
我有睇過“My fair lady” 㗎,
即係Audrey Hepburn同Rex Harrison嗰套,
even抄佢嗰套由譚炳文主演嘅粵語長片《改造小姐》,
我都有睇過。
我完全知道我今次嘅角色,
係相當經典兼且能夠表現出我嘅深度同內涵。
我,當然有信心做得掂啦。
有乜出奇唧,
幾多wet妹爛仔波牛喺我手上脫胎換骨,
個個都變晒天王天后萬人迷嘅接班人。
但係丁艷,唉……
佢無疑係條件唔錯,
肯執拾下都真箇係見得大場面㗎,
而且,佢重好鬼醒,
不過,醒又點吖,懶!
佢真係懶到死㗎,諸多藉口,
一時又話一時又話難一時又話使唔使學得咁深入,
話又唔係考狀元做博士。
你話咁點會成功?
都係疊埋心水趕走佢乾手淨腳算喇。
唔係show-off呀,我依家紅㗎,
好多job等住我做㗎,
下下咁每日畀幾個鐘頭嚟睇你呻話自己辛苦,
唔係啩。
我決定咗㗎喇,
如果佢再嚟煩我,
我就會搵啲有辦法嘅人搞掂佢,
費事煩!
你估係鬼就大晒㗎嗱,
真係打橫行㗎嗱。
我唔驚㗎。


【第二場:唐 VO】
Bernard Liao叫我搵師傅作法趕走丁艷,
死啦,絕對唔可以呀。
雖然我係同人算命睇風水,
但係唔代表我就識驅鬼,
但係,最最重要嘅原因係,
咁樣係好大件事㗎,
我師傅講過,
如果隻鬼,
畀人作法驅趕過的話,
就代表佢喺陽間不受歡迎,
咁樣就會好影響佢下世投胎,
即係下世可能做烏蠅小強呀咁囉。
所以,除非係隻鬼真係做啲傷天害理嘅事,
要作法嚟收服佢,
否則,最好勸佢走就算喇。


【第三場:的士車廂】
丁: 唐家祥,我哋今晚去邊度玩呀?喂我發覺我真係好喜歡去卡拉OK呀,今晚又試去過咯。
唐: 點解你下下都要喺我開緊工嗰陣先至嚟搵我㗎唧?
丁: 你屋企有觀音大使喺度,我唔入得去呀。
唐: 但係你阻我搵食呀,我連租都冇錢交呀,到時就真係要摺埋間公司,疊埋心水揸的士喇。……做乜呀?你重坐喺度做乜呀?你重唔走?我要開工喇。
丁: 點解唧?(退讓)聽晚先喇。
唐: 你死到臨頭喇重玩!
丁: 我死咗㗎喇傻仔,你唔記得嗱?你做乜唧,你好似好唔開心咁嘅?你唔歡喜同我玩呀?你都冇解嘅,無情白事就嬲人哋。
唐: 你記唔記得你走返上嚟係做乜㗎?
丁: ……乜嘢呀?學做千金小姐囉,即係你哋家陣叫名媛嗰啲囉,我有學到呀,係嗰個乜鬼嘢Bern勒衰之嘛,你都唔知呀,佢好 ‘long’‘嚟’ 㗎,一個唔合佢意就吹鬚碌眼咁樣。人哋大姑娘嚟㗎嘛,你叫人哋點算好唧?
唐: 你要做千金小姐……
丁: 所以要歎世界囉,想做千金小姐就係想歎世界之嘛,去卡拉OK歎住世界嚟學咪一樣?邊有好似個Bern勒咁樣咁傻瓜咁辛苦嘅唧……做乜呀?我講得唔嘅咩?……真係嬲我呀!
唐: 我唔想見到你。

丁: 你第一日見到我都已經係咁叫我借歪㗎啦!我記住㗎,我依家重記得好清楚㗎,不過冇所謂啦,你唔會害我嘅。
唐: 你一出現就帶畀我好多麻煩喇。
丁: 我冇煩過你喎!我搵你幫我手搵Bernard Liao之嘛。
唐: 我唔想見到你。
丁: 唔到你唔想喎,你欠我嘅。
唐: 我幾時欠你呀?
丁: 唔話得過你聽㗎。算啦,再見。

