鹭水芗南－闽南语部落-文化民俗 http://blog.roodo.com/limkianhui/archives/cat_57761.html      -[網站簡介]有狀元學生,無狀元先生。@世間,我佮汝……留話簿仔||學閩南語||笑詼譀古||龜挪鱉趖||在地歌詩||在地料理||言語文字||文化民俗||外國童話（闽南语版）||白話字正字法母語消息||講經説道||廈語文音||古册古典||時事開講||技能技巧||闽南俗語||闽南漢字||泉州講古||閩南歌謠||聽歌學閩南語 zh-tw Roodo Blog System All Rights Reserved 楊麗花佮歌仔戲的鹹酸甜 :
本世紀華人傳奇人物的名儂榜，肯定有一位儂儂知的大明星：楊麗花（Iûⁿ Lē-hoa）。

楊麗花出世佇宜蘭的一个子弟戲、歌仔戲的世家，佇全省各地的 戲棚骹 大漢的。七歲的時，著頭一擺登台去表演，電視歌仔戲當咧時行的時陣，伊佇臺灣歌仔戲界chhèng咔加四十冬。Ùi戲園仔、廣播、電視，遘kah 國家劇院；ùi 民國五十五年第一部「精忠報國」，遘民國八十二年上尾一部戲「洛神」，楊麗花攏總佇台視演出144檔戲，不但開啟了儕年來電視歌仔戲的輝煌生涯，嘛創造了電視歌仔戲佇所有觀眾心中永久的地位。一齣又一齣由著楊麗花做主腳（chú-kioh）、描寫忠孝節義的經典戲文，佇儕儕阿公、阿嬤的頭殼裡留落了永遠攏無法度放bōe記的印象。楊麗花伊所代表的歌仔戲曲調、歌仔戲文化，佇咧台灣即个工商業快速發展的所在，成做兩代儂人生路頂共同的記持。

楊麗花，生成端麗、大才（tāi-châi），好枝骨，面肉 幼秀 白抛抛，互伊來搬小生，真正有合。伊所扮演的角色，大多數攏是hit-lō 飄撇的緣投仔兄，清飄的阿舍哥，或者斯文的公子爺。伊的戲路，呣管是風流多情的唐伯虎、孽khia̍t 樂暢 的賈寶玉，飄撇的劍客，威風的大將軍，或者壓霸 嚴gâi的皇帝爺，淒慘落魄的和尚、乞食，伊攏有法度演kah徛真徛現，活跳跳，著nā 親像hit-lō飛天鑽地、飛簷走壁（hui-liâm cháu-phiah），有七十二般武藝的猴齊天，規身全本事，互觀眾佩服kah無話通講。楊大俠，伊千變萬化的戲路，嘛向hit當時的觀眾展出著歌仔戲藝術的內涵kah活力。

民國七十二年，楊麗花佮戀愛已經成十年的諸夫朋友（cha-po· pêng-iú）——洪文棟結做連理，牽手行入愛的禮堂，享受平凡又佫安靜的家庭生活。洪文棟是楊麗花目睭裡的如意郎君、好翁婿，是一家之主；iah 楊麗花嘛一直是洪文棟心中 賢惠、善良的家后，伊全權負責厝裡囡仔序細的教育。

Chêng伐出藝界了後，楊麗花to̍h過著佮普通儂共款的生活，佇夏威夷的「忘憂居」度過一工又一工，無煩無惱、輕鬆自在的日子。伊的生活，有一套家己的哲學，號做「四呣哲學」：煩惱，呣囥過暝；好食的物件，食巧 呣 食遘飽；肥，呣驚汝笑；shopping，驚錢 扎 無夠，呣驚物件仔貴。

鄉土戲曲的守護神

有一个十足合意（kah-ì）歌仔戲，是楊麗花小姐死忠的戲迷，名號做「郭惠芯」的小姐，佇咧《楊麗花全球資訊網》頂面貼一篇號做《我愛楊麗花》的文章，將伊心中的「戲神」呵咾（o-ló）kah 會 tak舌。伊寫講：「……伊搬戲的功夫 熟làu-làu，是幾落十冬來 kut力磨練的福報；伊唱戲的時 全精神的屈勢，這著是伊的真功夫；一目nih變換幾落个角色，著親像伊做儂頂真又佫自在。我愛楊麗花，伊總是掌握家己的命運，經驗著每一个普通儂對個人理想的追求佮ǹg望。我愛楊麗花，是因為我合意做一个肯拍拼、意志堅定，擔會起放會落、自在的儂。（……她爐火純青的戲曲功夫，是數十年不斷精進的結晶，唱戲時全神專注是提得起的真功夫，演畢時瞬即轉換角色是放得下的磊落自在。我愛楊麗花，她轉動著自己的命運，實踐了每個平凡人對自己的理想期許。我愛楊麗花，也投射出我愛那個肯努力吃苦、意志堅定、提起放下自在的自己。）」

佫紲落來，是楊麗花小姐，佇咧接受專訪的時，所講著的內容。佇chia，用楊小姐上第一熟似的閩南語，以第一人稱的形式來講互逐家聽。

心海羅盤·楊麗花·結緣

「舊年，『心海羅盤』六周年的演唱會，我有去現場聽葉教授講演，後來我請葉教授去阮厝食飯。佇即擺進前，約略差不多五冬前，有一工，我拄仔好佇電視頂看著伊佇咧講演，chiah知講有即个儂。逐家攏呣知伊叫啥名，kan-na知影儂攏叫伊『葉教授』安呢。伊的底細我oân-á無清楚，kan-na知講伊代表一種哲學。我感覺伊咧講話、講道理、哲學，攏足讚的，喙水嘛真讚，佫 好鬥陣；伊講國語啦、台語啦，攏誠清楚，互儂聽著誠明；伊講話真正足有說服力的，聽伊講話攏感覺 足 輕鬆的 安呢，互汝感覺講，分析kah真分明，真貼心，有時著ná親像互儂感覺頭殼拄著厝頂，規个腦筋攏chiâu 開智慧 起來，bē互真儕有困擾的物件kā汝 縛tiâu-tiâu。Hit當陣，聽電視頂咧講演，我問阮翁講『葉教授』是啥儂？後來chiah知影葉教授佇《中國時報》有規套的作品佇咧，當時著有買寡 錄影帶 轉來 看。葉教授誠細心，佫直直kā即份感激囥佇心肝裡。阮聽過錄音帶了後，嘛感覺講真有必要佫介紹互朋友聽，kāi當做是真好的教育 安呢。」

