鹭水芗南－闽南语部落-廈語稽考

拆字…無了時

Fri, 27 Oct 2006 22:40:42 +0800

+++［to̍h］：揀精to̍h白
阮龍海（佇福建漳州）在地腔，有一个字，讀做陽入調（第八聲）的"to̍h"（IPA：/toʔ4/），比論講：

（1）."to̍h豆仔"。意思是講"捻豆仔絲、揀好的豆仔"（北仔話：擇豆／擇菜）。
（2）.“揀精to̍h白：kéng-chiaⁿ to̍h-pe̍h”（北仔話：挑肥揀瘦）。

我呣知影“擇”字在佇中古韻，除去”陌韻“，佫有別物聲韻--無。"擇"佮“鐸”，敢攏無牽連？這我oân-á呣知。 “'择菜'，潮州話唸/toʔ/（阳入）；雷州話講'导菜to33 tshai21'"。可見，潮州佮漳州講法sio-siâng，雷州小可有增差，因為“促音消蝕”是雷州話的一个特點。

+++［chhoāⁿ （鱔）］：鱸鰻田chhoāⁿ
閩南語咧講的”鱸鰻田chhoāⁿ “呣是好話，是咧keng-thóe儂“歹囝氣（pháiⁿ-kiáⁿ-khùi）”。鱸鰻、田chhoāⁿ，本底是兩種活佇水底的動物。鱸鰻，是一種鰻仔，真大尾；田chhoāⁿ，著是鱔魚。
"chhoāⁿ "字，伊的漢字，正港著是“鱔”字。“鱔”字，中古音：山摄合（口）三（等）禪母仙韻上聲。解說（ké-soeh）如下：

（1）.禪母，在佇現代閩南語，子音（聲母）有讀即三種：s / ts / tsh。（例：a.“蟬”，漳州薌城講“iam-kóng-chûn”；b."常"。常在，讀chhiâng-chāi / chhêng-chāi）
（2）.仙韻：ian （開）/ uan（合）
（3）.山攝：an
（4）.上聲：分做陰上（上上、第二聲）、陽上（下上、第六聲）。中古八調，漳州腔、廈門腔、同安腔，偆七調，無陽上；陽上濫濫佇陽去（下去、第七聲）裡底。

所以講，鱔的白話音是"chhoāⁿ "，讀冊音“siān”。

+++［gián / lián （眼）］：小鬼gián ／小庀lián
北仔話”貪小便宜“，閩南語講”小貪“（siáu-tham）。”小貪“，是咔普遍的講法。同安腔嘛有講”小庀（仔）lián“，白話字寫做siáu-phí-(á)-lián；龍海話講“小鬼gián”。

照安呢來講，同安即个 "lián“，佮龍海即个"gián"，真有可能（差不多會當肯定）是共（kāng）一字，共字各(koh)音。

"目前"，閩南語嘛會使講做“目下”（ba̍k-ē）。我咔早做囡仔的時陣，佇阮龍海祖家，會記咧在地的鄉親序大in若講着“目前”即个詞，有噹時仔是講號做“gián時前”（gián-sî-chêng）。憑我的語感，早早著知影hit-ê漢字詞著是“眼時前”即三字。眼，普通時仔，kan-ta知影讀gán / géng （龍眼） / ngái （龍眼：同安腔）。閩南語真正複雜，著准是專門咧趁食即途的學者、專家，嘛呣是三五年著捌會thàng。

我雄雄感覺龍海腔裡底即个“小鬼gián”，是“小鬼眼“。正對著北仔話”小心眼“。（是呣是安呢，敬請四山gâu儂指教）

佫來迭（thi̍t）閩南語ê"輕聲"

Mon, 28 Aug 2006 21:13:44 +0800

同安鄉親Jack今仔日來咧開講，有講著一寡佮“POJ書寫”有干係的物件，hàm-hàm有趣味……伊叫我著噯將伊的話翻做漢文互儂看（伊原底是寫羅馬字），順sòa佫交代我噯講出家己的意見。Taⁿ我先照伊的吩咐（hoan-hù），共伊講的hit段文字liâu-liâu-á kā翻出來（下跤有食色的，是原文），逐个鬥陣來 kā 看māi咧：

Thó-lūn poj [ê](的) eh siah-huat.
討論白話字“ê（的）”的寫法

(的) eh ì-sìr tī Tâng-uaⁿ ū 2 tsióng kóng-huat:
"eh"意思伫同安有2种讲法：

1. [eh], e.g.
第1種：“eh”，比論講——

Mn̄g: (Tâng-uaⁿ)Tsit-liáⁿ sī sâng eh saⁿ? / (Tsiang-tsiu)Tsit-liáⁿ sī sâng eh saⁿ? / (Ing-gír)Whose coat is this?
問：（同安話）即領是啥儂的(eh)衫？／（漳州話）即領是啥儂的(eh)衫？

Ìn: (Tâng-uaⁿ)Guá eh./ (Tsiang-tsiu)Guá eh. /(Ing-gír) It is my coat.
應：（同安）Guá eh.（我的）／（漳州）Guá eh.（我的）

2. [gê], e.g.
第2種：“gê”，汝像講——

Mn̄g: (Tâng-uaⁿ) Tsit-liáⁿ saⁿ sī sâng gê? / (Tsiang-tsiu) Tsit-liáⁿ saⁿ sī sâng ê? / (Ing-gír)To whom does this coat belong?
問：（同安）即領衫是啥儂的（gê）？／（漳州）即領衫是啥儂的（ê）？

Ìn: (Tâng-uaⁿ)Guá gê./ (Tsiang-tsiu)Guá ê. / (Ing-gír) The coat is mine.
應：（同安）Guá gê.／（漳州）Guá ê.

An-ni hun-sik, lán ē-tàng khùaⁿ tshuaih:
安呢分析，咱會當看出來：

1. [eh]/[eh] piáu-sī lâi-guân, Tsit-tsióng tsîng-hîng eh kóng-huat Tâng-uaⁿ kah Tsiang-tsiu saⁿ-sâng. Tī kù-thâu eh [guá eh]/[guá eh] siong-tong Ing-gír eh "my".
第一，“eh”表示來源，即種情形的講法同安佮漳州saⁿ-sâng（sio-siâng/共款）。佇句頭的“guá eh”，相當英語的“my”。

2. [gê]/[ê] kiông-tiāu só·-iú-kuân, tsit-tsióng tsîng-hîng eh kóng-huat Tâng-uaⁿ kah Tsiang-tsiu bô-sâng. Tī kù-bér [guá gê]/[guá ê] siong-tong Ing-gír eh "mine".
第二，“gê / ê”強調所有權，即種情形的講法同安佮漳州無sâng（無siâng）。佇句尾“guá gê / guá ê”相當英語的“mine”。

Kiat-lūn: Buē-su Ing-gír eh [my] kah [mine], Bân-lâm-gír lāi-bīn, 1.[eh] kah 2.[ê] sī 2 gê bô-sâng eh hú-tsō·-sîr.
Tī tē 1. tsióng tsîng-hîng hā, poj [guá ê saⁿ] kah [guá ê] lāi-bīn eh [ê], poj tsìng-khak eh siah-huat ìng-kai sī [eh].
結論：Bōe輸英語的“my”佮“mine”；閩南語裡面：“eh”佮“ê”是兩个無共款的輔助詞，佇第1種情形下，白話字“gúa ê saⁿ”佮“gúa ê”裡面的“ê”，白話字正確的寫法應該是“eh”。

Koh kā tíng-bīn tē 1. tsióng tsîng-hîng pó·-tshiong kír-lē:
1(a). Hái lia̍h eh/eh hîr(tsìng-khak!), m̄-sī lâng tshī eh/eh. (tsìng-khak!)
1(b). Hái lia̍h gê/ê hîr(m̄-tio̍h !!! ), m̄-sī lâng tshī gê/ê. (m̄-tio̍h !!! )
佫共頂面第1種情形補充舉例——
A：海掠的（eh）魚，呣是儂飼的（eh）——正確！
B：海掠的（gê/ê）魚，呣是儂飼的（gê/ê）——呣著！（錯誤！）

是安呢啦，Jack即段文字，原底是記錄佇“留話簿”hit爿。即mái超工kā sóa來chia，有兩个原因。第一，即本“留話簿”即mái已經寫kah躼躼長ah，即幾日仔本然著有按算講beh來擋掉（tòng-tiāu），重佫換新頁互八方儂客來練仙khà kho̍k。第二，嘛是想講有必要佇chia來做一个回應。

代先，我贊成Jack所做的比對佮分析；我同意“第1種情形強調‘來源’，第2種情形強調‘所有格’”即款的講法。反倒轉，也著是講呣管是"my"抑是"mine"，漢語北京話攏總是“的”。

敢講閩南語真正無共款？真正有分“eh”佮“gê/ê”？我看應該呣是安呢。Jack進前呣知有瞭解“閩南語的輕聲”無？照看，汝hoān-sè無疑悟（無去致意著即裡中（lāi-tiong）的規律）。閩南語的輕聲，到底是啥物情形，我chhōa汝來去行行踅踅（kiâⁿ-kiâⁿ se̍h-se̍h）咧:

1、《語音系統》；
2、轻声的语音表现（参見""福建省情資料库"）；轻聲的范围（参見""福建省情資料库"）

所以，呣管是第1種、抑是第2種情形，其實攏是共一字，只不過第一種是“輕聲”，iah第二種呣是輕聲，in所表達的意義定著無共款。佇白話字（POJ）書寫系統裡底，用雙短橫“--”的連號來表示“輕聲部分”，比論講：

1、Siâng--ê saⁿ？（啥儂的衫？）
2、Chit-niá saⁿ sī sin bóe--ê.（即領衫是新買的。）
3、Chóa sī pe̍h--ê.（紙是白的。）
4、Hái lia̍h--ê hî, m̄-sī lâng chhī--ê. （海掠的魚，呣是儂飼的。）

Ah nā像汝頂頭講的“第2種情形”，he著呣是“輕聲”，he算普通調nā-niā：

1、我的：góa ê.
2、行過的路：kiâⁿ-kòe ê lō·.

在佇閩南語來講，輕聲真重要，有辨義的功能。舉一个簡單的例，“無去”，有時噯讀輕聲，有時bōe-sái讀輕聲，iah in所表示的意義soah完全攏無共款，會使講“天差咧地”。比論講：

1、讀輕聲“bô--khì”，這表示“拍pháng見”（丟失）、儂死去（人過世了）。
2、正常變調“bô khì”，表示“沒有去”。

PS：頂懸的文字，hoān-sè講了有錯誤。感謝潘科元先生，互咱瞭解佫咔儕——

親像 "Siang5 e5 sann1?" 佮 "Hai2 liah8 e5 hi5" 即个 e5，窮實並無讀「輕聲」，kan-ta是「輕讀」nia7，伊猶原有照正常个本調變調个規則。若用雙短橫來表示「輕聲」，按呢無應該佇遮使用雙短橫。但是，若講"Hai2 liah8--e5, m7-si7 lang5 chhi7--e5", 即兩个 e5 才是輕聲。「輕聲」有雙重(ting5)涵義，一重是聲調个中性化(neutralization)，一重是卡「輕」。這佮卡單純个「輕讀」有koh4樣。

同安腔，罔話罔講

Mon, 21 Aug 2006 23:17:50 +0800

即暫仔，本部雖罔一半拋荒一半種作，水路bē通，田草發kah半儂懸。田頭家無閒管顧，無疑悟佫有一寡死忠的好朋，三不五時斡過來kā咱鬥巡水路；佫咔想bē遘，連一寡自早呣捌見過面的新朋友oân-á來咧行踏——
To sin pêng-iú Jack: kám-siā lí saⁿ-kap lâi chia liān-sian khai-káng. Lí kóng lí tòa Tâng-oaⁿ chhut-sì, tòa Tâng-oaⁿ tōa-hàn, koh tiàm Chi̍p-bí tha̍k tōa-o̍h (tāi-ha̍k), án-ni chiâⁿ hó! Chóng-sǹg hō· góa chhē-tio̍h ē-hiáng siá Bân-lâm-gú bûn-jī ê Tâng-oaⁿ-lâng lo•h! Sī kóng, lí sī cháiⁿ-iūⁿ chiah o̍h ē-hiáng siá POJ eh? Sī siáⁿ-mi̍h sî-chūn o̍h ē-hiáng eh? Sī sím-mi̍h goân-in hō· lí tùi Bân-lâm-gú ū hèng-chhù? Lí chit-chūn tòa tī tó-ūi leh?

