鹭水芗南－闽南语部落

（看全文，線頂聽錄音~）

古早，台灣島佮中國相粘，中央無隔一踐（chōa）海溝。即搭有一个所在，號做東京，誠鬧熱，儂誠儕，嘛誠富（pù）。不而過，「有錢儂乞食命」，倒怯屎（khiap-sái），攏嘛「認錢無認儂」。有一个臭頭和尚，一身軀生疥（漳音：seⁿ-kè ；泉音：siⁿ-kòe），爛kah 汁流汁滴。伊去東京所在kā儂分（pun，普通話：乞討），無一个beh一碗互伊食、一sián（普通話：一分錢）互伊用；逐个攏嘛鼻仔ng咧，佫kā伊趕：「走啦走啦，一身臭薟薟，去別位分，去別位分啦！」臭頭和尚 一四界（chi̍t-sì-kòe）分無，行來遘山跤，拄著一个少年家，佇hia咧挨（漳音：e ；泉音： oe）豆乾豆腐。

少年家看著即个臭頭仔和尚，就對伊講：「老師傅啊，我今日（kiaⁿ-ji̍t）猶未趁著半sián錢，無錢通互汝，汝若（nā）腹肚枵（iau），這豆乾豆腐，免客氣做汝食啦。」臭頭和尚聽伊安呢講，嘛無細膩，做伊豆乾捎（sa）咧，大喙食、細喙塞（that），豆乾食了食豆腐，豆腐食了換啉豆花，食kah ná 像虎狼，親像三暝三日無食著物件的款，將少年家的豆乾豆腐食了了，一鼎豆花也啉了了，連拍嗝（phah-eh）一下嘛無，腹肚挲挲咧，哈耳歕鼻，目睭揉揉（漳音：jôe；泉音：lê）咧，講伊「beh睏啊」。少年家choăⁿ 將即个和尚扶（phô·）去咧眠床頂睏。臭頭和尚一貼著（tah-tio̍h）床梆，倒落去 現khô·ⁿ（khí-hoāⁿ：起鼾），衫褲也無褪，破草鞋也原在佫chhēng咧。少年家就kā 伊giú被 來 袷，重佫浸豆，按算beh佫挨。

臭頭和尚睏醒來，看見少年家咧挨豆，kā伊肩胛頭搭搭咧，講：「少年家，大度量。貧僧（pîn-cheng）也無啥通報答汝，送汝一句話，汝著噯會記得。」少年家問伊「甚物話」，和尚就講：「石獅吐血，地牛翻身，沈東京浮福建，救蟲呣通救儂。」少年家拄beh問伊即句話是甚物意思，一目nih，臭頭和尚已經走kah 無看見儂影囉。

少年家擔豆乾豆腐去街仔路賣，順sòa佫去看衙門口的hit兩隻石獅有吐血抑無。少年家逐日去咧衙門口看石獅，一个賣肉兮問伊咧看啥？少年家就實實kā伊講。賣肉兮soah愛笑，講少年家咧起戇（khí-gōng）。隔日，天未光，賣肉兮超工攢（chhoân）一寡豬血水，kā糊咧石獅喙兮。少年家擔豆腐來賣，看見石獅喙裡有血，著一驚，自安呢 kā 貧擔 tàn掉，那走那大聲吼喝（háu-hoah）：「石獅吐血囉，地牛beh翻身囉，緊走哦！」地牛翻身，著是「地動」啦，聽講是塗跤底有一隻地牛咧翻身來引起的。少年家喝講beh地動，無儂beh信，逐个攏笑伊咧起痟。

少年家直直走來遘一座山頭兮，一時烏天暗地，雷公 sihⁿ 爁（sihⁿ-nà：閃電），雨滴仔一粒兩粒大，劈劈啪啪 連紲落；雷公khuh-khuh-tân，雷聲哢哢吼……雄雄soah 起蛟龍（khí-kau-lêng，普通話：山洪爆發），大水淹起來。滿城的儂走bōe离，hām 猪、羊、牛、馬 大細隻 精牲 做一下，互大水流流去；眠床橱桌、大箱細籠，浮kah一四界。

