Muzikland

朱賣臣是筆者兒時聽的卡帶﹐感覺上談不上是很有名的劇目﹐不過數年前購買的一批粵劇CD﹐它便是筆者的選擇之一﹐可能是兒時的一些情意結吧。

此劇於1956年曾拍成電影﹐名為“朱賣臣衣錦榮歸” ﹐由新馬師曾與鳳凰女合演﹐故事乃民間故事﹐講述窮書生朱買臣潦倒﹐妻崔如花不願捱窮﹐迫寫分書而去。其後朱氏高中狀元歸來﹐而崔被人玩弄後淪落街頭乞食。崔氏欲與朱賣臣繼續前緣﹐朱氏要求她馬前重收覆水﹐奈何覆水難收。

翻查資料﹐此曲於1968年分別有兩個版本出版﹐第一個是與鳳凰女合唱的“朱賣臣衣錦榮歸”﹐可能是電影原聲帶﹐由港運唱片出版。另一個是與鍾麗蓉合唱的“朱賣臣”﹐由槍瑛唱片出版﹐與其後1980年永祥唱片出版的資料相同﹐ 所以可能是永祥唱片其後購買了版權吧﹐而CD於1990年出版。

鍾麗蓉﹐原名鍾麗容﹐擅唱紅線女腔﹐有新紅線女之稱。她與擅唱芳腔的李寶瑩﹑及何非凡腔的黎文新﹐同拜粵樂名師馮華門下﹐早於50年代已灌錄唱片。


朱賣臣之迫寫分書

(如花賣相思) 我錯嫁賣臣嘆倒運﹐我滿心苦困﹐佢兩餐都不繼﹐自稱君子樂貧﹐哎也我最怕係捱窮﹐心真不甘﹐我暗裡結識情郎﹐立心改緣別人。(白) 哈個衰佬呀咁抵死喎﹐日頭落崗喇都重未斬到柴番黎添喎﹐好﹐等一陣間呢我借頭借路黎迫佢離婚至得咁衰喎。(賣臣板面負新上唱) 唉真係悲失運咯﹗二豎侵﹐今朝我重發緊冷﹐帶病入山行。真枉我滿腹珠磯﹐也要捱飢餓。怪不得話百無一用咯就是書生。空負我飽學多才﹐竟把生活困。祇為點金無術﹐我甘作採樵人。不幸家有一個蠻妻﹐可嘆佢難安份。(二王下句) 被知把虛榮貪慕﹐不知所謂淑婦安貧。唉真個是柴米夫妻﹐我事事強為啞忍。(白) 哎也﹗亞如花。(如花白) 咩呀﹗捨得躝番黎嘞咩﹗(賣臣白) 唏你咪開口就鬧咁陰功呀﹗唏我今日唔知點解斬柴﹐硬係成日都見得沾寒沾凍咁樣﹐都唔知幾辛苦呀﹗哎也﹗亞花﹐唔該你同我走去藥材舖執劑廿四味俾我飲﹐賒住先好唔好。(如花一才白) 哎也執藥飲添呀﹗哼﹗好心你咯﹗無錢仲病乜鬼野啦﹗(賣臣白) 我都話賒啦嗎﹗(如花白) 我話之你死呀﹗唔賒。(一才) (賣臣白) 啊亞花﹐乜咁樣同你做夫妻﹐叫你同我賒劑藥黎飲吓都話唔得﹐你都唔好咁絕呀你。(如花白) 好絕咩﹗(一才) 哼無錢咪學人病呀衰佬﹗我睇見你就衰喇真係﹗(賣臣白) 哎也乜你咁都噏得出架花你﹗(賣臣泣殘紅) 為何待我咁狠心﹐一旦當路人。(如花接) 你寒貧咯﹗(賣臣接) 賒劑藥我飲啫﹗(如花接) 執藥要銀既﹗(賣臣接) 嘆貧窮在路邊無人問﹐苦煞你良人。