poavosa

Hit-kang tī 中國lâng 真tse ê 所在看tioh 1ê 查某(tsa-bóo) teh 行路真未穩，ká-ná giōng-beh 跋倒(pua̍h-tó) hit種形。Koh-khah 斟酌(tsim-tsiok)看 tsiah 知影伊ê kuân-kia̍h kap lâng 無仝(kâng)，鞋蹬(ê-tenn) sī 對鞋底中央(tiong-ng)生--出來-ē，m̄-sī 親像(tshin-tshiūnn)普通 án-ne 釘tī 鞋底尾á。

這種鞋 kap 古早縛腳(pa̍k-kha)ê 查某lâng 穿ê hit種「三寸金蓮」真相像(sio-siāng)。想buē-kàu tsit-má tsit-ê 時代 mā-sī ū-lâng 愛suí m̄驚跋倒(pua̍h-tó)。世間實在 siánn-mi̍h款 lâng 攏總(lóng-tsóng) ū。

Sī-kóng án-ne 行路 á無 kah 好看--ā。M̄-tsai 古早lâng 頭殼內 teh 想siànn。

Ta̍k-ke kām-未感覺足(tsiok)奇怪，國安會祕書長蘇起 ê 小弟(sió-tī)，前 NCC 主委蘇永欽 tī 中國教冊，sī án-tsuánn 烏官(oo-kuann)， 偽(guī)總統府發言人王郁琦今á日 ē 出面替 in 2ê 兄弟á 講話。國安會 kám-sī 總統府內面 ê 單位?

Iah-sī 有別項原因。比如(Pí-jû)kóng，有 siánn-mi̍h 需要掩崁(am-khàm)，bô-ài，甚至(sīm-tsì)驚 lâng koh-再提(the̍h)起--ē。

M̄-tsai ta̍k-ke iah 有印象無，馬英九 ê 三姐，馬冰如 Theresa Chao，tī 中國 International School of Beijing teh 做中文部校長這項代誌。

Iah-sī koh-khah 大條ê，馬英九 in 大姐 kap 中國政協委員合開公司這項。

Nā-sī koh-khah tsim-tsiok(斟酌) kah óo(挖)--落去，m̄-tsai iah 有 guā-tsē 未見lâng ê 見笑代。

Sī-m̄-sī 有lâng 驚 tsia-ê 代誌 ē koh hōo-lâng the̍h出來 kóng，所以先來救火，tsiah-未火愈(lú)燒愈(lú)炎(iām)，到時(kàu-sî)燒 tioh ka-tī。

莫怪(Bo̍k-kuài)馬英九雖然知影(tsai-iánn)蘇--家這-tsân 代誌，mā 知影 in m̄-sī 第一擺--ā，m̄-koh lóng m̄-敢 kóng siánn-mi̍h。Kan-ná 派1ê 無牌ê 傳令(thuân-līng)出來 tshin-tshâi kóng 一寡未通ê話，想kóng án-ne tio̍h-beh kah 代誌掩崁(am-khàm) hōo 過。

Sī-kóng 頂擺(tíng-pái) 上無(siōng-bô) iah 有1句「下不為例(ē-put-uî-lē)」，這擺 hām 出面 toh m̄-敢。可能真驚惶(kiann-hiânn) hōnn。

官字2支(ki) tshuì，m̄-koh 品字 suah 有3支。

有品ê官 tshuì 實在 tse-kah 驚死lâng。

莫怪(bo̍k-kuài)全台灣上蓋有品 ê hit-ê 不但話定定(tiānn-tiānn) 反來反去(píng-lâi-píng-khì)，而且(jî-tshiánn)做 kah hiah-nī 爛(nuā)，政見 逐項(ta̍k-hāng)跳票，kán-ná 親中賣台1項一直 bú，m̄-koh mā-bô 看伊有甚麼(siánn-mi̍h)反省，顛倒 koh kah「八年任期」掛 tī tshuì-內，一點á mā 未(bē)歹勢。

其實伊選舉前 tioh kóng beh 做8年--ā*，雖然 ta̍k-ke lóng 知影中華民國總統 ê 任期1任 sī 4 年。

莫怪伊有資格(tsu-keh) thang-好就(tsiū)「車」教 lâng按怎(án-tsuánn)有品，這位實在 bô-lâng 比伊 koh-khah 適合--ē。