少年家peh起去山頂尾，看天變地變，大水一下來，儂淹死真儕，一座東京城，soah 沈落去水底，連衙門口的旗杆（kî-koaⁿ）嘛攏無看見。少年家驚心動膽，想起hit-ê臭頭和尚講的話，聖聖（siàⁿ-siàⁿ）有影應驗——石獅吐血，地牛翻身，東京沈落去。淹著的所在——東京城，本成（pún-chiâⁿ）著是一个有福氣的所在，「福地福儂居」，建家立業，號做「福建」真真無錯。（浮福建，意思是講「福建佇咧水裡浮咧浮咧」。逐个著噯按即个角度去理解。）

少年家看大水按跤底直直衝過去，水流kah真洶真koah，儂佮精牲仔攏無法度近岸，peh bōe起來。有一隻鳥鼠仔，佇水裡沉咧浮咧，吱吱叫，親像咧喝救儂。少年家將一支竹篙伸過去，「鳥鼠sò竹篙——一節過一節」，來遘了山頂尾。大水浮一塊（tè）柴梆過來，一群白蟻歇佇梆仔頂，隨時著beh 反輦覆（péng-lìn-phak）囉。少年家佫用竹篙將柴梆輕輕仔勾、勾、勾，勾來遘邊頭，白蟻也攏趖趖起來山頂囉。一隻密蜂飛來飛去無tè歇，飛遘山頂已經無力佫飛啊，強強beh接載（chih-chài）bōe tiâu。少年家趕緊將竹篙仔尾伸過去互伊歇，chiah佫 勻勻仔（ûn-ûn-á）kā放落來。

無偌久，又佫流過來一叢杉仔，杉仔mo·h一个儂，互水激kah 面烏喙烏。即个儂 看見山頂有儂，開喙beh喝救儂，水湧按頭殼頂搧來，「沐沐沐」連吞幾落喙水，beh喝，soah喝bōe出聲，實在真危險，少年家若無救伊，真緊著無性命囉。少年家即个時陣，哪佫會記得臭頭和尚交代的話——「救蟲呣通救儂」？緊緊將竹篙伸過去。Hit-ê儂看著竹篙伸來，一時親像「熊抄（chhiau）著竹栱（tek-kóng）」，拍死都（to）呣放，少年家險險互伊倒拖落水，趕緊馬步 煞（sat）咧，將竹篙一下仔一下，勻勻仔拔（漳音：pe̍h；泉音：pu̍ih）倒轉來。

少年家救起來的即个儂，講家己 名號做王恩，請問少年家的儂名。少年家講伊姓李名義。王恩為著報答李義的救命恩情，招李義結拜，認李義做阿兄。兩儂對天咒誓（chiù-chōa），有福同齊享受，有難做夥擔當。

大水退了後，東京沈落去，變海溝，kan-taⁿ chhun海墘一踐（chōa）東京大路。李義照原靠挨豆乾、豆腐趁食三頓飽。王恩原本是財主阿舍，東京一下沈去，伊soah成做 浪蕩囝，無tè通去，看破 倚靠 義兄 李義 bóng渡 bóng過日。李義做豆乾、豆腐，「五路四界」 攏無儂，著盤山過嶺，擔去真遠的所在賣。

有一日，李義擔豆乾、豆腐beh去賣，盤過一座大山，突然間天烏一爿，李義想講是beh 落雨，攑頭一下看，一片烏雲飛過頭殼頂，飛去釘佇山嶺頂。李義佫斟酌看咧，烏雲soah化做一个魔神仔（妖怪），青面giàng牙，跤脊胼（kha-chiah-phiaⁿ）佫有發兩支翼股（si̍t-kó·），揹（phāiⁿ）一个查某（cha-bó·）。李義看一下，著青驚，走去覕（bih）坫 山路邊的大樹跤，呣敢做聲。過久久 佫kā 偷看咧，魔神仔soah無去囉。李義liam跤liam手，趖去遘山頭嶺頂，看著一窟山洞，親像大古井，烏khâm-khâm，深汪汪（chhim-oang-oang）。

