Pekes and the City

動手寫呢一篇網誌時, 心真係忍忍作痛! 但最不捨嘅事情亦都已經發生咗, 再唔開心, 再難過亦都無用!
 
今次會係最後一次寫呢個網誌! 因為家中已再無北京可以跟呢個城市連繫起來!
 
但我會久不久上嚟呢度, 回味一下過去曾經發生嘅事情, 好讓我可以繼續我嘅路!
 
在此好多謝各位響網路上相逢嘅朋友, 你哋俾我嘅支持, 的確非常重要! 我希望我哋可以繼續響其他media保持聯絡!

上星期向主席波解釋完之後，佢真係touchwood無再出事呀！你話係真唔係？
　
不過呢，我亦都開始識得點樣對佢作出intensive care．．．就係佢每次飲水、尿尿，甚至係便便時，我都會拖埋樽氧氣去俾佢一邊聞，一邊辦大事！真係有效喎！而且以前佢每次去完toilet都會跑出嚟，好似成身都輕鬆晒咁，而家我唔俾佢跑啦！一響toilet出嚟，我就會叫佢坐好，同佢講請佢食嘢，佢真係會即時坐定定等我俾嘢佢食架！咁樣可以減少佢再跑之後心臟負荷唔到嘅危險！So far so good 啦（touchwood）！
 
我覺得湊仔真係要鬥智又鬥力（拖住一樽1400L嘅氧氣喎，少ｄ力都唔掂呀！）！

尋日放工返屋企見到主席波接我門，我鬆一口氣之後，摸佢果時就發覺佢個肚仔濕晒，仲有一陣尿味，而且我發現茶几附近有水漬，咁即係．．．
　
唔緊要！唔怕暈，有醒未為輸！我無出聲，當無事好似平時咁拖地兼搞掂晒ｄ嘢！我一邊拖地一邊諗，究竟點解主席波會忽然咁樣嘅呢？究竟發生過咩嘢事？
　
忽然靈光一閃，我諗起上個星期發生過一件事，有可能會令主席波覺得自己係我嘅負擔，所以我急忙再三向佢解釋！其實上星期我提起嘅嘢完全唔關主席波事！我唔知會唔會諗得太多，不過早幾日阿van提醒我，狗係有第六感嘅，就算我無講，佢哋都會領會到！我就係怕主席波領會錯咗，所以要同佢講清楚！我唔知佢明唔明，不過希望佢會知佢媽咪咪嘅心意！老實講，有咁多人支持同鼓勵我，尋日個心的確係鬆咗少少！起碼尋日成日都無喊啦！
　
尋晚主席波去痾臭臭果時，我係拖埋支氧氣去廁所，等佢一邊痾一邊聞架！雖然都氣喘，不過好似有用喎！

這陣子有太多不愉快事件發生，主席波嘅，我自己嘅，每一件都可以寫一段文章，每一件都可以令我哭成淚人！腦入面嘅事會不停閃出嚟，太多嘅畫面，太多嘅人與事，好煩好煩！
　
如果所有事情可以再嚟過，煩惱可能會少很多很多！只能夠講，煩惱皆是自找的！

呢輪我都係朝早煮雞肉湯，夜晚蒸牛肉餅俾波少食！唔知可唔可以令佢增磅呢？
　
尋日朝出去晨運就真係爭ｄ嚇死我！條友仔痾完尿，行咗幾步痾完臭臭又抓地，點知抓幾吓就心臟負荷唔到，想暈想暈！真係成條脷仔都白晒呀！真係我都爭ｄ心臟停頓呀！結果要即時仆倒咁打道回府！可能係因為一直少郁動，忽然又行又抓地佢個心臟頂唔順呀！所以今朝晨運我都唔敢俾佢落地行，淨係落地痾咗尿就上番車仔，成朝純兜風！
　
雖然係無得落地，不過可以出去睇吓嘢，都好過廿四小時都響屋企啦！

　
　　
明顯地，波少日頭嘅情況係會比夜晚好，日頭會易Ｄ瞓覺，時間亦較夜晚長；夜晚有時都會氣喘或者瞓唔低，真係唔明點解夜晚會差Ｄ，連書都係咁講，可能真係因為晚上係排毒時間嘅關係！