上蓋頂懸(tíng-kuân) hit-ê ē-sái 無恥(bô-thí) kàu 這款程度，莫怪底á hia-ê 作官ē mā 有樣tuè樣，1ê 比 1ê koh-khah「有品」。

* 感謝大腸提供這ê資料。

Hiong-hiong 想著，台語 ê「bah-kha(肉腳)」到底 sī àn tó-uī 來-ē? Sī-m̄-sī kap 日語 ê「ばか」ū 關係? 這 2ê 詞不管 sī 讀音 iah-sī 意思 lóng 真-kâng。

Guá 查台語線頂辭典，內底 ká-ná ū lóo-bah-kha(魯肉腳) 這個詞。Tshuē-無 bah-kha。

M̄-tsai sī bah-kha 演變做 lóo-bah-kha iah-sī tú-hó(抵好) tò-pîng(倒爿)，sī lóo-bah-kha 簡化做 bah-kha。

但是 tsit 2ê 詞 ê 字 khah án-tsuánn 看 lóng-bô tsit-má 通用 ê hit-tsióng 真「lóo」ê 意思。

所以應該 sī 借音來--ē。有1種可能 sī 對 lóo 聯想 tio̍h lóo-bah(鹵肉) ê lóo，所以 kóng做 lóo-bah-kha(魯肉腳)，後來 koh 簡化做 bah-kha。

但是像這款對煮食 hit 方面來解說--ē 感覺上有 khah 勉強--一寡。而且 bah-kha 到底 sī siánn-mi̍h，kám 有人真正 bat 鹵過這味?

Nā kóng sī 對日語「ばか」來-ē án-ne kán-ná kah ē-通。

另外 guá koh 查台日大辭典，內面 ká-ná ū lóo-bah(鹵肉) niā-niā，bô lóo-bah-kha mā bô bah-kha 這 2ê 詞。

所以這種講法 sī 後--來 (1931-32 年以後) tsiah ū--ē。M̄-koh guá tsit-má iah tshuē-bô 別項資料 ē-tàng koh-khah 詳細知影 tse-sī 對 tang時開始用-ē。

M̄-koh guá ē-記-leh 細漢 ê 時 m̄-pat 聽 lâng án-ne kóng-過。M̄-知 sī-m̄-sī tsi--慢慢 tsiah 出現--ē。

Guá mā-ū 查教育部 ê 字典，內面 mā bô 肉腳這個詞。

中國人 bô 這種講法。

6月初4

E-poo(下晡) khì 中國lâng tsiok-tsē ê 所在。街á路 kap 普通時 sio-siâng，bô khuànn-tio̍h(看著) ū lâng teh 紀念六四天安門屠殺。

Guá sī m̄-tsai 中國lâng án-tsuánn 想-ē--lah。M̄-koh 像 tsit-khuán 日子，nā-sī hām ka-tī lóng bô siánn-mi̍h 動作，tio̍h mài siàu-siūnn āu-pái(後擺) ū lâng ē-來替 lí 出氣。

M̄-koh 話 koh kóng--tńg--lâi，nā-sī bô 支持台灣獨立(to̍k-li̍p) ê，guá kāng-khuán mā-sī bē(未) kā in 支持。Siōng-tsē tio̍h-sī khiā-tī 人道(jîn-tō) ê 立場(li̍p-tiûnn)表示同情。

今á日 Obama tī Egypt(埃及(ai-ki̍p)) 演講 ê 時 ū kóng-tio̍h Palestine (巴勒斯坦)--ne。Ài tsai-iánn(知影) i án-ne kóng Iseral(以色列(í-sik-lia̍t)) sī ē bô 歡喜--e。Palestine ê lâng nā-m̄-sī 一直(it-ti̍t)堅持 ka-tī ê 理想，一直勇敢kóng 出來，mài-kóng sī Obama，tsit-má 根本 toh bô-lâng ē tshap in。

Tse-sī 真簡單ê 道理，m̄-tsai án-tsuánn ná-ē tsiah-tsē-lâng 想bô，甘願 khì 相信馬英九 hit-tsióng 投降ê做法(tsò-huat)。Nā-sī tshiunn(像) i án-ne tsi̍t-sì-kuè(一四界) kik-tiām-tiām，tshuì-lāi kóng sī kap 中國互相 bô 否認(hóo-jīm)，其實根本 tio̍h-sī ka-tī 否認 ka-tī，kàu-sî-tsūn hōo-lâng 欺負 tsau-that 實在sī tú-hó niā-niā。