【第四場:唐 VO】
丁艷走咗喇,
好唔開心咁走。
我係咪好過份呢?
算啦,
我同佢又唔係好熟。
我拎住Bernard Liao畀我嗰隻CD,
崔萍嘅《臉兒甜如糖》。
突然間,
好想睇下佢喺台上嘅表演,
聽佢唱一次《臉兒甜如糖》,
我唔係掛住佢,
日日見依家唔見……

【第五場:電話對話】
(緊接第四場,手提電話響)
唐: 喂?
Bernard: (焦急)喂?你係唐家祥呀?我係Bernard Liao呀,你嗰個丁艷重喺唔喺度?我想搵佢。
【第五集完】

【第六集】

【第一場:的士車廂】
(手提電話響)
唐: 喂?
Bernard: (焦急)喂?你係唐家祥呀?我係Bernard Liao呀,你嗰個丁艷重喺唔喺度?我想搵佢。

【第二場:唐 VO】
咁奇怪嘅?
Bernard Liao會打電話畀我?
發生乜嘢事呀?
佢點解會有我電話㗎?
我上次都冇留低畀佢。
重要係搵嗰個佢好睇唔起嘅,嫌人哋26個英文字母都講唔齊嘅丁艷?
佢真係搵到啲法力高強嘅師傅趕佢走呀?
弊喇弊喇,
丁艷呢趟死硬喇,
咁樣畀人趕一趕,
實行畀閻羅王以為佢喺陽間不受歡迎,
下世咪講話要做名媛或者紅足三十年嘅天后,
有冇得做返人都成疑問,
弊喇弊喇,
丁艷下世做硬小強都得喇。


【第三場:的士車廂】
Bernard: 你咁緊張做乜呀?
唐: 我……我點知你呀,你依家……我依家我嘅私隱權畀你侵害……
Bernard: 喂,有你電話有乜咁出奇呀?你可以問你個周刊ball場記者friend攞我電話,我都一樣問得佢啫?係咪呀?
唐: 哦。
Bernard: 你今年貴庚呀?咁小事都大驚小怪成咁。
唐: 我唔驚,我冇驚過佢呀,你驚咋。我都冇驚到跌落梳化,我好鎮定咁就佢過主㗎。
Bernard: ……我冇興趣同你拗呢啲無謂嘢,你同我叫丁艷嚟啦。
唐: 你唔好啦,我都同你講過,你咁樣搵人去趕佢走,對佢好大影響㗎,你咪當做下好心啦。佢都講道理㗎,你勸下佢就得㗎喇,我都係咁樣。
唐: 點解呀?放心喎,佢唔會搵你㗎,佢搵你你同我講我幫你勸佢啦。
Bernard: 我就係想佢搵我呀。
唐: 係呀,叫下就得㗎喇。
Bernard: 唉!
唐: 做乜呀?
Bernard: 唉,呢鋪冇喇。再見喇,唔該晒。
(掛斷電話)

【第四場:Bernard VO】
呢鋪重諗住攞硬獎。
咁難得,
我可以得到一套攞獎格嘅電影,
budget又好嘅,
搵我做美指。
講一個五六十年代嘅歌女喎,
有乜嘢好得過搵正五六十年代嘅人,
重真係唱過歌嘅人幫手吖?
搵佢試造型兼做埋資料搜集顧問,一流。
你依家搵返個五六十年代嘅人唔難,
但係要好似丁艷咁,
重係廿零咁後生?
你話有乜可能吖?
有陣時氣質嘅嘢好難講,
你係嗰個年代嘅人,
就有嗰個年代嘅氣質,
扮嘅,就點夠真嘅嚟吖?
重有呀,
搵佢好budget㗎,
唔單止佢唔使錢,
至多燒返啲元寶蠟燭過佢就搞得掂,
搵佢試造型重抵,
唔使整真衫㗎,
畫出嚟燒畀佢就得㗎喇,
之前試過喇,好掂㗎,
fit到漏油,好過慢慢度身訂造。
……唉,
真係後悔當日咁惡鬧走佢。
點算呢……
咦?唐家祥個師傅可以趕鬼,
唔知可唔可以招鬼呢?


