Muzikland

新馬師曾另一套劇目“沙三少”﹐於1951年拍成電影﹐由他與白雪仙合演。

故事改編自清末發生於廣東佛山轟動一時的真人真事﹐朝廷命官沙鳳翔為人正直﹐奈何號稱沙三少的獨子沙安伯生性風流﹐不單對傭人銀姐動起色心﹐並且因此謀殺她的丈夫譚阿仁。事後為仁母揭發到衙門告狀﹐沙鳳翔不能侚私﹐惟有把兒子送到刑場。沙三少待斬之際﹐方才覺悟。

筆者少時聽的是翻版卡帶﹐還是數年前才買來CD。沙三少的兩段選曲“情挑銀姐” 與“臨刑”﹐由新馬師曾與鍾麗蓉合作灌錄成唱片﹐翻查資料﹐唱片於1969年由永祥唱片出版﹐並於1990年出版CD。


沙三少情挑銀姐

(沙三少夢囈白) 銀姐呀﹐銀組﹐我想得你好辛苦呀銀姐﹐銀姐你快的入黎陪住我啦銀姐﹗(銀姐白) 哎也就黎嘞﹗㷛好的藥至得架嗎﹗(三少白) 你救命呀﹗ 我就黎死嘞﹗得左﹗得左﹗(乙皮戀檀) 我在夢裡猶喚叫﹐詐病又詐得妙﹐痴心一片我為愛嬌﹐為她種情苗﹐願化同命鳥﹐樂也逍遙。我詐病又詐得妙﹐須知三少痴纏為愛阿嬌﹐我心愛慕﹐去用計桃﹐盼她今晚赴約藍橋。佢美艷俏妙﹐我相思朝晚思量奪佔阿嬌﹐我想計劃﹐用意表﹐與她身葬
情潮。我愛她廿寸腰﹐盼她慰寂寥﹐痴心願長護照﹐實覺相思難療。(故意呻吟白) 哎也
﹗銀姐﹐我好辛苦呀﹗你快的人黎服侍我好嗎﹖(銀姐應白) 哎也黎啦﹗(小鑼相思頭﹐捧藥上唱西皮) 又聽少爺喚叫﹐我聽完又試眼眉跳﹐佢叫完又叫我心兒焦﹐郎為了貪色笑﹐晚晚捱通宵﹐佢真懨尖﹐幾時得到第朝啫﹗亞三少爺﹐佢曉詐嬌﹐聲聲呻﹐揾心藥療﹐我明知佢意表。(入介白) 哎也三少﹗(三少白) 哎也銀姐乜你咁耐至得架﹗真係病死人喇﹗銀呀﹗你快的同我泵泵骨﹗我唔知點解梗係周身好似唔囉唔戀咁樣﹗黎啦﹗(銀姐白) 三少呀﹐碗茶啱飲喇﹐飲完佢然之後至泵骨啦好嗎﹖(三少白) 你話好咪好囉﹐哎也乜的藥咁苦架﹗哎也我唔飲呀﹗(銀姐白) 咬也唔飲點得既呢﹖飲左佢就好架嘞﹗ (三少白) 咁呀﹗除非我要你灌我。(銀姐白) 哎也點得既啫﹗被人睇見有乜好意思架﹗(三少白) 唓﹗而家正係兩公婆見鬼﹐有邊個睇到啫﹖唔怕喇﹗黎啦﹗(禿頭起﹐龍飛鳳舞引子) 哎也黎啦﹗(銀姐接唱) 黎喇﹗你何必偏要學詐嬌啫﹗(三少接唱) 求嬌將我盡照料﹐(銀姐接) 你何必監我又灌藥﹐(三少接) 為因你細心將我護照。(二王下句) 你睇我成身都發緊燒﹐你睇下我心肝卜卜跳﹐我覺得陣寒陣熱﹐真正係痛苦難描﹐你對我服侍慇懃﹐真係情非少﹐睇下病到五顏六色﹐至有求你灌藥醫療。我亦知過份既要求﹐幸勿視作心存話我不肖。