To 老朋友——韜仔舍，同安來的好朋Jack先生佇留話簿所講的，呣知汝聽有抑是無？在佇我想，我看汝穩當有寡聽無（也有可能汝聽有，不而過穩當有儂聽無）……我看安呢啦，歸去，我咔家婆淡薄，了淡薄時間，小可來共解說一下。

1、"Tâi-guân huang-kiû”（Tâi-oân hong-kiû，漢字“台灣風球”），這阮咔熟似，顛倒是恁台灣儂kiám-chhái著呣知影。“風球”，這同安話，唸做"hoang-kiû”；阮漳州叫做“空氣球”。西元1970年代～1980年代，台灣國民黨政府chhiâng-chāi（時常）會放一寡“風球”，互伊按台灣一路飛來遘對岸的大陸，互儂去抾，he裡底攏貯一寡“國民黨的宣傳單”、“食品”、“台灣紙字（銀票）”、“電視”等等的物件。風球，佇天頂飛懸懸，ùi台灣飛過海溝，飛來遘福建沿海地區，落落來（lak--lo̍h-lâi），互當地的百姓儂抾著，抾倒去厝兮，有通食，佫有通掠，實在不止仔好空！國民黨當局的目的，著是坫風球裡底囥一寡“傳單”，攏寫一寡宣傳國民黨偌好拄偌好、台灣偌好額拄偌好額；共產黨安怎歹、中國安怎窮赤的話……Hit陣仔，逐工早起睏精神，若拄著好天，定定满天攏全風球。逐个相爭去追去chip（jiok），呣管風球落佇叨位，山頭領尾也好，溪崁山坪也好，滿山滿洋，咔遠咔危險的所在嘛去咧搶……所以，號做“搶風球”。不而過，抾著風球，嘛無攏全好空的，有噹時仔，抾風球嘛會抾著炸彈：soah呣知國民黨有時仔偌夭壽咧，超工佇風球裡底囥炸彈。若咧衰運去抾著即款風球，動著跤瘸手折，佫咔厲害的，性命無去，he著真正hiau-hēng囉！Sòa落去，只好坫陰槽地府過後半世儂。

2、Jack另外有講著一句同安俗語“遘石潯chiah看會著籗仔底”。啥物意思，Jack講kah真透白，著是講“噯等遘最後chiah知輸贏”，咱土話講號做“見公母”。聽Jack的話，kán-ná是講石潯即搭，本然魚仔真厚（真儕）的款勢，呣知是呣是安呢？石潯，是同安的一个鄉鎮，在地儂唸做”chio̍h-chīm”。

"Tâng-uaⁿ ū tsit8-kù siok8-gír-uē kiò-tsuè "kà Tsioh8-tsīm tsiah khuàⁿ ē tioh8 khài-á-tué", [kà] tioh8-sī [kàu], [khài-á] tioh8-sī hē hîr ê suè-khia láng. i ê piáu-bīn ì-sìr sī: tioh8 thìng-hāu kàu Tsioh8-tsīm tsiah ē tsai-iáⁿ sâⁿ liah8 ê hîr kah tsuē. lâng tiaⁿ-tiaⁿ iōng tsit-kù uē lâi kóng tioh8 kàu tsuè-āu tsiah ū-huat-tō· kìⁿ kang-bó, hun su-iâⁿ."
(同安有一句俗語話叫做“kah石潯chiah看會著籗仔底”，“kah”著是“遘”，“籗仔”，著是下魚的細奇籠。伊的表面意思是：著等候遘石潯chiah會知影siâng(啥儂)掠的魚咔儕。儂定定用即句話來講“著遘最後chiah有法度見公母，分輸贏。”)

"[gaiⁿ5] kah [ngai5] sâⁿ-im, 「龍眼」tsiàng-tiāu ìng-kai sī [gîng-ngái], piàn-tiāu liáu-āu kóng [ging3ngai5a1], [ging3] kah [king3][敬], [pa3][豹] sâⁿ-tiāu. [ngai5] kah [him5][熊] sâⁿ-tiāu. [gîng-ngái-a] sī Tâng-uaⁿ ê tē-it fruit lông-sán-phín, tsiâⁿ-tsuē." ……

即段話有趣味。伊的意思是講："gaiⁿ5" 佮"ngai5" siâng音（共款的讀音），“龍眼”本調應該是/ŋiŋ24 ŋai53/ ，變調了後講/ŋiŋ21 ŋai24 a44/。／ŋiŋ21／佮／kiŋ21／（敬）、／pa21／（豹）siâng調。／ŋai24／佮／him24／（熊）siâng調。“龍眼仔”是同安排第一的果子農產品，產量真懸……同安話的變調，小可仔種著(chéng-tio̍h)泉州腔，比論講，本調第五聲（陽平調），變調了後調值變低降調21；本調第二聲（陰上調），佇“仔”字的頭前，變調讀升調24，即點佮咱普通所熟似的漳州腔、廈門腔真無sio-siâng，因為漳、廈攏讀高平調44。“籗仔”，同安腔khaih-á；漳州、廈門攏唸做khah-á。

是“水雞”，抑是“水蛙”？

Tue, 18 Jul 2006 00:19:12 +0800

北仔話“蝌蚪”，番仔話叫做“ tadpole ”;ah 咱閩南所在 soah 有幾落種無共款的講法。阮祖家福建漳州龍海白水，阮白水鎮在地腔，是叫做/kap32 kuɛ35 a53/ ，隔壁海澄腔講號做/kap32 kuai35 a53/。用漢字寫，著是“蛤蛙仔”。

“蛙”、“花”、“瓜”，中古音佮現代閩南語音排比如下：

	閩南語		中古音
	白水腔	海澄腔	中古音
蛙	/kuɛ35/ （白） /ua35/ （文）	/kuai35/ （白） /ua35/ （文）	影母麻韻假攝合口二等平聲^［注1］
瓜	/kuɛ35/ （白） /kua35/ （文）	/kuai35/ （白） /kua35/ （文）	見母麻韻假攝合口二等平聲
花	/huɛ35/ （白） /hua35/ （文）	/huai35/ （白） /hua35/ （文）	曉母麻韻假攝合口二等平聲

頂頭即張表單， thèng 好證明/kap32 kuɛ35 （ kuai35 ） a53/著是“蛤蛙仔”。

逐个攏知影講“青蛙”是“蝌蚪”變的。“青蛙”，是北仔話，佇咱閩南話裡底， ôan-á 有儕儕種無共的腔口。“田蛤仔”（ chhân-kap-á ）啦、“水 ke ”啦，攏有儂講。

“水 ke ”的“ ke ”，漢字到底是“雞”？抑是“蛙”？眾儂看法無攏相 siâng 。咱今仔日，著 beh 寬寬仔(khoaⁿ-khoaⁿ-á)來 kā 拆解互清楚。

“ súi-ke ”是漳州腔。廈門、同安，是唸做“ súi-koe ”。 Kan-taⁿ 看即个對應關係，咱著知影講 hit-ê 字眼穩當呣是“蛙”。 Beh 安怎講咧？汝 kā 看，“蛙”字，咱頭拄仔已經有講過，伊的白話音，漳州唸做/kuɛ/佮/kuai/，照講，這是對應著廈門腔的/kue/，不而過，廈門 ná 像無讀/kue/，顛倒 soah hām 海澄腔共款讀做/kuai/。台灣有唸做/kue/，明顯是按漳州腔/kuɛ/變來的。

Nā 安呢，“ súi-ke （ súi-koe ）”到底是 beh 怎樣來寫咧？我講是“水雞”，呣是“水蛙”。咱講即字“雞”，泉州、廈門攏唸/kue/，漳州唸做/ke/，無唸做/kɛ/。所以，/sui ke/百分百呣是“水蛙”。根據咱的瞭解，中國有寡所在，嘛有將“青蛙”叫做“田雞”。這佫咔會當證明閩南語咧講的“ súi-ke （ súi-koe ）”，本字著是“水雞”。

注1：“蛙”字，有另外第二个中古音：影母佳韵蟹摄合口二等平声。這對應著閩南語的/kuai/。

來講「起凊瘼」即个語詞的根頭

Sun, 16 Apr 2006 17:11:26 +0800

頂幾日仔，hām台灣的朋友（fujtwkid、Taokara）佮福州的朋友（Gnudoyng）佇 MSN 頂頭咧練仙khà-kho̍k，有講着「起凊瘼」（普通話：蕁麻疹）即个語詞。當時，fujtwkid問逐个儂，敢捌聽過"khí chhìn-mo·h"（起凊瘼）即句話？對我來講，我頭一擺聽着即个語詞是因為臺灣電視有一支廣告注死講著這，路尾我嘛表示講，略仔（lio̍h-á）會記得有一个滯佇中國福建晉江市（泉州轄區）的朋友kán-ná捌kiau我講過in晉江在地oân-á有即款的講法。當時，我想規晡久，確定家己khêng-si̍t呣捌聽過廈門儂抑是漳州儂講即句話，choâⁿ 實實kā in講「普通時仔，我呣捌聽過，不而過，這無代表講閩南自本無即款講法。」道理真簡單，閩南語博大精深，ah照我即陣的道行（tō-hēng），khiám-chhái 十份猶捌無一份儕。這是真平常的代誌。

其實，逐个攏嘛giâu疑giâu疑，想講即个語詞敢會是按日語來的？也着是講，hoān-sè是日語借詞濫摻佇臺灣話裡底，只不過讀音有所變化niā-niā？不而過，giâu疑 hoân giâu疑，無 chhē着真拄真的證據，逐个講話攏呣敢傷斬截（chám-choe̍h）。

Taokara兄，是一个誠有心佫頂真的儂，隨講卜去掀辭典做比對。無偌久了後，又佫隨「拼倒轉來」，kā眾儂報告講伊按《台/華辭典》查着一寡條目：

凊瘼（chhìn-mo·h）：蕁麻疹；
凊瘼呐（chhìn-mo·h-nah）：蕁麻疹；
凊呐（chhìn-nah）：風疹塊/蕁麻疹；
風瘤（hong-liû）：蕁麻疹；
風瘼（hong-mo·h）：蕁麻疹；
風疹塊（hong-chìn-tè）：蕁麻疹。
……

眾儂攏會捌日語，獨獨chhun我一个無半撇的，佇 hia 咧鴨仔聽雷。In講，日語是叫做「jinmashin／じんましん」，佫講，日語即个講法，hām咱儂話的「起凊瘼／khí chhìn-mo·h」、「起凊呐／khí chhìn-nah」，呼音攏無對同（tùi-tâng）。

儂講「lám-lám馬，嘛有一步踢」，雖罔in攏無kā我講日語的"jinmashin"漢字着噯安怎寫，不而過，我即个日本話的青盲牛，oân-á 雄雄發現講"jinmashin"佮「蕁麻疹」的漢語拼音beh-oá beh-oá，照看應該着是「蕁麻疹」即三字......Orz......（我安呢講，呣知恁會笑kah落下骸bōe？）

總是，討論來討論去，代誌暫時猶無結果。半暝啊，逐个攏真thiám啊，就此散局，隨儂倒轉去佮眠床比平長。

隔轉日，天未光，fjutwkid的blog着已經翻新啊。網頁頂懸，量其約仔是安呢寫的：

「……皮膚科的教冊先生，講着wheal（風疹）的時陣，特別指出有的講台語的患者會講家己『khí-chhìn-mo·h』……卜請問，這『khí-chhìn-mo·h』，漢字是卜安怎來寫？」

「佮別儂討論過後，已經有一寡初步的看法。假設這是按日語來的，iah呣佫日語裡底ná像無『凊瘼』（原文寫做『凊膜）』的講法（辭典查日語，ná像kan-taⁿ chhē著『jinmashin／じんましん／蕁麻疹』nā-niā）。所以，khiám-chhái是台灣儂按照日語的讀音，佫重新落去改造的。假使真正是安呢來講，這敢算是『本字』？……」