李義想講即搭穩當是妖怪的山洞，呣敢佫看，趕緊按山頂尾soan落來，豆乾擔 擔咧，入城做伊去賣豆乾囉。佇城裡，李義有看著官府貼一張告示，講知府大人的千金小姐佇後花園chhit-thô的時，去互妖怪掠去；若有儂會當將小姐救倒來，有某兮，beh賞黃金千兩；無某兮，小姐choăⁿ 順sòa嫁互伊。

李義將豆乾、豆腐賣了，倒來佮王恩講起即層代，又佫將伊看著魔神仔鑽入山洞的代誌，嘛做一下講講互王恩聽，伊按算beh請王恩鬥陣去救小姐。王恩kā伊應講：「小姐一个niā，救出來是beh互汝做某，抑是beh互我做某？」李義就應王恩講：「小姐咱攏mài kā伊娶，咱摕賞銀，有錢著娶有某，時遘，咱一儂娶一个。」王恩講：「好是好啦，呣佫，實在不止危險。」李義choăⁿ 佫再 鼓吹講：「咱好好按算一下，佮伊拼一注！」

兩儂choăⁿ 發落筐籃、長索，早早著先去覕佇山跤等候，候kah妖怪飛出山洞，李義著拖王恩來遘洞口。王恩驚講山洞裡呣知猶佫有甚物妖精鬼怪、山禽野兽無，驚死呣敢落去，choăⁿ 假講：「阿兄汝儂咔細股（sè-kó·），咔輕，汝落去；我咔大股，咔有力，我坫頂面kā汝拔索。」李義想講王恩講了oân-á 真 在理，choăⁿ 坐tòa筐籃裡，叫王恩拔索，將伊慢慢放落去山洞底。一tia̍p仔久，筐籃抵著底，王恩將索仔停咧，無佫放。佫過一tia̍p仔久，下底索仔咧搖，王恩出力，將筐籃giú上來，裡底坐一个千金小姐，生做有夠嫷。王恩一看著小姐，著將李義，hām佮進前兩儂的約束，攏總放bōe記得。伊kā筐籃、索仔 tàn掉，無管小姐直直講下底猶佫一个，iāng起小姐，家己先去chhōe官府請功囉。

小姐倒來了後，kā in 阿爹講，叫王恩去救李義，王恩驚拄著魔神仔，呣敢去。小姐真受氣，叫儂kā 王恩掠起來關。知府大人嘛是「橋過，拐仔着放掉」，小姐倒來囉，也無佫派儂去救李義。

李義佇山洞裡等啊等，無看著王恩佫kā筐籃放落來拖伊起去，佇下底有聲喝kah無聲，佫來喝kah sau聲，也無聽著王恩應kah半句。Kan-na聽著跤邊 吱吱吼，親像是有儂咧講：「王恩去啊，王恩去啊。」李義一下看，是一群鳥鼠。鳥鼠佇洞底咧iah空，直直iah遘thàng山跤。李義鑽出山洞，翻頭去官府chhōe小姐佮王恩，chiah知王恩無佮小姐做親， 顛倒是互儂關佇監牢裡。

知府大人看李義是一个散赤的庄跤儂，假使真正是小姐的救命恩情儂，若安呢，即个儂著是伊的囝婿，准講無做囡婿也著賞伊千兩黃金，即條錢，實在摕攏bōe出來。知府大人choăⁿ 故意相刁難，叫一陣 查某kán罩頭巾，hām小姐摻摻做一下，徛徛 tòa咧 二門裡，互李義來認看叨一个是小姐。認會出來chiah有承認伊是小姐的救命恩人。

