鹭水芗南－闽南语部落

[一] 世界杯笑话

2003年世界盃，中國隊輸kah若國民黨，倒來了後，暫時蹛伫一間酒店内底。比賽輸kah遐惨，国内舆论早早着闹kah鏘鏘滾。聽講有烏道大哥因為赌球输朆少，風聲講卟揬(tu̍h)死國家隊大细漢囡仔。聽着消息了後，本然着真無膽啲孫继海，更加是驚kah六六七(la̍k-la̍k-chhoah)。“緊蹽(liâu)，咔朆(bōe)拄著别條；緊辿(soan)，咔朆拄著機關”，孫继海决定卟冗早(liōng-chá)落跑。伊考慮規暝，想出一个撇步——化装做紅毛美女透暝踉蹽(làng-liâu)。
伊看著街路邊有一个乞食婆，iam一百箍互伊：“汝敢知影我啥儂？”
乞食婆頭連眈(taⁿ)嘛無眈：“汝孫继海。”
孫继海掣一趒(chhoah-chi̍t-thiô)，緊狂走轉去酒店，換裝做一个烏頭毛啲老阿婆，佫來遘乞食婆遐，佫hiù一百箍互伊：“敢知影我啥儂？”
“孙继海咯！”乞食婆chiàu-gôan kìⁿ-bīn to̍h ioh kah凖凖。
即擺，孫继海真正驚一下險險破膽！伊赶紧iam一千箍出來，细聲共問：“汝若共我講，汝是安怎共我認出來啲，遮錢著拢汝啲。”
乞食婆啲頭匀匀仔眈(taⁿ)起來，錢先袋落，了後輕輕仔应講：“嘘！咔细聲啲，我郝海東。” (注明：孙、郝，两儂拢是中国国家足球隊隊員)

[二] 电影分级

　　老爸佮后生咧開講，講著电影分級啲問題。后生請教老爸，分級啲標凖是啥？老爸分析講：
　　一陣大儂佮囡仔同齊去看电影。假使看遘一半，大儂看朆落去，即款电影叫做——普通级；
　　假使电影搬一半，大儂囡仔做夥咧議論，即款电影叫做——辅导级；
　　假使电影搬一半，大儂共囡仔戽出去，即款电影叫做——限制级；
　　不而过，假使电影搬咔無遘一半，大儂囡仔做一下走了了，即款电影一定是卟送去參加影展。

[三] 乞食
　　公園仔内，一个穿kah破糊糊啲乞食，當咧共一个好額儂好喙姑成(ko·-chiâⁿ)：“先生，拜托汝帶念我即个有路無厝啲可憐儂，淡薄仔來分啦，我無某無猴，無塍(chhân)無厝；無滊車，嘛無存款，干凋...干凋偆即支槍niâ...”

【一】有一个好額儂，按算卟倩(chhiàⁿ)一个奴才。有三个儂來面試。面試啲題目是“跔(khû)便所”。第一个入去跔出來了後，無洗手，好額儂面仔忧忧，叫伊轉去；第二个入去，出來了後共款佫無洗手，好額儂真受氣，大聲共(kā)伊喝(hoah)出去。第三个儂佮頭前迄两个拢無共款，出來了後，見面著先走去洗手。好額儂真满意，共即个儂留落來。不而過，有一工，好額儂雄雄發現即个奴才按便所出來了後，竟然無洗手。好額儂誠受氣，嘛誠好玄，問奴才為啥物？即个奴才笑笑仔共伊应(ìn)講：“頭家，是安呢啦，我今仔日有扎粗纸哩......”

【二】 一个查甫儂行过一間便利超市（超商）啲门骹口，看着超市當咧拼俗货，chôaⁿ斡(oat)入去。“卟買啥物？”“我想卟買寡仔狗食啲肉罐。” “哦，阮有規定，汝嗳證明汝有饲狗。” “哪有即啰規定？” “昑拼俗货拢嘛安呢。”...查甫儂佮售货员躇(thû)規晡，售货员硬死呣賣伊。無法度，查甫儂只好拼轉去厝啲牽一隻狗來，售貨員chiah kā狗仔罐頭賣伊。幾若工後，即个查甫儂又佫行过便利超市啲门口，超市猶原佫咧拼俗貨，查甫儂共款佫再斡入去。“摕两盒仔猫咪(niau-nî)咧食啲罐頭互我。” “哦，阮有規定，汝嗳證明汝有饲猫。”共款是頂擺迄个售貨員。查甫儂又佫踮遐佮售貨員躇規半晡，結果只好認路输，佫拼轉去抱一隻猫仔來。佫过幾若工後，即个查甫儂mo·h一kha纸箱仔來遘迄間超市，箱仔面有開一空。查甫儂chhōe著迄个售貨員。“卟買啥？” “汝手long入去摸看嘪，著知影也。”售貨員手chôaⁿ伸(chhun)入去摸，“是啥物碗糕啦，哪會軟軟、佫粘粘啦？” “Soah呣知影我想卟買寡仔粗纸...”

