靚 B 太生活札記

今晚, 我地一行六人到旋轉餐廳飲嘢. 每隔半個鐘有 live music. 有位 Julian 點咗首 I'll Always Love You 俾 Joelle 聽, 唱歌嗰位姐姐十分落力, 尤其係最尾嗰句: "I will always love~~~ from Julian to Joelle, you~~~" 令我同老公忍唔住大笑. 而 Joelle 亦回點咗首情歌俾 Julian, 喺走嗰陣我地決定去望吓 Joelle and Julian, 點知除咗我地得兩枱, 一枱係啱啱到所以一定唔係, 而另一枱係兩個男嘅... 唔知係唔係唱歌嗰位姐姐同又彈又唱嗰位哥哥互點呢?

各位有意去凌宵閣摩天台 (即係睇風景嗰度) 請注意: 而家上去睇風景要收錢!!! 話說有朋自丹麥來, 咪帶佢地上去睇風景囉, 點知臨上最後一層扶手電梯嘅時候俾人截住, 問我地買咗飛未. 咩飛呀? 佢話而家佢地要收二十蚊入場費, 仲話之前已經向外界公佈咗 (佈咩呀? 我上年九月去都唔駛收錢, 之後我從來無見過報紙有賣, 我上網查亦無咁嘅 announcement, 令我極度懷疑佢係大我). 結果? 迫住俾囉, 但係好老實, 話我孤寒都好, 我覺得佢地咁樣好離譜囉, 下次去山頂廣場算數. 雖然好嬲但係都影咗相:

尋日公司 Outing, 大家出海去. 十點開船, 五點幾落船. 天氣有幾好? 睇吓靚 B 太隻手顏色就知喇:



驚呢? 我同型 B 生仲要唔係曬足全程, 真係為今次 outing 留下一個好強嘅印記.

今日嘅目的地係山頂, 靚 B 太放工後搭地鐵去金鐘會合型 B 生同 B 生媽咪, 然後喺沙塵滾滾嘅金鐘廊對出等 15 號上山頂, 等候時間耐, 塞車時間仲耐.

上到山頂先揾地方醫肚, 發現山頂廣場同凌霄閣嘅餐廳選擇實在係唔多. 途中經過 Forest Gump-themed 嗰間餐廳, 仲見到模仿 Forest Gump個人添. 喺真係無乜選擇嘅情況下我地去咗喺凌霄閣 P2 層嘅 Suzuki Cafe (見另一 entry).

食完之後我地去咗凌霄閣嘅觀景台睇風景, 今次係凌霄閣裝修咗之後第一次去, 有 D 期待, 可惜我一上去就淨係諗到一樣嘢: 我一定唔會再去 (雖然我估最後我都有可能會再去) !! 佢地用高至心口位置嘅玻璃做牆, 景觀實在係一流, 雖然天氣唔係好好但係都睇得好清楚, 連九龍都望得好清楚, 真係超 impressive 架. 可惜我係超畏高, 實在唔敢行近個 edge 度, 再加上好大風, 我只有靠 "牆" (另一塊正常高度嘅玻璃) 行去出口等老公同老公媽咪. 其實唔止個觀景台, 凌霄閣嘅全個設計都係超唔適合畏高人去仕參觀. 新嘅設計好靚, 睇到嘅景真係一流, 但係畏高嘅我真係無福消受, 全程淨係得個驚字... 如果你唔怕高就去睇啦吓!

老公媽咪到訪, 我地尋日帶咗佢去睇大佛. 之前睇報紙話昂平 360 試業, 諗住試吓都好, 點知打去熱線話未開, 所以都係用最原始嘅方法: 由中環搭船去梅窩, 再轉巴士去昂平. 因為中環塞車搞到我地 miss 咗班船, 所以我地要等成四十分鐘先上船. 撞啱嗰架係快速船, 真係唔知叫好彩定唔好彩, 快速船係快, 但係我搭親都暈船浪... ...繼續閱讀

我, 老公同老公媽咪三個咗人去公園兩次, 兩次我都被蚊咬, 佢地就咩事都無. 尋日去大佛已經做足準備咗噴蚊怕水, 一如以往 D 蚊乾淨係咬我, 仲要陰濕到咬我手指! 哼! 你好嘢!

話說上回講到我地得到 free upgrade, 坐商務客位由墨西哥飛去加拿大, 今次比以前好, 原因唔係個 free upgrade, 而係可以同老公一齊飛, 唔駛一個孤伶伶. 順利抵達加拿大, 因為安全理由所有 transit 嘅乘客都要拎埋 D hand-carry 落機喺 transit-room 度等, 因為要等超過一個鐘, 我同老公就開始玩啤牌. 點知玩玩吓我竟然俾人叫名! ...繼續閱讀

終於都的起心肝寫喇, 由墨西哥搬到香港呢個旅程真係波折重重. 搭飛機之前個朝去 immigration 度拎我出境嘅文件, 之前個職員叫我地朝早九點去拎, 點知我地十點幾去到都未得, 要一點再去過. 第二日就走 D 文件仲未得, 梗係擔心死我啦, 好彩到最後 D 文件都 okay. 嗰晚我地同老公阿哥同女友食飯, 之後就 final pack 所有嘢, 然後就瞓. 四點半起身, 沖個涼再 final check, 因為我同老公都傷風, 所以自備咗好多 tissues. 六點鐘我地 book 咗嗰架的士到咗, 拎晒 D 嘢就同間屋講 byebye, 向機場進出發! ...繼續閱讀