「設使頂頭的講法成立，nā安呢，有可能是ùi日語"jinmashin"的讀音轉做台灣音"chhìn-mo·h"。」

「這掠外，佇《臺日大辭典》嘛有查着"chhìn-mo·h"，不而過，佇hia soah kan-taⁿ 看着假名"ちんも"(chinmo)，添注『蕁麻疹』。所以，這嘛有可能是台語詞。」

「Ah nā 照廈門的網友佇咧介紹講，伊佇廈（Hā）、漳（Chiang）、泉（Choân）所在，ná像攏呣捌聽儂講過這，但是呣敢咬定一定無。尾仔，伊有佫講 kán-ná捌聽一个晉江的朋友講 in 晉江oân-á有即款的講法，但是具體有抑無，猶原是呣敢確定。……所以，照看，真有可能是臺灣土産的，ah nā根頭，無的確真正是外國語來的。」

……

「tknetlll（儂名）來報講《廈門方言辭典》寫講：
凊瘼凹（chhìn-mo̍·h-nah）：蕁麻疹；
風瘼（hong-mo̍·h）：蕁麻疹；
風瘤（hong-lâu）：蕁麻疹。
……」

fujtwkid即段文字，我斟酌kā讀幾落遍，愈讀疑問soah愈儕，心肝頭即个「死結」（sí-kat）nā無tháu開，實在不止艱苦。我決定寫電子批請教廈門大學的周長楫教授（周教授着是《廈門方言辭典》的作者）。周教授回批的速度真正緊kah會驚倒儂！三點鍾bōe-tīⁿ，伊着隨回倒轉啊。伊的回批真短，kan-taⁿ一句話。所講的，嘛佮《廈方典》記載的 sio-siâng，只是強調講：

「我做过调查，普通话的‘荨麻疹’厦门有人叫做‘凊膜凹’（chhìn-mo̍·h-nah），也有人叫做‘风膜 hong-mo̍·h’，吗有人号做‘风瘤hong-lâu’，拢会用讲着是啦。我想，应该不是对日本话来的。」

周教授強調講廈門本地確確實實有即款講法佇咧，是伊親身落去調查的。

安呢好！Ah呣佫，咱嘛發現講廈門的講法，佮臺灣小可有增差。廈門講「chhìn-mo̍·h-nah」，臺灣講「chhìn-mo·h-nah」，聲調略仔無siâng。是講，平平有講「風瘤」，廈門周教授講伊調查的結果是"hong-lâu"，ah呣佫，臺灣的《台/華辭典》soah寫做"hong-liû"，敢講兩爿講法真正無sio-siâng？即个問題暫且按下，咱佫來講sòa落去。

tknetlll 佇 fujtwkid 的blog 回應講：

查幾落本字典，攏有看着用「凊」表示「冷」的涵義。不而過，kan-taⁿ 廈門方言辭典有看着用「凊」字來組詞表示「蕁麻疹」，ah nā 其它的着攏無。

1、《廈門方言詞典》江蘇教育出版社
【凊膜凹】ts'in3-2 mɔ~ʔ8-3 na~ʔ4 = 【風膜】hɔŋ1-7 mɔ~ʔ8 = 【風
瘤】hɔŋ1-7 lau5 蕁麻疹
共款是周長楫教授所主編的《新加坡閩南話詞典》，嘛有收有chiah-ê語詞。

2、《雷州方言詞典》江蘇教育出版社
【風瘤】huaŋ1-6 lau5 風疹塊 (註：6為陽上調，調值33)
【瘤】lau5 瘤子，長瘡或受傷後留下的疤
【瘤墣】lau5 pɔk8 皮膚表面上長的疙瘩：哈儂面生瘤生墣(滿臉疙瘩)，
識何好驚(非常可怕)

3、《海口方言詞典》江蘇教育出版社
【風瘤】huaŋ1 lau5 蕁麻疹，皮膚病，症狀是局部皮膚突然成塊地紅腫
發癢 (註：海口話沒有變調現象)

4、《福州方言詞典》福建人民出版社
【風瘼】huŋ44 mo44 蕁麻疹 (註：福州話的44為第1聲的調值)
【饃】mo44 (1)疙瘩：頭碰腫蜀大～(頭上撞腫了個大疙瘩)。(2)凸起：
風蚊咬遘～蜀大～(蚊子咬得凸起個大疙瘩)。/蜀碰蜀下就～崛起(碰一下
就凸起一塊)。(註：它真的寫「饃」)

5、《建甌方言詞典》江蘇教育出版社
【風瘼】xɔŋ1 mɔ1 (1)風疹：饁酒吹風會發～(喝了酒吹風會長風疹) (2)
蕁麻疹：發～(皮膚出現小疙瘩)
【瘼(另一個字為病字旁加"老")】mɔ1(lɔ1) 皮膚上長起的小疙瘩：發風～
【發風瘼】puɛ2 xɔŋ1 mɔ1 長風疹，皮膚過敏長出小疙瘩 (2為上聲，調
值21)

感謝tknetlll提供chiah-ni̍h儕，又佫有價值的參考資料。按即裡底，咱通（thang）瞭解講雷州（算是閩南語系）、海南（算是閩南語系）攏有「風瘤」即个语詞，ah講法又佫hām廈門話siâng款，差不攏是念「風lâu」，呣念「風liû」。呣知影，台灣民間是念做"hong-liû"，抑是"hong-lâu"，抑是兩款講法攏有？

佫來，呣管是廈門、臺灣、福州（閩東語系）、建甌（閩北語系），攏有即个「風瘼／風膜」的講法，所以，照看，這是閩語本底着有的，呣是按外國語來的。

為着卜查清楚「凊瘼」、「起凊瘼」、「凊nah」、「起凊nah」chiah-ê有帶「凊」字，表示「蕁麻疹」的語詞，到底是呣是外來語借詞，某儂我專工撽電話轉去厝兮的問阮阿母（阿母講龍海話（漳州話），呣捌字）。問的時陣，有講究，頂頭排出來的hiah-ê語詞攏無對阿母來講起，只是問伊「食某物一項物件了後，ná像皮膚過敏的款，這是安怎啦？」，阿母倒問講「會癢bē？有一niah 一naih無？」我應講「會癢，有一niah 一naih」。阿母佫問講「是呣是拄現giâ起來的 hit 款？」我隨喙應伊講「是啦」。阿母choâⁿ 講即款症頭號做「起凊naih」。講真正的，我當時聽了後，歡喜kah phut-phut-tiô！真正是咱在地的福建話，呣是外國話 neh！

佇阮龍海腔裡底，"naih"的意思是「皮肉有生hit-lō一粒一粒的」，比論講「互蠓叮一naih」（普通話：被蚊子咬一个皰）。廈門話叫做"nah"。

所以，講遘chia，應該會使講是水清魚獻（chúi-chheng hî-hiàn）囉。真明顯：

「凊nah」／「凊naih」／「凊瘼」，是名詞，本底的意思攏是「風疹塊」（普通話）。
「風瘼」，是「風診」（普通話）的意思。
「起凊nah」／「起凊naih」／「起凊瘼」，意思是「得了風疹」（普通話），也著是北方民間土話所講的「蕁麻疹」。

常用閩南語漢字集合

Mon, 20 Feb 2006 13:11:05 +0800

閩南語用字（漢字），自來攏無統一，差不多每一个儂攏有家己的「標準」（實在講，這真害！）。本部落的用字，嘛是有家己的一款「僻」。為著方便讀者（網友）閱讀本部落的文字，本儂即陣就將本部落咔慣勢用的一寡「文字符號」貼出來。准講朋友汝有任何的意見佮建議，嘛會當提出來做夥交流佮探討，感謝各位。

閩南語用字

本字地位

性質／屬性

釋／譯

組詞（例）

漢字

白話字

本字

反切

上古

本字

借、訓、俗

合音字

不明

普通話

英語

漢字

白話字

凊

chhìn

凊

七政

√

涼、冷

cool

秋凊

chhiu-chhìn

一

chi̍t

蜀

市玉

√

一

one

一日

chi̍t-ji̍t

兩

nn̄g

兩

力讓

√

兩

two

兩年

nn̄g-nî

佮

kah / kap

合

古沓

√

和

and

我佮汝

góa kah lí

這

che

√

這

this

這是

che sī

即

chit

即

子力

√

這

This

即時

chit-sî

* 遮

chia

√

這兒

here

佇遮

tī chia

* 迄

hit

√

那

that

迄陣

hit-chūn

个

√

個

三个

saⁿ-ê

的

其

渠之

√

的/之

我的

góa ê

兮

√

厝兮

chhù--ê

佇

tī

著

陟慮

√

在

佇咧

tī-leh

呣

m̄

√

不

呣是

m̄-sī

捌

bat / pat

八

博拔

√

曾經、認識

呣捌

m̄-bat

咧

leh

√

正在

我咧看冊

góa leh khoàⁿ-chheh

咔

khah

較

古孝

√

較

佫咔

koh-khah

佫

koh

各

古落

√

再

again

佫再

koh-chài

卜

beh

√

要/欲

want

我卜去

góa beh khì

寡

kóa

寡

古瓦

√

些

some

一寡

chi̍t-kóa

略

lio̍h
(白)

略

離灼

√

稍微

slightly

略仔

lio̍h-á

囝

kiáⁿ

囝

九件

√

子、仔

young

囝兒

kiáⁿ-jî

囡

gín / kín

囝

九件

√

小孩兒

child

囡仔

gín-á

仔

囝

九件

√

小稱

金仔

kim-á

喙

chhùi

喙

昌芮

√

嘴

mouth

喙齒

chhùi-khí

跤(骹)

kha

跤(骹)

口交

√

腳

foot

骹骨

kha-kut

睭

chiu

珠

章俱

√

睛

eye

目睭

ba̍k-chiu

猶

iáu

√

猶/仍

猶未

iáu-bōe

汝

lí

汝

人渚

√

你

you

汝的

lí ê

阮

gún / goán

√

我們

we / us

阮厝

gún-chhù

恁

lín

√

你們

you

恁兜

lín-tau

* 紲

sòa

世

舒制

√

接續

continues

連紲

liân-sòa

相

sio

√

相

相通

sio-thong

煞

soah

煞

所八

√

停、止

conclusion

煞局

soah-kio̍k

拄

tú

√

遇

meets

相拄

sio-tú

通

thang

通

他紅

√

能/行

may

呣通

m̄-thang

遘

kàu

遘

古候

√

到

arrives

遘位

kàu-ūi

裡

lāi

裡

良士

√

內、裡

inside

裡底

lāi-té

懸

koân

懸

胡涓

√

高

high

頂懸

téng-koân

躼

lò

√

長、高

high

躼跤

lò-kha

偌

lōa

偌

人夜

√

多、多麽

many、how

偌儕

lōa-chōe

儕

chōe

√

多

many

真儕

chin chōe

攏

lóng

√

全都

all

攏總

lóng-chóng

共

kā / kāng

共

渠用

√

給、
相同

共伊講、
共款

kā i kóng
kāng-khoán

坫

tiàm

坫

都念

√

在、躲藏

坫在

tiàm-chāi

膦

lān

卵

盧管

√

屌

penis

膦鳥

lān-chiáu

攑

giâ / gia̍h

√

舉、擡

Shoulders

攑旗

gia̍h

摕

the̍h

√

拿

takes

摕來

the̍h--lâi

噯

ài

愛

烏代

√

要

want

著噯

to̍h-ài

互

hō·

√

讓

for

互我

hō· góa

憖

giàn

√

癮

憖薰

giàn-hun

* 諸

cha

諸

章魚

√

諸姥
(女子)