【三】 有一个儂，真合意食川菜，尤其爱食迄啰“麻辣粉丝煲”。有一擺，伊去菜馆，讲卟點即个菜。伙计(hóe-kì)共伊讲，即个菜賣了也。“敢精實賣了也？” 伊感覺誠失望。“先生，精實賣了也。汝看，最後一份着是隔壁迄个先生点去啲。”有影to̍h着！隔壁确實有一个穿kah真襒扎(pih-chah)啲紳士，伫遐咧坐。紳士看勢是食卟饱也，不而过，迄份“麻辣粉丝煲”竟然拢猶未振动啲款！即个儂感覺紳士無食真討債，chôaⁿ行倚去紳士啲邊頭，指着桌頂迄礓(kiang)“麻辣粉丝煲”，诚有禮貌共問講：“先生，這汝敢佫卟挃(ti̍h)？” 绅士诚有風度來咧摇頭，講伊“呣也”。聽儂講聲“呣”，即个儂赶紧坐落來，碗箸捎(sa)咧，着随來一出現代版啲“三戰呂布”，無唸乜仔(liam-mi -á)時間，拂kah碗礓反(péng)过面，食kah清氣tak-tak。當咧爽爾(niā)，雄雄soah看着碗礓底猶佫一隻死鳥鼠仔囝teh浮咧浮咧。阿娘喂！可恶！即个儂感覺有够gê啲（恶心），chôaⁿ開始伫遐咧“鼠牛虎兔”，頭拄仔食啲拢總吐吐出來，佫照原吐kah規礓tīⁿ-tīⁿ。即个儂當咧嘔吐(áu-thò·)啲時陣，無疑悟(bô-gî-gō·)迄个紳士soah伫邊頭，真同情啲共伊安搭：“足gê啲呣？頭拄仔我嘛是安呢……”

——美國總編統：布斯，佮英國首相：布萊爾（布來染）， in兩个儂通電話的秘密 （儂客nā beh聽錄音，勞煩閱讀全文）

進前bat 坫（tiàm ）馬來西亚"佳禮中文論壇" hia tah過, 趣味趣味,taⁿ佫再the̍h出來馏一遍仔——

(北京)布希："哥們，您說這算怎麽檔子事兒！打了一禮拜了，丫老薩愣他媽的沒事！要不您受累，再派點援軍去？"

(閩南)布斯：鬭陣ê ah, taⁿ 即擺是啥物情形hâⁿ...恁娘卡好,拍beh規禮拜ah,即箍"漏屎ê"（老薩,台譯:海珊）原在猶佫活跳跳tī--leh,真正beh kā我氣死! ah無...安呢啦,chit摆佫hō·汝khah出力leh,佫加chhōa一半ê仔"兵仔",做一擺去 kā收拾起來,汝看安怎？ ...繼續閱讀

三條囡仔時代聽儂講的謎猜(bê-chhai)，汝敢有想beh来約看māi……

1、
謎頭：一个囡仔黄酸酸，攑铁枝揬尻川（Chi̍t-ê gián-á n̂g-sng-sng/ûiⁿ-suiⁿ-suiⁿ, gia̍h thih-ki thok kha-chhng/kha-chhuiⁿ). (约”庄骹所在，灶骹内底的一项建筑物的某物仔部位)

这謎猜是约一个”用火钳夹柴燃火的灶空”。咔早农业社会，tiàm庄骹所在，作穑侬（choh-sit-lâng）生活蓋艰苦，哪有钱通好起大厝，透底拢嘛用”土角仔、甓仔(phia̍h-á)”做建材，凊採起起咧。若散凶侬(sàn-hiong-lâng/散赤侬）无钱通起厝来讲也，起灶骹(chàu-kha)着佫咔hau六。普通的庄骹侬兜(lâng-tau),灶骹内透底嗳安一个大灶，有灶当然嗳设烟筒佮灶空。有时仔，厝内底頭喙(thâu-chhùi/人口)一下侪，灶建着重倍(têng-pōe/特别，相当）奒(hai)，灶空嘛做kah 加真阔，加真大。煮食嗳燃火(hiâⁿ-hóe),燃火嗳燃柴，柴仔着嗳撙节chiⁿ入去灶空内，安呢火才燃会旺，饭菜才煮会熟、佫bē 臭火焦(chhàu-hóe-ta)。若有捌用大灶燃火的侬，透底会知影”火钳”(hóe-kîⁿ)是啥货。”火钳”着是夹柴燃火的家俬。
因为燃火的时，灶空内底火咧着(to̍h),色泽(sek-tī)黄黄，咱那咧燃那嗳用火钳撓咧撓咧，安呢柴仔才着(to̍h/燃烧)会焦匀(chiau-ûn)。即个用大灶燃火的情形，看起来着亲像”一个黄酸黄酸的囡仔，攑一支长长的竹仔抑是柴仔，伫咧揬尻川(kha-chhng)”。（”黄酸”比喩”火的色泽”；”囡仔”比论”燃火的侬”；”尻川”比论”灶空”）

2、謎头: 天顶一本册，任读也读bē 破(Thiⁿ-téng chi̍t-pún chheh, gīn tha̍k iā tha̍k bē phòa). （约”一种建筑材料”）

即条謎猜是咧约”厝瓦”(chhù-hiā)。往过的厝仔，呣管是红砖仔厝、石厝，抑是土角仔厝，厝顶透底是罩厝瓦，准讲是好额侬起的楼仔厝，有噹时仔嘛是勘(khàm)厝瓦。厝瓦的外形弯弯khiau-khiau,几若片厝瓦叠做一下，着亲像是一本册。

3、謎头: 一条巷，两条巷，两尾水蛇仔咧相弄(Chi̍t-tiâu hāng,nn̄g-tiâu hāng,nn̄g-bóe chúi-chôa-á leh sio-lāng). (约”咱侬的生理现象”)

这咔简单，答案着是”流鼻”。