呢輪忙主席波嘅嘢真係忙到傻，上星期咁啱有機會，咪幫自己量一量血壓囉！因為我都係肥，而且呢輪自覺壓力好大，新工作又成日坐響度無得郁，所以我一直都以為自己係高血壓類型，點知量出嚟嘅結果上壓係91，下壓係68，標準囉！可能仲算低咗ｄ咁多添！都好，起碼唔會爆血管先！
　
呢輪電視成日賣廣告話連續飲14日雞精，個人會精神ｄ，記憶力又會好ｄ，皮質醇都會低ｄ！唔知堅唔堅呢？我未試過連續飲咁多日，好多時都係記得就飲，唔記得就放響度！

之前都聽人講過話呢隻靈芝粉好似幾有效，不過當時無買，今朝忽然諗起，中午就買咗！希望有幫助啦！

尋晚我又照辦煮碗，煮雞扒雞湯，真係唔知點解，佢食咗一舊之後就唔想食！我以為係因為俾佢食果一舊比較「鞋」口，佢唔鍾意，所以再拎另一舊淋ｄ嘅俾佢，不過佢都係聞一輪之後就擰開塊面！
　
好彩嘅係，佢對ｄ雞湯都仲好有興趣！我咪用ｄ白麵包浸雞湯俾佢食囉！之後先再烚個蛋俾佢食！馬蹄、車厘子同埋kiwi fruit佢都仲想食嘅！
　
其實我估佢ｄ牙仔都唔多舒服，所以佢都唔係好想咬嘢！可以的話，我都會咬爛ｄ嘢先再俾佢食架啦！不過碎晒之後想加ｄ湯，然後再逐啖逐啖餵就會好難囉！今朝都係麵包浸雞湯加蛋白碎，不過我覺得佢都係無精神，因為平時佢食kiwi fruit會好想食，今朝又係食咗一啖之後就唔hou！
 
唉．．寶貝仔，你想食乜呀？話我知等我可以煮俾你食啦！

郁記見主席波情況咁樣，尋晚專登打電話返嚟香港俾我，同我傾咗成個幾鐘，等我可以解吓壓之餘，又可以share吓佢嘅心得，真係好多謝佢！
　
尋晚返到屋企，主席波已經無再扯氣，不過就仲係好攰，所以我估佢日頭都仲氣喘咗一輪先至穩定！不過見佢唔再氣喘兼夾會瞓低休息，我個心都定咗好多！最重要嘅係，我一返到屋企餵佢食藥果時，見佢都好似幾好胃口，幾想食嘢咁！我都即刻開心晒！即刻響雪櫃拎件雞扒出嚟，學公主娘教我嘅方法煮嚟俾主席波食！
　
佢幾開胃呀！因為朝早無乜食嘢，夜晚果餐我俾多ｄｄ肉佢食，食完雞肉又食咗幾片雞湯浸節瓜，之後再食咗半片白麵包，都係浸過雞湯嘅，佢真係食到舔舔脷！公主娘教我煮肉嘅方法真係唔錯，我估我會用多ｄ呢個方法煮嘢俾主席波食！多謝晒公主娘教我呢個烹調方法！
　
不過可能因為肺入面始終有積水，我見如果要主席波自己由個碗果度不停舔ｄ食物嚟食的話，食幾啖之後佢就會好似有ｄ抖唔到氣咁，所以而家我都要一啖一啖咁餵佢食，佢就會食得舒服ｄ！
　
夜晚我同郁記傾電話果時，主席波仲全程瞓覺覺，果度都瞓咗接近兩個鐘，真係算OK！
　
尋晚結果係我同佢兩個九點幾就已經入房瞓覺！我知佢久不久都會醒，都會坐響度中吓眼瞓，都會喘幾吓氣，不過起碼瞓低又瞓著覺嘅時間亦都唔短，咁我都覺得可以囉！

尋日放工返到去見主席波仲有喘扯氣，估計佢應該日頭都係無覺好瞓，可能天氣真係太熱，日頭唔開冷氣唔OK，所以決定今日會開細細冷氣俾佢!不過老實講，我住地下，其實日頭只要有開大風扇的話，點都唔會係好熱！而且我又怕成日開冷氣會太乾燥，令主席波呼吸唔暢順！
　
尋晚主席波都仲肯食肉，食生果，不過就唔肯食澱粉質嘅嘢！不過佢尋晚都仲係瞓唔到，所以今朝連肉或者蛋都唔想食，擰開個頭，反而肯食馬蹄同埋車厘子！真係一隻古怪狗！
　
尋晚諗住等佢舒服ｄ先瞓，點知一搞就差不多成晚無瞓！其實我唔瞓唔緊要，我最希望係佢有覺好瞓！今朝見佢咁慘，連我呢個無神論者都向神祈求，希望佢可以幫到主席波舒服ｄ，有覺好瞓！