【第五場:Bernard辦公室】
唐: 喂你好過份喎,等我重覺得唔好意思帶埋隻鬼嚟煩住你。依家你又唔嫌佢阻你搵食?
Bernard: 係幫我搵食呀,攞到獎多好多job㗎!你幫我諗諗佢睇下有乜法子啦。
唐: 你都黐線㗎。
(掛斷電話)

【第六場:唐 VO】
我未見過啲人咁自私㗎,
啲面口轉得幾快呀。
同我第一次見我嗰陣,
話我頭髮又娘衫又娘夾住個男裝手袋重無端白事拎住把遮,
急口令咁樣。
唉,不過,
我都係因為佢成為阻我開唔到工,
所以先叫佢走啫。
老實講,
同佢熟咗,
都……冇乜嘢吖,
佢又唔害人,
講啲嘢又趣緻。
佢走咗之後,
我成日揸車冇客嗰陣,
都會向後望睇下見唔見到佢。
因為望倒後鏡係望唔倒㗎嘛。
講下講下,
咁又過咗成兩個禮拜喇。
咦,點解你喺度嘅?

【第七場:的士車廂】
丁: (笑著,俏皮)做乜呀?好掛住我呀?

【第六集完】





【第七集】

【第一場:唐 VO】
我算唔算掛住丁艷呢?
係至多算係唔慣啫。
不過,見返佢,
又突然之間覺得好高興。
我覺得我自己好無謂呀。


【第二場:的士車廂】
丁: 你唔准咁快趕我走㗎?
唐: 咁你返嚟做乜呀?
丁: 梗係有好嘢,今次犀飛利喇。
唐: 乜嘢呀?
丁: 我有下期六合彩嘅號碼。你唔好問我點樣得返嚟呀!
唐: 吓?
丁: 不過得五個咋。你話你冇錢交租丫嘛,我又冇得話畀錢過你,咁咪同你問囉,當係多謝你。
唐: 五個number咋?
丁: 好艱難先至問到返嚟㗎咋。
唐: 五個,五個都好好,有三獎,隨時夠我交大半年租。……咦?但係,你依家咁樣講出嚟,唔驚洩露天機咩?
丁: 你夠同人睇相批命睇風水咯,又唔見你驚洩露天機。


【第三場:唐 VO】
我梗係唔驚啦。
其實,
我風水相學嘅嘢,
我唔係真係好掂咋。
呢樣,我自己知自己事。
我的而且確有個師傅叫天雲居士,
佢亦都真係我個同學個阿叔,
但係,
佢冇去過尼泊爾取經。
呢啲係我作出嚟㗎咋。
佢,邊有讚過我有慧根?!
佢自己本身都唔係好叻,
佢主要都係教我睇人眉頭眼額,
到時見到個客隨時執生,
講多兩句好說話下個客就得㗎喇。
咁樣,點都好過企喺渣甸坊賣電話做星探,
起碼,都好似專業啲。

【第四場:的士車廂】
丁: 好啦,我走喇。
唐: 你去邊呀?
丁: 返落去等投胎囉。
唐: 你決定下世都唱歌呀?
丁: 唔好咩。
唐: 你咁好條件,應該嘅。不過真係好辛苦喎?
丁: 有乜法子唧?你又淨係識得嗰個Bernard Liao。


【第五場:唐 VO】
我好唔好話畀佢知Bernard Liao搵過佢呢?
Bernard Liao個人咁自私,
等個人有利用價值嗰陣即刻面口唔同晒,
呢種人抵幫佢咩?
不過,丁艷就算畀我鬧走佢,
佢都一樣返嚟幫我。
算啦,
或者佢幫完Bernard Liao之後,
Bernard Liao會再肯教返佢,
等佢得償所願下世做名媛呢。

【第六場:的士車廂】
丁: 你放心都得喇,我一定會去。
唐: 吓?你唔憎佢咩?
丁: 我欠佢嘅。
唐: 咁又係,話晒佢都真係教過你。
丁: 你唔明㗎喇。

【第七場:唐 VO】
丁艷又試閃走咗咋。
唔知重會唔會見到佢呢?
我覺得同一隻鬼做朋友相當麻煩,
都唔知點搵佢,
永遠唔知佢幾時會閃返出嚟,
又唔知道佢幾時會投胎,
以後會唔會再見。