葉教授的講演互儂感覺足親切的，真正拄著問題的時，聽聽咧著感覺頭腦加真清楚，儂著bōe感覺 ná像 去 互 啥物貨 kā 咱 硩tiâu-tiâu 安呢。普通時仔 我 攏 足 無閒的，閒chiah有看liâm-mi-á電視。新聞互儂看著 頭誠眩，所以會想卜佫轉葉教授的節目來聽，聽伊的聲，著加真快活，安呢頭腦著會加真清楚啊。聽教授咧解答別儂的問題的時陣，夫妻啦、家庭啦、股票啦……攏講kah足好的。儂講「一儂苦一項，無儂苦相共」，每一儂攏有家己的煩惱，教授的作品ná親像攏會當解答所有chiah-ê問題，聽聽咧 心情自然著會加足快活的。

我一直攏感覺教授 伊是一个真無普通的儂，歷史上嘛攏無出過像伊即款的人才。本身我家己有演過真儕忠孝節義的故事，歷史故事瞭解足儕的，我感覺葉教授的理念kài有新意，有合（ū-ha̍h）即mài的社會的骹步，講kah真透白，真明，攏bōe「鴨仔聽雷」。伊講話佫定定足笑詼的，汝會感覺誠輕鬆，又佫自在。我捌hām汝滾sńg笑，問伊講： ah汝 hiah gâu 講話，是安怎無愛出來競選。葉教授伊捌的物件，呣是講有真儕儂知道，佫咔呣是凊采互汝學會著的，逐條to是道理，伊真正足無簡單的，是一个人才，我是有夠佩服伊的。

自細漢盡捌忠孝節義

我自細漢，磨練上儕的，著是演戲，直透咧搬演歷史戲，攏總有搬過三百外部。師傅教師仔，呣kan-na是教技巧，連做儂做代誌、規矩、禮數，攏噯教，nā無安呢，是哪會kā he 忠孝節義的故事演kah會活？講話噯斯文、雅氣，搬戲著是噯有教育意義佇咧……汝看即mái的囡仔，無大無細 五倫不分啦……

葉教授有捌講過：古意的chiah會久長，戇戇食天公；有一句俗語話，講號做「越奸越巧越貧窮，奸奸巧巧天不從（oa̍t-kan oa̍t-khiáu oa̍t pîn-khiông, kan-kan khiáu-khiáu thiⁿ put-chiông）。」

汝即个儂 真精（chiⁿ）真奸巧，天哪會從？Ah nā 戇戇做的，戇戇bóng過日，咔幸福啦。我食苦 食 上thiám的，是做囡仔hit陣仔，tòe阮父母佇戲班，生活攏無固定，ah呣佫，阮戲班 食 八方的，四界演戲討生活。Hit陣仔，阮攏佇戲院演出，戲院著親像即擺的電影館。Kan-na 台北 著有幾落十間戲台。舊早 無 hit-lō 電影館，有戲團，歌仔戲、新劇團、平劇嘛有。往早kā平劇當做是「國粹」（國寶級的），正經講，歌仔戲chiah是正港的地方戲。因為歌仔戲是ùi臺灣湠根（thoàⁿ-kin）、大叢（tōa-châng）起來的，hit 陣，hām大陸開始有teh來去（來往），有的走去大陸chhōe根。我講 汝去大陸chhōe歌仔戲的根，是卜chhē 啥物 番薯「根」啦？即个「根」，著是 ùi 咱臺灣 puh-íⁿ 的，大陸的歌仔戲是咱臺灣傳過去的，佫講，in做了嘛無kài專。

阮阿公 佮 阮阿母，攏是趁食即途出來的，真瞭解歌仔戲是佇咱宜蘭chia湠根、 puh-íⁿ 的，遘taⁿ 已經百外年啊。宜蘭，自早 無 歌仔戲，是子弟戲。歌仔戲是子弟戲 佮 四平戲去改的，古早的歌仔戲是用唸的，無 戲服仔，坐咧唱；子弟戲 直直改，改七字仔調，七字仔調chiah是伊的本調，其它 有的 小調 攏 外來的。後來平劇來啊，平劇有chhēng戲服仔，in chiah tòe儂學chhēng衫、學化裝……像即種文化的物件，是「伊抾伊、伊抾伊」，七鬥八鬥綜合起來的。

子弟戲世家，成養（chhiâⁿ-iúⁿ）歌仔戲將才

子弟戲 呣是 四界 去 演出，演員 透底（thàu-tóe）攏是 有錢儂 的 後生。往過，好額儂 的 囝 攏無咧趁錢，食飽傷閒 著去 學唱。子弟戲 無 諸姥（cha-bó·），攏 諸夫的（cha-po·--ê）咧唱，呣chiah叫「子弟戲」。阮阿公是子弟戲的頭家，伊嘛是儂兜的子弟去咧學，有的學員娶姥生囝to̍h無佫出來唱。阮老父嘛有去學，學遘尾仔，時機愈來愈bái，諸夫囡仔攏著做工，chhōe無團員，阿公choăⁿ kā 六个 諸姥囝 叫叫落去學（阮老母排第六，煞尾仔），阮老父 著是安呢chiah佮阮老母熟似的。Hit 陣仔，歌仔戲團開始chhèng，阮老父老母去參加儂的戲團，一團仔一團 直直做，做遘我出世，我嘛是tòe阮老母佇咧戲班大漢的。有儂講我是出世卜來做戲的。阮老母生我的hit一暗 猶佫佇咧做戲。伊揹（phāiⁿ）一粒大腹肚做小生。因为武生、文生攏是孤生孤旦，別儂嘛無法通替汝。我是安怎攏無讀啥物冊咧？我做囡仔攏佇戲班，足愛chhit-thô的，攏bōe想講聽候（thèng-hāu）冊讀煞chiah來做戲。Hit當時戲團佇台北抑是新竹演，卜讀冊著噯滯宜蘭阮阿舅in兜。暑假tòe父母佇戲班，時間遘，老父送我去坐火車。伊一越頭（oa̍t-thâu），我著隨跳落車，走轉去戲團kā伊哭講我無愛轉去。所以，我kan-na讀一兩年冊niā-niā。