(如花接) 你個病壞災瘟﹐更令你妻捱窮受困。(賣臣接) 艱辛不過暫強忍啫﹗(如花接) 我飢餓都實惡忍﹐不再受你呃。(賣臣反線中板) 妻莫發牢騷﹐須知小人窮思濫﹐而我則君子安貧。(如花白) 無錢就無得講喇﹗(賣臣續) 守得雲開見月明﹐(如花白) 我等你有錢呀我都老喇﹗(賣臣續) 終有日喜極泰來﹐勸妻你應宜守本份。貧賤夫妻百事哀﹐縱使牛衣相對泣﹐衹贏得煩惱加深。(花) 達人應知命﹐他日夫貴就便妻榮﹐開講話先苦後甜﹐唉你都休怨恨好嗎﹖(如花白) 哼﹗唔該你喇﹗你呢幾句說話﹐我聽都聽到厭嘞﹗(中板) 呢個現實既人生﹐我不能心存幻想﹐等到你高中﹐帶挈我做夫人。就算你學姜子牙﹐到晚年富貴榮華﹐可惜我已經都無命等咯﹗好彩我重年青﹐憑我既花容月貌﹐結識一位理想俏郎君。(七字清) 有勢有財英俊甚﹐誰叫你糧無隔宿太清貧。(花) 佢可以助你金百両﹐惟是要離婚﹐精既你就當堂允肯。(白) 喂俾錢你離婚喎﹗要唔要呀﹐要左佢啦窮鬼。(一才) (賣臣白) 哼﹗呢的咁既衰錢﹐就算我餓死街頭我都唔要。(如花白) 哼唔要就慳番。(賣臣下西岐) 拒絕錢財我難退婚﹐盼望如花休變心﹐呢你是我既嬌妻﹐焉能另再婚﹐嫁夫縱是窮亦要安份。(如花接) 你確實養妻都無能重弊過一碌棍﹐鬼願共你捱貧。(賣臣接) 唉我不過暫時累你遭苦困﹐終有日大富來臨。(如花接) 請問你何時﹐至得你窮鬼會轉運﹐我無咁得閒再為你等。(賣臣接) 妻呀要想真。(如花接) 想去想來都要另配婚。(賣臣白) 亞如花﹐你須知女慕貞潔﹐自當從一而終至好呀﹗你何必又去貪慕虛榮﹐我話俾你聽呀﹗你千祈唔好俾個的萬惡金錢累到你一失足成就會千古恨。(如花白) 喂我而家唔得聞聽你講古架喎﹗要你寫分書﹐(一才) 脫離夫妻關係﹐大家各行各路﹐以後休管女嫁男婚呀﹗(賣臣白) 哎也好好﹗須則夫妻本是同林鳥﹐惟是大難臨頭都衹有各自飛﹗好啦﹗我唔寫都唔得嘞﹗(如花白) 快的寫啦﹗(賣臣妝台秋思) 下筆痛苦已萬分﹐寫分書令我斷腸甚﹐小書生抱恨痛心﹐杏已出牆羞不禁﹐家聲破真不幸﹐我帶病都更被刺激深﹐拆散鴛盟﹐恨賦仳離﹐絕愛分書寫了令我長懷恨。(如花白) 寫完未呀﹗(賣臣白) 嗱﹗寫好嘞﹗(如花白) 俾我睇過先。(看信) 呀得嘞﹗咁樣唔該晒你喇喎朱先生。(賣臣白) 你死啦你﹗(如花花半句) 哎也﹗本來我都好唔捨得你架﹗(賣臣接) 我真多謝你呢個無廉崔氏﹐你刺激起我今後我都奮鬥去做人。

