靚 B 太生活札記

呢幾晚又瞓得唔好, 一來瞓嘢覺嘅 quality 唔好, 二來又晚晚發埋 D 又怪又好有壓力嘅夢, 原因係 unknown. 開心嘅係, 星期二開始 da da da, 老公知我痛特登買一 pint Haagen-Dazs (Strawberry) 俾我, 幾 sweet 呀, 我一個開始食, 平時明明食到一半就好濟要停, 點知我竟然唔覺唔覺, 用茶匙食晒成盒! 老公梗係無怪我啦, 通常如果嗰樣嘢食係 one of my favourites (e.g. Chips Ahoy) 佢都會叫我食埋最後嘢 D, 同樣我都會叫佢食埋最後嘢 D favourite food of his. 近排好似有 D 壓力 (唔好以為 full-time housewives 無壓力), 希望今晚會瞓得好 D 啦, 晚晚都係咁實在唔係幾盞.

星期五晚, 我地又邀請咗老公阿哥嚟我地屋企玩. 喺下晝, 我先同老公去 Starbucks 撐檯腳, 老公叫咗杯 espresso frappuccino (佢又到先過我), 我叫咗杯熱嘅 grande mint mocha (我自己叫 o架!!!!), 嘆咗一陣就去逛 Plaza Loreto (正!), 撞啱有個關於埃及嘅 exhibition, 即刻諗起 The Mummy. 之後返屋企準備, 預咗兩個漢堡飽俾老公, 兩個俾我, 四個 (!) 俾老公阿哥. 佢阿哥到咗, 老公就開始整漢堡飽, 我就介紹 Sims 2 俾佢阿哥玩. ...繼續閱讀

經過種種嘅困難, 長長嘅歲月, 老公嘅 paper 終於接近尾聲喇! 搞掂佢嗰 D 之後, 就可以申請我為 dependent of 佢, 咁我就唔駛再每隔三個月就要 extend 我嘅 tourist visa 喇. 咁到時我就可以真係安心咁做個 full-time housewife 喇. 好 o野!

好大雨呀, 仲落雹添呀! :O

星期五, 老公提議不如 invite 佢阿哥星期六嚟我地屋企囉, 好呀. 諗吓諗吓, 佢應該星期五晚都得, 不如改星期五晚囉, 好呀. 就係咁, 老公七點幾開始準備煮嘢食, 我亦執好 D 嘢 set 好張檯., 佢阿哥八點幾到, 我地一邊食嘢一邊講笑兼 chit-chat, 之後睇咗套戲叫 Memento (之前喺芬蘭睇過, 但依然好睇), 睇完成十二點, 以為佢阿哥一係就返屋企, 又或者叫我地 inflate 張 airbed 啦, 點知佢地想玩啤牌, 好呀, 佢地越玩越興起 (Blackjack, 用屋企有頗多 o既 10 cents coin 做籌碼, 但係我地唔賭錢), 到一點我已經開始眼瞓, 老公都係, 但係佢阿哥依然好興起, 到點半老公太眼瞓, 終於佢地就 inflate 張 airbed, 我就去刷牙洗面, 大概兩點鐘大家都瞓晒.

第二朝我八點幾就起咗身 (唉...), 戴 headphone 瞓喺老公隔離睇 Desperate Housewives, 到十點幾老公醒咗 同我一齊睇, 到十一點零佢阿哥醒埋, 照舊我又 serve 咖啡, 以為佢今次會同上次一樣飲完咖啡就走, 點知佢地開始玩啤牌 (我地玩咗 Poker, 3, 7 of Club 同 500, 玩 poker 嗰陣我贏得都幾多 o架), 之後我仲 join 佢地添, 估都估唔到, 一玩玩嗰四個鐘, 沿途我都有 serve 咖啡, 之後嗌外賣, 食完佢地埋首 "玩" Google Earth, 我就去沖涼, 之後佢阿哥就走喇. 間唔中咁玩吓都幾好丫.

