鹭水芗南－闽南语部落

暗光鳥 ê 厝，昨昏專工錄一tè影片，教儂安怎寫wikipedia（維基百科）。有詳細的講解，配合實況操作，不止心適。介紹咱逐个saⁿ-kap來去參觀。

PS：閩南版維基百科，網址是 http://zh-min-nan.wikipedia.org （滞伫中国的朋友，khiám-chhái无通上即个网站，请汝ji̍h即个网址→→
https://ushide.com/cgi-bin/nph-proxy.cgi/000001A/http/zh-min-nan.wikipedia.org）

即暫仔雖罔咔無閒通上網， soah 嘛噯 逐工 勼(kiu)佇 電腦桌的面頭前 leh khi̍h-khi̍h-khia̍uh-khia̍uh 、 ti̍h-ti̍h-ta̍uh-ta̍uh ，無閒 佮 鍵盤 jí 仔 交陪。 Khiám-chhái 是我生本咔 pîn-tōaⁿ 抑是安怎，橫直，我影影會記得 ná 像 久久 無 kā 電腦升級ah 。無疑誤soah愈驚愈著跤脊骿（kha-chiah-phiaⁿ ），過免偌久，著真正出代誌ah ！我哩咧…看pān 勢，正經 beh “出運” ah 。 XD~~~

有破空，當然嘛噯補，噯冗早補，儂講“細空 nā 無補，大空叫艱苦”， iah nā 無，真正著有影“趁‘一空’，食 kah 六月冬”，時遘， beh 哭 tō 無目屎。

總是，我即 tè 傢俬頭仔，無講無tàⁿ 雄雄 soah 來出狀況，講遘底， he 攏是因為“瑞星（rising ）” leh 惹禍—— bōe 仙假仙，牛膦 leh 假鹿鞭！互伊害一下 險覆覆落去（phak-phak--lo̍h-khì ），真正 chhoah 咧等！

尾仔，好 ka-chài 是咱頭殼好料，巧巧仔儂，會曉趁早 kā “瑞星”即款無路用的 kha-siàu ，掃帚揾尿——戽一个互伊無看見。

Taⁿ ，我是用“ Kaspersky ”即味兮，中文名號做“卡巴斯基”，這正港 阿督仔 出產的，絕對呣是咱在地 hiah-ê 阿沙不luh 會當比並（pí-phēng ）的。咱呣是專題咧研究即途，無瞭解 chiah-ê 刣毒軟體 到底各儂啥物性素，是講，有噹時仔咱 nā 感覺講氣口有合（ha̍h ），著大膽 kā 開落去，呣免觀前顧後、頓teⁿ 躊躇。 Kaspersky 真正無咧臭蓋，現鬥落去現升級，佫 soah落去，免三字久的時間，一寡牛鬼蛇神、有的無的……著攏總掠 kah 無半隻，真正清閒，此去呣免佫 tng蠅tng 蠓、煩惱 kah bōe食bōe睏得。

Kaspersky ，網路頂懸一四界攏有咧賣，價數（kè-siàu ）普通 niā ，有影 俗佫有 kio̍k 。

講 chiah 儕， bōe 輸咧替儂吹銷、做廣告，ah嘛 kán-ná 親像 喝玲瓏咧賣雜細。是啦，有影不止仔無義量，可比 hit-lō 牽豬哥仔——趁暢（thàn thiòng ），ah嘛無得著 一 sián 五厘…… XD ～

常在（chhiâng-chāi）有咧上網的儂，hoān-sè攏有拄着即款的困擾：想卜登入一个真久真久無去行踏的網站，iah 呣佫 liâm-tong-sî soah bē記得 密碼是啥貨。有時仔 真正 想kah 頭殼 煏破（piak--phòa），嘛猶佫想無。即个時陣，請逐个呣免緊張，儂講「緊事寬辦」（kín-sū khoaⁿ-pān），只卜咱進前捌用Firefox登入過即个網站，安呢，咱着 有法度 順藤chhiû瓜，chhē着pháng見的密碼。