往時（éng-sî）衙門攏設佇大厝的裡面，用一扇門閘咧，分裡佮外。裡面tòa女眷，無隨便互儂出入。所以chiah有咧講，千金小姐「大門呣出，二門呣伐」。李義徛咧二門外，bōe得入去，蜜蜂飛來伊的耳仔邊，輕輕仔kā伊偷講：「我來去小姐頭殼頂飛。」就安呢，李義將罩頭巾的小姐認出來囉。

知府佫叫儂將二門龕（khām）起來，小姐佇裡底，李義佇外口，叫李義家己入去chhōe小姐。白蟻來鬥跤手，一扇門 攏總 kā 嗤嗤（chhu）破。李義choăⁿ 大空大榫（tōa-khang tōa-sńg）做伊行入去佮小姐相見。小姐hit 時佇山洞裡，四界暗摸摸，呣知李義生做圓抑扁，bōe認得伊的儂，呣過會認得伊的聲，伊choăⁿ 佮李義相認。李義ko·-chiâⁿ 放王恩出來，講若無王恩鬥相共（tàu-saⁿ-kang），伊家己一个嘛無法度救小姐。小姐呣答應，講：「伊存心beh害汝，汝猶佫咧替汝講話是乜代？汝beh救伊，ah伊有想beh救汝無？」

李義即个時陣chiah想著臭頭和尚講「救蟲呣通救儂」即句話。做大水的時陣，伊救鳥鼠、白蟻、蜜蜂，伊拄著困難，攏有來鬥相共，kan-taⁿ 即箍王恩，忘恩背義，實在有夠無天良，救伊soah 顛倒來相害。無良心的儂，有影咔呣值得一尾蟲！

即个故事，捌翻做 儂戲（lâng-hì） 摕出來搬；香港佫捌kā翕做彩色的電影，片名號做《雲中落繡鞋》，又名《石義大戰蟒蛇精》，真正是 出名出聲 紅phàⁿ-phàⁿ。

ps. 即節的故事《沈東京浮福建，救蟲呣通救儂》，是按《中华.闽南文化网》（泉州）記載的共名故事所來改編的。

(Beh聽聲，佇下底　→)

（看全文，線頂聽錄音~）

按咱閩南的風俗，正月初二是「囝婿日」，泉州所在，嘛有叫做「查某仔日」。嫁出去的查某囝攏噯（chhōa）著尪婿佮囝兒，倒轉去外家，共（kā）父母拜年，hām兄弟姊妹相見面，一家伙仔團圓，鬧熱滾滾。儂講 查某仔伴門戶——鬧熱，精實有影；嘛有講，「惜花連枝愛，丈姆婆仔疼囝婿」，做儂的囝婿，也著去互丈姆婆仔挲頭殼，互汝（bōe）免得。
　　
呣知是啥物朝代，叨一个時陣，有一家伙仔儂，厝裡三个查某囝攏嫁出去囉，阿大的嫁一个讀冊儂；第二的嫁著賣魚的；煞尾仔第一歹字運，去嫁著一个扛棺材的悾戇囝（khong-gōng-kiáⁿ）。大囝婿有學問，看起第二囝婿佮第三囝婿，嫌呣捌字、土公氣（khùi）。第二囝婿有錢，嫌大囝婿窮赤（kêng-chhiah）兼凍霜，嫌 細漢囝婿 戇 佫 倯（gōng koh sông）。第三囝婿虽然是半（khám），做儂也忠直、古意，呣敢嫌東嫌西，咔認戇。

即年的新正時，三對查某仔囝婿相招beh轉去後頭厝拜年。第三查某囝，驚講 尪婿 憨憨戇戇（am-am gōng-gōng），頭一擺 倒去 做 新囝婿，曉 禮數 互儂 愛笑，所以，未轉去進前，著專工去倩（chhiàⁿ）鄉里的私塾仔先生來beh kā伊調教調教、點督點督（tiám-tuh）咧。