阮阿公嘛做子弟戲，伊攏是搬「阿姐旦」。古早的戲台足大間的，像國家劇院hit款舞臺hiah大，但是一定噯有後臺，後臺噯著真大。戲班一團攏有六、七十个儂，像一个大家族。後台無隨便互儂出入，hia是規个團的家。一个家族舖一張床，用戲箱仔、番仔衫櫥仔 來做隔間（服裝攏著家己做，呣是戲頭家做互汝的），食、chhēng、滯，攏佇hia。每一个所在，攏著演十工，觀眾nā咔儕，抑是講咔好趁，著加演幾工仔；假使nā咔無觀眾，著噯搬，搬台中、高雄……我講阮食八方，逐工攏噯演，班主噯煮互儂食，戲文攏共款，一套戲文四界搬kah thàng，全省巡完了後chiah佫換新戲文。戲團的團員，攏各地來鬥的，有的滯高雄，愛看歌仔戲 著來學，hit 時，真儕儂 choăⁿ 入鄉tòe俗，就近做親，結婚生囝，直直傳(thn̂g)落去。

親身行過歌仔戲的鹹酸甜

阮老母講我細漢的時陣，歌仔戲班，上少嘛有三十團，歌舞團有兩團，新劇團嘛有兩團，咔早也有 客儂仔戲（客家戲）。客儂仔戲 嘛 上 舞臺，台北儂咔bē曉聽客儂仔話，in攏佇新竹、桃園 chit 搭。日本管的時陣，呣准 歌仔戲chhēng戲服仔，噯汝chhēng se-bí-loh （西裝），後來，蔣兮 來臺灣chiah改變。

歌仔戲班kan-na 滯 戲台teh演，呣是 路邊戲。後來電影出來囉，儂攏時行看電影，一寡戲台soah攏改做電影院。舞臺 無啊，歌舞團散去，新劇團嘛散散去囉；客家團、南音、福州戲、歌仔戲 嘛攏 差真儕。舞臺戲 落衰（lak-sui）了後，有的走去「路邊戲」，有的去電臺，阮父母hit 陣 著 收起來囉。Hit 時，我差不多十九歲，我去參加一團去菲律賓的，唐儂（tn̂g-lâng：華僑）真合意歌仔戲。因為講話會通，hit 時菲律賓景氣真好，in十箍等於咱的百外元；hit个所在的儂攏真闊手、真血漢（hiat-hàn），戲看煞 攏有紅包通好摕，半年著趁差不多十四萬，三十幾冬前，聽好（thèng-hó）買頂下層的樓仔厝啊！轉來了後 即班儂 散陣啊，各儂 倒轉去 士農工商 食家己（當時我hām小明明、柯玉枝攏有結拜，佇電視台猶有鬥陣。）Hit 時，我買厝買佇迪化街hia。迪化街 大龍峒 正聲廣播電臺 拄好 有 一个 天馬歌劇團，廣播一、兩年，電視著有啊。Hit 時無彩色的，全台灣kan-na「台視」一台，開台的第四年，阮考入去臺視演歌仔戲。我二十一歲，全省愛看歌仔戲的儂真儕，拄好tn̄g著 hit个時陣吧，自安呢 我規个攏chhèng起來。

我頭一擺登台表演是七歲，hit 時 戲團 欠 囡仔，我演hit 齣《安安趕雞》hit 个 安安。即齣戲真出名，我搬囡仔 上台唱兩葩niâ，大漢著換別儂演啊。我攏總演出三百六十外齣戲，合意的劇本真儕。我真合意宋朝楊家將的戲，佮王寶釧與薛平貴，chiah-ê故事攏足súi的。做kah上風流的是唐伯虎點秋香；創作的劇本有 王文英、竹籚馬、朱洪武……我16歲頭一擺搬男主角，演《陸文龍》，佇 台仔頂 弄 雙槍，足厲害的是呣！我呣是kan-na演hit款風流飄撇的，我 本身 有 足儕 種 戲路，獨獨 著是 演 諸姥兮 無伊法。演小旦抑是男扮女裝的，准講 汝 裝 佫咔 súi，儂觀眾早著已經咬定啊，攏講無好看。電視、舞臺、電影、電臺，我攏經驗過。我咔愛演舞臺戲。舞台是佮觀眾上倚近的，我哭，觀眾嘛哭，愈演愈真，kan-na聽 pho̍k仔聲，咔辛苦嘛無要緊。電臺kan-na有放送聲音，kan-na一粒話筒，一个儂唱幾落个角色，我攏禁bōe-tiâu 足愛比動作，定定去互同事笑kah……電臺聽眾比電視台的觀眾佫咔熱，聽眾直直噯阮出來公演。後來佇大橋頭hia公演，規个所在khoeh kah強強卜煏破（pak--phòa）！我的運途真正bē歹，定定真受歡迎，有的儂 chhèng，kan-na chhèng 兩齣戲，無儂像我chhèng chiah久，這著是我的根本。Ah呣佫，我咧chhèng的時陣，攏罕得做秀，因為he舞臺呣是阮的舞臺，假使nā卜公演，我一定噯chhōe hit-lō有夠大佫闊的舞臺。為咱的歌仔戲出去公演，鬧熱滾滾，逐个攏愛看。