【第八場:的士車廂】
丁: 喂,我有件事唔記得要講過你聽㗎。
唐: 嘩!乜你神出鬼沒咁㗎?……對唔住,我講咗啲蠢嘢。
丁: 冇相干啦,我有陣時都唔係好記得自己係一隻鬼,專係想一啲唔應該再去想嘅事。
唐: 係呀?你都係呀?我都係成日係咁,一時諗下睇下好唔好做第二行,但係我又知自己成日轉行唔係幾好,但係一辛苦又諗過,好煩。咦?係呢,你話有嘢想同我講,係乜呀?
丁: 我想話畀你知,其實……做朋友係應該坦白,係咪?
唐: 係。
丁: 點講呢,第一次見你嗰陣,我畀你聽嗰首歌,唔係我唱,係崔萍姐姐唱㗎。
唐: 係咪佢呀?
丁: (出奇)係呀?你有佢唱片呀,你知道晒嗱。
唐: 知啲唔知啲啦。
丁: 但係我真係叫蜜糖歌后丁艷,我每次登台,最好反應就係我唱崔萍姐姐嘅《臉兒甜如糖》,我都真係唱得好好聽㗎冇呃你㗎,有好多客都真係讚我人靚歌甜㗎。
唐: 我知,你唱鄧麗君小妹妹嘅《甜蜜蜜》同埋王菲小妹妹嘅《多得他》,都唱得好好呀,我上次卡拉OK聽到晒喇。
丁: 你知穿晒都唔嬲我,咁就得喇。再見喇。


【第九場:唐 VO】
丁艷真係閃咗喇。
閃咗成個月喇。
真係去咗投胎嗱。

【第七集完】





【第八集】

【第一場:Bernard VO】
今鋪我真係有運行,
五十年代蜜糖歌后丁艷真係走嚟拔刀相助。
真係perfect,真係perfect,
我嘅諗法完全成立,
丁艷真係帶到畀我好多資料同靈感。
佢經過我精心嘅塑造,
真係脫胎換骨。
佢有一種好強嘅可塑性,
有當年粵語片明星梅綺嘅氣質同風範,
可以風華絕代顛倒眾生,
又可以弱質纖纖楚楚可憐。
著旗袍有中國女性嘅溫婉,
著西式裙又有時代女性嘅明媚。
佢真係好靚。

【第二場:Bernard 辦公室】
丁: 你做乜眼光光望住我。
Bernard: 我唔望住你點做嘢呀大姑娘?
丁: 哼,咸濕佬,下流。
Bernard: 隨便你點講。
丁: 喂,我有嘢想問你呀?
Bernard: 乜嘢呀?
丁: 你呢份工作要做到幾時?
Bernard: 希望八月中可以完。
丁: 你係咪一路都要我幫你手?
Bernard: 你好趕時間咩?你唔係都有第二個job做呀嘛?
丁: 我要走喇,我真係要趕住去投胎喇。


【第三場:Bernard VO】
可能對住佢太耐,
我已經唔記得佢其實係一隻女鬼。
可能,
因為佢唔係嗰種冇手冇腳,
而係一隻風華絕代嘅靚鬼。
如果,佢當年唔係走去自殺,
佢真係一定會係superstar,
我做呢行咁多年,
我一定知。


【第四場:Bernard 辦公室】
丁: 我不嬲都知自己生得靚。我十四歲入南洋紗廠,一個月都冇兩餐係要自己畀錢,其餘全部都有男仔請我食飯。所以我冇乜姊妹,個個女仔都妒忌我。我嘅姊妹,係得金晶晶一個。後來,佢去做舞小姐,搵好多錢,多過做紗廠好多,所以又叫我去。
Bernard: 你做過舞小姐?
丁: 冇呀,個衰人楊志超唔畀我。
Bernard: 楊志超係邊個?
丁: 我個情人囉。佢成日都話好愛我,又話第日搵到大茶飯就唔使我出嚟拋頭露面,結果……結果佢背住我同第二個女人鬼混!我嬲起上嚟咪飲‘拉素’死咗佢囉。

【第五場:Bernard VO】
所以做人最緊要識得諗,
好似丁艷咁,
生得幾靚幾有條件大紅大紫,又點吖?
走去學人死咗佢。
我都試過畀人飛啦,
重好啦,
唔係畀人飛我都唔能夠喺英國讀好個master。

【第六場:Bernard 辦公室】
丁: 你可唔可以幫我一個忙?
Bernard: 幫你做乜?
丁: 我……我好想著一次婚紗呀。你有冇睇過葛蘭嘅《六月新娘》呀?好靚呀佢。楊志超話佢搵到大茶飯之後,就會畀我著婚紗,行西式婚禮。點知,我會搞成咁唧?
Bernard: 哦,咁冇問題。我揀返件復古嘅婚紗燒畀你咪得囉,包你成個葛蘭咁款。
丁: 我唔要復古呀,我要依家最興嗰款。
Bernard: 但係,依家興復古喎。
丁: 唔……點解……永遠啲嘢都係咁嘅唧?總係想嗰樣得唔到嗰樣!

