靚 B 太生活札記

至細都有呢個問題, 細個媽咪會叫我食 "天梯" (豬嘅一 part), 結果梗係無幫助啦. 近排又開始磨牙喇, 搞到 D 牙差晒, 再係咁就要杜完牙根後去睇牙醫整返個護牙膠托先得喇, 起碼治標先. 不過講到底, 磨牙嘅主要成因係壓力, 盡量放鬆自己先係治本嘅方法.

由墨西哥搬到香港兩個幾月, 見過一個又一個 interview, 失望過一次又一次, 靚 B 太終於都搵到工啦! 而家靚 B 太喺港島東工作, 銜頭係秘書, 要一人服侍四個老闆, 不過通常都係 book 機票同處理文件等等, 重要 D 嘅 meetings 就由大老闆個秘書幫手 (我 report to 佢). 返咗工五日, 都開始習慣. 好嘅係, 個個老闆都好 nice 好有幽默感, 個個叫你做嘢都唔該前唔該後. 大老闆個秘書都好好人好 nice, 基本上 D 同事都好 nice, 除咗 accounting/finance 嗰 D 囉. 正式回歸為上班一族嘅靚 B 太一定會好好努力, 勤力做嘢, 做個個個老闆都讚嘅好秘書!

係咪唔可以一次杜兩隻喺唔同邊嘅牙 o架?

有咩方法可以令眼線唔會化開?

自搬咗入呢間屋之後, 我地成日遇到不速之客. 先有蟑螂 (若干, 好彩用藥餌毒死晒, 無再到訪), 再有四腳蛇 (兩隻, 俾老公英勇咁用熱水 / 漂白水 / 藍威寶殺死, 已經喺屋企絕跡), 呢排新到有蟻. 唔知叫好 D 定一樣咁衰, 起碼蟻無咁醜樣, 有時佢地喺度你都未必知. 前日喺手指度見到有隻, 今日又有, 我同老公已經鎖定要點, 落重藥餌, 而家已經見到屍橫遍野, 好得. 希望過埋呢次就唔會再有不速之客啦.

尋晚去完媽咪嘅生日晚飯之後, 本來同老公諗住落蘭桂坊行吓, 諗吓諗吓都係返屋企好, 點知上到車老公話不如去阿貓 cafe. 都好, 因為我都未去過.

行到去阿貓地攤, 唔知 cafe 喺邊, 跟住見到有人去 cafe 梗係跟啦. 去到叫咗杯雪糕食, 老公就叫咗杯荔枝飲品, 睇見 D 貓真係好鬼得意, 鍾意貓嘅老公梗係開心啦. 好鬼死想同 D 貓貓玩, 不過老公話 D 貓知邊個鍾意貓邊個想同佢玩, 你愈想佢就愈唔睬你, 唯有齋等. 好快就有隻名叫多多嘅貓坐咗喺養過貓兼好鍾意貓嘅老公隔離張凳, 老公熟練咁摸佢, 佢就不知幾 enjoy. 之後佢跳走咗, 正當我以為佢背棄我老公之際, 發現佢原來只係去食少少嘢, 跟住又坐返喺老公隔離, 老公又摸佢, 佢就舒服到由坐喺度到打側身到好似個人咁瞓喺度! 簡直係神乎奇技, 睇到我目定口呆. 最衰無帶相機, 如果唔係我一定會影好多相. 結果多多就喺我地隔離由我地到 cafe 到我地走坐足全程, 而沿途不斷有行過嘅貓啤住多多, 梗係妒忌又羨慕啦. 好鬼死鍾意度, 希望快 D 再去就好喇!