轉咗去新職位眨吓眼已經三個月，so far so good啦！早果輪忙住籌備旅遊展嘅嘢，真係忙到唔識形容，而家已算穩定，起碼無急嘢要趕住做，每日都有時間可以上吓網八吓！
　
新工作環境仍在習慣中，新同事都幾nice，好helpful，不過始終唔係識得咁耐，有時點都會好似有ｄ格格不入咁！要繼續合作就一定要互相認識了解多ｄ囉！
　
其實最煩心嘅係，自從轉咗新工作之後，主席波嘅病情就開始急轉直下，我真係唔知究竟係因為我夜咗返到屋企（每日都大概遲一個鐘先返到屋企），搞到佢夜咗少少食藥同食飯；定還是係因為天氣真正轉熱！不過無論係邊個原因都好，我都不無內疚，總覺得自己少咗時間陪主席波！
　
主席波，你要撐住呀！等媽咪咪一切塵埃落定，就會多ｄｄ時間可以留俾你架啦！

好耐無寫blog，不過呢輪真係好想再開筆，因為好多心事好多不同嘅心情響facebook都無法一一講清楚。要搵個平台舒發一下，一諗就係自己嘅老家！
　
主席波近呢兩個月嘅情況好唔穩定，早兩三個星期瞓唔低之餘，仲不停喘氣！由上星期日開始，唔知係咪因為我無開冷氣，佢又好似好番ｄｄ，可以有覺好瞓！不過，剛過去嘅星期六日又係成晚氣喘，見到真係心都痛埋！最無奈嘅係我都唔知點樣幫佢！抱佢佢又唔舒服，幫佢按耳仔，初初可能都仲會停止氣喘，但無幾耐又會再喘過！最肉赤嘅係見到佢唔可以瞓低，因為會壓住個肺好唔舒服，只可以坐響度，但係佢又好攰，攰到響度「中」眼瞓，結果係不停咁「中」眼瞓、瞓低、起身；「中」眼瞓、瞓低、起身．．．真係睇見都覺得辛苦！
　
老實講，主席波而家嘅quality of life已經好差，身體唔好，又唔可以散步，唔可以跑，又唔玩得玩具，因為郁幾郁佢就會氣喘，亦試過因為太用力抓地下之後暈低！唯一仲有興趣嘅係食，不過醫生驗血之後又話唔可以食太多protein，搞到而家只可以食少少肉，螺絲粉呀，麵包呀果ｄ佢又唔食得多，搞到已經皮包骨！不過佢呢個為食豬真係好鍾意食生果，基本上我食嘅生果佢都會食，所以我都唔理得咁多，總之係無加工嘅食物，我都會俾少少佢食，反正狗一世物一世，而家唔食都唔知仲有無機會食！反正食咗唔會有大礙就OK啦！
　
我經常都同佢講，叫佢要加油加油，因為媽咪咪唔可以無咗佢！有時我心都會諗，我咁樣講又會唔會害咗佢呢？！可能叫佢早ｄ走，佢唔駛受咁多苦呢？！不過講到尾，我都係唔會放棄嘅！眼見朋友嘅狗狗有呢個病，點都可以拖番三兩年，我又唔信我嘅主席波會咁無用，咁快就俾呢個病打低！
　
不過我而家已經有計劃，就係幾年後主席波都去埋彩虹橋之後，我會暫停養狗啦！起碼等自己休息吓，可以放鬆心情咁去吓旅行，唔駛日掛夜掛屋企嘅寶貝！而且，照顧老狗真係會心力交瘁！見佢唔舒服，佢又唔識講，我又幫唔到佢時，果一種無助感真係唔識形容！
　
小寶貝主席波，媽咪咪最鍚你，你要努力加油奸爸嗲呀！

