鹭水芗南－闽南语部落

今仔日，聽儂teh報馬仔，講「粵語wikipedia」（廣州話維基百科）佇昨昏正式來成立囉。先kā in講一聲「恭喜恭喜」。

廣東版的維基百科總算是正式開版囉！真正有夠拖挲，chêng舊年 呣知 叨一月的叨一日的叨一時的叨一刻……一直透拖遘即陣chiah起步。He真正互儂「望啊望，等啊等，等遘目箍漸漸紅」，會等 等遘 bōe等。總是，此去 beh等嘛無機會啊。

根據瞭解，「當初時，維基人士佇咧討論講beh開辦一寡漢方言版本的時陣，著有將 上海話、廣州話、客家話、閩南語chiah-ê語言按算在裡，呣佫，尾仔為著某物原因，kan-na閩南語wikipeida辦有成niâ」，ah chhun--ê hiah-ê to̍h暫時無即款福氣囉。即擺粵語wikipedia正式成立，安呢，佇即个beh遘300種語言版本hiah-ni̍h儕的維基大家族裡底，攏總著有三个漢語言的版本囉。

「聽著」粵語wikipeida成立的消息了後，我to̍h隨拼過去看。Taⁿ順sòa佇chia kā儂 凊採 小介紹一下（我的同胞——中國的朋友，chiàng時 猶 無法度 正常訪問wikipedia）：

• 粵語wikipedia，用傳統的「粵語漢字」來寫的。頭頁，號名「首頁」（佮中文版兮sio-siâng）。歡迎辭，嘛佮「中文版兮」beh kāng beh kāng，是安呢寫的：

  「歡迎嚟到人人都可以編輯嘅維基百科！
  
  海納百川，有容乃大，粵語維基喺2006年開始，已經有 24條條目。」



• Hoān-sè是因為拄拄chiah開始niā，目前暫時先按算8个類別：自然 | 地理 | 歷史 | 文化 | 社會 | 生活 | 技術 | 科學。
• Chhun--ê，差不多攏是照wiki軟體基本的風格佇咧佈置in的梆模。

總是，這是一个新的wiki，需要社會各界有心的儂，出力鬥扶持（hû-tî）、鬥贊聲、鬥牽成，尤其是會曉讀、會曉寫粵語文字（漢字）的網友出來做貢獻，互即个wiki會當咔緊生根puh-íⁿ，咔緊生長起來，滂湃起來，嘛thang冗早來為社會、為人類粒積佮貢獻伊的智慧。

粵語wikipedia使用的文字，對對to̍h是hit款「粵語漢字」，這著說明講即个wikipedia注定佮hit-ê共款使用漢字的「中文維基百科」真無sio-siâng，會當預測，in此去beh行的路線嘛定著會真無sio-siâng。這是咱願意看著的。

不而過，嘛因為即个粵語wikipedia是透底用「廣州話白話文」來寫的，所以，伊的前途到底是好是bái，是熊是虎，chiàng時 實在猶佫真「歹講」。雖然粵語漢字有定型，有統一，有規範，有電腦支持，有香港政府teh扎氣，不而過，自來 佇hiah-ê「高級社會」佮「正規場合」當中，攏罕得看著「粵語漢字白話文」；儕儕堅持用「標準現代漢語書面語」（官話白話文/中文）寫作的儂，對著民間咧使用的即款「粵語漢字白話文」，儕少攏嘛抱持（phāu-chhî）著輕視的看法。當然，將來會變安怎，無儂會知，hoān-sè即个新的wiki soah會來帶動著「粵語白話文書寫」的熱潮，he嘛無的確。

——「廈門老戰士合唱團」佮「廈門老朋友藝術合唱團」將卜聯合獻唱《正月點燈紅》佮《閩南漁歌》

厦门日报報導講，第四屆世界合唱比賽將卜佇咧今年（2006）年7月，坫廈門市隆重來舉行。為著卜互世界各所在的儂客 親身來感受廈門即座城市的風采，作為比賽的主辦方——廈門市，決定卜趁即擺的機會，kā 上kài 會當代表廈門的「閩南歌謠」展（show）出來互儂客欣賞。根據瞭解，現子時 有「廈門老戰士合唱團」佮「廈門老朋友藝術合唱團」當咧 kut力 排練做準備，按算講 時遘 卜 聯合 出場 表演。