自來攏嘛搬小生

我身懸一百六十四公分，我演的，攏小生的 咔儕。因為演戲的關係，我的個性有咔偏 諸夫的。佇舞臺頂 上歹演的是hit款「也著哭，也著笑」的戲，尤其是《呂布與貂嬋》，驚講哭了無聲，唱腔誠懸，佫噯演苦味的，實在是佇咧考驗演技。

即陣逐齣戲，我攏會勻勻仔（ûn-ûn-á）揀，kā過去hiah-ê超工「揀kah仁仁」的服裝攏換tàn掉，專工佫來chhoân一寡咔有合 即mái 社會時行的。Chhun--ê，比論講 唱腔、調仔、配樂，攏無變。將伊根本的物件保留；劇本噯寫新的，nā無，新一代的觀眾in bōe接受汝。古早的哭調仔，約略攏是四遘五段，nā 攏唱遘煞，ah 戲著攏免搬啊！一个鏡頭翕遘底，hit款的模式佮現在 無共款。即mái 噯 節奏 緊，nā無，觀眾會攏睏去。

即幾年歌仔戲開始有teh國家劇院演出，感覺誠好，呣佫，國家劇院辦的演出真少有滿座的。我的舞臺經驗咔儕，常在（chhiâng-chāi）有出國看一寡藝術表演，所以我認為歌仔戲一定噯加新的物件落去，舞臺的佈景，bē使 佫像 往早 安呢 一幕遘底。所以，我一定噯做一个舞臺互儂看。頭一个佇國家劇院的戲文是《呂佈與貂嬋》，呣免 話筒，攏用 肉聲（自然聲），劇院噯 規間 關bā-bā，演出hit場戲了後，戲界透底攏學我的型。

歌仔戲對我來講，著親像人生的戲文，生命的代表。因為自細漢演出 遘taⁿ 猶原 放bōe離，我有半世儂攏佇電視台，我感覺歌仔戲nā佇電視頂無去 安呢 足 無彩的。我 即款 年歲 咔無愛出場演出，taⁿ 我是咔 致重 做 幕後 推捒（tu-sak）的工課（khang-khè），以教學為主，chiah bōe互文化來斷層去。陳亞蘭是我第一合意的學生。我咔瞭解著安怎做 chiah通互觀眾對歌仔戲有興趣，所以，我一直佫咧拍拼，卜利用的我名聲，佫佇電視台恢復（khoe-ho̍k）歌仔戲的風采，互新的學生有表演的機會。

華人文化的重要資産

郭惠芯認為講楊麗花「m̄ kan-na是活佇所有戲迷 個人的『人生戲場』裡底，伊不斷出來咧演，攏無倒勼（tò-kiu）。楊麗花，伊是安怎會當佮即个社會文化保持無脫鉤咧？He全部是因為伊有堅強的意志，會當接載（chih-chài）佮排解來自各種傳播媒體的壓力，幫助歌仔戲mài互 一刮（chi̍t-koah）又一刮的 外來文化 拆食落腹。楊麗花著是安呢chiah 成做 基層百姓心肝裡的大明星，嘛 成做 鄉土戲曲藝術的 守護神 佮 成養者。」（不僅活在所有戲迷的個人歷史扉頁裡，她頻頻出場演出，不曾缺席。楊麗花最能夠與社群文化交融結合的，其實是她意志堅毅地度過各種傳播媒介勢力的消長，讓歌仔戲不在快速淹來的外來文化中湮滅。楊麗花於焉成為廣大基層民眾心中的天王巨星，也成為地方戲曲藝術的守護者和開創者。）

Nā講遘 歌仔戲發展佮改革，楊麗花有伊家己的意見，有家己的堅持。伊真看重保留歌仔戲的元神 佮 有特色的部分。為著歌仔戲會當成做一種 全社會 通儂 攏 聽好（thèng-hó） 觀賞的表演藝術，只卜 是 做 主腳 演出 的 戲齣，一定會結合現代劇場、電視、hām佮舞臺效果的表現形式。佇舞臺頂，伊扮演的角色自來攏是主裁；歌仔戲的劇目嘛因為有楊麗花即个儂 chiah變kah加真精彩、滂湃；歌仔戲佇伊的推捒之下，成做臺灣佮世界華人文化的一筆大資産。Nā講 「楊麗花 一个儂 關係著整個（chéng-kô）歌仔戲的命運」，安呢 嘛 無過份。

ps. 本文是根據《歌仔戲泰斗楊麗花的傳奇形象》（文／ 蕭嘉慶．林秋芬）所來編譯的。

]]> http://blog.roodo.com/limkianhui/archives/1164714.html http://blog.roodo.com/limkianhui/archives/1164714.html 文化民俗 Sun, 12 Mar 2006 00:49:16 +0800 闽南民间风俗---出世、剃頭、满月、四月日、度晬、十六岁、做生日 離、唸完。民間 風俗 是 鄉土 文化 當中 真 重要 的 一个 部分，往往 hām 鄉土 語言、鄉土 藝術、民間 曲藝、宗教 信仰 相粘蒂帶。Chiah-ê 傳統 的 民間 文化、風俗 習慣 是 咱 老祖先 佇咧 古早 農業 的 時代，所來 産生 的 社會 文明，是 咱 寶貴 的 祖公業。時代 發展 真緊，往過 以農立國，農業的社會，即陣 變成 工業立國 的 科技社會。現子時，咱 有噹時仔 定定 會 數念 往過，數念 囡仔時代，怨歎 現代 社會 變化 傷緊。一寡仔 佇咧 往早 農業 時代 常在 咧 搬車 的 古早話、古早例，現在 會使講 所留落來的、所chhun落來的，真正 無 儕 啊，強beh 無無去 啊……這 實在 真 可惜，互 儂 想著 心肝芛仔 真正 會 痛悿（thàng-thiàⁿ）。