cha-bó·

* 姥

bó·

姥

莫補

√

妻子

wife

娶姥

chhōa-bó·

* 夫

po·

夫

甫無

√

男子

man

諸夫

cha-po·

儂

lâng

儂

奴冬

√

人

person

大儂

tōa-lâng

勼

kiu

勼

居求

√

退縮

Flinches

倒勼

tò-kiu

匊

kiuh

匊

居六

√

收縮

Contraction

匊帶

kiuh-tòa

冗

lēng / liōng

冗

而隴

√

寬鬆

冗去

lēng--khì

戇

gōng / gāng

√

傻、愣

戇囝

gōng-kiáⁿ

愕

ngia̍h

愕

五各

√

愕

astonished

昂愕

gông-ngia̍h

瘧

gio̍h

瘧

魚約

√

彆扭

irritable

礙瘧

ngāi-gio̍h

痟

siáu

√

瘋

insane

起痟

khí-siáu

爿

pêng

爿

步還

√

邊、旁

正爿

chiàⁿ-pêng

訕

soan

所姦

√

譏

Ridicule

訕潲

soan-siâu

揬

tu̍h

√

捅

揬膦

tu̍h-lān

貼

tah

貼

他協

√

貼

pastes

貼圖

tah tô·

疊

thia̍p / tha̍h

疊

徒協

√

疊

Folds

疊磚

thia̍p chng

誠

chiâⁿ

誠

是征

√

很

誠好

chiâⁿ hó

怯

khiap

√

不好

bad

怯势

khiap-sì

抾

khioh

√

撿

Picks

抾拾

khioh-si̍p

枵

iau

枵

許嬌

√

餓

Hungry

枵鬼

iau-kúi

膩

jī

膩

女利

√

小心

Careful

細膩

sòe-jī

捎

所交

√

拿

take

用手捎

iōng chhiú sa

弗

hut

弗

分勿

√

搞

弗呣著
(搞錯)

hut m̄-tio̍h

啉

lim

√

飲

Drink

啉水

lim-chúi

尪

ang

√

偶、像、神明

尪仔標

ang-á-phiau

翁

ang

翁

烏紅

√

丈夫

Husband

嫁翁

kè-ang

婿

sài

婿

蘇計

√

女婿

Son-in-law

囝婿

kiáⁿ-sài

姆

ḿ

姆

莫補

√

伯母

Aunt

阿姆

a-ḿ

嬤

má

嬤

忙果

√

奶奶、外婆

grandmother

阿嬤

a-má

妗

kīm

妗

巨禁

√

舅母

Aunt

阿妗

a-kīm

俺

án (廈門)
ńg (漳州)

√

阿

俺公 (阿公)

án-kong

徛

khiā

徛

渠綺

√

站立

Stand

徛起來

khiā--khí-lâi

倚

oá

倚

於綺

√

倚、靠

Depend on

倚靠

oá-khò

薟(蘞)

hiam

薟(蘞)

火占

√

辣、臭

臭薟

chhàu-hiam

蠘

chhi̍h

蠘

疾屑

√

梭子蟹

Crab

蠘仔

chhi̍h-á

踅

se̍h

踅

似絕

√

轉、遨

踅街

se̍h-ke

歹

pháiⁿ

否

符鄙

√

歹

bad

歹儂

pháiⁿ-lâng

媌

bâ

媌

莫交

本字

娼

Prostitute

媌頭

bâ-thâu

滞

tòa

√

住、在

借滞

chioh-tòa

埋

tâi

埋

莫皆

√

埋

Burie

埋死儂

tâi sí-lâng

芳

phang

芳

敷方

√

香

fragrant

芳水

phang-chúi

謗

pòng / phòng

謗

補曠

√

造謠/吹牛

謗風

phòng-hong

肏

chhoh

肏

√

肏、駡娘

fuck

肏粗喙

chhoh chho·-chhùi

抑

a̍h / ia̍h

抑

於力

√

抑或

抑是

a̍h-sī

囉

lo·h

語氣詞

了

食飽囉

chia̍h-pá lo·h

啊

ah / a

語氣詞

了、啊

食飽啊
是啊

chia̍h-pá ah
sī--a

擺

pái

擺

北買

√

次

times

即擺

chit-pái

鬥

tàu

鬥

都豆

√

湊
幫助

Piece together
Help

鬥骹手

tàu-kha-chhiú

摃

kòng

√

擊打

Strike

摃死

kòng--sí

翕

hip

翕

許及

√

壓、抑

翕胸

hip-heng

輦

lián

輦

力展

√

輪 / 轉 / 行

步輦

po·-lián

墘

白話字

舷

胡田

√

邊沿

Border

溪墘

khoe-kîⁿ

讚

chán

√

棒（好）

Good

真讚

chin chán

漚

àu

漚

烏候

√

爛

漚古

àu-kó·

摳

khau

摳

恪侯

√

刨

dig

摳刀

khau-to

趁

thàn

趁

丑刃

√

賺

obtain, gain

趁錢

thàn-chîⁿ

賺

choán

√

賺、混吃

賺食

choán-chia̍h

貿

ba̍uh

√

包辦／承包

Contract

總貿

chóng-ba̍uh

卯

báu

卯

莫飽

√

通吃

卯死

báu--sí

硩

teh

硩

丑列

√

壓

suppress

硩死

teh--sí

趖

sô

√

爬/磨蹭

倚壁趖

oá-piah-sô

蚵

蠔

胡刀

√

牡蠣

Oyster

蚵仔煎

ô-á-chian

代

tāi

事

鉏吏

√

事

Matter

代誌

tāi-chì

誌

chì

√

代誌

tāi-chì

挵

lòng

√

撞

挵破

lòng--phòa

傍

pn̄g

傍

蒲浪

√

托 / 傍

傍福氣

pn̄g-hok-khì

尻

kha

尻

苦刀

√

屁股

尻川

kha-chhng

川

chhng

川

昌縁

√

川

尻川

kha-chhng

刣

thâi

夷

以脂

√

殺

Kill

刣雞

thâi-koe

糜

bê / môe

糜

靡為

√

粥

Gruel

糜飯

bê-pn̄g

粿

ké / kóe

粿

古火

√

糕點

炊粿

chhoe-kóe

吼

háu

吼

呼後

√

哭 / 叫

shout

吼喝

háu-hoah

喝

hoah

喝

許葛

√

叫、喝

shout

喝拳

hoah-kûn

哺

pō·

哺

薄故

√

嚼

Chew

哺舌

pō·-chi̍h

岫

siū

岫

似祐

√

窩

nest

鳥岫

chiáu-siū

曝

pha̍k

曝

蒲木

√

曝曬

expose to the sun

曝粟

pha̍k-chhek

粟

chhek

粟

相玉

√

稻子

Rice

粟桶

chhek-tháng

冇

phàⁿ

泛

孚梵

√

空、虛

冇粟

phàⁿ-chhek

虼

古越語

虼

虼蚤

ka-cháu

蠅

sîn

蠅

余陵

√

蒼蠅

Fly

蝴蠅

hô·-sîn

箠

chhê / chhôe

√

竹鞭

竹箠

tek-chhôe

埕

tiâⁿ

庭

特丁

√

平地

鹽埕

iâm-tiâⁿ

睏

khùn

睏

√

睡

Sleep

睏眠

khùn-bîn

礐

ha̍k

礐

胡沃

√

厕所

屎礐

sái-ha̍k

則

chiah

則

子德

√

才（才會）

only

則會

chiah ē

【注】有加 " * " 標記的字，咔罕用。

初步先安呢，慢慢chiah佫來粒積。相關的連結：《闽南汉字》

閩語的「pē」（父親），安怎來寫？

Sat, 21 Jan 2006 22:44:57 +0800

（看全文，線頂聽錄音~）

咱漳泉儂稱呼家己的父親，當面是叫「阿pā」，跤脊後是叫「老pē」，即个「pā」佮「pē」，一个是讀冊音，一个是白話音。「pē」字，漳、泉兩个所在，讀音又佫無共款，漳州讀/pɛ/，泉州chiah是讀/pe/。/ɛ/是漳州腔chiah有，泉州、廈門、同安、臺灣攏無即个母音；原底佇漳州讀做/ɛ/的音，佇長泰、海滄（廈門管轄的一个行政區）、臺灣（無包括偏泉腔）攏總變成/e/。

漳州腔分別/ɛ/、/e/，這為咱稽考本字提供真大的利便。佇咧漳州腔裡底，韻母獨獨有帶一个/ɛ/的字，透底是對應著中古音的「假攝麻韻」。可比講：家、紗、馬、罵、茶、假、蝦、查、帕、炸、嫁、罷。為著行文利便，下底nā牽連著漳州腔的/ɛ/，咱攏卜用POJ的"e“來表示。

閩南語的「阿pā」／「老pē」，有的儂直直想講伊的本字（漢字）著是「爸」或者「父」，其實即兩字攏呣是。當然，咱普通時，儕儕儂攏咔愛用「爸」，即裡中是有原因的。「爸」是訓讀字，已經佇民間用幾落世紀啊，逐家攏慣勢啊；佫再講，普通話拄好也是叫做「爸爸」。不而過，事實上，「爸」即个漢字，有可能是近代chiah出現的。《國語辭典》寫講：「對老者的尊稱。明˙張自烈˙正字通˙父部：夷語稱老者曰八八或巴巴，後人因加父作爸字。」

頂幾日，湊拄坎去看著下底即段文字：

囝生閩方，閩吏得之，乃絕其陽。為臧為獲，致金滿屋。
為髡為鉗，如視草木。天道無知，我罹其毒。神道無知。
彼受其福。郎罷別囝，吾悔生汝。及汝既生，人勸不舉。
不從人言，果獲是苦，囝別郎罷，心摧血下。隔地絕天，
乃至黃泉，不得在郎罷前。

這是《全唐詩》裡底記載的【上古之什補亡訓傳十三章·囝一章】。當中有寫著「郎罷別囝」、「囝別郎罷」、「不得在郎罷前」。「囝」，著是即陣閩南語咧講的「kiáⁿ」；「郎罷」的意思是「老pē」（父親）。當今，佇福州話裡底，嘛猶佫稱呼「老pē」做「郎罷」。

宋代詩人陸游《戲遣老懷詩》：阿囝略如郎罷老，孫能伴太翁嬉。（囝：後生；郎罷：老pē；太翁：阿公）
宋代詩人黃庭堅的詩句：但得新年勝故年，即如長在郎罷前。

「罷」字，有中古音：並母麻韻假攝開口二等上聲，部下切。即句話是安呢來解說的：「罷」字，佇中古的時陣，有一个讀音是——聲母「並」，韻母「麻」，聲調「陽上」，是屬於「開口二等字」；對應現子時閩南語的讀音是：pā（讀冊音）／pē（白話音）。即个讀音，拄好佮漳泉儂咧講的「阿pā」／「老pē」有對同。

ps. 按頂面稽考來看，「罷」chiah是閩南語的「pā（文）／pē（白）」。不而過，即个字，實在傷「老」，現代儂尤其會感覺生份。Nā真正卜將「老pē」寫做「老罷」，hoān-sè有真大的阻礙。

咱逐家攏知影，廣東話有發展出一套統一的白話文書寫系統，所用著的漢字，有儕儕攏呣是「本字」（像講：呢度、邊度、喺、嚟、嗰……）。香港儂將即款「無一定是『本字』的四角字」，號做「正字」。佇咧民間，逐个攏遵守一條不成文的約束：寫正字，呣寫本字。本字，甚物時陣用會著？學術研究。

閩南語無廣東話hit 款的條件，無發展出一套統一的漢字書寫系統。不而過，設使日後條件nā成熟，必然嘛會拄著共款的問題，必然噯有「本字」佮「正字」分開的概念。

(Beh聽聲，佇下底　↓)

「hiam」是「薟／蘞」，呣是「馦」

Wed, 18 Jan 2006 16:21:51 +0800

朋友穩當攏捌聽過下底即兩種講法：

番薑（番椒仔）是hiam的。
頭尖尾尖，放屎臭hiam-hiam。

……
咱今仔日，照原beh來講一寡佮「閩南語本字稽考」有tī-tāi的。今日（kiaⁿ-ji̍t），beh講的「字」，著是頂面有講著的即个「hiam」。

真儕儂，敢采（kiám-chhái）攏知影講，咱儂話咧講的「hiam」，漢字著噯寫做草字頭的「薟」，不而過，因何安呢寫，敢采著無一定會知影囉。各位假使nā有興趣，無chiah勞煩恁斟酌來看sòa落去——

各位呣通想講閩南語「倯佫漚膿（sông koh àu-lông）」，看伊無目地，佫kā伊當做是下路（kē-lō·）的語言。相信逐家加少有捌聽儂咧講「閩南語是古漢語的『活化石』」，這是有根據的，絕對呣是咧凊采講講。我家己著hàm-hàm有體會，我感覺講，加去瞭解一寡閩南語的音韻智識，著愈會當體會著即種語言的古雅。比論講，普通時咱凊凊采采講出喙的一句話、一個語詞，甚至是一个字，一个讀音，nā beh去認真kā研究，hoān-sè著是古冊裡底有記載的文字。咱beh來講的「薟」字，正港著是一个古漢字。