報導介紹講，「廈門老戰士合唱團」佮「廈門老朋友藝術合唱團」攏總有150外个團員，年歲攏超過50，上老的80外。兩个團組合排練，時遘按當中選拔出100个比較咔優秀的團員上臺演出。廈門老朋友藝術合唱團首席指揮楊炳維介紹講，即擺參賽曲目是in超工揀的，會使講是閩南儂真正熟似的兩條民間歌謠——《正月点灯红》佮《闽南渔歌》。楊先生講：「廈門在地的民間歌謠真讚、真滂湃，噯好好來推捒……時遘，世界各所在的儂客來遘咱廈門，in當然會想卜瞭解廈門。廈門儂作為即擺比賽的主儂，定著噯將咱厝上kài正港的閩南傳統藝術chhoân出來互儂看。」

按牛冬hia瞭解講逐年的公曆2月21號，是「國際母語日」。世間儂安排佇即一日來紀念人類各族群的母語。我咧想，chiah-ê逐年to互儂佇咧紀念的「母語」，應該m̄-nā包括現子時猶佫「活著」的語言niā，應該嘛是有包括進前已經「過身」去啊的「語言」，呣知我即个看法，著抑是呣著？

聽講 中國 今年 oân-á卜來舉辦「紀念」活動。有儂講，這號做「摜籃仔假燒金」、「六月芥菜——假有心」，「假好衰」to̍h tio̍h啦。Ah 儂會安呢講，嘛呣是超工咧「畫烏擦白」，儂講「儂咧做，天咧看」，進前，汝的所作所為，敢呣是早著已經互儂看出出囉？有hit-lō 漚政策 擺佇 hia 咧「死豬鎮砧」鎮tiâu-tiâu，即陣 戲 佫咔 安怎 搬、搬佫咔好，著oân-á 無儂卜共汝 信táu，當做汝是咧弄「布袋戲尪仔——秦假仙（真假仙）」啦！今仔日，汝按算beh怎樣來變弄、怎樣車盤，「he是恁兜的代誌」，咱實在無心情 舞摻落去，橫直，有的儂 自頭遘尾攏全 為著「普通話」niā，佇in的心肝裡，bōe輸 kan-taⁿ 普通話chiah 是「漢語」，iah nā 其它的漢系語言soah「攏總呣是漢語」的款。咱實在想無in是徛在啥物款的立場來咧解讀「母語」即个概念！其實呣是「想無」，是咱「無愛佫替in來思考」即个「自頭就失去理智，又佫無公平」的議題。即款的語言政策，敢呣是「麻布做裡底褲——看現現」？？各位，秤頭 攑有平無？！相信有生目睭的儂，逐个心頭攏嘛知知。好ah，像即款「揬膦」的代誌，加講，是加傷感情niā，mài講也罷！

今年的「國際母語日」的主題，聯合國教科文組織共伊定義做——

朋友nā有瞭解著佫咔儕關於即方面的代誌佮消息，不妨講出來互咱做進一步的瞭解，感謝啦。

（看全文，線頂聽錄音~）

日前，廈大（廈門大學）的學生組建的閩南語協會宣告成立。這是廈門大學自來頭一擺開辦佮閩南語有代治的社團。目前，「協會」已經有90名學生會員。協會負責人——自動化系二年級的學生葉炳悅介紹講，的目的，著是beh學閩南語……噯 會曉 講 閩南語，chiah通 做 一个 正港的 廈門儂；iah 有的 同學 本然 著 按算講 畢業了後 beh 留滯 廈門 bā頭路，學 閩南語，對來講，是teh為就業做準備。

根據瞭解，協會按算每禮拜組織一擺的活動，主要的任務，著是 教 學員 學 閩南語。

上讚的男女歌手拢台灣儂；专家透底认为厦门在地歌手呼音無正。

日前，由厦门广电集团佮台湾八大电视股份有限公司联合举办的头一届「『两岸』闽南语歌唱大赛」总决赛在厦门广电中心落幕。进前，「海峡两岸」拢总有8位歌手进入总决赛。即摆总决赛采用循环打擂台的方式，拢总安排8 场精彩的大车拼，最后拼出悬下（koân-kē / 高低）：查甫状元、查某状元全部去互台灣儂捧转去（phâng tńg--khì），chhun--ê六名歌手oân-á有 好头彩，有的摕着（the̍h-tio̍h）“上有潛力”的奖項；有的承着（sîn-tio̍h）“优秀歌手”的獎項。