〖Chhē密碼的撇步〗：

頭一步：啟動Firefox瀏覽器。

第二步：ji̍h 「工具列」（菜单栏）的「工具（T）」，bok出 「下級表單」（下拉式菜单），像 下底 圖(1)看着的 安呢。

圖(1)

第三步：ji̍h「選項（O）...」，會bok出圖(2)即个 對話窗。

圖(2)

第三步：佇圖(2)對話窗 裡底，相連sòa ji̍h 「個人隱私」、「密碼」、「檢視已存密碼（V）」即三个標簽。了後，會自動bok出 佮圖(3)頂半部分 共款的對話窗。

圖(3)

第四步：繼續 佫 ji̍h「顯示密碼」即个標簽，會bok出 圖(3)下半部分 hit-ê 對話窗（你確定要顯示密碼嗎？）。繼續 ji̍h 「是（Y）」，bok出 圖(4)對話窗，像安呢：

圖(4)

佇圖(4)對話窗 裡底，汝 着 會當 chhē着 進前 pháng見 的 密碼。

着是chiah簡單！安呢niâ，無啊。

閩南維基百科即暫仔有介紹一款新的字體（字型），號做「Charis SIL」，講是SIL International開發設計的一款電腦字型，是按照Bitstream Charter的「模」落去做的。目的着是beh造一套有chiâu-chn̂g 的 Unicode（通用碼／统一码） 字型。所以，in講即款字型已經包含「世間所有的『羅馬字』抑是『Cyrillic字』的字母」，thèng好 用來 配合 文字的書寫，嘛thèng好 用來kā文字注音。

維基網頁介紹講，「Charis SIL」佮「 Doulos SIL」共款，嘛用着一寡先進的字型技術，比論講Graphite、OpenType 佮 AAT。不而過，「Charis SIL」比「Doulos SIL」有咔進步。In講「Doulos SIL」即款字體（字型）kan-taⁿ 一款字形（weight）nā-niā，ah nā 「Charis SIL」有四種字形：羅馬體（roman）、粗體、趨體 佮 粗趨體。

佇SIL International官方網站 ，有 開放 免費的版本 互儂 掠（lia̍h／下載），建議朋友相招去掠。Nā beh掠，請入去：http://scripts.sil.org/cms/scripts/page.php?site_id=nrsi&item_id=CharisSIL_download#FontsDownload

這是用charis SIL顯示POJ的效果圖：


p.s. Kā恁偷講一下：「charis SIL」佮福州話羅馬字（平話字）嘛有四配哦～

有牽連的文篇：《白話字的符號代碼（UTF-16）》

　　PDF，是一種電子文檔（檔案）的格式，全稱號做「Portable Document Format」，會當保存來自任何源文檔的字體、格式、色緻 佮 圖形。佇業界，有真儕電子文件，尤其是咔重要的檔案，透底是使用PDF的格式。

　　過去，beh chhē一款會當製造PDF格式的軟體（軟件），ná像呣是hiah簡單。Adobe公司會當講是PDF的鼻祖（pi̍t-chó·／開山祖），初起先，in出産的産品 Adobe Acrobat Reader ，佇業界來講，真正是孤門獨市，有夠交易（ka-ia̍h）。

　　即陣，國産的組件式辦公軟體WPS Office 2005，oân-á會當輸出PDF格式囉。真正足感心的~~　

　　古早儂講「錢呣用是銅」。所開發的電子軟體，nā是bē當為用戶提供利便，講咔歹聽的，he 佮 糞掃（pùn-sò）敢有精差？用着會利便，這條道理是軟體開發商一定噯瞭解的。金山公司開發的WPS Office 2005，會當將「.doc格式」的文檔 hām「.wps格式」的文檔，輕鬆轉換做PDF格式的。
　　操作kài簡單，只要用WPS Office 2005將按算beh轉換的文檔開開，直接chhi̍h（點擊） 【文件（F）】→ 【输出为PDF格式（F）…】，就可以囉！整個（chéng-kô）的過程，kan-taⁿ 需要5秒鐘。安怎，有緊無？