【第七場:Bernard VO】
點解永遠一定係要結婚,
恨著婚紗唧?
點解連死都經歷過,
都重係要恨著一次婚紗?
我都曾經經歷過好多嘢,
失敗過好多次。
兩次我都想死。
第一次係考唔到TOFEL去唔到美國讀書。
考TOFEL好辛苦,
我捱過數唔盡咁多個通宵,
飲盡不下數百樽雞精,
上千杯咖啡,
但係,考唔到就係考唔到。
我好失落,嗰次真係好想死。
如果真係死咗,
我就唔會後尾攞到獎學金到英國留學。
第二次係,
我女朋友唔要我。
佢要嫁有錢佬,
係錢加一張綠卡。
我好失望。
後尾我諗通咗,
都係好失望,
點解我要為一個咁無知嘅女人傷心?
點解佢睇唔出我都會好success?

【第八場:Bernard 辦公室】
丁: 你諗緊乜呀?
Bernard: 如果你肯學,你咪可以知道我諗緊乜囉?你話你係鬼,可以有得學都唔學。
丁: 好辛苦㗎。
Bernard: 隨便你。無論如何,我真係好多謝你。
丁: 其實你唔使太過多謝我。正所謂受人恩惠千年記,得人花帶萬年香,我係應份幫你㗎。
Bernard: 點解呀?
丁: 唔講得,我真係唔講得㗎。
Bernard: 係呢,你有冇搵唐家祥呀?佢點呀?
【第八集完】






【第九集】

【第一場:唐 VO】
每個人都有自己嘅理想,
我都係。
我細個嗰陣有諗過做老師,
又有諗過做律師,
當然,十零歲睇過《新紮師兄》,
就一定想到要做杰佬,
去當差。
可惜,我讀書又唔叻,
體能又差。
我都好努力㗎,
係唔知應該努力邊樣嘢。
哼,依家,喺醫院裡面,
努力乜嘢都冇用,
邊度都唔使去。

【第二場:夢境裡】
(sfx: 夢境)
丁: (震驚)我唔知你搞成咁呀!我係去搵至你架車,發現架車已經變成一舊廢鐵…..嚇死我喇,早知你撞車我就早啲嚟探你啦。
唐: 你又唔識醫我,早知都冇用。
丁: 哎呀我知喇,梗係我洩露天機話啲六合彩number過你聽,你就搞成咁。我害死你喇。
唐: 我都未死。況且都唔關六合彩事,我都未買。
丁: 我幫你想下法子吖。
唐: 你可以想到乜嘢法子吖,你雖然係鬼,但係法力咁差,冇用㗎。
丁: 我喺下面識好多人吖嘛。……醫生有冇話你幾時醒得返呀?
唐: 冇呀?
丁: 你昏迷咗幾多日呀?
唐: 廿零日啩。
丁: 但係都唔知幾時先至醒得返,你睇你自己個樣……根本就睇唔到你個樣,包到實晒。
唐: 冇所謂啦,本身又唔係靚仔。
丁: 咁點算喎?
唐: 等囉。

丁: 唔得呀,我要你快快趣趣醒返陪我出去玩,依家淨係喺夢裡面見到你,呢度乜都冇,好悶呀。
唐: 你搵第二個囉,Bernard Liao囉,你同佢咁夾咯依家。
丁: 我話你都發神經㗎。
唐: (咄咄逼人)你同佢一齊咁耐,你哋唔係好開心㗎咩?你上次頂唔順返嚟對住我喊晒咁㗎喎,你今次都冇咁樣。你今次點解唔係咁吖?你講吖?
丁: 你依家做乜唧?

