靚 B 太生活札記

今日媽咪搵我飲茶, 仲有屋企靚湯, 返到公司又發現老細食晏嗰陣包咗 D 炒飯俾我, 今日嘅食運真係好得出奇!

尋日同老公去咗深水埗鴨寮街閒逛, 之後搭巴士 (係無冷氣嗰隻!) 去尖沙咀逛, 逛吓逛吓逛咗去加連威老道, 不得不叫佢價廉威老道, 有好多 brand 嘅 outlet 都喺嗰度! 去咗我至愛嘅 Bossini, 甩背心由 19 蚊起, tube top 我唔記得係十幾定廿幾蚊, 最重要嘅係, 一件我喺太古城見到喺銅鑼灣間間 Bossini 都無嘅白色 halter neck top, 原價 60 蚊, 特價 35 蚊!! 結果買咗, 返屋企試上身, 好開心, 老公都話好睇, 原本件衫有 pad o架, 不過個型唔靚, 所以都係用 bra 好 D. 想執平嘢嘅妳, 快 D 去睇吓啦!

人地 Giogio Armani, 我竟然睇咗做 Giordano Armani, 仲要完全唔發覺...

嚟歡樂天地飛車真興奮
旋轉或碰撞感覺皆美妙
齊參與新穎趣怪遊戲
一家分享 無窮樂趣

如果唔係今日 lunch 首歌無啦啦喺我個腦度響起,我都真係唔記得以前香港有間咁嘅嘢. 好明顯冒險樂園已經 domincate 咗個市場. 仲記得邊度有歡樂天地嗎? 有無喺嗰度搞過生日會呢?

以前放工後常去蒲點係旺中,
而家百佳, 實惠, 十蚊店啱我 D;

以前一見到 Hello Kitty 嘅嘢就買,
而家除非係 7-11 同 OK 買嘢送, 否則都唔駛預我;

以前游水著一件頭,
而家幾多件頭都唔駛預我;

人喺唔同嘅階段都會變,
變亦唔係件壞事...

今次主角係鳳仙, 旺寶同脆皮樂. 先幾日喺惠康見到雀巢雪條買一盒送一盒, 所以就揀咗盒有齊鳳仙, 旺寶同脆皮樂嘅, 十二支雪條只係三十四蚊, 實在係一個好平嘅奢侈品. D 雪條實在係好味, 鳳仙嘅外層好香香蕉味, 最入面有好香嘅芒果... 唔知點形容添, 總之就好味啦; 旺寶嘅外層係橙汁冰冰 (而家仲有無架?), 入面係好軟滑嘅雲尼拿雪糕, 雖然明知入面係咩, 但係食到 D 雪糕嗰陣依然好驚喜; 最後嘅脆皮樂 D 脆皮唔太甜, 啱啱好, 但係無鳳仙,同旺寶咁正囉. 總括嚟講, 三十四蚊真係好抵, 大家一齊嚟雪一雪啦!

- 夜晚瞓覺喺無開窗嘅情況下都聽到好大聲風聲
- 因為點都有 D 風入屋嘅關係, 房門俾 D 風吹到有聲
- 第二朝好唔想返工...

- 原本要出 trip 嘅老細同事全部留晒喺香港
- 原本要返香港嘅老細全部滯留外地返唔到嚟, 仲搞到一鑊泡, 兩位老細一返到香港就猛投訴國泰嘅安排幾唔掂
- 積聚嘅工作要星期五遲走搞掂 (非必要)
- 放工嗰陣俾風吹郁...

*一個人照顧四個藝人中*