按古冊的記載，佇古早時代，「蘞」佮「薟」算是相通的兩个字。《廣韻》有寫講：「蘞」，屬平聲嚴韻虛嚴切：芋之辛味曰蘞。這意思是講，「蘞」字，聲母是h，韻母是iam，聲調是上平（陰平），涵義是「辣」。

咱專工佫去查《中古音》，發現講，「薟」字有三个古音，當中有一个是「曉母鹽韻平聲，火占切」，猶原是噯讀做「hiam」。線頂《國語辭典》嘛解說（kái-soeh）講：「薟」，是「蘞」的異體字。

咱即陣閩南語講的「hiam椒仔，辣hiam-hiam」，攏是即个「薟」（蘞）字。

這以外，佇閩南語當中，「薟」，佫會當用來表示~~「臭味誠重」~~『味真重』（北方話：氣味濃烈），定定直接用來表示『臭味』、『漚味』。即層的涵義，比起本底表示「辣」的涵義，算講有所擴大。可比講：臭薟薟、臭屎薟、有夠薟……

《台灣話大辭典》寫講：「hiam-hiam」、「hiam-loa̍h」是 「馦」。這呣是伊的本字。

闽南语的“喙澜”、“喙choâⁿ”、“siân”（有关闽南语中的“唾液／口水”等）

Wed, 11 Jan 2006 20:56:00 +0800

講著「chhùi-nōa」，儕儕儂攏知影用漢字寫做「喙瀾」。以早，捌有儂teh堯疑「瀾」呣是"nōa" 的「本字」，不而過，堯疑bóng堯疑，soah直直無法度摕出（the̍h-chhut）互儂完全信服的理由，所以，照原是寫做「喙瀾」的咔占贏面。

“Chhùi-nōa” 逐个攏知影，呣佫，" nōa-choâⁿ "、"chhùi-choâⁿ "，hoān-sè 儕儕的儂攏無啥瞭解。

" Nōa-choâⁿ "，意思是「喙瀾」。臺灣《台文／華文線頂辭典》寫做：

台語羅馬字漢羅華文英文
1 nōa-chôaⁿ 瀾泉唾液腺
2 nōa-chôaⁿ 瀾殘唾液

關係即个" choâⁿ "字，伊的本字，到底是啥咧？咱會當tùi現時的一寡辭典佮資料去chhiau-chhōe佮稽考（khe-khó）。Tùi頂面即个表格，咱看著兩種寫法，一種寫做「泉」，佫一種寫做「殘」。即本《台／華線頂辭典》上主要的功能是：第一，查讀音；第二，翻譯／解說（kái-soeh）。所以，對著閩南語的用字、本字校對來講，攏呣是真嚴格，不而過，猶原有一定的參考價值佇咧。就事論事啦，咱發現講，無論是「泉」、抑是「殘」，白話音攏會當讀做" choâⁿ "，所以，噯佫比較in的涵義，看叨一字咔有合（ha̍h），抑是講兩字攏無合（只不過是借音niā-niā）。

頭拄仔，咱佫有講著" chhùi-choâⁿ "即个詞。佮頂面的" nōa-choâⁿ "一下排比，平平攏有帶" choâⁿ "。Ah 即个" chhùi-choâⁿ "是啥物意思咧？台灣林俊育先生新編的線頂《摘譯台日大辭典》，寫做「嘴（喙）殘」，解說講：

食chhun落來ê物件，人（儂）食過，留嘴（喙）瀾ê物件。［舉例］食人（儂）ê 嘴殘。

可見，即本《臺日辭典》的理解是「食chhun--ê，有bak喙瀾的物件」，重點詞是「物件」，呣是「喙瀾」。真明顯，伊是按「殘」字去理解的，理解做「殘留下來的東西」（華語）。

《廈門方言詞典》（作者：周長楫，廈門大學教授），共款是注明「喙殘」，不而過，伊的解說，佮《摘譯台日大辭典》無共款。《廈門方言詞典》解說講：

吃东西后残留在碗筷或食物上的涎沫。（華語）

所以，伊是理解成「喙瀾」，無強調講是「物件」。也著是講，《廈方典》事實是將「choâⁿ」當做是「喙瀾」，認為本字是「殘」。即點，拄好佮《台/華線頂辭典》的「瀾殘」對會得起來。所以，咱基本會當確定「喙殘」、「殘」，本意著是「喙瀾」。是講，哪會《摘譯台日大辭典》soah講「喙殘」是「食chhun--ê，（有bak喙瀾）的物件」咧？即个問題，真容易來拆解。咱來看《摘譯台日大辭典》的舉例：食人（儂）ê 嘴（喙）殘。即句話，普通時咱定定有咧講，嘛會使講「食儂的喙瀾」、「食儂的喙尾仔」。所以，理解成「食『儂食chhun--ê 的』物件」完全會通，只不過是算是一種詞性本義的延伸。也著是講，「喙殘」佇chia會當表示「儂食chhun ê物件」，呣佫，伊的本義是「喙瀾」。

講規晡，不管是「瀾choâⁿ」、「喙choâⁿ」，到底即个「choâⁿ」的本字，是呣是 hiah-ê 辭典所講的「殘」咧？敢有叨一本古冊，寫講「殘」會當表示「喙瀾」（或者「hām喙瀾意思相倚近的」嘛好）？即個疑問猶未破解進前，咱暫時先kā放一邊，佫來看下底另外一个「字音」。

「涎」字，中古音：邪母平声仙韵开口三等；《集韻》：徐連切。《說文》：慕也、欲也、口液也。現代辭典的解說是：唾液、口水。如：「垂涎三尺」。宋．陸游．記夢詩：「君知夢覺本無異，勿為畫餅流饞涎。」

所以，按頂面即段話，咱會當知影講，「涎」字，佇古漢文裡底，其中有一个意思是「喙瀾」，閩南語的讀冊音是" siân "。這，咱會當tùi閩南語的生活口語當中chhōe著根據。

漳州話，有一句話叫做「流瀾siân」，比論講「即个囡仔，愛流瀾siân」。意思是「囡仔流瀾流滴」。

閩南語有咧講「吐龍siân」，本義是講「儂吐出『龍喙瀾』」，用即句話來比論做「烏白講，講一寡無影無蹟的話，造謠」。佮即句意思相親像的，佫有「seⁿ-siân」（生siân）。

所以，真明顯，閩南語的「siân」，正正著「喙瀾」，呣管是涵義，抑是讀音，攏總hām古漢語相siâng。

話講遘chia，咱佫再越頭來看上頭提起的「瀾choâⁿ」、「喙choâⁿ」。我 teh 想，即个「siân」佮「choâⁿ」，敢會拄好是「文白對應」的共一个字。為著beh求證即个「假設」的想法，咱著噯 tùi「涎」字的聲母佮韻母來稽考，假使聲、韻攏有合（ha̍h），即个「假設」著有可能成立。代先，咱噯會記得，佇中古音，「涎」字是屬於「邪母仙韻开口三等」的字。咱會當做以下的比較：

「邪母」字，讀冊音的聲母是"s"。白話音來講，有真儕的字，攏會使讀做"chh" / "ch"，比論講：徐（sû / chhî）、斜（siâ / chhiâ）、象（siōng / chhiūⁿ）、松（siông / chêng, chhêng）、旋（soân / chn̂g；soān / chn̄g : 生佇頭殼頂的「 chn̄g 」）……所以，「涎」字白話音的聲母，讀做"ch"，無問題。
「涎」字，中古音的韻母是「仙韻」，又佫算是「山攝三等」的字。即款「仙韻山攝三等」的字，比論講：煎（chian / choaⁿ ）、濺（chiān / choāⁿ）、賤（chiān / choāⁿ）、線（siàn / soàⁿ）……即組的字，讀冊音佮白話音拄好是"ian / oaⁿ "的對應關係。因此，「涎」字白話音的韻母，嘛會當讀做"oaⁿ "。
所以，安呢著證明咱的假設是成立的。也著是講，徛在語音的角度，「涎」字，讀冊音是"siân"，白話音是"choâⁿ "。佫因為「涎」本然著有「喙瀾」的涵義，因此，咱講，閩南語的「chhùi-choâⁿ」是「喙涎」。

古泉州音，敢有瞭解？

Thu, 05 Jan 2006 23:13:56 +0800

佇北大中文論壇《閩南話專題III》第52頁，有朋友問講：

如何分清晋江话里哪个元音是[ɯ]？[ɤ],[ɯ],[ɤɯ]用于老泉州话那些字？……

即寡問題，時常有儂會問起，照我家己所知影的，儘量來替儂解答一下……

一、老泉州音[ɯ]（臺灣學者普遍標為[ɨ] ），一般是出現佇「中古音」的「魚韻」，比論講「豬、汝、虛、書、魚、去、鼠……」。

除去魚韻，對著「脂韻」佮「之韻」，有一寡字的讀冊音，tng-tong聲母是“ts、tsʰ、s” （即POJ的ch, chh, s）的時，老泉州話一般來講是讀做[ɯ]，比論講「四、事、資、絲、次、此……」chiah-ê字的讀冊音，攏嘛屬佇即款的情形。不而過，講起來有趣味，新派泉州話（比論靠海的晉江、石獅、惠安），好親像攏總變成［i］囉；iah nā佇廈門、漳州兩个地區，攏嘛讀做［u］。

佫來，講著中古音的「虞韻」，佇泉、廈，攏全讀［u］，可比講，「區、虞、珠、輸……」。Ah漳州音，有的字讀［u］，有的字讀［i］。

二、老泉州音的［ɤ］/ ［ɤʔ］（入聲），算是白話音。廈門音以及新派泉音讀做［e］／［eʔ］；漳州大部分是讀做［ue］／［ueʔ］，個別讀［e］／［eʔ］。下底有三個例：

１、大多數中古支韻、戈韻的字，比論講「火、過、稅、綴（tɤ : 跟隨）、髓、粿、炊……」，老泉州音讀［ɤ］。廈門讀[e]，漳州讀[ue]。個別情況，比論講「坐、螺、脆、阝朵（短）…」，老泉音讀［ɤ］，在廈門讀［e］，漳州也讀[e]；
2、「雪、絕、踅（［sɤʔ］：逛）…」，老泉音讀［ɤʔ］，廈門、漳州讀［eʔ］；
3、「說、郭、月、缺…」，老泉音讀［ɤʔ］，廈門讀［eʔ］；漳州讀［ueʔ］。

三、［ɤɯ］（也有人標記為［ǝɯ］），會使講是古早古早的泉州音，算是讀冊音，即陣猶佫保留佇南音（南管／南樂）唱腔裡底。在咱瞭解，遘kah《彙音妙悟》出世的年代，已經轉變成做［ɤu］(或記為［ǝu］)，因為《彙音妙悟》記載的是［ɤu］（［ǝu］)。呣佫，無論［ɤɯ］、抑是［ɤu］，呼音攏佮普通話漢語拼音的“ou” 真正倚近。聽說［ǝu］，即陣猶佫保留佇倚山的永春縣、德化縣的個別鄉鎮；這以外，現子時佇泉州地區的大部分所在，透底攏已經濫佇［io］。即類型的字，比論講「溝、鉤、後、頭、扣……」等等。即个讀冊音，佇漳州、廈門，是讀做［ɔ］。Ah nā伊所對應的白話音，閩南三地攏是［au］。

閩南語所講的「kha-chhng」（肛門）本字是啥？

Wed, 04 Jan 2006 21:44:33 +0800

在《福建之聲》中文論壇那邊，有人提到「肛門／屁股」的閩南語 " kha-chhng "。於是有人說其漢字應寫為：（1）「腳倉」；（2）「尻川」……如下：

樓主說道：海陆丰人叫“屁股”为“脚仓”，据所知，潮汕话（含海陆丰福佬话）也这样称人体后面两股上端和腰相连接的部份。
如：打针是打手还是打脚仓？

跟帖1：这个需要修改.“脚仓”两个字都不符合正字规范.
"尻川"才对,对比福建漳州或者粤西雷州话,海南话就知道.
尤其"仓"更不可取.因为海陆丰地区北片受潮汕腔影响较小,保留鼻化韵,[ts'ui~]并未象南片混同于[ts'ng]一样.