私塾仔先生就叫即个戇囝婿仔做陣出門去，那行 那看光景 那講 一寡「之乎者也、子曰詩云」的話，互即个戇囝婿是聽kah 霧sah-sah 佫 茹匆匆（jû-chhiáng-chhiáng），記無kah半句。私塾先生佮戇囝婿兩儂行來遘鄉里外的橋仔頭，看見橋仔骹hia，有閘一排水閘，水chio̍h-chio̍h-á按閘頂流過去，半爿清清，半爿醪醪（lô-lô）。私塾先生就搖頭捻鬚，唸一句講：「水聲淙淙，水色不同。」哪知一下搖頭，頭殼的 hit頂 四角帽仔 soah去勾著橋邊的觀音竹。儂講「老戲旦跋倒 也是詼（khoe）」，私塾先生趁勢又佫唸一句講：「竹枝竹枝，何必來相欺。」戇囝婿聽即兩句，咔好記，「水聲淙淙，水色不同……竹枝竹枝，何必來相欺」……相連sòa唸咧誠十遍，硬死kā記咧腹肚裡。倒去了後，私塾先生又佫kā戇囝婿查某儂 叫去邊頭，放步放步，交代交代，講是傳授妙計，互伊會當放心尪婿，雙雙轉去外家。
　　
正月初二即日，一透早，查某仔囝婿，雙雙對對，攏全遘位。丈儂丈姆就發落一塊桌，請囝婿食酒。即个第三查某囝，就按照私塾先生教的撇步，按戇囝婿正骹（chiàⁿ-kha）骹骨的，kā 縛一條油麻索仔，牽入去裡面，叫戇囡婿坐好勢，交代講：食桌的時陣，索仔nā揪（giú）一下，chiah-thang 伸箸去挾（ngeh）一下；無揪 呣通 挾，咔 互儂講「歹款」。也莫怪（bo̍h-koài）得 第三查某囝kā 戇囝婿 限 hiah死啦，soah呣知影 戇囝婿平常時扛棺材，攏嘛 安呢 大海碗 托（thuh）一塊，四界（sì-kòe）踞咧（khû--leh），著 做伊 大喙窒（chiⁿ）、細喙塞（that），食kah 碗礓 扳輦覆（péng-lìn-phak）。是講，平時攏是徛咧食 慣勢囉，ah 坐咧 soah 曉通食，磕 著（kha̍p-bōe-tio̍h），骹 著beh 蹺（khiau）起來，食著親像ná虎狼。Taⁿ 私塾仔先生教即步，真正巧妙，有夠讚。戇囝婿佮儂坐咧做一桌食，坐kah四四正正，佫食kah真斯文。逐个 攏 呣知 下底 咧 搬嘉儡、弄猴戲。
　　
大囝婿有讀冊，咔會曉禮貌，就kā丈儂爸thîn一杯紹興酒，家己thîn一杯狀元紅，順sòa佫kā兩个細漢同門的，一儂thîn一杯高梁。第二囝婿趕緊徛起來答禮，講：「阿兄阿兄，不敢當，不敢當！」iah戇囝婿本然著曉佮儂講客氣話，伊想著頂日私塾先生teh唸的話，對喙就講：「水聲淙淙，水色不同」。「水」佮「酒」共聲共聲，逐个無疑悟，攏聽做是「酒聲淙淙，酒色不同」。各儂聽戇囝婿安呢講，有影呢，也有黃色的紹興，也有紅色的狀元紅，佫有白色的高梁，各種色緻著有影「不同」，iah thîm落去杯仔底 嘛精實「酒聲淙淙」。逐个攏掠戇囝婿金金相，是 底噹時 變kah chiah有學問 哩啊？
　　
來講即个老丈儂，平常時 死死六工尺，豆干配菜脯，雖然是正月正時，出桌也是粗飽路，米粉芋，雞卷豆油醋。眾儂食beh規晡久，真無簡單chiah出一盤鯧仔魚。鯧魚是好料物，儂講「鯧鼻鮫鰳（ka-la̍h）目，鰻頭魴魚尾」，chia攏算是「一粒一」的海味。賣魚的囝婿算講「滯巷仔裡的」——裡行的（內行的）to̍h tio̍h啦（就是囉），伊相著鯧魚仔鼻，箸伸去，按算著beh挾起來孝敬即个老丈儂。即个時陣，戇囝婿縛佇骹骨hit條索仔，拄好搐（tiuh）一下，伊嘛趕緊箸伸出去，不料soah佮第二囝婿的箸對架（tùi-kê）。第二囝婿歹勢歹勢，箸趕緊勼倒轉；iah戇囝婿想講拄仔家己講hit句「詩」，逐个攏呵咾（o-ló） kah，就緊狂beh kā私塾先生教的第二句話唸互了，choăn做伊唸講：「竹枝竹枝，何必來相欺」。即siaⁿ 逐个攏總戇去（gāng--khì），就一儂一句，呵咾即个戇囝婿有影「巧」，佫講話。憨囝婿看眾儂呵咾伊，oân-á 趁儂 笑kah 咿嗚叫。
　　
大囝婿是讀冊儂，平時文章規斗籠（táu-láng），一時beh用 茹匆匆（jû-chháng-chháng），無儂呵咾伊，腹裡咧激氣，存辦beh 佮即个戇囝婿比一下仔高低（kē），見一下仔輸贏。就講，有酒無詩盡興，無詩也著行酒令。老丈儂燒酒啉落腹，興頭一下攑（giâ）起來，就 tòe喙 讚聲 講：「著！今日新春聚會，就以春字開頭，一儂說一句。」大囝婿講：「我大的，我先來。嗯哼…『春遊芳草地』……煞。」Iah 咱講有一條詩唸做「春遊芳草地，夏賞綠荷池。秋飲黃花酒，冬吟白雪詩。」即四句，佇當當時（tng-tang-sî）來講，會使講真正普通，nā 小可 有 讀著 漢學仔 的 儂，透底攏嘛會曉唸。不而過，即家口儂，有讀冊的在本無幾个，soah攏呵咾大囝婿，咔講嘛著讀冊儂，講伊詩文滿腹裡，出喙是文章。

