下晡行路經過 1-ūi 車 tsin-tsē ê 十字路口, lâng 紅燈，tò-uat （左轉）ê 車青燈. Guá khiā-tī 路邊，看對面 ê 學生 gín-á kap 車相爭行過來。其實 tsi̍t-tsióng 情形 tiāⁿ-tiāⁿ 看著, mā-bô 感覺 ū siáⁿ-mi̍h 奇怪--eh.
Hia-ê 高中生行過來了後, 停 teh 青紅燈腳, 擋 tī guá ê 頭前大小聲 hi-hi-huā-huā. 其中 1-ê teh 發簡訊 ê tsa-po͘ gín-á hiông-hiông ua̍t-thâu 對路 hit-pîng 大聲 huah, "Look at her, she thinks she is white."
White? Guá kám-ū 聽 m̄-tio̍h. Tse-sī siáⁿ-mi̍h 意思? Huah 了以後 in 開始行, guá tsiah 看著路 ê 對面原來 iah-koh-ū 1-ê tsa-bo͘ gín-á bô 過來。
Guá ái sió-khuá 解說 1-ē, tsit-tīn gín-á 內底 ká-ná hit-ê tsa-po͘-ē sī Hispanic, 其他 lóng-sī 烏-lâng tsa-bo͘ gín-á.
行無幾步, hit-ê tsa-po͘ gín-á koh ua̍t-thâu 過來 ná-笑-ná-huah, "White girl, white girl."
代誌 lú-lâi-lú 趣味--ah，敢講 tsit-má "white" sī teh 笑 lâng 無膽 ê 話. Obama ū hiah-tsē lâng 支持, 特別 sī 30 huè 以下 ê 少年 lâng, kap guá 今-á-日看著 ê tsit-hāng 代誌 m̄-tsai ū 關係 bô.
