靚 B 太生活札記

由我入大學到搬去墨西哥再搬去香港, 上網, 玩 game 都係靠一部慢到嘔泡嘅 Acer notebook, memory 少啦, storage 少啦, 上網 browser 開多幾個 tab 都會 hang 機. 同老公商量過後決定買多部電腦, 新嘅梗係老公用啦, 我要咁快都無用, 而我就接收咗佢嗰部對於我嚟講超快嘅舊電腦!! 以前有好多 game 都玩唔到, 而家? 沈醉於餅乾夢工坊二!!

自從上次老公突擊接我放工之後, 我長期處於好開心狀態. 尋日就放工收到老工嘅短訊問我放工未, 又問我其他嘢, 唔知點解我覺得有 D 嘢, 唔通佢又想突擊接我放工? 於是我放工就打電話俾佢, 睇吓 background noise 係咪喺街, 我問佢啦, 點知俾我估中咗! 我開心到嗌咗出嚟, 喇喇淋執好 D 嘢去會老公, 其間同事問我咁開心係咪中咗六合彩, 之後就同老公好開心咁搭叮叮返屋企. 咁都未止, 今日老公又接我放工啦, 好幸福呀!!!

我每日返工時間都同老公有好多短訊來往 (網內免費), 星期四就收工, 老公提議不如去金鐘囉, 都好丫, 約喺金鐘等. 平時我返工放工都係上身著恤衫配西裙, 下身著波鞋 (著高跟鞋上落八層樓梯絕對係 mission impossible), 唔知點解嗰日心血來潮, 不如今日著靚 D 啦, 放工前走去洗手間化妝 (平日我係完全唔化妝), 劃咗眼線, 搽唇膏同 lip gloss, 梳靚個頭, 返位熄咗部電腦後就著住對高跟鞋快步搭電梯落去搭地鐵. 點知喺去搭地鐵途中見到老公企咗喺度! 嗰陣真係又開心又驚喜, 有趣嘅係, 平時我同老公去食飯我唔會化妝亦唔會著高跟鞋, 唔知點解嗰日突然心血來潮; 更有趣嘅係, 我之前嗰日先喺度諗, 如果老公突然接我放工, 如果我走咗咁點呢? 總之嗰日好開心好開心好開心!

真係唔經唔覺, 感覺上實在無咁耐, 不過好開心. 以前好開心, 而家好開心, 將來都會好開心!!! *甜蜜中*

由墨西哥搬到香港兩個幾月, 見過一個又一個 interview, 失望過一次又一次, 靚 B 太終於都搵到工啦! 而家靚 B 太喺港島東工作, 銜頭係秘書, 要一人服侍四個老闆, 不過通常都係 book 機票同處理文件等等, 重要 D 嘅 meetings 就由大老闆個秘書幫手 (我 report to 佢). 返咗工五日, 都開始習慣. 好嘅係, 個個老闆都好 nice 好有幽默感, 個個叫你做嘢都唔該前唔該後. 大老闆個秘書都好好人好 nice, 基本上 D 同事都好 nice, 除咗 accounting/finance 嗰 D 囉. 正式回歸為上班一族嘅靚 B 太一定會好好努力, 勤力做嘢, 做個個個老闆都讚嘅好秘書!

幸福對於我靚 B 太嚟講好簡單: 有屋企人關心 (我父母, Sandi 同 Kurt Kurt 都好關心我 o架), 有朋友嘅愛戴 (陳小 B 阿媽不知幾愛我, 唔使唔認喇), 生活唔使擔心, 身體托賴算健康, 最重要係, 有個錫我嘅老公關心我同照顧我, 所以每晚當我地上床準備瞓嗰陣我都會忍唔住笑, 因為喺老公隔離我真係覺得好開心, 好幸福!

呢幾日日日一起身就 check 聯盟同 blog, 之後就喺其他人嘅 blog 跳嚟跳去為聯盟做宣傳 (喺留言板留言作出邀請, 我諗呢幾日一定多咗好多人討厭我!), 另外亦將聯盟喺香港同台灣 Yahoo 登記, 希望多 D 人有興趣, 實在有 D 攰, 今日得到老公嘅邀請, 去 Starbucks! 梗係好啦, 老公由公司出發, 我就由屋企出發. 心情唔錯,
一路行一路諗一陣嗌咩, 好想食朱古力 muffin, 一定會叫, 飲呀... 飲 mocha 啦. 就係咁一邊行一邊諗, 同時亦盡量行快 D, 費事老公等. 點知天雨路滑, 我一滑, 就 "冼" 低咗! 好笑嘅係, 我 "冼" 低後嘅 post 就好似求婚一樣 (一邊膝頭掂地嗰隻呢), 但係又唔痛喎, 即刻企番起身繼續向 Starbucks 出發. 去到 Starbucks, 見到老公, 佢一隻手拎住佢最愛嘅藍莓 muffin, 另一隻手竟然係我最愛, 頭先一邊行一邊諗住嘅朱古力 muffin!! 實在係太 sweet 喇, 就係咁, 我一邊食 muffin, 一邊飲 mocha, 一邊同老公喺 Starbucks 渡過一段悠閒嘅時光.

佢, 係一個英雄. 佢會做係英雄都會做嘅嘢: 變身! 佢, 就好似其他英雄咁, 有一個掩飾嘅身份: 幼稚園低班學生. 佢平時就好似一個平常嘅學生, 但只要時機一到, ...繼續閱讀