【第三場:唐 VO】
我依家做乜?
我都唔知點解自己有咁樣反應。
可能,犯賤就係唯一嘅解釋。
平時日日見就話人煩,
人哋去見第二個唔煩你就又唔抵得。
我都覺得自己好討厭。
丁艷咁樣畀我鬧一鬧,
又試嬲我,好耐都唔出現喇。
我諗佢又話諗法子,都係吹下水嘅啫。
佢初初都吹水自己係歌后啦。

【第四場:陰間】
(sfx: 陰間)
黃: 你想要觀音大使嘅楊枝甘露去救唐家祥呀?
丁: 有乜所謂唧?至多咪減壽?我又唔恨咁長命。
黃: 減運呀,你本來可以紅足三十年,依家你要楊枝甘露,一滴就一年,你要佢行得走得食得,就要廿滴,咁即係要救佢,你就得返十年運行。冇嘢嘅,賺少啲錢啫,都係過眼雲煙啫。
丁: 咁又唔係咁講法喇,三十年變十年,少三份二喎。咦,喂咪住先,你又話我有得做名媛?
黃: 你話你咁耐以嚟自己學成點吖?自己心知肚明啦。
丁: 你今次叫我搵Bern勒,就係要嚟報前世恩啫,依家報晒啦。
黃: 點會淨係咁簡單至得㗎。
丁: 重有乜呀?
黃: 你咁都領悟唔到?咁你同唐家祥一齊又領悟到啲乜?
丁: 即係點呀?都冇解嘅,乜都講得一半。你之前又冇叫定人哋去領悟。你唔講我又點知喎,無情情又叫人哋點領悟啲嘢出嚟唧?
黃: 冇,同台食飯,各自修行,你領悟唔到咪算囉,你冇心肝嘅話,就算畀足機會你,你都唔慌會紅足三十年啦。


【第五場:唐 VO】
我依然昏迷緊,
留喺自己嘅夢境裡面,
我可以睇到晒出面發生緊乜嘢事。
就好似匿埋喺一個大玻璃球入面,
見到外界,
但係叫天不應叫地不聞。
例如話,邊個嚟探過我,
佢哋做過啲乜,
講過啲乜。
我師傅天雲居士,
就喺我面前同我阿媽講,
佢話一早就睇得出我有呢個劫,
過唔過到呢個劫就要睇我個人嘅造化。
我覺得,見到一個人畀啲繃帶紗布石膏包到冚,
都好明顯係一個劫喇啩,
亦都好明顯生死未卜啩,
使乜你講。
冇幾耐,我就見到丁艷,
攞住一個白色小瓷樽,
滴咗啲嘢落我個口度。
天雲居士同我阿媽當然睇唔到佢啦,
我就睇得好清楚。
但係我係一個昏迷緊嘅人,
只能夠喺夢境裡面睇到晒出面嘅事,
唔能夠走出去,
而且,將來醒返,
即係假設真係醒得返嘅話,
我喺夢境入面所見過嘅嘢,
就會完全唔記得晒。
依家能夠走入夢境同我溝通嘅,
就只有丁艷呢隻女鬼。
點解佢唔行入嚟同我講下嘢呢?
畀我問佢個樽裡面嘅係乜嚟唧?

【第九集完】





【第十集】

【第一場:唐 VO】
過咗十九日喇。
由丁艷再喺我面前出現開始計,已經十九日喇。
我睇住每一日丁艷都將嗰個白色小瓷樽入面嘅嘢,
滴落去我個口裡面,
每一日,佢都係滴完就走㗎喇。
未試過走入嚟同我傾兩句偈。
佢明知我係一路睇住佢,
又明知要佢走入嚟,
我先至可以同佢講到嘢,
佢唔入嚟,我就只能夠擘大對眼睇住佢,
乜都做唔到。
點解唔入嚟唧?我好悶呀。
(喜悅)終於,到咗第二十日,
丁艷走入嚟我嘅夢境入面喇。