此去，咱 beh 長短仔 來 介紹 一寡仔 閩南 地方 的 民俗。講 是 講 beh來 做「介紹」啦，iah 事實 我 家己 所捌 oân-á 真有限。我limkianhui 算講 猶佫 是 一个 年歲 無講 kài儕 的 少年輩的，況兼 我 進前 嘛 無 專途 咧 研究「民間 風俗」，所以 我 即款「介紹」定著 啥物 會 chiâu-chn̂g，有 落交（làu-kau）、有 tāⁿ 誤 嘛一定 在所難免。敬請 各位 批評 指教。

今仔日，來講 一寡仔 佮 囡仔 出世、大漢 有 相干 的 風俗 古例。

§出世 §剃頭 §滿月 §四月日 §度晬§十六嵗§做生日

出世︰

嬰仔 出世 了後，第三 日、第九 日、第十七 日，厝裡底 示大儂 噯 知影 通（thang） 拜 床母，即款 拜拜 的 儀式，號做「做朝」（chò-tiau），有「三日朝」（saⁿ-ji̍t tiau）、「九日朝」、「十七日朝」……閩南人 看重 供「床母」，民間 認為講，囡仔 自 出世 遘kah 十六歲足 進前，攏 是 床母 咧 庇佑，保庇 囡仔嬰 會得 平安 順利。三日朝，是 紅嬰仔 落土 了後，算講 第一擺 有孝（iú-hàu） 床母（頭一擺 做朝），所以 重倍（têng-pōe） 噯 斟酌。三日朝 做煞，猶有 九日朝、十七日朝，共款 噯來 拜 床母，求 床母 保庇 紅嬰仔 平安 順利、乖乖 大漢。此去，每逢 初一、十五，或者 是 無拄好 囡仔 破病，示大儂 攏噯 款 一寡 供品 來 求 床母 保庇、消災解厄。

三日朝 即工，上要緊的，當然 著是 拜 床母 囉，這 透底 安排 佇 早起時。燒金，oân-á 有 講究。一般 來講，紅嬰仔 佮 老母 睏 共床的 咔儕，所以，供 床母 嘛是 佇 月裡房（goe̍h-lāi-pâng）咧 供。拜拜 結尾 著噯 燒金，燒金 著噯 燒 滯咧 房間 的 門後——壽金 呣好 展開，規沓（tha̍h）直接 用火 點著（to̍h）就 會使 囉。拜 床母 的 意義，是 beh 求 神明 保庇 紅嬰仔 會當 有 好睏眠，睏 會 長眠、睏 會 在眠。床母 拜了，請 抾姐（khioh-chiá ／産婆）kā 紅嬰仔 洗身軀。

頂面 講的 是 做 三日朝 即工，代先 噯 知影 通 供奉（kèng-hōng）床母。阮 漳州 龍海，攏 講號做「供姐」（kèng-chiá），稱呼 床母 是「姐」。除了 噯 供 床母，佫噯 攢（chhoân）油飯、雞、肉 來 祭拜 厝裡 的 神佛 佮 祖公。了後，厝主儂 會 派儂 摜 一寡 油飯 去 hēng 媒儂婆、親堂、厝邊頭尾 佮 月裡儂 外家 hit爿。意思 是 beh 報 互 chiah-ê 親情五雜 通 瞭解 主儂 抾囝（khioh-kiáⁿ）啊。

剃頭︰

紅嬰仔 出世 二十四日，示大儂 噯 央（iang）儂 來 kā 嬰仔 剃頭。二十四 日 剃頭，這 代表 講，囡仔 大漢 了後 會當 來 有孝 示大儂（中國 民間 傳說，講 有 二十四 个 孝子）。閩南 有的 所在，嘛有 剃 二十日的。

剃頭，著是 將 嬰仔 的 胎毛 剃掉，一般 來講，剃 和尚頭的 咔儕。未剃 進前，代先 噯 攢 一奇（chi̍t-kha） 骹桶、淡薄 石卵仔（華語：卵石）、淡薄 蔥仔、銀角仔 十二塊、雞卵、鴨卵（用 紅花米 挲 紅紅）。先 坫 骹桶 裡底 倒 寡仔 燒水，chiah佫 kā hiah-ê 石卵仔、銀角仔、蔥仔、雞卵 鴨卵 下滯 骹桶 裡，了後，戽水 起來 kā 嬰仔 洗頭。Chiah-ê 物件 攏 代表 著 無共的 意義——
石頭： 表示 身體 勇健（ióng-kiāⁿ）、性格 儼硬（giám-ngī）；
蔥：表示 聰明（chhang-miâ）；
銀角仔：表示 富貴、好額、行財運。
雞蛋、鴨蛋：表示 囡仔 生媠（siⁿ-súi）、古錐、好 枝骨。俗語 講「鴨卵身、雞卵面」。


滿月︰

滿月，一般 是 噯 辦桌 請 儂客。親情五雜、朋友間，招招 相請，辦 kah 誠 豐厚（hong-hō·）、誠 chhe-chhau。

做滿月，舅--仔（kū--á，月裡儂 外家 的 兄弟）著會 來 親家兜（chhin-ke tau） 「送頭尾」。送頭尾，著是 款 一套 囡仔 衫褲、鞋襪、帽仔、手環、骹環……等等 的 物件。

四月日︰

四月日，噯 kā 嬰仔「收瀾」（siu-nōa，華語：收涎）。Oân-á 噯 款 hit-lō 牲禮 佮 紅桃 供 神，供 祖公。做 siu-nōa 儀式 的 時陣，示大儂 噯著 攢 十二塊 馬蹄酥，用 紅絲仔線 kā 穿穿（chhng-chhng）、縛縛（pa̍k-pa̍k） 做 一串（chi̍t-chhǹg），順sòa 佫 kā 挂咧 嬰仔 的 頷kún仔，唸 好話——
收瀾 收 凋凋，（Siu-nōa siu ta-ta,）
明年 生 膦脬。（Mê-nî siⁿ lān-pha.）
收瀾 收離離，（Siu-nōa siu lī-lī,）
明年 生 小弟。（Mê-nî siⁿ sió-tī.）