　　兩步：　　

　　頭一步：用"WPS文字"拍開beh 轉換的Word文擋（見圖1）　　

圖1 用"WPS文字"拍開beh 轉換的Word文擋　

　　第二步：捏"文件"→ "输出为PDF格式(F)…"，佇 對話窗 裡底，按提示操作，最後，捏"确认"，就OK囉。　　　

圖2 輸出PDF格式的選項

　　效果像安呢：　　

　　

圖3 輸出PDF的效果　　

　　啥款？是呣是足讚的～～

p.s. WPS beh 去叨位 downloa d咧？免驚，佇chia佇chia： 【WPS Office 2005 個人版】。

        進前tòe儂咧時行，三不五時，愛佇BLOG頂懸khè一寡好聽的音樂，不但儂客有thang聽，家己nā卜聽，嘛不止仔利便。頂一暫仔，坫「T-Eye 第3只眼」hia學着一招，轉來遘，隨做一个 古錐 又佫 束結 的播放器。He是用ExoBUD MP(II)即个軟體做出來的，實在不止仔合意，不但會當聽音樂，佫有歌曲清單thang揀。不而過，有一好着無兩好，伊kan-na有合IE用niā，火狐狸（Fierfox）soah bē用得。

        昨昏，又佫 牽google 出去 四界liù，按算講「鴨母喙罔lū，無田螺也有水龜」，對對 去chhiau着一寡好料的——是一个簡單、利便的「播放器程式」。比ExoBUD MP(II)佫咔簡便。不而過，功能當然是有咔輸面。但是，利便！利便着是上大的優點。儂客 nā 有興趣，無 嘛 thèng好 抄轉去 試看māi。下面是即个「播放器程式」的語法。

　　 <ASX Version="3.0" PREVIEWMODE="NO">
　　<repeat>
　　<entry>
　　 <ref href= "第一首歌曲網址" />
　　</entry>
　　<entry>
　　 <ref href="第二首歌曲網址" />
　　</entry>　　……
　　<entry>
　　 <ref href="第N首歌曲地址" />
　　</entry>
　　</repeat>
　　</ASX>

        請將頂面即套程式語法copy落來，用記事本保存起來，擴展名「.asx」（注意：呣通 揀 Unicode編碼！），比論講：koakhek.asx。佫紲落來，噯進行兩个步驟：

1. 着是噯將即个檔案傳上網（上傳），可比講，蕃薯藤-樂多BLOG允准傳.asx格式的檔案。傳上網了後，得着檔案的網址（像安呢：http:// *******.asx）。
2. 佇blog網頁裡底，將下底的語法貼起去：

   <embed type="application/x-mplayer2" pluginspage="http://www.microsoft.com/Windows/MediaPlayer/" src="http://*******.asx" autorewind="0" autostart="1" showcontrols="1" showstatusbar="1" align="middle" height="68" width="176">

        安呢，着創好勢囉。即个播放器伊會當自動、連紲播放。語法當中autostart="1" 表示「自動播放」，假使無噯互伊自動播放，請將改做autostart="0"。

Khá-koài--ah, Chit-chām-á Keyman_POJ_0.6 su-ji̍p-hoat soah hiông-hiông bōe-tàng tòa IE lâi sú-iōng?? Chit lāi-tiong m̄-chai sī sím-mi̍h goân-in, kàu taⁿ ti̍t-ti̍t hō· góa siūⁿ lóng bô.