**********

朱賣臣之馬前覆水

(如花叫化白) 福心啦﹐好心啦﹐司憐施捨吓呢一個乞兒婆。(木蘭從軍) 一錯於當初﹐天罰我遭橫禍﹐不該作孽多﹐唉到今受折磨﹐自悔淫賤有因果﹐乞米懲罰我。(白) 乜咁多人呀個便呀﹗(賣臣七字清中板) 寒酸洗盡換綺羅﹐金殿掄元欽點我﹐南宮折桂喜如何﹐衣錦榮歸﹐(花) 我接受幾許官紳黎道賀。(如花白) 哎也原來衰鬼高中番黎﹐真係好囉﹗(花下句) 見前夫﹐佢榮歸衣錦﹐使我感慨良多。我要重相遇﹐認夫郎﹐望佢海量汪XX原諒我。(衙差白) 擋道﹗(賣臣口古) 哈﹗本狀元衣錦榮歸﹐一路上鳴鑼喝道﹐你還不閃避在兩旁﹐還敢叫苦連聲﹐攔途於道左呀又﹗(如花白) 狀元郎﹐小婦人正是狀元爺既前妻崔氏﹐(介) 今日我攔途相認﹐望夫你原諒我當初啦﹗(賣臣白) 啊﹗乜你係崔姑娘咩﹗(如花白) 係呀﹗(賣臣白) 唔係掛﹗(長花下句) 呢佢貌美又年青﹐艷似芙蓉花一朵﹐睇你垢面蓬頭休騙我﹐你鶉衣百結都似個乞兒婆﹐佢都改嫁得如意郎君﹐當不愁折墮﹐可見你分明撞騙﹐(一才) 你冒認個位崔氏嬌娥。(如花白) 唉﹗我真係你個老婆黎架﹗(賣臣續) 待我傳口令﹐驅逐呢個叫化婆﹐我且恕你無知小過。(白) 人黎趕﹗(如花白) 哎也﹗唔好呀﹗(衙差白) 喂﹗扯扯扯扯﹗走呀﹗(如花白) 哎也﹗咪咪趕我啦官長﹐你聽我講啦﹗(白頭吟) 請君休發怒火﹐見否我珠淚滂沱﹐崔如花今知錯咯﹗ 請收容免令我污聲播。(白) 狀元郎﹐(賣臣白) 做乜野﹗(如花白) 昔日我千差萬錯﹐錯在我貪慕虛榮﹐(賣臣白) 係咩﹗(如花續) 後來慘遭遺棄﹐(賣臣白) 陰功咯﹗(如花續) 今日回頭覺岸﹐我望你冰釋前嫌﹐許我自新﹐收容復合既啫﹗(寶臣白) 你又點會你折墮到會做到乞兒娘呀又﹗(如花白) 你原諒我啦﹗(賣臣接) 你得金錢幫助﹐更有情郎互助﹐風流樂享點會來求我﹐我未能助。(如花白) 原諒我啦﹗(唱) 唉憶仳離﹐寫分書﹐真個絕情抵我受折磨﹐我求郎你諒我﹐當初為貪快樂誰料惹橫禍﹐我悔效蛾兒撲火﹐自悔尋求惡果。(賣臣接) 卻原來係我猜錯﹐你確係如花當真折墮咗。(如花接) 唉因果報得實太苛﹐天公太苛。(白) 原諒我一次啦狀元郎﹗(賣臣白) 哼﹗你都何必怨天尤人﹐你怨吓你自己所作所為罷啦你﹗(如花白) 我都知道自已唔啱架喇﹗(賣臣長二王下句) 今朝磨折都未為苛﹐你一步行差就會千日錯﹐記否分書黎迫寫﹐去另結絲羅﹐你為著貪慕虛榮忍心拋棄我﹐你今日反遭人遺棄﹐可證得果報無訛。你原可夫貴妻榮﹐偏耍弄到今時得咁折墮。 (如花反中板下句) 悔當日木匠擔枷﹐到今朝自食其果﹐我慘遭遺棄受災磨。紅杏暗出牆﹐都估話可託終身﹐半載賦同居﹐一朝拋棄我咯﹗一朵好名花﹐都不幸風霜曾歷盡﹐珠黃人老斷腸多。(花) 淪落後﹐幸相逢﹐請念結髮情親郎助我。(白) 原諒我啦﹗(賣臣白) 哼﹗如果你當初係肯念結髮之情既﹐就不至到有今日之禍啦衰野﹗(撲仙令) 我為誰人家傾破﹐你重敢求吾助﹐(白) 而家鬼睬你呀﹗(如花白) 麻麻地啦﹗(賣臣白) 唔睬﹗(如花白) 你原諒我啦﹗(賣臣續) 天公責罰賜災磨。(如花接) 我好比羔羊求脫禍。(賣臣白) 今日正係果報循環﹐若果要得你既都唔係人呀﹗(如花接) 但願重圓破鏡喜諧和。(賣臣接) 你好比娥兒沖火焰過喇﹗(如花接) 又好比風捲殘花落愁河。(白) 唉不若我為奴為婢﹐若果你唔應承我既﹐我就死左去喇﹗我死喇﹗(賣臣制止介) (花下句) 唉﹗睇佢要死要生難拒絕﹐不若我思量妙計暫延娥。(白) 好﹗嗱﹗(花) 我要你馬前覆水都若重收﹐(如花白) 馬前覆水呀﹗(賣臣續) 縱使係無理要求也當許可。(白) 亞如花﹐嗱你考慮清楚喎吓﹐馬前覆水﹐我要你點滴重收﹐倘有半點失落呀﹗都算你輸架喇﹗(如花白) 咁呀﹗咁等我求吓隻馬大哥幫忙我之得囉﹗(如花續) 禱告神祈助我收覆水﹐舊時琴瑟再諧和。叫句馬大哥﹐你切不可擺尾搖頭﹐否則就難圓鏡破。(賣臣白) 中軍﹐攊水黎﹗(奉水介) (如花白) 嗱﹗亞馬大哥﹐你有靈有性﹐你千祈就唔好郁呀﹐郁親就載唔番既嘞﹗(撥水馬叫介) (白) 哎也﹗死咯﹗衰馬﹑病馬﹐你真係唔爭氣咯﹗(賣臣三搭節花下句) 唉正係馬前若可收覆水﹐咁就平陽大地都亦可變江河。呢朵殘花不配狀元妻﹐我欲破鏡重圓天不助。(白) 人黎﹗打道﹗(下介) (如花白) 哎也﹗唔好走呀﹗乜你真係唔愛我呀﹗(哭相思) 唉真係慘咯﹗(花下句) 一念虛榮遭天罰﹐我何必要偷生人世受災磨。



筆者相關的介紹﹕

新馬師曾/吳君麗 - 萬惡淫為首
http://blog.roodo.com/muzikland/archives/1160270.html

新馬師曾/鄭幗寶/半日安 - 一把存忠劍
http://blog.roodo.com/muzikland/archives/1164592.html