度晬︰

紅嬰仔 滿 一歲足，厝裡 所做的 儀式，號做「做度晬」（chòe tō·-chòe）。北方 中原 所在，自古 著有「周晬」的 講法（見《東京夢華錄》），所講的，著是「周歲」的 意思。閩南 漳泉的 風俗，紅嬰仔 度晬 即日，厝裡儂 著噯 先 拜 佛祖 神明，燒金、放炮。

做度晬，上 趣味的 著是「試周」（chhì-chiu，華語：「抓周」)。試周 的 儀式 是 安呢：坫咧 厝裡底 大廳 佛架仔桌 的 面頭前（大廳中央），佇 土塗兜 排 一个 竹做的 大 筊 （ka-lia̍h），裡面 有hē 十二項 物件，比論講：秤、墨、硯（hīⁿ）、毛筆、冊、算盤、蔥仔、雞卵、柴、白銀、布尺、雞bong。物件排好了後，大儂 kā 嬰仔 抱 滯 筊 裡底，互 嬰仔 家己 去 捎（sa） 裡底 的 物件，看 代先 捎著 啥貨。一項 物件，代表 一項 社會職業。根據 嬰仔 上代先 捎著 的 物件，著 會當 來 a-kah（華語：預測）囡仔 的 性素、運途，判斷 囡仔 大漢 了後 做 叨一 途。比論講
蔥：表示 囡仔 真 聰明（chhang-miâ），有 出脫。
冊：說明 嬰仔 別日 誠 讀冊，是 狀元才。
筆、墨：表示講 誠寫字、畫圖，有 才情，通（tang） 做 畫家。
算盤、秤：表示做生意，有財利。
雞卵、雞bong（雞腿）：表示 富貴，有通 食，枵腹肚。（有噹時仔，用 箸 扦(chhiám) 雞卵 代替 雞bong。號做「雞攑」（ke-kia̍h）)。
布尺：說明 囡仔 日後 會 入 裁縫 即途。
白銀：表示講 日後 會 好額、會 富貴……

十六歲︰

囡仔 大 遘 十六歲，號做「成丁」（chiâⁿ-teng），示大儂 噯kā 辦「成年禮」。

民間 透底 相信講，囡仔 會得 平安 順利、大漢，一切 攏是 神明 佛祖 佇咧 鬥保庇。所以，遘kah 囡仔 十六歲足 的 時陣，示大儂攏會 去 佛祖廟的 拜拜、答謝；或者 佇咧 厝裡底 祭拜 七娘嬤、燒 七娘嬤亭，用 安呢 來 報答 神明，對 神明 表示 感謝。

做生日︰

Cha-po· 囡仔 大漢 了後，做 示大儂的，逐年 攏會 kā 慶祝 生日。

ps.閩南儂 認為講，數字「九」往往 呣是 啥物 好吉兆。Cha-po·-lâng 的 歲聲 piān-nā 拄著 「九」，比論講 十九、四十九……hit-ê 年kō（華語：年份）整個（chéng-kô）的 運途 會 加咔 bái， 做 任何 的 代誌 一定 著噯 細膩 佮 斟酌。為著 安呢，逢 九 做生日，佫咔 著 慶祝，往往 會比 往常時（éng-siâng-sî）加咔 豐厚、加咔 鬧熱。閩南語，「九」佮「久」讀 共音，「久」本然 著是「長久」、「永久」的 意思。不而過，三十 過後，做生日 oân-á 著 講究，不可 濫糝（lām-sám）來。一般 來講，三十九 著噯 當做 四十 歲 生日 做，四十九 歲 嘛噯 當 五十 歲 生日 來做（俗語講，「五十九做生日，雙骹 lòng直直」）。五十歲 生日 叫做「暖壽」，六十 歲 叫做「下壽」，七十 歲 叫做「中壽」，八十 歲 叫做「上壽」，九十 歲 叫做「耄耋之壽」，一百 歲 叫做「期頤之壽」。有錢儂 做生日，不但 辦桌 請 儂客，佫噯 倩（chhiàⁿ） 戲班 來 搬戲，真正 是「老伙仔 食 麻油——鬧熱滾滾」啦！ ]]> http://blog.roodo.com/limkianhui/archives/766700.html http://blog.roodo.com/limkianhui/archives/766700.html 文化民俗 Tue, 22 Nov 2005 18:54:13 +0800 閒閒bóng練牙：河洛？抑是福佬？
即位台灣啲朋友SLS（歹勢講出伊啲名號，先用羅馬字母做代號），一見面就問我「河洛」（Holo）即詞福建漳泉所在敢有儂安呢講。我應講「無」，了後，伊佫問我中國啲Hakka（客家儂 / 客儂）安怎稱呼福建漳泉儂？聽伊安呢問，我家己著咧ioh講，伊穩當是想beh問我有關「河洛」、「福佬」啲代誌……

講正經啲，「河洛？福佬？」即个問題，我進前拄好有聽儂講淡薄，家己嘛有略仔掀過冊，嘛有佇網頂查過一寡資料。我著hām伊講起我所瞭解啲一寡看法——

Tòa佇中國福建西部、西北部啲客儂，往過若講起「講閩南語啲儂」，透底kā咱叫做「Holo」（這只是客語啲譯音，無法度確定是holo、hohlo、抑是holoh……）。台灣研究閩南語啲老仙覺吳守禮先生，佇論文內底有講著伊捌查閱一大bu啲福建方誌（抑是史誌？），攏無看著佮「河洛」、「福佬」有治代啲記載（這佮閩南地區chêng-tàu-taⁿ攏無「河洛/福佬」即款講法 對會和）。守禮仙佫講，台灣儂即陣所講啲「Holo」，上早真可能是按客話hia 那péng那來 啲。伊講，一開始，客儂是keng-thé福建儂「福佬」，客話讀做「Hok lo」，意思是「福建佬」、「福建鬼」。這佇客話內底，算thóe-that儂啲歹話。後來，台灣啲福建儂（漳泉儂）大概是互儂罵了慣勢，不但bōe記得「福佬」是一句歹話，顛倒soah sa來稱呼家己，siâng時呼音嘛有起變化（客話Hok lo → 漳泉語Holo）。安呢無打緊啊，遘kah路尾，soah 連有啲客儂嘛反倒轉tòe福建儂講：Holo, holo......