明明話香港今年冬天唔會好凍，又話乜嘢「厄爾厘諾」現象令到香港今年無冬天，點知呢幾日就凍到死死吓，唔係講笑，真係死咗！

...繼續閱讀

　
之前響Three Sixty買有機雞柳俾主席波食，因為間舖頭點都係唔方便，要個個星期出去的確有ｄ難，所以近呢幾個月都無再出去買。點知早幾日積琪介紹咗「永達」俾我，原來有一間咁嘅舖頭響屋企呢頭都唔知添！
　
最重要係價錢亦算合理呀！買一次嘢就可以入會，入會之後就有九折，即係下次我再去買，一隻只需$135，以有機雞嚟講算OK架啦！ ...繼續閱讀

新聞透視今日講香港嘅生死教育，講出中國人始終比較難面對死亡呢一樣嘢。香港嘅生死教育好弱，一般人一講死亡就覺得避忌，唔想提呢樣嘢！而我呢？我響我嘅網誌都講過幾次我對死亡嘅睇法，所以都唔再多提。
　
呢個節目其中一部份係介紹一個機構，主要係向老人家提出死亡唔係一件咩嘢特別事，其實人人都要面對，如果可以，點解唔自己去選擇埋一ｄ自己可能無能力選擇嘅嘢呢？即係，點解唔響在生之時，去安排一下死後自己安排唔到嘅事呢？！最有趣嘅係，有個機構搞咗一ｄ參觀團俾ｄ老人家，安排佢哋去睇棺木、壽衣，仲有就係即場試化「死人妝」！真係正到爆！真係有婆婆同伯伯去試架！幾好呀！起碼將來最後果個樣大概係點，自己都心裡有數嘛！女人都真係貪靚ｄ嘅！仲有一樣嘢好笑嘅係，機構安排ｄ老人家有group discussion，其中一個婆婆問：『「車頭相」係咪一定要黑白，唔可以彩色架？』小組入面另一個婆婆就搭咀：『乜嘢「車頭相」呀？』本來問問題果個婆婆呆咗一吓，我都以為佢唔知點答好，點知佢話：：『如果你連「車頭相」係乜都唔知就唔知點解釋嘞！』呢個婆婆嘅表情真係好好笑！
　
講到尾，生死教育其實就係教人要prepare for the worse！做人一定要有面對死亡嘅心理準備，萬一親人愛人跟自己永別，要覺得心安；而如果要離開嘅人係自己，亦都要覺得心安！要做得到，唯一辦法就係要明白死亡係必經階段，唔需要刻意回避死亡，肯面對，仲有就係珍惜眼前人！

今朝搭地鐵果時，又見到有人一邊搭車，一邊化妝！我都唔係第一次見ｄ人咁樣，不過每一次見到，都好佩服佢哋！一嚟佩服佢哋隻手定，可以由零開始，搭一程車就化一個全妝；二嚟就係佩服佢哋唔怕怪相，可以對住成車人化妝！
　
我真係唔明，化妝雖然唔係ｄ乜嘢唔見得光嘅嘢，不過我自己真係覺得，要對住ｄ陌生人咁樣化妝都幾肉酸！尤其是朝早返工果時，人迫人迫到都無乜空間，ｄ人都仲係可以咁樣化妝架喎！你話點可以唔覺得佢哋勁呢！
　
今日果個女仔一入車箱，就企去對面門邊開始化妝！最奇怪嘅係，佢又想避開眾人嘅目光，但係又要面對車箱嘅燈光，所以結果佢係打側身挨住門，面對住一個佢唔識嘅男人化妝！果個男人個樣都有ｄ尷尬！我見佢由本來背靠凳邊玻璃嘅pose，轉為側挨玻璃，避免望住人哋化妝！
　
果個女仔一邊化妝一邊周圍望，因為我坐響度無嘢做，所以久不久就望佢一眼，而就係因為咁，所以同佢嘅眼神都接觸過幾次！其實我見到佢化妝我真係無刻意望佢，不過視線範圍內真係無嘢睇，而我又唔想扮瞓覺，所以視線總會久不久瞄向佢！眼見佢去到搽mascara呢個step，即係應該都快完成啦！啱啱想擰開，佢又瞄出嚟瞄到我！嘻嘻．．．可能佢覺得我煩，搽完mascara之後，就擰向門嘅玻璃先搽唇膏！
　
好彩以我所知我ｄ朋友唔會咁樣化妝嘅啫！如果唔係我估我會笑佢囉！響屋企花十五分鐘化好妝先出門口唔得嘅，係都要迫人哋睇住佢哋變身，真係無解囉！

