■台灣論壇：馬.扁.李.連.宋.吳攏去落18層地獄啦!■本壇免募款(免親像魚夫去賣血)亦無網管&園丁! 更加免驚予人浸水桶～♫～■欲【與霉體對抗】免落【煤坑】:緬懷228系列～【犧牲換來覺醒】

<< 緬懷228系列～建立【海洋的國家】是咱的使命 | 回blog首頁 | 緬懷228系列～【點燈歌～客語版】 >>

February 24,2006

緬懷228系列～【犧牲換來覺醒】

【犧牲換來覺醒】詞．曲：王明哲

失去尊嚴　來被壓迫　人生有啥意義？
人無自尊　像無靈魂　社會已無公理
台灣人　台灣人　愛覺醒　打拼為自己
榮華富貴　無啥意義　犧牲換來覺醒

明哲是我在街頭跟政見講演場熟識的兄弟，當年，揹著１支Guitar，駛１台筒管仔車，南北奔波走場，我敢講１句良心話：當今坐在台面的執政官員及較叫會出名的立委，無１位的場伊無走過攤；加油家己加，食飯路邊擔，每遍伊趕真早到會場，惦靜坐在台腳，等到冷場的時，主持人纔緊請伊上台，１首１首喚醒激勵人心的歌位伊真特殊的淒涼歌喉跟功力真高的Guitar技巧，躦入去每１位聽眾的心肝底，等到大腳，亦著是天王級的若到，時常伊著家己緊收遂，讓人演講…等未到散場，伊復趕向另外的場…

　遊行的時，大家行若久，著會揣開闊的所在暫時歇睏，這個時陣，伊帶領唱戰鬥歌，成作是鼓舞士氣上有效的良藥。

　伊一直是1位話真少的人，伊的行動力就是靠伊的音樂天份，尾也！因為伊和『興票案』的莊柏林大律師合作製作【上美的歌詩 (2CD)】，我和伊有復較濟的接觸，更加欽佩伊的音樂造就跟了解伊對台灣的１份堅定的愛。

在前年伊出版【海洋的國家】專集，收錄伊部份的”愛國歌曲”跟幾首真美的作品，到今聽起來，加添真濟感觸－為啥麼當年的反對黨已經執政也，咱台灣的路猶原者爾艱難坎坷？問題出在曷？是國家認同出差錯抑是危機意識無建立？

台灣人矣！愛覺醒也！若是等到對面的土匪統治的時，領１８％？汝免想也！其他，電視台１陣所謂的『政治評論家』，怹攏愛作啞狗，連咱現此時每１位在網路寫東寫西的自由攏會受高壓管制，朋友！請汝冷靜想看leh…

【海洋的國家】製作／水長流傳播（股）有限公司發行／原上草志業有限公司
地址／台南市裕農路375號10號L室電話／06-2756519 傳真／06-2340828
E-mail／d401210@ms13.hinet.net

～緬懷228系列～謹以最誠摯的敬忱製作此系列

◎ 總共有２４篇, 是我個人這世人感覺作上有意義的工課, 其實! 所有的音樂攏是台灣這塊土地上優秀的音樂家及詩人的成就, 向怹致上感恩! 殷望這個專題能使對牽挽台灣各族群互相的愛有所堅固, 而且! 喚醒台灣人的國家認同無混淆的空間, 對歷史的傷痕－咱能使無怨恨! 能使原諒! 毋過! 對製造悲劇的彼陣人及靠彼陣人致蔭的人, 怹攏愛真心懺悔, 而且為過去的罪行認錯﹑負責﹑盡上大的氣力彌補, 此後! 共同疼惜咱的母親－台灣! 焉爾! 咱緬懷追思這個２２８紀念日纔有真正的意義!

◎ 感謝汝的撥工閱讀, 若是汝對這個系列有所批評, 請汝毋免客氣! 若是汝想欲傳播其中任何１篇, 請遵守智慧權!

◎ 最後! 以上虔誠的心祈禱所有的受難英靈安息! 所有的受難家屬後代平安!
緬懷228系列～以《Amazing Grace》默禱２２８英靈安息