Pa̍t tâi tiān-náu bêng-bêng ē-sái--tit, in-hô chit-tâi soah bōe-tàng ? Kám-kóng sī Windows Update àm-chīⁿ teh chok-lōng? (Kiàn-pái chhut chiōng-hóng, to̍h lóng khan-thoa tùi MS hia khì... XD~~~) Ah-sī lán ka-kī ê tiān-náu tó-ūi chhiâu-liáu m̄-tio̍h--khì? (pí-lūn kóng IE ê "sio̍k-sèng" tiâu cháu-choa̍h--khì..) Kiám-cha kui-po· kú, iû-goân chhâ bōe-tio̍h kin. Khoàⁿ pān-sè, ài chhiàⁿ hit-lō “choan-kho ê tiāu-náu sian-siⁿ ” lâi hoāⁿ-me̍h, nā bô, chi̍t-sî soah bô hoat-tō· i-tī .

Hó lah, ke-oē mài koh kóng. Taⁿ kín lâi kóng chèng-keng--ê. (Án-ni thâu-tú-á m̄ to̍h choân leh kóng siáu-oē ? Hi-hi.....) Kin-á-ji̍t, chù-sí khì chhiau-tio̍h Tavultesoft Keyman ê koaⁿ-hong bāng-chām. Pún-jiân, ba̍k-chiu peh kah tōa-tōa lúi, siūⁿ-kóng beh chim-chiok lâi kā chham-koan--chi̍t-ē, bô-gî-gō· soah khoàⁿ bōe-sêng: lóng-choân siáⁿ Eng-bûn... I bat góa, góa m̄-bat i, to̍h chhin-chhiūⁿ hit-lō "thó·-tī-kong leh khoàⁿ ka-lé, lú khoàⁿ lú hoe..."

Chū-tóe to̍h ū leh àn-sǹg beh iōng keyman ka-kī lâi chòe chi̍t-ê khah kan-tan iū-koh lī-piān ê POJ su-ji̍p-hoat. Ah nā chìn-chêng, it-ti̍t kàu kah chit-chūn, lóng leh ēng Pek-tiong hoat-bêng--ê hit thò ke-si-thâu-á. Pek-tiong siat-kè--ê chit thò, sui-bóng bōe pháiⁿ ēng, m̄-koh góa kám-kak iáu bô-kàu kán-piān, chú-iàu sī phah "tiāu-hō" ê sî-chūn ū khah hùi-khì.

Góa ka-kī ū leh khó-lū beh (tòa keymanPOJ_0.6 ê ki-chhó·-siōng) lâi kā kái hō· khah lī-piān--tām-po̍h. Góa chho·-pō· sī án-ne teh àn-sǹg--ê:

(1). a + 2 → á
a + 3 → à
a + 5 → â
a + 7 → ā
a + 8 → a̍
a + 9 → ă
…………
(2). Phīⁿ-im hû-hō " ⁿ " : n + 0 → ⁿ
(3). " o· ", chiàu-goân an-pâi tī "q" chit ūi.

Tû-khì téng-bīn chit 3-tiám sió-sió ê kái-piàn, chhun--ê lóng chiàu-goân î-chî KeymanPOJ_0.6 ê pò·-kio̍k. Án-ni siu-kái, ū nn̄g-pō· hó (iu-tiám):

• Tē-it, phah-jī ē khah lī-piān, m̄-bián iōng-tio̍h "Ctrl" kah "Alt" chit 2-lia̍p àn-kiān.
• Tē-jī, sò·-jī ti̍t-chiap tùi-èng tio̍h tiāu-hō, ti̍t-tú-ti̍t; iáu-koh ē-tàng pang-chān lâng khah kín lâi lí-kái kah se̍k-sāi POJ ê siaⁿ-tiāu.

Che sǹg-chòe kóng khah chho·-chhián, khah bóng-tóng ê siūⁿ-hoat lah, mā bô-it-tēng kiâⁿ ē thong. Khah khì--chi̍t-chām-á, tán khah ū-êng ê sî-chūn chiah lâi bóng chhì-giām khoàⁿ-māi leh.