(銀姐口古) 三少﹐雖然係啫﹗若果亞三少奶佢知道點算啫﹗梗係責罰我既噃﹗個陣我水洗都唔清﹐而且罪名不少。 (三少口古) 唓﹗佢係杉木靈牌之嗎﹐祇要三少喜歡﹐點到佢干涉呢﹗好心你咪咁扭擰刁蠻喇。(銀姐白) 唔﹗咁呀﹗又好啦﹗(海葉春) 沙三少﹐你做人膽大招搖﹐真冤孽﹐你存心輕挑﹐暗裡表情挑阿嬌﹐我被情絲饒﹐(三少接) 今晚夜飽餐秀色﹐想博亂欲擁蜂腰﹐惟盼得照料﹐惟盼渡藍橋。(銀姐白) 三少﹐唔冷唔熱架喇﹗個碗藥啱飲架喇﹗乖乖地飲左佢啦﹗(柳搖金) 飲左少爺就退燒﹐包保得奇效﹐還望你﹐即刻飲去母用治療。(序白) 就飲就好﹐唔過明朝早。(三少序白) 你灌我﹐(按唱) 請看﹐我既病情好緊要﹐咁我望嬌﹐用心灌藥來照料﹐(銀姐白) 哎也﹗點灌啫咁醜。(三少續唱) 你無用怕﹐含藥灌我病能消﹐(序白) 咀對咀唔係得囉。(銀姐接唱) 怕你嬌妻見﹐個陣時就不得了架嗎﹗(三少序白) 閂埋度門邊個見呀﹗(銀姐唱) 啊﹗ 原來你成晚用情挑﹐居心真難料﹐(三少唱) 我忙力抱﹐狠一吻呵奴借藥療。(銀姐一才羞介白) 哎也﹗我唔制﹗監硬錫人個面珠仔噃﹗我唔制呀﹗(三少俏皮白) 唏﹗當堂為都無晒喇銀﹗(禿頭起醉頭陀) 騙得伊人一吻真高超﹐寧舍香甜真係俏。(序白) 一吻治相思﹐真係香咯﹗(銀姐序白) 憎鬼死你呀三少﹐(唱) 你頑皮精乖又詐嬌﹐飛擒大咬重呱呱叫﹐(白) 求人灌藥為名﹐錫人地個面珠仔﹐我唔制呀﹗(三少笑介白) 唔出綽頭又點索得到你噃﹗ (接唱) 你夠風騷﹐夠嬌嬈﹐我愛你情深要慰寂寥。(序白) 我好愛你架銀姐﹐你知唔知道亞三少既心事﹐(銀姐白) 我唔制呀三少﹗(唱) 我有夫君﹐枉你種情苗﹐你家有賢妻﹐咪咁無聊。(先鋒鈸欲下介) (三少食住先鋒鈸攔介白) 咪行住﹗大膽﹗(長花下句) 你知否我為你一見已情牽﹐都暗被情絲繞﹐我都愛你月貌花容人窈窕﹐正係相逢恨晚續情潮﹐你好比彩鳳隨鴉都辜負你青春年少﹐你應享榮華富貴﹐(一才) 不應為人庸婦我都暗憐嬌。花吐艷﹐(一才) 蝶憐香﹐(一才) 我幾番勸你仳離﹐改嫁呢個多情既三少好嗎﹖(銀姐白) 哎也三少﹗(小曲) 芳心早已付於三少﹐春宵裡暗比翼同渡鵲橋﹐甜言和蜜語將愛表﹐(三少唱) 情堅金石﹐我為戀嬌嬈。(銀姐唱) 你戒就戒輕挑﹐(三少唱) 我愛﹐愛阿嬌﹐(銀姐唱) 郎熱情相邀。(三少唱) 把佢芳心挑逗了。(銀姐羞白) 哎也﹗唔得既呢三少﹐被人知道點算啫﹖(三少白) 唔怕﹗天大事情都有三少負責﹐放心啦﹗(銀姐花半句) 我笑滅銀燈羞解丁香帶﹐(三少花半句) 咁我都未曾真箇已魂銷。