樓主回：“川”汕尾话读[cuan],仓读[cui]与村，也读脚村。用“尻村”来读音是最好的了。

跟帖2：不觉得"川"很象形么? 不过也是,"川"到底有无白话音还难说.我们只是根据泉漳差异以及中古音韵推测本字而已~~~

跟帖3：这里，屁股也叫“脚仓” 。“脚目”这里也用，不过不知是啥意思。这里“四散”指“胡乱来”的意思……

於是針對這個話題，我也談了自己的見解，原文採摘如下：

WILSON890,你是哪裏人？如果是閩南人，那你的確是說得不對。在閩南，泉州/廈門/同安/台灣，所說的“kha-chhng”（國際音標：kʰa tsʰŋ。其本義是普通話的「肛門」，但在閩南有時也用來泛指「屁股」），這在漳州讀為kha-chhuiⁿ（國際音標：kʰa tsʰũi）。而這個閩南詞，論其本字，如上面huangvudik兄所言，有學者很多都考釋為「尻川」。其中，「尻」應該是無可非義的，問題只出在「川」字。一般地，我們考釋閩南語（或其它漢系語言），最基本的，首先會對應到「中古音」（所謂中古，即唐代左右吧，再往上應算為上古）。所以，我們去查中古音，發現「川」是屬於:「昌母仙韻」、山攝合口三等字、反切為「昌縁切」。這是什麽意思呢？就是說，「川」的聲母是"昌"（tsʰ），韻母是"仙"（uan），所以把聲、韻母組合起來，在閩南語文讀音中就表達為就是"tsʰuan"，當然在普通話中是表達為"chuan"（這是漢語拼音）。接著往下說（當然，如果你不看，我就白說了，XD~~）——

閩南語語音有分「文讀音」和「白話音」（有的人說“白讀音”）。這個嘛，我們拿廈門/泉州話來打個比方，「两」這個字，文讀音是"lióng"，而白話音有二個，一是「两个三个」的「两」，讀為"nn̄g"（國際音標：lŋ ）；二是「斤兩」的「兩」，讀為"niú"（國際音標: niu ）。你如果直到現在還在看帖子，那麽相信你現在應該明白怎麽回事了吧。好，如果還有興趣，我就接著說——

再回到主題那邊吧。「倉」字，閩南語文讀音，讀為"chhong"（國際音標：tsʰɔŋ），這個文讀音和普通話「葱」的發音幾乎是一模一樣。「倉」的白話音，無論漳泉，都是"chhng"（國際音標：tsʰŋ）。剛才說了，普通話的「肛門」，在泉州/廈門/同安/台灣，是說“kha-chhng”，所以，從泉州/廈門/台灣/同安的角度來看，「倉」在語音上是符合的。不過，對於漳州話來說，便不符合了，因為漳州是說"kha-chhuiⁿ"，而「倉」也讀為"chhng"（漳、泉一致），所以不符合。

反而，「川」字，無論對於漳州還是泉州，都是符合的。為什麽呢？再來看中古音。剛才提到了，在中古音裏，「川」字屬於「昌母仙韻」、山攝合口三等字、反切為「昌縁切」，這裏頭提供給我們一個很重要的信息，那就是「川」是屬於「仙韻」當中的「合口」字，而不是「開口」的。所謂合口，在這裏（仙韻），就文讀音而言，是指有帶"u"的"uan"，而不是另一個不帶"u"的"ian"。而「仙韻合口」字，其白話音，在泉州/廈/台一帶，韻母是可以讀為"-ng"（國際音標：ŋ）；在漳州則讀為"-uiⁿ"（國際音標：ũi）。打個比方，「全」、「川」這兩字都屬於這個情況。我們來證明一下，你比如說，正宗的閩南本地詞彙「十全」（“完滿”之意），在泉州/廈/台讀為 “cha̍p-chn̂g”（國際音標：tsap tsŋ ）；而在漳州則讀為"cha̍p-chûiⁿ"（國際音標：tsap tsũi）。又比如，泉州話裏頭有一個表示「棺材」的「全成板」，讀音是"chn̂g-siâⁿ-pán"（國際音標：tsŋ siã pan）。所以，事實證明，「川」字，它的閩南語白話音完全可以讀為: （1）泉州/廈/台："chhng"（國際音標：tsʰŋ）（2）漳州：" chhuiⁿ "（國際音標：tsʰũi ），所以，「川」字，從語音上來說，完全符合閩南語中那個表示「肛門」的" kha - chhng / chhuiⁿ "。

不過，請注意，如果「川」字的字義解釋，無法考釋或聯想出「肛門」之意，則立刻可以斷定「川」也不是kha-chhng / kha-chhuiⁿ 的本字，充其量只是屬於「音合而義不合」。

另外，我們也以換一個全新的角度來看這個問題。比如說，如果僅僅從閩南語本身比較通俗、比較淺顯的角度出發，而撇棄「尻川」這種純粹「力求古雅」的思維模式，那麽，我們發現「骹穿」也完全符合，而且音義皆合，即漳、泉都通得過。「骹穿」（骹，即普通話的「腳」），可以理解為「腳部某處的一个穿孔」，這樣理解完全符合閩南語口語裏頭那種常見的「淺白」、「通俗」，讓人一聽就懂，不用太深奧的道理或高深的文字。

此外，順便回答了何為「腳目」，並解釋了「四散」的意思。

再來說「腳目」（kha-ba̍k），其實應該是「骹目」或者「跤目」才對。大凡普通話中的「腳」，在閩南語中大抵都是對應到「骹/跤」（當然個別有例外，如普通話的「腳色」，閩南語是「kioh-siàu」，"kioh"就是"腳"」）。骹目，就是普通話所說的「腳踝」。閩南語的「目」，除了表示「眼睛」以外，還可以表示「節肢狀物體的關節部位，或者說節骨眼兒」，比如：骨目、骹目、甘蔗目……

最後一個問題。「四散」，讀白話音（sì-soàⁿ），在閩南漳泉廈台各地，這個詞的意思和汕尾話是一模一樣的，而不是“胡亂來”的意思。簡單說，就是散亂、零散、化整為零的意思啦。而表示“胡亂來”的閩南語，其中有一種說法是“濫糝來”（lām-sám-lâi）。

有一个語詞號做「koa-tôa」

Sun, 09 Oct 2005 10:42:57 +0800

查某囝chêng出世着攏怹外嬤咧io，內嬤tòa佇庄骹，呣捌字行無路，罕得來城市--ê看金孫。Taⁿ，時間咧過誠緊，一目nih，beh度晬囉。頂一chōa，我請探親假，專工斡(oat)轉去厝--ê看兩个序大儂佮sio-siâng tòa庄骹的阿兄阿姊。廈門遘龍海，雖然路頭無真遠，呣佫交通呣是真利便——庄骹所在，車路細條，li-li-lap-lap，彎彎斡斡。咱驚講路頂儂kheh 歹行車，soah呣敢chōa幼嬰仔做伙轉去。算起來，我oân-á規半年無倒去ah，現遘厝niā，老大儂著歡喜kah，款茶款食，無閒chhih-chhih…厝內儂看紅嬰仔無tòe大儂倒來，早早著一儂一句，問東問西，問講嬰仔有乖無，飼糜抑未，會曉 khiā-gâu 抑bōe……

我佫會記哩阮母仔有問講「嬰仔有咔koa-tôa無」……「koa-tôa」？啥物意思？我gông-ngia̍h一下，雄雄soah聽無伊咧講啥。看我無應話（聽無，bōe曉應），厝邊hit个阿姆choăⁿ佫sòa一句「輝兮，恁阿母問汝嬰仔有咔koa-tôa無，ah汝soah神神、戇戇（gāng-gāng）……」其實我是咧想hit-ê 「koa-tôa」到底是啥意思。拄好hit个阿姆佫唸一遍，安呢，我略仔知影意思ah，he是咧講：嬰仔囡加咔 gâu大，加咔sek（成熟）。

我一時感覺誠見笑，像即款「古早話語」傳遘咱即代，實在chhun無偌儕ah。講真的，我真驚會傳(thn̂g)bōe落去……

轉去廈門了後，我趕緊beh來稽考即个「koa-tôa」，看到底是叨兩个漢字。我感覺「koa」字，事實著是咱chhiâng-chāi咧講「菜瓜真koa」（華語：絲瓜很老）的「koa」，本意是「sek」、「成熟」……我會記哩，kán-ná是《廈門方言志》，有講「koa」的漢字是「乖」，佫講普通儂kan-na知影「乖」讀做「koai」，soah 呣知影「乖」嘛會當讀「koa」。進前，對著即个講法，我即个才疏學淺的儂oân-á堯疑堯疑，呣敢盡信。

我呣知影廈門話有「koa-tôa」的講法無。呣捌聽廈門儂講過，冊底嘛無記載，我實在無法度確定。自來，儂編寫的字典、辭典，透底攏記廈門音咔儕，soah罕哩看著漳州話的辭典。聽講明年中國beh出版一本《闽南话漳州腔词典》，taⁿ看破噯將希望寄託互即本猶未出世的《詞典》。

古"明、泥、疑"母在闽南语内底是安怎讀啲

Sat, 09 Jul 2005 15:27:36 +0800

“闽（bân）南（lâm）语（gú）”，即三字，分别代表三个無共款啲聲母，用IPA會當分别kā標記做：b，l，g。即三个聲母，也著是中古音啲“明、泥、疑”三母。

事實上，古代“明、泥、疑”三母，怹完整啲音位分别是：b/m，l/n，g/ng。這是啥物意思咧？著是講，咱會當kā "m，n，ng"分别看做是"b，l，g"啲鼻音，其中"m/b"是共一个音位、"n/l"是共一个音位、亦"ng/g"嘛是共一个音位。

闽南语啲语音内底，siâng時存在"m，n，ng（有鼻音）"佮"b，l，g（無鼻音）"即两套相對應啲系统。亦究竟啥物時陣噯讀"b，l，g"、啥物時陣噯讀"m，n，ng"咧？這，漳州、厦门、同安、台湾即寡所在啲儂透底拢分kah诚清楚，可比講：

b：命（令）、面（桶）、亡（魂）…
m：命（運）、面（粉）、罵…
l：年（華）、（肚）量、龍
n：年（嵗）、量（體長）、努（力）
g：語（言）、五（萬）、儀（式）
ng：硬（斗）、（隊）伍、雅

所以，有一條規律是：在口元音（無"鼻音"啲時）頭前，著噯讀浊塞音①：b、l、g；在鼻化元音或者纯鼻音韻母啲頭前，著噯讀成鼻音：m、n、ng。

這是漳州、厦门、同安即寡所在啲情形。事實上，即條規律，並無完全適合泉州腔，或者講無合(ha̍h)。即點，可以kā當做"漳、泉"两派伫語音上、尤其是聲母方面上吤根本啲區别。學者严学宭、尉迟治平在《汉语“鼻-塞”复辅音声母的模式及其流变》（音韵学研究第二辑 1986年）當中有寫講：

(1)厦门方音和代表漳州方言的龙溪方言是一类，b/m，l/n，g/ng完全互补。
(2)代表泉州方言的晋江方言是另一类，b/m，l/n，g/ng虽然也互补但其分配却没有厦门、龙溪方言那样整齐。在晋江方言中，明、泥、疑各纽如紧接鼻音或鼻化元音也是分别读为m、n、ng，但如紧接的不是鼻音或鼻化元音，却不一定读作同部位的浊塞音b、l（d）、g，在较少情况下，也会出现m、n、ng，如 bing～ming 明。即在这些字里，b～m，l（d）～n，g～ng是自由变读的。
(3) 代表潮汕方言的揭阳方言，其特点是b和m，l（d）和n必须分立，不能归并为一个音位。例如，be?麦，me?脉，lang鳞，nang人……

即段文字已經将"漳、泉、潮"中間啲區别講kah一清二楚。我同意即两位學者啲分析。因為普通時仔，我嘛常在(chhiâng-chāi)佮一寡泉州啲朋友鬥陣，我真早著發覺怹啲鼻音特别儕，尤其是惠安腔。

PS.