（【說明】即招是按線頂kā儂「偷賺食」來的，實在真好用，驚記，只好kā抄起來囥佇chia……）

三不五時，有看著一寡趣味的網頁，會當佇咧網頁當中佫再插入一个外部網頁。有的儂想講he定著是用著框架的語法，呣佫，事實呣是安呢，這是用著<IFRAME>的技術。講是講kan-na IE（瀏覽器）會用得，不而過，我有試過啊，Firefox（瀏覽器）oân-á會合（ha̍h），iah nā是其它的瀏覽器，我著呣知影囉。下底有完整的語法（是按別位照搬來的）：

分析代码：<iframe src="iframe.html" name="test" align="MIDDLE" width="300" height="100" marginwidth="1" marginheight="1" frameborder="1" scrolling="Yes"> </iframe>

　　src="iframe.html"
　　用来显示<IFRAME>中的网页来源，必定要加上相对或绝对路径。
　　name="test"
　　这是连结标记的 target 参数所需要的。
　　align="MIDDLE"
　　可选值为 left, right, top, middle, bottom，作用不大 。
　　width="300" height="100"
　　框窗的宽及长，以 pixels 为单位。数值可以根据喜好自己修改，但不要设得太大，以免造成母页破版。
　　marginwidth="1" marginheight="1"
　　该插入的文件与框边所保留的空间。
　　frameborder="1"
　　使用 1 表示显示边框， 0 则不显示。（可以是 yes 或 no）
　　scrolling="Yes"
　　使用 Yes 表示容许卷动（内定）， No 则不容许卷动.

效果亲像安呢：

朋友 nā 是 常在（ chhiâng-chāi ）有 teh 線頂（網路）踅 chhit-thô ，儕少穩當有聽著「播客」即个講法。實實講，我嘛是最近 chiah 有聽儂 teh 講起啦。 Ah 照我看， hōan-sè 猶佫 hàm-hàm 儕儂呣知「播客」是啥物仔碗糕。雖然我 ôan-á 無 kài 清楚，所知影的實在真有限，不而過，咱共款是 beh 將家己所瞭解的，來 kā 朋友小報告一下（一支破雨傘，興展興展啦）。

Podcast ，伊的中文譯名猶未定型，目前，上儕儂 kā 翻譯做「播客」。伊算是一種「數字廣播」技術，初初出世的時陣，是倚靠（oá-khò ）一款號做「 iPodder 」的軟體（软件），結合 一寡 輕便型 的 播放器來咧操作。 Podcasting 所錄製的是一寡線頂廣播或者網路聲訊節目，網友會當將線頂的廣播節目掠落來，存滯家己的 iPod 、MP3播放器或者其它輕便型的數碼播放器裡中，隨時聽好（ thèng-hó ）欣賞。不而過，這算講 kài 普通，應該呣是 Podcast 上主要的特色。對 Podcast 來講，上 kài 有意義，或者講上 kài 有趣味的代誌是，網友（播客）會當將 in 家己的錄音檔案， hē 坫網頁頂面，分儂聽。安呢，每一「播客」攏會當將 in 的心聲， in 想 beh 講的話，或者 in 經過的代誌用錄音的形式，放送出來，佮眾儂做夥來分享。有儂講， Podcast 是一種有聲的 blog 。

Podcast 的定義：目前，對 Podcast 猶無一个統一的定義。 Podcast 的推動者 Doc Searls 伊是安呢解說（ kái-soeh ）的： PODcasting ， Personal Optional Digital casting 。可見， PODcasting 是一種自助廣播，一種新式的廣播形式， beh 聽呣聽，隨在儂；隨時會當收聽，攏免佫被動接受。 Doc Searls 認為講，真正的 Podcasting ，著噯 siâng 時具備三个條件：

