靚 B 太生活札記

尋日信箱入面有一張 Pizza-Box 嘅推廣信, 以前爹地媽咪唔喺屋企, 我同 Sandi 嗌 pizza 嘅情景就即刻湧現.Pizza-Box 前身係 Dominio's Pizza, 唔知整咩改吓改吓改咗做 Pizza-Box. 我最鍾意食 Crunchy Thin Crust (超薄奇趣) 餅底, 好脆, 正! 而家佢地有嘅推廣有:

-任何大薄餅買一送一!
- 外賣自取任何大特色薄餅及小食一客- 半價!
- 星期一至五套餐: $123
- 天天套餐: $108 / 158

有興趣不坊去佢地個網頁睇吓啦!

... Hyatt 集團酒店 D 電話號碼全部都係 1234 結尾? 唔係淨係香港喎, 係全世界!

基於屋企無洗衣機而拎出街洗又比較經濟嘅關係, 型 B 生同靚 B 太 D 衫都係拎出街洗嘅, 一向以來都無乜問題. 尋日靚 B 太放工去咗攞衫, 返到屋企放埋一邊, 到夜晚諗住邊睇電視邊摺衫, 一拎 D 衫出嚟就發現: 乜 D 衫咁生面口嘅? 然後先驚覺: D 衫唔係我地架! 基於間舖頭已經閂咗, 除咗等佢第二日開門就真係無其他辦法. 結果尋晚成晚都好不安: 如果攞唔返我地自己 D 衫點算? 因為我唔肯定佢地八點定八點半開舖, 所以今朝我無帶袋衫, 八點鐘就去舖頭交涉, 放工再去拎番袋衫去換返自己袋衫. 好彩最後都拎得返自己袋衫, 以後我都係要檢查吓袋衫先離開間舖頭好.

作為秘書, 有 D trick 一定要識, 同時間亦要知喺邊度又或者問邊個可以有幫手. 今日靚 B 太揾到三個可以幫到大家嘅小工具, mark 低啦!

1. 文字發聲工具: 只要輸入繁體中文就可以聽到佢嘅普通話或者廣東話發音, 好方便!
2. 文字轉拼工具: 輸入繁體中文, 佢就會 show 個拼音俾你睇, 對學習普通話好有幫助
3. 繁簡轉換工具: 好方便呀, 繁轉簡又得, 簡轉繁又得, 最重要係佢可以轉換廣東話同普通話詞彙, 如果你用繁轉簡, 你可以 tick 一個叫 "使用粵語轉普通話詞彙" 嘅 function, 你打雪糕佢就變成冰淇淋, 唔用個 function 都得, 呢個係靚 B 太強烈推介!

- 先幾日, 有一晚點幾醒咗, 出面行雷閃電, 密到好似開咗燈咁, 之後睇報紙話兩小時閃咗 3800 次電, 咁咪即係平均每分鐘 31.67 次, 每秒 0.53 次?!
- 前日著咗條都有一少段時間無著嘅西褲返工, 大脾位竟然無以前咁窄, 唔通真係瘦咗 D?
- 杜牙根療程已經開始咗, 喺打咗麻醉針落隻牙附近之後, 個牙醫開始講解個手術嘅風險. Timing 有 D 奇怪...

啱啱開始返工嘅時候因為公事關係同 account 姐姐有交涉, 因為仲新嘅關係仲俾佢 lecture 添, 我對佢嘅印象唔係幾好. 但係而家做落咗, 其實佢都唔係好差啫, 我有 D urgent 嘢佢都肯幫我, 仲幫我 check 資料同教我嘢, 仲閒談咗幾句添! 反觀 account 另一位同事就真係唔多掂, 都係少惹為妙.

靚 B 太努力執屋, 型 B 生努力砌櫃, 努力呀!

物品: 防蚊網
價錢: $20.4
購買地點: 日本城
用法: 將隨包附有嘅魔術貼貼喺窗框, 然後張防蚊網貼上, 確保條邊邊無罅可以俾蚊進入
用後感: 用法好簡單, 但係真係好得, 尋晚開晒 D 窗, 好涼但係又無俾蚊咬, 價廉物美, 值得推介
其怪點: 明明尋晚無俾蚊咬, 但係今朝刷牙後發現左腳腳 "爭" 俾蚊咬咗一粒 (講開又奇, 我左腳前後俾蚊咬咗三次, 乜腳板好好味咩?), 幾時咬係一個迷

靚 B 太嘅辦公時間係星期一至五 8:30am - 5:30pm, 中間有一個鐘嘅 lunch break. 每朝我都準時 8:30am 返到公司, 每日我都差唔多係我公司 o個 part 最早返到嘅人, 好幾次我都係開燈 o個個. 其他同事可能因為同佢地嘅 department arrange 過, 所以佢地通常都九點先返. 問題就嚟喇: 我每日都喺 5:30pm 前做完我要做嘅嘢, 理應 5:30pm 可以準時走, 但係因為身邊 D 同事都未走, 搞到我好似好早就走咁, 走親都有 D 不安. 以每日走咗之後我又硬係覺得自己唔記得咗 D 嘢又或者做漏嘢 (其實已經做好), 所以就更加不安. 好明顯我仲喺適應期中.