浊塞音：lô-sat-im

"所"字啲閩南語白話音

Fri, 01 Jul 2005 11:13:16 +0800

"古早儂所講啲無濫糁"，即句话，呣知衆儂客倌，恁敢捌聽儂講过？唷，逐个soah靜靜！無..我先講我啲經驗分儂聽嘛好啦。

我細漢啲時，蹛伫庄骹(chng-kha)所在。迄阵仔，阮母仔定定來咧講起即句话——"古早儂所講啲無濫糁"(POJ:kó·-chá-lâng sé-kóng--ê bô lām-sám)。逐个犯勢有注意著，迄字“所”，我超工共(kā)伊標記成"sé"。其實，he bē使講是我超工beh安呢记啲，事實，阮遐啲儂确實是安呢講啲。在我往早(èng-chá)猶佫真無了解閩南語啲時，我定定當做講，he稳當是庄骹儂呣捌字，讀了走精去，明明“所”字是噯讀做"só·" chiah tio̍h，哪會beh共讀做"sé"？後來，大漢了後，我所捌啲智識有比向時(hiàng-sî)加咔儕，嘛加少有teh做一寡佮閩南語有治代啲工课(khang-khòe)。慢慢我著發覺講，農村儂(lông-chhoan-lâng)咧講話，雖然真樸實(phoh-si̍t)，呣佫往往soah伫普通當中隐藏(ún-chông)著一寡大道理。朋友若是常在(chhiâng-chāi)有咧關注一寡鄉土俗語，定著有家己啲體會。

好，taⁿ佫來講正题。頭拄仔，咱講遘“所”字，因何會讀做"sé"咧？其實，即中間啲道理，oân仔诚简單，呣是吤複雜。紲落來，咱著beh沓沓仔(ta̍uh-ta̍uh-á)來拆解——

伫beh拆解進前，beh先共朋友做一交代：咱共款beh佫利用"漢語中古音"來做比對。逐个實在呣通看輕"中古音"，因為"中古音"實在真重要！若普通時有咧研究"漢語言"啲儂，透底拢了解安呢啲一个道理——"中古音"可比是一个儂啲"大脑"，各所在啲"漢語方言"可比是受大脑控制佮约束啲"肢體器官"；简單講，即个"中古音"著是漢語族啲標准規範，各所在啲漢語方言雖然無法度通話，不而过，怹拢總遵守"中古音"即抱(phō)標准規範。了解即个道理了後，咱來講紲落去chiah有意義。

我先寫幾个逐家拢有熟似啲漢字：初、疏、蔬、梳、所。初初看起來，即幾个字好親像無啥物特别啲聯係。不而过，汝犯勢呣知影，事實，即五个字，怹伫中古時代(唐、宋)卻是讀共款啲一个韻母。即个共款啲韻母，著是"魚"韻。得著即个共識了後(暂且當做第①个共識)，咱翻頭佫來看即五个字啲閩南語讀册音(文讀音)是啥。是啦，這逐个拢比我咔了解："初"是"chho·"；"疏"、"蔬"、"梳"是"so·"；"所"是"só·"。安呢，逐个定著已經發覺講，怹啲韻母有影拢共款，平平拢是"o·"。真好，這是"第②个共識"。有頭前即两个共識了後，著會當進一步得著第③个共識，這嘛是咱最後beh嗳啲結論。

朋友應該儕少有了解一寡“文白異讀”啲智識hò·？實際，這嘛是閩南語語音系統吤重要啲特點。好勢，咱來看"初"、"疏"、"蔬"、"梳"即四个字。怹啲白话音(白讀音)分别是：

初：泉州音"chhoe"；漳州音"chhe"。比論"初一十五"。

疏：泉州音"soe"；漳州音"se"。比論"頭毛真疏"（華語：頭髮稀疏）。

蔬：泉州音"soe"；漳州音"se"。比論"菜蔬"（華語：蔬菜）

梳：泉州音"soe"；漳州音"se"。比論："掃梳"（華語：大竹掃帚）、"柴梳"（漳州話，華語：頭梳）

講遘遮，朋友稳當已經得出第③个共識，也著是咱啲結論！無呣著，咱啲結論著是：“初、疏、蔬、梳、所”即五个字啲中古韻共款、讀册音(韻母)共款，所以，怹啲白話音(韻母)當然嘛會使讀共款。因此，咱講“所”啲白讀音正正著是："sé"（漳）、"sóe"（泉）。

"chhoah冰"="擦冰"="礤冰"

Wed, 29 Jun 2005 20:05:53 +0800

即篇原底是tah伫“北大中文論壇”hit爿啲一段回應，因為感覺猶有淡薄仔價值，所以，决定 kā拈(ni)去糊tòa"水雞咯咯叫俱樂部"hia，亦嘛顺紲粘tòa“古井水鷄”即爿

我認為講“chhoah蕃薯簽”、“chhoah菜頭仔簽”、“chhoah冰”内底讲啲即个“chhoah” 字（IPA: /tsʰuaʔ³²/），伊啲本字，该當著是“擦”。聽講代先提出即个看法啲儂是廈門大學啲周长楫教授。實在真够讚！

我手頭無半本“古韵书”，不而过，我有用著即套線顶查中古音”啲傢俬。在我了解，“擦”（集韵注明佮“礤”相通）是“七曷切”，中古声母“清”（ tsʰ）、中古韵母“曷”（at），閩南語讀册音“tsʰat³²”。為著卟進一步來稽考“擦/礤”啲白话音，咱會當先來做一个简单啲比對。

“渴”字，其中有一个讀音，中古声母“溪”、中古韵母“曷”、反切音“苦曷”。真好，拄好佮閩南語有對同(tùi-tâng)！咱知影，“渴”字，閩南語啲讀册音是"khat"；白话音唸做"khoah" (IPA: /kʰuaʔ³²/)，比論，閩南俗语講“喙凋喉渴”（POJ：chhùi-ta âu-khoah）。

所以，通过顶面啲比對，咱著有法通知影講，“渴”字佮“擦/礤”字算讲是共一个“韵母”，平平拢是讀做：at (文) /oah (白)。

這以外，咱佫知影講，“擦/礤”啲意思是“摩擦”（集韵：摩也）。所以，咱即陣佫再翻頭來看“chhoah蕃薯簽”、“chhoah冰”是啥物意思。其實，這应该無需要我佫解釋，因為閩南儂拢嘛知影。拆白讲，即个“chhoah”是咧表示一个“动作”，伊所代表啲意思是“luh”、“chhoeh”、抑是“leh”。若卟用普通话來翻譯，量其约(liōng-kî-iok)會當解釋成“搓”、“用力搓”。

安呢，呣但(m̄-nā)“音韵”有合(ū-ha̍h)，亦佫hit-ê“意思”嘛是不止仔對同哩。真正是“江湖一点訣，講破呣值錢”哩咧！

閩南語「仔」啲声调

Sat, 14 May 2005 17:46:07 +0800

代先，卟來練一寡sán話。闽南语啲“仔”，號做“小称词”，透底(thàu-tóe)伫“焦點詞”啲尾溜，是焦點词啲奴才、奴隶，本身無自由。闽南语啲“仔”，呣是華语啲“仔”，魚還魚,蝦還蝦，呣好七鬥八鬥。根据了解，“仔”只不过是俗字，怹講正字該當是“囝”。不而过，這是古早時代啲代誌也。即陣，咱實在無必要佫回轉去原初,佫用伊啲前世“囝”來代替，這無符合實際。按照稽考正字啲觀點來講，“囝”佮“囡”應該是共儂無共面腔。举一例，華语“小孩子”，閩南语講做"gín-á-kiáⁿ"，這是白话字啲寫法，若卟用漢字寫，我會寫做“囡仔囝”；假使若是鐵齒，硬卟寫正字，安呢汝寫出來着是“囝囝囝”，我看這呣是孔子公仔看無爾，連汝家己着捎(sa)無。當然汝若寫羅马字應该無即个問題。所以，我啲做法是：“囝=kiáⁿ ” ;“囡=gín”; “仔=á ”。煞。
“仔”啲讀音，有咔複雜一寡。不而过，若摠(chang)着伊啲規律了後，着朆佫感覺诚費氣。卟議讑某物仔字啲讀音，定著噯講起“本調”佮“變調”。“仔”字啲本調，應該是“隂上調”，第二聲。變调來講，有两種情形，一種是普通變调，第二聲變第一聲；佫另一種是“輕聲”。“仔”字啲輕聲，透底出現伫“儂名”抑是“特指名称”當中，比論講“阿忠仔”、“挺仔”、“秀菊仔”、“阿共仔”(臺灣儂對共產黨啲稱呼)……
有一个咔趣味啲。頭拄仔，咱經體(keng-thóe)“仔”是“焦點詞”啲奴隶，不而过，伊并呣是完全無路用、据在侬差教(chhe-kà)啲骹siàu。事實上，拄著“仔”字讀本调啲時，焦點词内底最後迄个(hit-ê)字，變调朆當(bōe-tàng)照普通啲變调規律處理。即阵着來議論“仔”字讀本調啲時，焦點词煞尾迄个字（以下简称“煞尾字”）啲讀法（調值）。一般來讲，煞尾字啲變調，是由伊本身啲调類性質來决定，有两條規律：

设使煞尾字是属於：第1声（隂平）、第5声（陽平）、第7声（陽去）、第8声（陽入）即四種啲，伊啲變調著是“中平调”，調值接近本调啲第7声。比讑讲：柑仔、墻仔、和尚仔、玉仔。

设使煞尾字是属於：第2声（隂上）、第3声（隂去）、第4声（隂入）即三種啲，伊啲變調著是“高平调”，調值接近本调啲第1声。比讑讲：鳥仔、兔仔、桌仔。

相關啲内容，請看“闽南语语音系统”

閩南語的「第九聲」

Tue, 10 May 2005 14:55:22 +0800

一般來講，閩南語的聲調包括本調佮變調两部分。

本調。漳州、厦门、同安，實際kan-taⁿ chhun七聲niā（也著是講「第六聲」已經濫落去「第七聲」）；不而過，泉州腔佇咧讀變調的過程當中，猶原會當感覺著「第六聲」的存在。第一聲～第八聲，按傳統聲韻學的「調類」來分，會當安呢來表示(先用廈門腔做代表)：
調類
隂平
隂上
隂去
隂入
陽平
陽上
陽去
陽入
调值
44
53
21
32
24
—
22
4
代號
1
2
3
4
5
6
7
8

變調。變調加真複雜、加真活，呣是三两句話會當講清楚，不而過，咱主要是來beh瞭解即个「第九聲」，所以一寡咔無牽連的，咱著無beh加講。逐个噯注意，咱佇chia所講的「第九聲」呣是「輕聲」，魚還魚、蝦還蝦，呣通濫濫做一下。「第九聲」往往出現佇白話音裡底，有噹時仔會當kā看做是一款特殊的變調，可比講（有食色(chia̍h-sek)的字，著是「第九聲」）：

光光光/金金金/新新新/冰冰冰/清清清；
红红红/平平平/油油油/綿綿綿/長長長
静静静/遠遠遠/直直直/熟熟熟/活活活
儕儕儂咧看電視.
魚仔大大尾.
汝會用去.(lí ē-ēng khì)

……
這以外，口語當中有一寡仔虛詞，oân-á讀「第九聲」，汝像講：

有够趣味的哦!(ū-kàu chhù-bī--ê ŏ·)
哇啊！物件有够儕的neh !(Oă--a ! Mi̍h-kiāⁿ ū-kàu chōe--ê neh ! )
喂，汝好，請講話……(Oĕ,lí hó, chiáⁿ kóng-oē....接電話的情形)
Hăⁿ...是汝咧叫我呣?（應話的情形）

講遘chia，逐个khiàm-chhái已經知影啥物是「第九聲」囉。實際上，即个「第九聲」該當是一个「高升調」，伊的讀音佮「泉州腔」（廈門腔嘛是）單字調的「第五聲」（陽平）差無真儕，嘛真倚近普通話的「第二聲」，不而過，「第九聲」的音值佫咔懸(koân/kûiⁿ/koâiⁿ)淡薄。

