■台灣論壇：馬.扁.李.連.宋.吳攏去落18層地獄啦!
■本壇免募款(免親像魚夫去賣血)亦無網管&園丁! 更加免驚予人浸水桶～♫～
■欲【與霉體對抗】免落【煤坑】

菅芒花白無味 生來毋著時 無玉葉無金枝 啥人會恰意？

世間事鏡花水影 花紅有了時 只有風姨溫柔搖擺 顧阮的腰肢

菅芒花白文文 出世在寒門 無美貌無青春 啥人來溫存？

世間情一場幻夢 船過水無痕 多情金姑來來去去 伴阮過黃昏

　【菅芒花】就是彼１晚彼位誠意的大哥在５、６分仔醉的時唱予我聽的，聽了後我非常的感動，因為歌詞寫ka者爾也淒美，旋律也帶有十足的愁意，將近２０幾年也，每次若聽著這首歌著會去想著彼１暝的情形，彼位大哥這陣毋知猶復會飲否？毋知猶復有在唱菅芒花否？

　這首歌的作曲家是鄧雨賢先生，鄧雨賢先生真愛用地方民謠的資源來做譜曲的材料，這首【菅芒花】就是伊的作品內面真有地方色彩的其中之一。

　這首歌的作詞家是許丙丁先生，許丙丁先生是台南人，伊細漢的時，真愛聽人講古，所以到伊２４歲的時，就用講古的手法寫出【廖添丁再世】這本冊來，人講：人在細漢彼時的興趣是啥？大漢的時著會往興趣的彼條路行去，這句話真正應驗在許丙丁先生的身軀頂。

　許丙丁先生是在二次世界大戰後纔投入歌詞創作的行列，除了為民謠填新詞以外，亦復ka流行歌曲的作曲家合作，這首【菅芒花】的詞，實在是將菅芒花在溪埔、在山頭的孤單、寒微、無人照顧的情境，寫到予人為之動容，這種借物寫人的手法，現在的作詞者，怹彼種愛剖甘蔗又復破未準的寫法，實在真使人擔心啊！

　這首歌的旋律讚，歌詞也讚，莫怪彼位誠意的大哥，在２０幾年前就叫我有機會著愛將這首歌來介紹予大家知。

＊以上的文字是Ringo大主大意將文隆仙ｅ的原文改少數字，上重要的是殷望：所有來巢窟聽歌的朋友，毋通僅na耳孔聽，上好請汝愛斟酌聽文隆仙ｅ者爾標準的台語，順遂對照文字。焉爾應該加減能使了解Ringo寫台語文用字的準則，感恩矣！