**********

沙三少之臨刑

(大笛水底魚﹑監斬官﹑二劊子﹐縣兵以籮抬安伯「衣斬簽枷鎖」上) (甲差口古) 哼﹗三少﹐你腳軟哩﹗你都有咁耐風流有咁耐折墮咯﹐攪到我地要揾籮黎抬你去行刑﹐你都疊埋心水去投胎罷啦﹗你最遲都係等到三聲炮響。(乙差口古) 三少﹐你都抵有今日嘞﹐恃住老豆既勢力黎蝦人蝦物﹐有王法明噃﹐到今日循環果報﹐等陣五時三刻﹐你便要刀落人亡。(三少重一才慢的的悲咽白) 循環果報﹐刀落人亡﹗(長嘆一聲) (乙反南音) 唉﹗真個是天有網咯﹗我既罪無疆﹐一回懺悔﹐一斷腸。誰叫我一念貪淫﹐今日招罪降。萬惡淫為首﹐我錯戀杏花香。可憐我大好家庭﹐竟是由我喪﹐上有慈祥父母﹐下有淑德一房。怎料個嬌俏
既女傭﹐銀姐引得我情放蕩。記得我幾回黎挑逗佢﹐都好比粉蝶憐香﹐個陣話妾愛又話郎情﹐都真係冤孽賬﹐講乜野共把風流享。(二王下句) 所以我橫刀奪愛﹐不惜辣手殺害佢既夫郎﹐到今日果報循環﹐逃不脫灰灰天網。(白欖) 唉﹗想我就沙安伯﹐做人就太過辣撻。我原本係有嬌妻﹐又何必做成咁鬼賤格﹐我恃住老豆做千總既大老爺﹐我好人唔做學古惑。亞媽佢縱到就我出骨﹐索野就全靠師爺幫我行策劃。就請著亞銀姐黎做我近身﹐點不知啱啱遇著呢個脂粉客。我用盡千方百計去偷情難怪人個老公梗係心胸窄。淫人妻子模係笑呵呵喇﹐不管果報循環我行暗殺﹐殺人墳命理本該﹐奉勸世人咪學我沙安伯﹐原來一舉
一動有鬼神知﹐點知瞞得世人﹐唔呃得菩薩。做人要磊落就與光明﹐千祈唔好就學會我咁衰格。(催爽) 我勸句就好青年﹐食淫就會犯法﹐小則就影響前途﹐大則會將頭殺﹐船到江心就補漏遲﹐須知所作所為就都要負責。(反線中板下句) 我父大義滅親﹐綁子到公堂黎認
罪﹐佢甘願毀滅那倫常。所謂慈母多敗兒﹐祇曉得慣養嬌生﹐佢將我縱成咁放蕩。我死不足悲﹐可憐閨中個淑婦﹐從此為我孀守淒涼。(花) 我人將死﹐(一才) 懺前非﹐(一才) 無奈都要等候個個無常帶我離世上。(哭相思介) 趕住去死咯﹗(快沖﹐沙母﹐沙妻捧茶菜上介) (沙母喊口歌) 安伯﹐安伯呀安伯﹐唉﹗仔﹐仔呀仔﹗我見你引首待刑倍令娘悲愴仔呀﹗重祇望你開枝散葉﹐點估到如此冷酷既收場。(悲咽白) 亞家嫂﹐你快的攞碗魚翅被佢食啦﹗(三少咽白) 唉﹗到呢個時候﹐乜野我都食唔落咯﹗媽﹐(沙母白) 哎也﹗唔得! 你唔食點得架仔﹗你做隻飽鬼都好過做餓鬼呀嗎﹖你重要飲飽食醉你就乜野都唔見痛苦架喇你﹗(三少白) 唉﹗就算而家龍肝鳳膽﹐我都唔想食咯媽﹗我祇望亞銀最後見我一面﹐我就死得心甘情願﹐(沙母白) 你想見亞銀。 (三少白) 係﹗我重有除非佢要餵我食飯我就食嘞﹗(沙妻花下句) 怨郎至死猶不悟﹐(一才) 臨刑尚望一見那禍水紅妝。我為妻子復何言﹐(一才) 估不到郎在彌留使我還失望。(沙母白) 亞安伯﹐乜你仲想見吓亞銀呀﹐好啦﹗你臨死呢個要求我答應你﹐好彩佢跟理一齊黎既啫﹗亞銀姐﹐你快的黎見吓三少啦﹗(銀姐白) 黎咯﹗三少﹗(沙母白) 亞銀﹐我地勸極佢都唔肯食﹐佢話點都要見吓你噃﹗佢要你餵佢食呀﹗亞銀﹐你三少最後既要求唔通你咁都忍心拒絕佢咩﹖(銀姐白) 好啦三少﹐你食左佢啦﹗(三少白) 銀﹐你餵就食咯﹗(銀梨花慘淡經風雨) 我奉茶湯﹐但願你開懷歡暢﹐強飯還須莫個悲愴咯﹗且進佳餚和美釀﹐(三少唱) 等我拂羹飽翅飯﹐食飽臨泉壤。(白) 我都就死咯﹐重食黎做乜鬼野銀﹐(銀姐白) 食左佢喇三少。(三少唱) 今時應受勸﹐之不過食也神迷惘咯﹗(銀姐唱) 待我奉敬葡萄﹐醉後魂歸天上。(三少苦笑白) 我呢一種人﹐點會魂歸天國﹐祇有打落十八層地獄就真囉﹗(小曲) 接罷葡萄神已傷﹐醉後魂歸心也安。(銀姐唱) 再奉敬一杯﹐我痴郎自暗傷﹐盼君你能見諒。(三少唱) 往事嘆息孽由自作我貪色相﹐我罪大難忘。(銀姐唱) 想到前塵我累你個貪花漢﹐請把往事遺忘。(三少唱) 悔我橫強﹐平添我罪狀﹐誤己誤人恨朱央。 (銀姐唱) 死別永參商﹐三杯飲完聽大砲響。(創子喝白) 時辰到。(眾同哭相思介) (三聲炮響介) (快雁兒落劊子殺三少介) (沙母暈倒介) (沙妻﹐銀姐哭相思介) 夫郎﹐三少﹐(銀姐在下句) 默禱孤魂歸極樂﹐陰陽阻隔恨茫茫。



筆者相關的介紹﹕

新馬師曾/吳君麗 - 萬惡淫為首
http://blog.roodo.com/muzikland/archives/1160270.html

新馬師曾/鄭幗寶/半日安 - 一把存忠劍
http://blog.roodo.com/muzikland/archives/1164592.html

新馬師曾/鍾麗蓉 - 朱賣臣
http://blog.roodo.com/muzikland/archives/1167290.html