Maan han?（什麼呢）

陳水扁總統 tī 頭 chit 任當選 ê 時，有捌簽署「原住民族kap 台灣政府 ê 新同伴關係」，連任了後，koh bat 允頓 （ún-tùn） tī 新憲法加入〈原住民族專章〉。

咱知影現此時 ê 政治現實，beh 修改憲法是 1 件無簡單 ê代誌（tioh 立法院投票四分之三贊成才 ē 過），總--是〈原住民族專章〉內底，有部份 ê 內容，根底是毋免等修憲 tō ē做得--ê，比論講：原住民有用傳統名 ê 權利，恢復原住民部落 kap 山、溪 ê 傳統地號名。

親像 chit-koá 有行政權 tō 有才調做 ê khang-khoè，m知政府是 teh 等啥貨？尊重原住民 in ka-tī ê 號名、地號名，phah 破漢字才是字 ê 迷思，6 冬--ah，我 kan-taⁿ 看 in 拖拖沙沙。

立法院無 kā 法律通過，憲法改 bē tín 動，che 攏是因端，不而過nā theh che 來起貧憚做 ê 攔頭，有影 hō· 人看破跤手，尊重姓名權（tak 族群攏 tioh 尊重），恢復地號名（地號名標音 tioh 尊存在地族群），nā 直直 iân-chhiân khô·-khap（拖拖拉拉），是抵好證明有人 gâu hau-lak-hau-tak（誇口），無 tō 是in 連 ka-tī teh 講--啥 tō m 知，講暢--ê niā-tiāⁿ。●

【附記】
文中「四分之三」，據原作者解說，本是寫「四分三」。「四分三」才是正確的寫法。不過現在太多人受了中文影響，都會加上「之」字。編輯也犯這個毛病，所以硬是把原作者的寫法改錯了。（又學到一項.....）^^"