有的儂穩當心肝裡teh臭堯疑：he嘛奇怪ah ！明明著是第五聲的音值咯，哪會講是啥物「第九聲」的啦？有即款想法的，透底是一寡講廈門腔或者泉州腔的儂。是安怎講咧？我舉一个例來講互逐个聽，聽了汝著加真清楚ah——

[例1]：短句「新新新」，頭一字「新」的讀法（變調），無論佇廈門抑是漳州攏共款，攏是「高升調」，調值差不多是「35」，聽起來真靠近廈門腔單字調的第五聲（陽平調，調值「24」，有的講「25」）。因為安呢，所以廈門儂可能一時無法度分別，不而過，漳州儂soah 分kah真清楚。漳州腔（長泰、龍海）的陽平，伊的本調的調值佮廈門、泉州無共款，顛倒是hām普通話「第三聲」實際的音值真靠近，咱暫時先共伊記做「214」。咱具體佫用「長泰腔」（Tiô-thòa-khiuⁿ，屬漳州音）來做比論，佇「長泰腔」裡底，傳統的「七聲」，呣管是本調抑是普通規律的變調，攏無「24」／「25」、「35」即款的「調值」。所以，短句「新新新」頭一字「新」（讀高升調），呣是漳州腔的「第五聲」，正港是一个屬佇「傳統八聲」（無算「輕聲」）以外的「新調類」。頂面講的hiah-ê例，攏總是即款的情形。

佫來講sòa落去。閩南語當中有寡仔「合音字」，oân-á 讀「第九聲」。比論講：

「自安呢」／（POJ：chū án-ne / chū án-ni，華語：於是），合音了後，變做「第九聲」，泉州腔／廈門腔讀做“choăn”；漳州腔讀做“choăⁿ”。有噹時仔，為著讀寫利便，會kā記做「第五聲」的 “chôan” 佮 “chôaⁿ ”。
「昨昏」（POJ：cha-hng，華語：昨天），合音了後，為著方便，記做“châng”。實際，這oân-á是「第九聲」——“chăng”。
「下昏」（POJ：e-hng，華語：今晚），有的所在讀合音的“ĕng”，共款是「第九聲」。
「今仔日」（kin-á-ji̍t），有的所在，比論廈門，講「今仔」（省去一字「日」）。佇泉州德化、永春即搭，講做 " kiăⁿ "或者「kiăⁿ日」。當中即个 " kiăⁿ "，事實著是「今仔」的合音，是「第九聲」。

抛荒臺語文工作室

白話字輸入法（Taiwanese Package2.0）」

稽考"族"字啲讀音

Sat, 07 May 2005 21:18:30 +0800

(晉前伫北大中文論壇有討論，在下感覺有必要搬倒轉來"厝啲"——)

伫阮漳州龙海，常在(chhêng-chāi)有咧讲着"種cha̍uh"（国际音标为：[tsiŋ⁵³] [tsauʔ⁴]）即个词，意思略仔(lio̍h-á)卟接近"家族"、“宗族”、“血缘”。比论講：

往过，伊生“双生仔”，即擺，怹新妇嘛佫再生一對“双生仔”，這應該是怹即家伙仔啲种cha̍uh。即句話，華語啲意思，量其约仔是安呢：过去，她曾經生了双胞胎，这回，她儿媳妇又生了双胞胎，看來這是他们家族的传统啊。

即个囡真歹性地，拄好佮怹老爸共一个種cha̍uh。即句话，華語啲意思大概是：這个小孩脾气坏，正好和他爸一個德性。

怹叔伯兄（隔腹兄）爱偷拈（ni）偸摕（the̍h），伊嘛共款，看勢的确是共hit个種cha̍uh啲，無脱種。即句，華语啲意思是：他堂兄一向有偸盗的恶习，他也一樣，看來的确是同種同宗，没有變種啊。

我举即个例，主要嘛是卟來議論“種cha̍uh”即个词，siâng时，嘛是为着稽考(khe-khó)“cha̍uh”啲漢字是啥。阮厝所講啲“種cha̍uh”，其實漢字该當是“种族”即两字，也着是講 "cha̍uh"该當着是“族”字啲白话音。但是，即个“種族”（chéng-cha̍uh）所代表啲意思嗳比文读音所讲啲“種族”(chéng-cho̍k)咔隘(e̍h)，后者啲意思佮華语讲啲“種族”完全共款；前者却是干凋(kan-ta)是咧代表一个家族啲血脉（抑是讲“血缘”），這以外，嘛聽好比喩做：一个家族独有啲传统、惯勢做法。

我啲印象當中，kán-ná呣捌聽厦门儂，抑是同安儂讲过"種cha̍uh”即个腔口（犯勢oân-á有，只不过是我呣知影）。後來，台湾彰化二林啲楊境韜伫论坛共我回应讲：

chéng-cha̍uh毋是“種族”也，汝tsit4詞我解知hoonn0，我n老母(站長注明:楊先怹阿母，後頭厝伫"線西鄉")定定來講“tsing2-tsak8”，意思是“被遺傳”“遺傳自”“跟誰一箇樣”，比論講“汝毋通去tsing2-tsak8著汝n老父其否性地hann0”。tsak8參tsauh8其漢字定著是覺韻，族是屋韻hoonn0，屋韻無來讀作-auh也。
是講汝n龍海市敢是著愛念作tsiong2-tsauh8，亦汝若解殺念作tsing2-tsauh8？...

通过杨先生啲对话，咱了解口语内底佫有"chéng-cha̍k"即个講法。“族”啲白话音，定著是“cha̍k”，這可比“木”字。“木”字的白话音是"ba̍k"。“族”佮“木”平平拢是“屋”韵（中古韵）。按杨先生啲比論（“汝毋通去tsing2-tsak8著汝n老父其否性地hann0”），咱着会知影，彰化線西鄉啲腔口“chéng-cha̍k”，是做动词用啲，這佮同安腔啲“種着”（chéng--tio̍h）意思完全共款，词性嘛完全共款。線西鄉即个“chéng-cha̍k”，佮龙海腔啲讲法有增差，龙海腔讲作“chéng-cha̍uh”，做名词用啲，用法我伫顶面有讲着。

我认为，虽然“chéng-cha̍k”佮“chéng-cha̍uh”意思有增差，词性也無共，呣佫，我佮杨先生共款，相信怹应该是共一个漢字，只不过读音无共爾。不而过，虽然讲感覺是安呢，總是需要证据來證明。我顶面有解说也，“族”啲白话音會使读“cha̍k”。我即陣主要是想卟证明“cha̍uh”是 “族”啲第二个白话音。为着卟证明這个命题，我想卟先摕“哭”字來分析——

“哭”，也是“屋”韵（中古韵），入声，讀册音是“khok”；白话音現主時透底讲是“khàu”(入声舒化)。若是“入声舒化”啲讲法成立，安呢來讲，即个 “khàu”一定是按“khauh”變來啲，也着是讲“哭”字啲白话音，自本是“khauh”，只不过路尾发生“入声舒化”，变做"khàu"。

共款啲道理。“族”，讀册音“cho̍k”,白话音嘛有可能是“cha̍uh”。我认为，对闽南语白话音啲研究，咱呣通去互“規矩、定律”束缚(sok- pa̍k)稠(tiâu)咧，有噹時仔，咱着嗳突破規矩看问題。

我佫举一个例，“沃”韵（中古韵）啲“毒”字。咱逐个拢知影，“毒”字讀册音是“to̍k”。白话音來講，会當百分百确定啲是“ta̍k”；佫來，古今中台研究闽南语啲學者，透底认为“毒”有第二个白话音，着是咱普通時定定讲着啲“thāu”（比论讲：毒鳥鼠 / thāu niáu-chhú)，學者認為"thāu"是按"tha̍uh"變來啲，共款是“入声舒化”啲结果....

照安呢來看，假使以上啲解说會成立，安呢，“族”着会使讀做“cha̍uh”，這嘛已经證明我啲语感是正确啲。

寫字:福建話&廣東話

Fri, 08 Apr 2005 18:44:13 +0800

儂問我一个問題：卟安怎用漢字寫閩南語（文）?
……
著是辷個短短啲問題，害我戇戇(gāng-gāng)，一時呣知卟如何來回答。 (繼續閱讀...)

想遘講遘

Wed, 06 Apr 2005 02:22:28 +0800

一、
咱儂话,"拢","拢是","拢總","拢共"....泉州所在假若(kán-ná)咔罕得听着,泉州儂透底说"kè",比论:"kè嘛是汝!"(华语:都是你啦!),"两个儂kè是台灣儂"(華語:两个人都是台湾人)......"kè"，伊啲漢字到底是啥？存年（chûn-nî/chûn--nî：前年），佇北大論壇有討論着這，迄阵仔,晉江啲缯季讲"kè"啲正字犯势是"皆"，不而过，伊呣敢挂保证，因為伊也知影"皆"字啲聲调無合。我辷暂仔，雄雄想着一个字——"介"，我認為"介"着是"kè"啲正字。

二、
中國大陸普通话所讲啲“地铁”（着是“地下铁”啦，“地下铁”即个语词敢讲是日本儂发明啲？），伫台湾，儂讲“捷運”。伫台湾，若提起“捷運”，儂透底會用華语念，罕得聽着直接用闽南语讲“捷運”。各位，犯势呣知影。其实，“捷”即个字，闽南语定定有咧讲。下底举例说明一下： (繼續閱讀...)

泉州儂,漳州儂寫"POJ"共款無問題

Wed, 06 Apr 2005 02:11:44 +0800

POJ嘛會通!!!

泉州儂、漳州儂、同安儂、漳浦儂、永春儂、长泰儂、雲霄儂、平和儂、晉江儂、金门儂……呣管咱是叨位來啲，辷擺拢聽好(thèng-hó)鬥陣來寫POJ。 (繼續閱讀...)

古早儂敢有影是講“咱儂話”？

Wed, 06 Apr 2005 02:02:57 +0800

北大中文論壇論坛，有儂問講："这首诗反映了什么语音现象"？

《戏妻族语不正》......
作者：[唐]胡曾

呼十却为石，唤针将作真。忽然云雨至，总道是天因。 (繼續閱讀...)

汝敢“跋过”siūⁿ-poe？

Wed, 06 Apr 2005 01:53:30 +0800

相信讲，若厝内底序大侬(sī-tōa-lâng)有咧拜拜啲朋友，稳当拢知影"siūⁿ-poe"是啥。

今仔日，蹛伫(tòa-tī)彰化二林镇啲朋友（杨境韬先生）来批，讲遘"siūⁿ-poe"（华语是"杯筊"，一种佛教器具）辷个语词。杨先生讲 "siūⁿ-poe"啲"poe"，汉字是"棓"抑是"片咅"。杨先生是一个注心来咧研究闽南语啲少年侬，伊啲本事诚悬，不但有才情，又佫真性格，台湾著名啲闽南语专家洪惟仁先生呵咾(o-ló)杨先生"比普通啲学者了解佫咔侪"。 (繼續閱讀...)

"胭脂"是啥物碗糕？

Tue, 05 Apr 2005 23:31:06 +0800

晉前(chìn-chêng/之前)，佇北大中文論壇閩南話專題，有來討論著"胭脂"辷項物件，來自臺北啲"Timluo"網友講著"胭脂"佮"唇紅"無共款，伊講" Technically speaking, 胭脂 and 口紅 are not the same. 胭脂 is what we call 腮紅 (blush or blusher) nowadays." (繼續閱讀...)

创啥siâu !

Tue, 05 Apr 2005 23:13:32 +0800

创啥siâu!!!! 各位啊，呣通误会lia̍h准是我某物侬踮遮咧"肏訐谯"(chhò-kàn-kiāu)... (繼續閱讀...)

“睏”啥款？

Tue, 05 Apr 2005 23:09:02 +0800

即摆来讲"睏"....北京话啲"睡觉"，咱侬话（閩南）讲"睏"。假使是"稍微眯一会儿",咱侬话会使讲"寐一下"，即内底啲"寐"，读做" bî "。 (繼續閱讀...)

	台語羅馬字	漢羅	華文	英文
1	nōa-chôaⁿ	瀾泉	唾液腺
2	nōa-chôaⁿ	瀾殘	唾液

調類	隂平	隂上	隂去	隂入	陽平	陽上	陽去	陽入
调值	44	53	21	32	24	—	22	4
代號	1	2	3	4	5	6	7	8