比賽煞鼓了後，一寡 做评委的台湾音乐人，对厦门赛区4位歌手的评价是：有一定的实力，不而过，上大的输面 是 chiah-ê歌手透底无经过专业训练，呼音无正，对歌曲本身beh表现出来的意涵理解无透。怹讲「台灣的语言环境咔赢唐山，闽南歌的历史加咔久长」，所以，台灣歌手对歌曲意境的理解会咔透徹。

ps. 看进前的报道—— （1）「中、台闽南语歌唱大赛」总决赛伫厦门举行 ； （2）「中、台閩南語歌唱大賽（復賽阶段，中国站）」

２００５年８月１１号，本站有报道「中、台閩南語歌唱大賽（復賽阶段，中国站）」的消息。即摆，总算是遘kah正式决赛大车拼的坎站囉。１０月２１号暗时，即场「『两岸』闽南语歌唱大赛」总决赛安排伫厦门举行。中、台双方拢总８个脚数（kioh-siàu）上臺车拼。举办即项比赛的目的是「为双爿的少年侬伫咧歌唱艺术领域的交流搭一座平臺」。

另外，根据瞭解，目前，两爿的同行人士当咧走蹤，按算beh伫咧无偌久以後佫来举办一场「『海峡两岸』闽南语歌曲创作高峰会」，希望会当为「两岸」歌坛 加 写一寡仔优秀的闽南语（歌曲）作品。

ps: 参加即摆总决赛的歌手名单——

• 厦门：陈鹭虹（相片［1］、［２］）、何珣薰
• 漳州：潘超、刘辉翔
• 台灣：林良歡（女）、黄紫誼、朱海君、庄振凯

　　2005年8月下旬，九届泉州市政协召开第58次主席会议期間，有政協委員透露，《闽南语词典》（泉州腔）將beh佇兩年內出版。有消息講，自頂世紀90年代以來，泉州的語言工作者佇咧研究、整理閩南語（泉州腔）方面，已經取得一定的成果。不而過，soah為著經費的問題，一寡不止仔有價值的研究成果一直遘即陣攏無法度出版。

　　根據瞭解，2005年7月，由泉州市政協出面，抾和「華僑大學」、「泉州師範學院」、「泉州社科聯」、「泉州學研究所」等單位的專家，共同制定出一个挽救閩南語的近、中、遠三期規劃。詳細情形啥款，請逐家做伙來看sòa落去——

　　近期規劃（兩年内）：按算佇咧現有的研究基礎上，編寫《閩南語泉台對照詞典》。即本詞典的定位是「實用工具冊」。

　　中、遠期規劃（五年～十年）：集中儂馬，重點稽考閩南語的語源，最後的目標是出版綜合性的大辭典。

　　華僑大學文學院阮長、閩南語古漢語研究學者王建設教授介紹講，現子時，上大的問題猶原是經費，只beh錢項會當得著保障，明年（2006年）年底著會通來出版即抱《閩南語泉台對照詞典》。

p.s. 參考消息——《闽南话漳州腔词典》明年底出版

　　泉州市第一間專業的閩南語電臺佇2005年9月29號頂晡正式成立，臺號是「刺桐之聲」，電臺的頻率是調頻FM105.9（中波105.9兆赫）。這是泉州市頭一間對台宣傳的閩南語電臺。

　　根據瞭解，「刺桐之聲」廣播電臺的頂司是「泉州人民廣播電臺」，節目形式主要包括新聞、音樂、娛樂；節目特色定佇咧宣傳閩南在地文化。 目前開播的節目具體是：早起聽新聞、咱厝好歌大家聽、海峽兩岸、歡喜著好、厝邊頭尾、月娘月光光、草蜢弄雞公……

「保持共産黨員先進性教育」，現子時，即句話佇中國大陸真夠時行，差不多大儂囡仔通儂知；無瞭解啲儂，實在無幾个。若即个「保鮮」到底是「保」啥物碗糕咧？罔看māi，汝著知。