Sòa落來輪著第二的。第二的賣魚，規日bak臭臊（chhàu-chho），哪有啥碗糕詩文通好來唸出喙？不而過，畢竟是生理儂，頭殼咔轉彎，伊choăn講一句：「春鮸冬鮫鰳」。即句算講閩南俗語啦，意思是講，春天著食鮸魚，寒天著食鮫鰳魚，安呢chiah有著時陣。即句俗語話，nā beh唸咔 chiâu-chn̂g 的，是號做「春鮸冬鮫鰳，春鱘冬毛蟹」。Ah…第二囝婿講即句，oân-á 算講 hàm-hàm啦。安呢，大的、二的，拄好 拍平過，無輸贏。

第三的扛棺材，規年thàng天 攏全 佮 死儂 咧 舞直，頭殼不時著悾悾。伊佮私塾先生學兩句已經用了了啊，beh佫叫伊講，真正比死咔慘。伊佇hia 咿咿嗚嗚，躇（thû）一晡，講無半字 儂聽有的。尾仔，真正逼kah無法度囉，想著家己普通時咧扛死儂，心裡雄雄有主意，choăn 喙仔掰開，吐一句：「春…春…春……啊 chhun骹 目khoeh去 嗚！」逐个笑一下險半死，喙裡的酒菜 做一下 攏 霧霧 出來。戇囝婿看儂笑kah 歪戈chhi̍h-chhoa̍h，當做講儂是咧呵咾伊，soah也趁儂笑kah 搭椅搭桌，戽骹戽手。
　　
老丈儂看即个第三囝婿 漏氣 兼 出倯（chhut-sông），笑kah一塊油蔥排骨強beh夾tiâu，soah落落（lak-lak）落去桌骹咧。即時，戶橂（hō·-tēng）邊仔兩隻狗，緊緊緝（chip）倚來，相爭搶排骨，佇hia 咿咿嗷嗷，滾來佮滾去。狗骹 無張弛soah去硩（teh）著戇囝婿骹骨hit條油麻索，捷捷（chia̍p-chia̍p）安呢 搐咧搐咧。戇囝婿呣知空，想講是某看伊顧笑無顧食，teh叫伊著趕緊加塞（that）兩喙仔，就緊kā箸佫攑起來，連捷（liâm-chia̍p）夾、猛猛窒（mé-mé chiⁿ），塞kah規喙實捅捅（cha̍t-thóng-thóng），輸 咧食救本的。
　　
咱 故事 著 講遘 即搭 煞，戇囝婿倒去了後，會互某安怎kā治，安怎揉死（jê--sì），he是尪仔某中間的代誌，咱呣知影，呣敢七講八講。