1 ．必須是一个獨立、又佫會通（ ē-thang ）下載的媒體檔案；
2 ．媒體檔案的發布形式是 RSS2.0 enclosure feed ；
3 ．接收端（客戶/用戶）會自動接收、下載，而且有法度將檔案自由 sóa 動，比論講 sóa 去遘 用戶 家己的播放器裡中。
　 伊佫講，設使 kan-na 提供 MP3互儂掠（下載），猶無算是播客（ Podcast ）――這算是充分條件，但呣是必要條件。「有通掠（下載）檔案當然是真好，不而過， nā bōe 當自動播放，猶原無算真正的 Podcasting 。」

當然，對 Podcasting 的概念，業界猶佫有真儕無共款的解說佮定義。

現子時，佇中國，播客 teh 時行是真緊。足儕網路媒體攏將焦點對准「播客」，各式各款的「播客服務」是一齣 sòa 一齣，排 kah 滿四界（ sì-kòe ）。親像講《播客天下》啦、《博客網—播客頻道》啦、《中國播客網::原創影音基地》啦、《播客寶典》啦 等等……

呣知朋友有注意著無？ iah 事實咱用 blog 嘛聽好（ thèng-hó ）來 kā Podcasting 一下，雖然無 hiah 正港。總是，趣味趣味，趁時行，罔變（ bóng-pìⁿ ）罔變。

我是安呢變弄（pìⁿ-lāng）的：

1 、頭一步，先家己錄音。做成wma的格式（或者別種音頻格式，比論 mp3 ……）。

2 、 第二步，Chhōe 一个所在， kā 咱 頭拄仔 錄的 音頻檔案 捒上網（ sak-chiūⁿ-bāng : 上傳）。上網了後，會生一个「網址」（ url ）出來。

3 、第三步，這是上關鍵的一步，好佳哉，完全攏bōe複雜。佇咧即步裡底，咱會用著一段html的語法，目的是beh來製造一个簡單的網頁「播放器」。將即段語法抄起來（copy），tah滯咱的網頁頂面。安呢，著ok啊。語法，佇下底：

<embed autostart="true" loop="true" src="即个所在囥音頻檔案網址（此處添入音頻檔案網址）" height="45" width="176">

4 、全部 khang-khòe 攏總完成，收工。

闽南语虽罔是汉语系的一种语言，不而过，呣是每一个音节拢有汉字通写。这是因为：

• 閩南語內底有足儕古漢語的成分。千百年來，中國歷代的教育部門攏無共閩南語當作正規語文，學校攏無咧教閩南語。致使會捌閩南語字的儂愈來愈少，有的音節已經拍交落（phah ka-la̍uh），遘今無法度稽考，無「本字」通寫，或者是無法度確定「本字」是啥。根據瞭解，佇現代閩南語當中，有咔加５％的音節，屬於「上古漢語」的成分。
• 現代閩南語猶原保留一部分古早時代「閩越」語言的成分。即部分音節oân-á無法度用漢字來寫（噯佫造字）。
• 千百年來，咱儂（漳泉儂）佇咧勞動、種作、生産的過程中，家己發明的「土話」、「土音」。
• 番仔話借音、借詞。

總是，nā的確 卜用漢字來寫閩南語，定著噯造字，或者借用訓讀字（像粵語漢字安呢）。當然，這牽涉著「正字」佮「標準化」的問題…這日後nā有閒工，chiah佫 ta̍uh-ta̍uh-á 來議論。

今仔日順手做一寡「閩南漢字」的尪仔標，囥佇 本部落 頭頁「邊欄」的「告示牌仔」內底（嘛 會當 看即張網頁）。安呢，寫網頁的時陣，著thèng-hó用著即个家俬頭仔，有影加真利便。即陣，著來kā小介紹一下——

