Muzikland

來自另一張廖志偉及伍木蘭合唱的小唱片﹐由南聲唱片出版﹐朱紹操監制。

一連多天介紹了多張南聲出版的45轉小唱片﹐發覺都是由朱紹操監制﹐間或有劉東領導﹐或有顧嘉輝編曲﹐可是唱片上的歌曲資料仍不多。有一點令到筆者很感興趣的﹐就是歌詞紙常會印有 Produced by Hong W. Quan 或者是 Copyright by Hong Wah Quan ﹐似乎所謂的 Produced by 並不等同中文的唱片監制或製作人﹐而因為曾印有 Copyright by﹐所以可能這位Hong Wah Quan先生就是南聲唱片的老闆﹐不過這名字只以英文拼音印在歌紙上﹐進一步的資料﹐實在有待更進一步去證明。

這一張小唱片﹐收錄了兩首歌曲﹐全由廖志偉撰曲。廖志偉在40-60年代於省港走紅﹐擅唱譜趣粵曲﹐常跟伍木蘭搭擋﹐合唱“幻境新歌”聞名。“幻境新歌” 始於日治時代﹐多屬諧趣式粵曲或歌唱式話劇﹐道具最多只得一桌一椅﹐佈景僅靠觀眾想像﹐件奏樂器也簡單﹐但內容多反映現實生活。他自撰曲目﹐也精於樂藝﹐吹彈拉打件件皆會﹐尤喜歡吹笛子﹐偶然也會在黃飛鴻電影中飾演蘇乞兒的角色﹐廖漢和為他的徒弟﹐他最著名的粵語歌曲為“海上風光”﹐1975年去世。

“風流伯父”由廖志偉主唱﹐歌詞內容是有季常癖的丈夫﹐背著妻子尋花問柳﹐可惜又讓惡妻揭發﹐甚至被罰。至於“講嫁還價” 則由廖志偉與伍木蘭合唱﹐講述一宗買賣愛情﹐有錢公子渴望得美為妻﹐可惜卻遇著拜金小姐﹐頓感無奈。

這張小唱片的拍和音樂員共有8位﹐分別是朱慶祥 (梵玲﹐即小提琴)﹑朱毅剛 (色士風)﹑劉紹榮 (洋琴)﹑廖森 (簫)﹑吳智強 (啤士)﹑ 梁桐 (啫士)﹑ 黎浪然 (大胡) 及何海棋 (板) 。

風流伯父 (年份不詳/南聲) Track List:
01 風流伯父 - 廖志偉
02 講嫁還價 - 廖志偉 / 伍木蘭


風流伯父﹕此曲調子非常熟識﹐1952/1960年﹐梁醒波與鳳凰女的諧趣粵曲“光棍姻緣”﹐ 便曾使用這旋律﹐據歌詞顯示的資料﹐原曲為“青梅竹馬”。
撰曲﹕廖志偉

充生晒做闊佬 一日西裝我換七套
你估我晚晚走去邊度 走去跳番幾匹舞
花式 各好 有的慢狐步 又有掟的煲舞
快慢有鼓聲報 的確摩登夾時毛
最好跳的查查舞 確係暈浪到兼生藕一口泡
重有的跳加叻蘇 你我都一定好
有的兩個起勢咁擰 有的開心共擁抱
有對肥共瘦 參差兩個咁高
個對我眼微露 我就魂又無
但重笑一笑 更重骨都無
我最羨慕 佢似足珍羅素 佢似足珍羅素
添晚要早的到

當衰就爆煲 俾隻老虎乸知到
佢發覺我走私路 佢猛呷的酸薑醋
但跟蹤 我去跳舞 佢心妒忌 邊個把消息報
秘密俾佢知穿到 慌得我震熬熬
睇見佢真恐佈 嚇到我魂又無的確真倒灶
佢話見到絲有蘇 同我兩個攪住跳舞
話我兩個夠煙紉 但又鬧我花心學到乜都好
又鬧我唔認老 攪到鬼風騷
我見我老婆怒 惟有從實報
不敢半吞吐 一於㗳抵個惱
佢重更魯蘇 手揸雞毛掃 手揸雞毛掃
打到我跳的矮仔舞

**********

講嫁還價
曲﹕佚名
詞﹕佚名

(小曲引子) 阿蘭 呢只訂婚戒子等我仝你載喇
(旦白) 咪住 講妥先 唔講話結婚咁大件事啦 買斤菜都怕要講吓價卦
(生白) 哦 得得得你會講價我會還價即 即管講啦
(旦曲) 你一心愛矯花 要先商量我才願嫁
(生插白) 騎騎有商量就得啦 怎商法
(旦插白) 我的條件怕你唔敢接受啫
(生唱) 自誇厚身家 得卿願嫁 任你點花
(旦插白) 敢係唔係即 (主插白) 無研究 隨便你駛
(旦唱) 別墅紅牆綠瓦 傢俬優美時代化裝飾雅
(生唱) 還重汽車一年換三架 坐卡得叻共堪霸
(旦插白) 你真係咁捨得既拿 呃我卦
(生插白) 唔係 最緊要你歡喜即
(旦唱) 有陣陪同看賽馬 一切全都美式化
(生唱) 一於照卿話 更奉陪下午茶
(旦唱) 先先找番火鑽十數卡
(生插白) 哦 十數卡火鑽呀
(旦插白) 唔係多呀 (生插白) 唔多唔多 再講啦
(旦唱) 婢僕兩打 至夠聲價 為了文雅 學作晝
(生唱) 快話齊 待我哩還價 共你嗟商吓
(旦唱) 重有家裡用調節機裝番幾架 問明你順從我就願嫁
(生插白) 嘩 你食左山渣麥芽咩 減為一折得唔得呀
(旦插白) 一折衙 你好行都得叻
(生唱) 買賣愛情 你全唔化 亂開價
(旦唱) 拜拜 因我艷容似仙不憂嫁
(生唱) 呢隻胭脂馬 令我怕



筆者相關文章介紹﹕
梁醒波/鳳凰女 - 光棍姻緣
廖志偉/鄭幗寶 - 鐵咀雞
朱頂鶴 / 廖志偉 / 鄭幗寶 - 睇花燈 / 揀女婿
朱頂鶴 / 伍木蘭 - 桂姐買花 / 賣剩蔗
廖志偉 / 伍木蘭 - 咪貪口爽 / 假細心