是講，我ioh像即款議題，儂客倌穩當咔無興趣。Taⁿ，beh瞭解、呣瞭解攏無要緊，橫直，講咔歹聽啲，KTS咧講話，是bē輸咧搬電影—— 一套一套。

好。來報告一條新聞。未看進前，若有儂身體確實有咧無爽快，或者是拄好胃腸糟糟 想beh吐啲，建議先去外口吐吐啲，等咔sù-sī了後，chiah佫轉來看紲落去。這是佮汝講正經啲，呣是咧滾損笑，若有得失，請多多包涵；iah若堅持呣聽我苦勸，小等啲 若真正吐kah規身軀 全全是，安呢，汝著呣通kā我訐譙兼詈罵、怪我無kā汝講代先。（講實在啲，正實是因為連我家己嘛強強beh看bē落去_..._）

新聞：廈門市篔簹（Oân-tong）街道辦（全稱：街道辦事處，屬於一種「行政單位」），各黨支部，結合實際情況，采取一種吤有特色啲學習撇步，來咧開展KST黨員先進性教育活動，為各黨員啲學習提供了真大啲利便，嘛取得真好啲效果。街道辦啲機關黨支部，利用內部辦公網路，將學習材料、簡報、周報、hām一寡咔有代表性啲事例傳送互每一个黨員，互黨員會當通過網路，真利便著來實現學習啲目的。（利用網路來咧學習「保鮮」，真正是「一兼二顧，摸蜊仔兼洗褲」哩~~）佫來—— 嶼後西社區黨總支部，佫咔是來咧收集著《厦门日报》佮《厦门晚报》等報紙刊登啲、佮「保鮮」有治代啲材料，並且kā剪裁落來，製作成做一个「先進性教育學習園地」啲專欄。（這算報紙啲，chhoân便便啲，由在儂搬；即回是「鰗鰡巡便空」，攏免錢啲，正經是「俗佫大碗，倯佫有力」！）慢且是，猶佫有啲—— 岳陽社區黨支部嘛考慮著一寡退休啲老黨員聽無普通話，決定用「閩南語+普通話」來做一个「雙聲道啲放送」。（哇，安呢chhiâu落去，真正連 本成 著bōe曉通聽，抑是講 無想beh聽啲儂，嘛攏聽聽入去啊。我苦！呣聽嘛bōe-ēng--tit，有影苦惱~~）

「中、台閩南語歌唱大賽」（两岸闽南语歌唱大赛）復賽階段，佇咧北京廣電中心hit間成千m²闊啲演播廳舉行，攏共20名參賽者參加復賽，最後選拔出4名優勝者。根據瞭解，即4名優勝者將beh代表中國大陸方面，佇咧今年8月25號即工，hām來自台灣啲4位高手同台比試、見公母。這以外，即擺復賽進入前6名啲歌手，攏總有資格直接進入明年啲「第九屆閩南語青年歌手電視大賽」。

「中、台閩南語歌唱大賽」是由厦门广电集团佮台灣八大電視股份有限公司聯手主辦，時遘，來自中國佮台灣啲參賽者共臺比試（歌藝）啲過程將beh安排佇厦门电视台佮台灣八大電視台siâng時播出。台灣八大電視股份有限公司節目部監製黃朝亮介紹講，兩爿啲電視台做夥製作綜藝節目，並且siâng時放送，會使講是開世代啲頭一層，這標志著雙方面啲交流已經步入一个全新啲坎站。往早啲資訊交流，差不多攏是民間藝術佮宗教界啲事務咔儕，並且一直攏無「大眾傳媒」來咧插骹。即擺電視台之間啲合作，不但影響力大，而且效果嘛是誠讚。

「中、台閩南語歌唱大賽」決賽，按算采用拍擂臺啲形式進行，攏共beh錄製8檔節目（每一檔算一期）。佇咧每一期啲節目當中，即8位參賽歌手，每一儂必須噯演唱兩條自選啲閩南語歌曲；比賽結果會佇最後一期節目中公佈。也著是講，每一个上臺啲參賽者上少攏噯準備16首歌曲，才有法度完成整個啲比賽過程，這對參賽者來講，嘛算是一个考驗。根據瞭解，為著beh保證節目播出會當達到一粒一啲品質，台灣方面特別邀請著上吤優秀啲燈光、攝像佮導播來配合節目製作；聽lih講，其中著有台灣綜藝界啲首席顧問兼製作人曲威。

P.S：以上消息啲來源——《廈門晚報》 （Ē-MN̂G BOÁN-PÒ）