1. ：tháu，[動詞]，華語「解開、松開」。詞組「索仔」（華語：解繩）；
2. ：tân，[動詞]，華語「響、叫」。詞組「雷公」（華語：打雷）；
3. ：siâng，[形容詞] [副詞] [合音字]，華語「相同」。詞組「款」（華語：同樣）；「相」（華語：同樣）；
4. ：sán，[形容詞]，華語「瘦」。
5. ：pûn，[動詞]，華語「吹」。詞組「火」（華語：吹火）；「雞胿」（華語：吹牛）；
6. ：phóe（廈） / phé（漳），[名詞] [量詞] 。詞组「喙」（華語：臉頰）；
7. ：bāi ／māi，[動詞]，華語「看、瞅」。詞組「試看」（華語：試看看）、「一下」（華語：瞅一瞅）；
8. ：mài，[副詞] [合音字]，華語「不要、甭」。詞組「去」（華語：甭去）
9. ：kô，[動詞]，華語「攪動、糾纏」；例句「囡仔 beh 食 四秀仔」（華語：小孩吵著要吃零食）。
10. ：khiū，[形容詞] 現代媒體寫做「Ｑ」，華語的意思是「韌」、「彈性好」。詞組「粿真」（米糕很韌）。
11. ：khám，[形容词] 脫線、頭殼無好勢。北京話「傻」。
12. ：in，[代詞] 第三人稱「伊」的複數形式；
13. ：hûi，[名詞] 華語「瓷器」；
14. ：gâu，[形容詞] 意思是「勥」（khiàng），華語「能幹」。詞組「真」（華語：很能幹、出色）。
15. ：chông，[動詞] 華語「闖」。詞組「來去」（華語「闖來闖去」）；「走」（華語：闖蕩）
16. ：chiáⁿ，[形容詞]，華語「味淡」，「鹹」的反義詞。
17. ：chhē / chhōe，[動詞] 華語「找、尋」。詞組「走」（華語：尋找）；
18. ：chhōa，[動詞] 華語「帶領、引路」。詞組「路」（帶路）
19. ：chhio，[動詞] [形容詞] 華語「勃起」、「很屌」、「性致勃勃」。詞組「起」（華語：發春、勃起）；「雞」（華語：正發情的公雞）；「kiak-kiak」（華語：很衝，充滿挑釁性）
20. ：bōe / bē，[合音字]，華語「不會」。詞組「使」（華語：不可以、不能）。
21. ：lia̍h。[名詞] 詞組「筊 ／ka-lia̍h」，竹做的箩（lôa）。
22. ：tēng（漳）／tūiⁿ（泉）／tāiⁿ（同安），[形容詞] 華語「硬」。
23. ：thit （泉）／chhit（漳） 。[動詞] 詞組「chhit-thô／thit-thô」，民間透底寫做「 迌」，嘛有中国的學者寫做「佚佗」。華語的意思是「玩、耍」。
24. ：gân（泉）／gàn（漳），[形容詞] 寒、涷。比論講：氣溫降落來，水變kah真。
25. ：thīⁿ，[動詞]，用針來縫、補。比論講：衫褲破去，用針線。
26. ：thang，[名詞]，「窗」的本字。
27. ：poe（泉）／pe（漳），[名詞]，外形扁扁、略仔長長的物件。詞組「船」（華語：船漿）、「球」（華語：球拍）、「撓／lā-pe」（華語：琵鷺）；俗語「死鴨仔 硬 喙」
28. ：koāⁿ，[量詞]，詞組「一」（華語：一串）。
29. ：nih，[動詞]，華語「合眼」。詞組「 目」（華語：眨眼）
30. ：kán，[名詞]，華語「女婢」。詞組「查某」（華語：女婢）
31. ：pih，[動詞]，華語「卷起」。詞組「襒手」（華語：卷袖口）、「襒裤骹」（華語：卷裤管）
32. ：phih [動詞] [詈語]，漳州、同安腔口。表示「相幹」（性交）的動作，嘛用來罵儂。
33. ：ńg，[名詞] 華語「袖口」。詞組「手」。

ps.　先做一个初胚。此去chiah佫勻勻仔來補添。