而家同主席波出去散步果時，成日都要叫住佢唔好行咁快，要慢慢行，如果唔係又會咳！其實佢而家已經行慢咗少少，可能真係有心無力啦！不過都仍然唔係慢游果種，所以安全計，我同佢散步都係勒住勒住架！
　
不過要咁樣行，先發覺原來慢步並唔容易！我呢份人係正正式式嘅「火燭鬼」，行路快，食飯快，講嘢快，飲啖水都快！尤其是響金鐘返工嘅日子，就算我想行慢d，都會被周邊嘅人嘅速度影響到我加快腳步！所以要我真真正正咁慢步，對我嚟講實在有ｄ唔習慣，總覺得雙腳嘅步伐怪怪咁！
　
日日都陪主席波散步，我亦慢慢開始懂得欣賞慢步嘅樂趣，原來慢步時，可以認真留意主席波行路嘅姿勢；原來慢步時，會見到橫過馬路嘅千足蟲，佢哋郁動嘅速度都幾快呀；原來慢步時，會見到雀仔響引水道捉魚。其實呢樣同人生都有ｄ相似！生活節奏太急速，經常忙這忙那，總會遺漏周遭嘅事情！
　
今年好快就過去啦！年初立下CHANGE嘅目標，老實講，認真change咗嘅嘢唔算多！不過早兩日接到消息，下年工作方面可能真係有change！不過呢個change係好係壞，仲要等ｄ時間先知！不過我有時會諗，人生都算過咗一半啦，下個月又生日嘞，可能真係應該放慢腳步，諗吓究竟有無ｄ乜嘢係我好想做而未做嘅呢？

今朝起身，就發現Dick仔痾咗兩次！我拿拿林執好ｄ尿尿墊啦！點知Dick仔一見到乾淨尿墊就即刻上去痾過！佢痾完我咪即刻執走囉！就係咁，痾咗幾次，每次都係ｄ咁多嘅唧！見佢咁樣，我梗係唔俾早餐佢食啦！點知八點幾仲嘔添！好彩只係嘔咗一次，我見係ｄ黃膽水咁嘅嘢，唔知係咪太肚餓呢？唉．．．真係唔知關唔關我煮果ｄ嘢食事！定還是係佢媽咪拎嚟果ｄ雞肉碎出事呢？因為我煮果ｄ嘢係尋日朝食，如果係唔妥，應該我尋日放工返嚟就已經滿地屎啦！不過無論如果，人哋個仔響我度住搞到肚瀉，我真係覺得過意唔去！
　
尋日見Dick仔出街咁緊張，我今日下晝就轉地方，俾佢出去花園行一陣！佢都輕鬆ｄ咁周圍聞，仲識得鬧鄰居添！不過佢返到入屋又瀉過！明明已經停咗成六個鐘無痾啦，無啦啦又嚟？！唯有餵佢食止痾奶嘞！好彩，我都仲可以餵到佢食！哈哈．．．我都怕俾佢咬架！因為我試過係好痛架！
　
黃昏阿芬打電話返嚟問佢點樣，痾嘔勁唔勁？夜晚七點幾嘅時候佢就已經無痾無嘔嘞！如果夜少少佢無再痾，我就煮ｄ飯仔俾佢食！個肚仔餓咁耐真係幾陰公架！

Dick仔呢幾日嚟咗我度住，今次唔似上次，一嚟得佢一個，無Mike仔陪佢，二嚟佢唔可以響我屋企四圍走，只可以響有限範圍內走動！不過自問範圍都唔算太細架啦！住幾日都OK啦掛！
　
Dick仔今次過嚟，我竟然發現咗ｄ怪事。今朝餵佢食早餐果時，我發覺到Dick仔有一個好大嘅問題，就係佢食緊嘢的話，我隻手伸埋少少佢都會woo我！真係R晒頭！點解一隻由細養到大嘅狗，食嘢都會咁alert！呢ｄ通常都係ｄ流浪過嘅狗先會發生架咋喎！本來，佢woo我我唔伸手埋去係無問題嘅，不過因為佢食到周圍都係，咁我唔幫佢執番落個碗果度，佢就會食剩好多架啦！但係我都唔係傻仔，佢咁樣，同佢硬鬥實在無謂，所以我都無再試圖伸手埋去嚕！ ...繼續閱讀