SLS聽我安呢講，雖然伊無當面表示反對，不而過，我ioh伊應該無同意即款啲解說(kái-soeh)。我感覺SLS基本上咬定這「Holo」著是「河洛」（拄開始啲時，伊著是問即个）。伊一再拜託我噯去做調查，看中國啲客儂咧稱呼漳泉儂啲時，是「福佬」抑是「河洛」。伊講上好是調查客儂實際啲語音。安呢就會知到底是「魚」抑是「蝦」；是「珍珠」抑是hit-lō「鳥鼠仔屎」。當時，我嘛認為即个撇步誠好，著隨應允，講有機會我會去調查清楚。路尾，SLS有講起伊認定是「河洛」啲理由，伊講——

伊咔相信客儂講啲是「河洛」，呣是「福佬」。客儂一貫認為家己是ùi中原地區遷落來啲，siâng時又佫承認福建儂 oân仔 是 ùi 河南即角勢搬來啲。所以，客儂透底將福建儂叫做「河洛」。

其實，SLS搬出chiah-ê道理，我嘛呣是頭一擺聽著。我會記得 進前咧看《廈門方言》（《廈門文化叢書系列》，鷺江出版社）啲時，著捌看著共款啲講法。是講，親像即款「河洛本位論」到底是有影抑無影，現時我猶原無法度做定論。不而過，設使中國客家儂講啲呣是「河洛」即詞，安呢，伊 hit个 理由 著講bōe通囉。

講遘「河洛」即詞，老仙覺吳守禮先生oân-á有無共款啲看法，嘛是我咔beh相信，或者講佮我個人看法咔接近啲（只是咔接近niā，無完全siâng款）。做夥來看māi ——

守禮仙啲講，「河洛」即个講法是歷來台灣官方（國民黨政府）佮少數文人學者硬造出來啲。伊講，「Holo」即个音，佮「河洛」即兩个漢字啲呼音相親像（總是嘛無完全siâng音）。因為安呢，有啲文化儂著主張kā「Holo」寫做「河洛」。講「河洛」即兩字，不但 字面啲 比「福佬」加咔雅氣，佫會當暗示「台灣儂攏是ùi中原河洛地區遷來啲」，是正港啲「中原貴族」。守禮仙佫講遘，國民黨走來台灣了後，獨尊華語，看台灣儂啲母語真無目地，一再強調台灣土話只不過是「方言」，是無水準、無路駛啲閩南話。這以外，國民政府又佫沿用進前台灣人士提出「河洛話」啲講法，暗示政府原在有同意閩南話是按古早時代啲河洛地區傳來啲，根在中原，是漢族話，呣是外族語言。

總是，對著「Holo」即个名詞，目前只kan-na有伊啲讀音佇咧，進前也攏無文字記載留落來。無siâng學者所作稽考佮解說（kái-soeh）嘛無siâng。Taⁿ，除去頭拄仔講啲「福佬」、「河洛」以外，佫捌看著「鶴佬」、「學佬」……等等 龜挪鼈趖 啲寫法。到底叨一種chiah tio̍h，khiàm-chhái噯佫進一步啲稽考佮比較。 ]]> http://blog.roodo.com/limkianhui/archives/462188.html http://blog.roodo.com/limkianhui/archives/462188.html 文化民俗 Thu, 08 Sep 2005 16:39:35 +0800 中秋博饼 厦门风俗
廈門民間啲博餅，有伊啲歷史故典。民間傳說講，往早，鄭成功佇福建起兵，廈門做根據地，做兵仔儂透底攏是泉州府、漳州府、潮州府即三个所在啲散兇儂。俗語講，「中秋無轉厝無祖，年兜無轉厝無某」，做兵仔儂，出外口久長長，思想故鄉啲親儂在所難免。尤其若遘kah八月半，想厝啲心情更加無法度平靜落來。為著安搭、排解士兵鬱悴又稀微啲情緒，鼓舞軍隊啲鬥志，鄭成功佮伊啲軍師、部將想出一套會當消譴娛樂啲遊戲，互伊啲將士做夥來chhit-thô消譴。經過一代佫一代，即套遊戲一直流傳遘taⁿ，成做今仔日廈門所在獨特啲風俗。

今仔日，咱beh將廈門博餅活動啲規則，來做一个詳細啲介紹。

【會餅】

博餅博餅，著是用「餅」來咧博，來咧輸贏。看啥儂贏啲餅咔大塊(tè)，啥儂贏啲咔儕。用做輸贏啲餅，有一个專名，叫做「會餅」。傳統啲會餅，每一會，固定是63塊，有大有細；每一款月餅，攏代表一个名號，分別是：狀元餅1塊，對堂餅2塊，三紅餅4塊，四進餅8塊（是進士哦~），二舉16塊（是舉人neh~），一秀餅32塊（秀才啦）。當中，狀元餅上大塊，上有價值；一秀上細，數量上儕。