【第二場:夢境裡】
(sfx: 夢境)
唐: 你做乜唔走入嚟呀?
丁: (故作平淡)冇嘢呀。
唐: 真係冇嘢?咁,你滴咗啲乜嘢落我個口度呀?
丁: 冇嘢呀。
唐: 我日日睇住㗎重話冇?
丁: (按捺不住)我冇嘢呃你㗎喇。
唐: 你第一日識我嗰陣就已經呃我啦。
丁: 你又話冇擺喺心度嘅?
唐: (辯解)冇呀,真係冇呀。……算啦,我都有嘢呃過你。
丁: 你講你個師傅冇去過尼泊爾嗰啲係咪?我一早知啦。我重嚟搵你就知我冇擺喺心度啦。
唐: 咁就好喇。你係咪重想去卡拉OK呀?你搵第二個陪你吖,你要等我醒都唔知等到幾時。
丁: 放心啦,你會好快好返㗎喇,不過我都係等唔切,我要走喇。我今次專登走入嚟,係想同你講聲再見。
唐: 你去邊呀?
丁: 重有邊度去唧?梗係去投胎啦。
唐: 你夠鐘投胎嗱?你投胎做乜呀?係做名媛定係紅足三十年嘅紅歌星呀?
丁: 我就梗係紅歌星啦。
唐: 你放棄做名媛嗱?
丁: 做名媛一樣好辛苦㗎,經過今次我學曉㗎喇。
唐: 你係講學曉做名媛,定係學曉做名媛一樣好辛苦呀?
丁: 都一樣啫。

【第三場:唐 VO】
我覺得丁艷變咗呀,
同佢以前練精學懶嗰種樣,
好似唔同咗咁。
佢好似變成我嘅一個長輩咁。
雖然,佢係一九三幾年出世嗰隻,
但係我見佢,
都重係停留喺廿鬆啲歲到,
同我差唔多。
所以,我從未覺得佢係我長輩。
不過,佢話做乜都好辛苦,
我係明嘅。
我每次轉工轉行轉女朋友,
之前都以為轉到就正晒,
結果發現一樣係咁。
除此之外,
有好多,
都唔係好明佢點解咁講。

【第四場:夢境裡】
丁: 有冇人讚過你靚仔呀?笑起上嚟個酒凹好甜。
唐: 冇喎,有人話過我娘咋喎。
丁: 你講緊,嗰個Bern勒?
唐: ……(訕訕)唔止佢一個。
丁: 吓!重有邊個呀?
唐: ……咁多人講過邊記得呀。
丁: 咁就忘記佢啦,都係過眼雲煙啫。


【第五場:唐 VO】
我醒返喇。
重好精神。
醫生話,我傷成咁,
昏迷成個幾兩個月都唔醒,
都斷估我做硬植物人。
點知重可以醒得返,
重一啲後遺症都冇,
真係冇穿冇爛咁就離開咗醫院,
呢鋪都算係奇蹟。
之後,我冇再幫人睇相。
根本,我都唔係嗰方面嘅材料。
我真係諗住話呃飯食㗎咋,
但係我確實冇乜料到,
冇得好講,冇生意都係應該嘅。
我依家喺一間電腦器材公司嗰度做sales,
冇人知道我曾經係一個睇相佬,
所以,有時,都幾尷尬㗎。

【第六場:電腦店】
師奶: 咦,你咪唐居士?哎呀我搵唔到你呀,我想多謝你,因為你教我一得閑就勤啲用碌柚葉黃皮葉水抹乾淨個廚房呢,唔好畀啲衰氣積積埋埋咁,哎呀,我老公真係多咗返嚟食飯喎。你好犀利呀,你可唔可以幫我測下今年個流年呀?……(fade out)

【第七場:唐 VO】
我有時都會諗返起丁艷,
自從佢嗰次畀低嗰五個下期六合彩號碼之後,
佢就去咗搵Bernard Liao之後,
跟住,我炒咗車,
就冇再見過佢。
我有諗過試下去搵丁艷嘅靈位喺邊,
不過諗落,
佢睇怕都投咗胎咯,
重去嚟做乜?
去到佢都唔會見到我啦。
前排睇娛樂版,
除咗見到嗰個Bernard Liao真係攞到獎之外,
重見到有個有錢佬嘅好朋友,
幫呢個有錢佬生咗個女,
做朋友可以好到同人生女,
佢都真係好好人。
唔知,呢個BB女會唔會就係丁艷呢?
佢恨做有錢女。
如果係,咪好囉。

【全劇完】



All Words Copyright (c) http://blog.roodo.com/roffice All Rights Reserved. Any unauthorized copying, reproduction, hiring, lending, public performance, and broadcasting is strictly prohibited.

  • yam_roffice 發表於樂多回應(0)引用(0)【廣播劇】張家輝趙學而《臉兒甜如糖》編輯本文
    樂多分類:文字創作切換閱讀版型 │昨日人次:0 │累計人次:918

    引用URL

    http://cgi.blog.roodo.com/trackback/759329