好想要個散銀包. 銀包我係有, 但係我從來唔用 (喺呢度), 原因係擺到明係銀包, 俾賊 target 到就唔好, 而且我仲對老公俾人撻咗個銀包留有好大陰影 (事發時間: 幾個月前), 我亦唔想 risk 我地唯一一個 Tough 銀包都俾人撻埋. 除咗以上原因之外, 我想要散銀包係因為我買嘢通常都帶好多散銀, 有散銀包俾錢嗰陣就方便 D, 唔駛猛咁 "巢" 個褲袋. 星期五去 Friday market 望過吓嗰度嘅散銀包, 無乜合眼緣, 睇嚟我下次去大超級市場同 Coyoacan 都要周圍望吓, 搵返個合眼緣嘅散銀包喇.

點解上次去大超級市場食嘢有 a small piece of stuff fell off from my teeth (左邊), 今日只不過係食糖都整甩 a small piece of stuff from my teeth (右邊), exactly 係上次去芬蘭甩嘅同一個地方, 城大個牙醫夠膽死 check 唔到. 唉...

喺香港, Max Factor 都算係貴價化妝品一族 (多得 SK-II), 有專櫃, D 嘢又貴, 不過你估都估唔到喺呢度佢唔似喺香港咁矜貴. 唔知點解, 我唔係好覺眼有 Max Factor 嘅專櫃, 我第一次見到佢嘅 products 係喺 Walmart, setting 同 Maybelline 呀, L'oreal 呀, Revlon 呀差唔多 (類似屈臣氏同萬寧 setting), 之後見到佢都係喺類似嘅 setting. 價錢又好似無香港咁貴 (雖然都唔平), 包裝亦簡單唔靚唔花巧. 唔通 Max Factor brand 離亞洲賤?

好舒服, 身心都係. 啱啱沖完涼 (無慢慢沖, 諗住趕喺媽咪湊阿 Kurt 返學之前打俾佢), 然後打咗俾媽咪, 由一個好乞人憎嘅人聽電話, 劈頭我就問 "媽咪呢?", 費事晒我時間. 近住同媽咪傾咗大概五分鐘, 講吓呢樣講吓嗰樣, 同阿 Kurt 本來打算傾一陣, 佢拎起電話, 同我講電視話架車同架巴士撞車, 跟住就轉咗媽咪解畫, 之後又閒話家常, 得知阿 Kurt 喺學校學畫畫, 每個禮拜三放學後留喺學校多半個鐘, 四堂 $260. 問佢學成點啦, 媽咪話老師話佢好定喎, 有少少出奇. 問佢有無喺屋企畫吓啦, 媽咪話爹地唔俾, 話佢學壞手勢喎, 呢樣對於我嚟講就唔係好 make sense, 小朋友細個學吓畫畫, 點會驚佢學壞手勢 o架呢? Afterall 要趁佢細個俾佢接觸多 D 唔同方面嘅嘢嘛. 其實如果驚佢周圍畫, 可以買本畫簿俾佢, 教佢只可以喺畫簿畫, 驚佢學壞手勢就可以係佢寫字 o既時候教佢唔同嘅 "楂" 筆手勢 o架嘛. 好笑嘅係, 媽咪話阿 Kurt 同爹地成日嗌交, 果然係一物治一物. 雖然只係同媽咪講咗大概五分鐘, 但係感覺已經好好. 可惜唔可以講耐 D, 太貴喇, 不過間唔中咁傾吓反而珍貴啦.

平時我地買汽水, 通常都買 1 L 或者 2.5 L 嘅膠樽裝. 今日我去買鮮奶嗰陣, 老公問我間士多有無玻璃樽裝汽水. 我去咁多次都唔覺眼, 不過都幫佢睇吓啦. 去到間士多先發現原來佢地係有玻璃樽裝汽水, 不過得可樂. 拎咗兩支, 加三盒鮮奶, 加一個甜筒, 加一包細包 Doritos, 合共 71.6 pesos. 個老闆 (女人) 猛咁同我講一大堆嘢, 我一句都聽唔明, 但係我都估到係同兩支汽水有關 o架喇, 一定係按樽問題. ...繼續閱讀