【遊戲儂數】

無固定儂數啦，建議每一會上好呣通超過10个儂；當然儂傷少嘛無趣味。

【准備工作】

1、攢(chhoân)家俬頭仔：一塊桌頂（輔助工具）、一會會餅、一副(六粒)骰仔(tâu-á)、一塊大碗礓（hûi啲，愈弧（ô·）愈好）。

2、桌頂排蹛廳中央，碗礓kheh踮桌頂。眾儂圍倚(oá)來，準備博餅。

【遊戲規矩】

博餅有一套規矩（無共啲角頭，小可有精差），儂儂攏噯遵守。這誠簡單，講破呣值錢。代先，是在下設計啲一條「盤喙錦」（poâⁿ-chhùi-gím，華語：順口溜）：
博餅著準備，代先唱（chhiàng）規矩。
眾儂聽分明，事後莫（bo̍h）糾纏。
逐家圍桌墘，某儂先開始。
手搦骰仔jí，鏘喨tàn落去。
碗内獻數字，賞罰有根據。
博著啥物點，著賞伊啥物；
骰若跳出礓，罰伊停一期。
博好換隔壁，直直輪落去。
等遘月餅盡，遊戲嘛停止。
唸煞即條盤喙錦，相信各儂心肝內應該攏有一个粗淺啲概念。紲落來，詳細啲規矩，說明如下（對照圖畫看說明）：

1、一秀：出一粒紅四，得一塊一秀餅（圖1）。
2、二舉：出二粒紅四，得一塊二舉餅（圖2）。
3、四進：出四粒點數共款啲（四粒紅四掠外），比論講，四粒一、四粒二、四粒三、四粒五、四粒六，像圖3。
4、三紅：出三粒紅四，得三紅（圖4）。
5、對堂：點數自一排遘六，號做對堂（圖5）。

6、狀元：狀元餅啲輸贏（華語：角逐）上吤趣味。「狀元」分做幾偌个坎（等級），有「大狀元」佮「小狀元」啲分別。不而過，狀元餅kan-na一塊，所以，逐家著噯來拼輸贏，看啥儂博啲級聲咔koân。輸贏啲規矩，會使講是「大魚食細魚，細魚食蝦米」、「賊劫賊，鎖管仔劫墨賊」，總是，遘最後，真正啲「狀元」只有一个，第一猛啲摕(the̍h)去食。大細「狀元」啲級聲，按照自細遘大啲順序，規定如下：
（1）出「四紅」，也著是四粒紅四啲情形（像圖6，呣佫，無包括「四粒紅四 帶兩粒一」），著會使算是狀元。假使有兩个儂（或者咔加）攏出四紅，安呢，噯佫比較所帶啲點數，看啥儂帶啲點數大，著算伊贏。其中，「四紅帶十二」上大。

（2）、比「四紅」咔大啲，是出五粒點數相共啲（圖7），號做「五子登科」（簡稱「五子」）。當中，「五粒六」第一大；「五粒一」第一細。

（3）、比「五子」咔大啲，是四粒四帶兩粒一（圖8），這號做「狀元插金花」。按規矩，博著「狀元插金花」啲儂，除了得狀元餅，佫會當「搶走」對堂餅。

（4）、比「狀元插金花」咔大啲，是六粒點數完全共款啲情形（圖9）。

（5）、特殊情況——
①、出現「六粒紅四」（圖10），號做「六pū紅」（lio̍k-pū-âng），是全局上吤大啲狀元公。按規矩，博著「六pū紅」啲儂，所有啲會餅攏總伊啲，總ba̍uh。總是，現代儂感覺即條規定呣是真合理，所以有時會臨時取消即項規定。
②、出現「六粒六」（圖11），號做「六pū烏」（lio̍k-pū-o·），是「歹吉兆」。即个時陣，按古早規矩，著噯關門禁燈，逐家做一下來搶餅，烏白搶，由在儂搶。不而過，即項古例，即擺咔無咧時行啊，因為安呢實在誠無文明，所以，差不多嘛已經互儂取消去啊。

7、添注說明：
（1）、狀元餅只有一个。橫直，啥儂是上吤大啲狀元，啥儂得去。
（2）、只beh遊戲猶未煞鼓（結束），准講，某一項會餅已經暫時互儂分完，按規矩，猶原會當運用「追」啲步數，去共儂「搶」餅，或者去互儂「搶」倒去。這是遊戲當中上吤刺激啲、嘛是上吤趣味啲。只beh點數咔贏儂，後來者著會當憑點數來「搶走」進前hit个獲取者啲月餅。比論講，三紅餅暫時分完，過後，若有儂佫博著三紅，而且，伊所帶點數佫比路尾得著啲hit个儂咔koân，安呢，「搶」餅著有成功。
（3）、傳統啲博餅，博啲是真真正正啲餅。不而過，現在啲社會，餅實際已經無啥儂咧食，所以會餅透底攏已經換做實實在在啲物件，比論講各種生活用品、家用電器、金銀器，甚至紅包……會餅雖然換做物件，不過博餅啲規矩、程序無變。所以，博餅嘛變kah加真趣味，加真刺激。
PS：博餅作為廈門民間傳統啲節日文化，早早著已經「社會化」，成做全市各族人民共同啲節日文化；成做全市各行各業95%以上啲企業、佮公司啲「企業文化」之一。現子時，博餅文化已經受著中國內陸愈來愈儕啲認捌；博餅活動嘛已經慢慢推廣遘廈門以外啲所在。另外，根据瞭解，今年，廈門市已經向國家有關部門申報將「博餅文化」定做「國家級文化遺産」。

相關連結：2004年第二屆博餅文化節 ]]> http://blog.roodo.com/limkianhui/archives/366950.html http://blog.roodo.com/limkianhui/archives/366950.html 文化民俗 Fri, 12 Aug 2005 21:24:21 +0800 閩南侬对“日、月“啲理解 北大中文论坛"，有看着网友写讲： (繼續閱讀...) ]]> http://blog.roodo.com/limkianhui/archives/62493.html http://blog.roodo.com/limkianhui/archives/62493.html 文化民俗 Tue, 05 Apr 2005 23:00:39 +0800