p.s. 即个故事是根據《中华. 闽南文化网》——泉州講古《憨囝婿》改寫的。

（看全文，線頂聽錄音~）

——照泉州閩南（語）文——《查嫫仔賊（Cha-bó·-á Chha̍t）》改寫

咱做父母的儂，對囝兒，逐个攏真心致意，十囝十惜，疼命命。現時政府kan-na允准生一个，父母疼，阿公阿嬤疼，外家公外家嬤嘛疼……真正是「六个大儂扛一个囡仔，疼kah呣捌寶」。即陣的囡仔嬰，自細漢著安呢誠kā寵恿（théng-sēng），nā生著cha-bó·--ê，是可比小公主；iah-nā生著 cha-po·--ê是可比小皇帝。事實，囡仔呣好傷寵恿，儂講「恿囝不孝，恿豬攑灶」，真儕囡仔攏是自細漢無ka-tiuⁿ，無雕啄，大漢了後往往著變款變相，對父母不孝，忤逆（ngó·-ge̍k） 序大儂，事事顧家己，自私佫gâu激行。嘛有hit-lō做儂查某囝的，未嫁存私心，「食父穿母」，趁錢家己用；嫁了後，後頭厝nā 窮赤（kêng-chhiah），一骹tah（kha-tah）著無行骹遘；反倒轉，後頭nā 古意、好額，著品嫁妝，張（tiuⁿ）呣嫁，「一哭二鬧三吊脰」，橫直「無糖（kô）kah 有 秫米」，舞kah伊歡喜甘願，chiah beh上花轎。所以，儂定定咧講「嫁查某囝，咔慘著賊偷」。呣nā安呢niā，嫁了猶佫煞得，三日兩日 轉來挖（iah）外家，錢也好，物也好，苦得將規厝裡的家伙攏總搬搬、款款轉去。儂講「查某囝賊」，著是咧講即款的。當然，即陣時代無（siâng）囉，男女平等，平平攏有繼承權，嘛咔有以早hit款的見笑代來咧發生。不而過，雖然講即陣的社會有比往早咔文明，總是，囡仔nā無自細漢教示，實在來講，是害呣是愛。

　佇清朝的時陣，晉江 海骹（注：海墘／沿海）有一个儂，姓「陳」名號做「孤」，厝裡窮赤，歲頭食遘四十外仔外，猶佫佇咧海船頂hông倩（chhiàⁿ）短工teh拖老命，真正「散kah鬼掠去」。儂講「行船走馬 無三分命」，誠危險，不但會沉船落馬，佫定定愛去拄著hit-lō強摃贼，有時無張弛，連性命嘛烏有去。儂講「儂nā衰，放屁彈死雞」，陳孤伊是互船主倩工，有一擺伊真正去拄著海賊，連船hām儂，做一下摳摳（khau）去。Chhōa頭的，是即搭 四箍lìn-tńg 出名 的海賊王——蔡騫（Chhòa khian）。即个儂聽講是有夠橫惡，刣儂輸刣雞仔。蔡騫 的 下骹手儂 將 船頂的貨物攏搶搶去，佫kā陳孤佮船主一陣儂縛縛去見蔡騫。陳孤想講即擺穩死無救，想著家己猶佫有一个查某囝，雖罔是嫁儂囉，總是放落心。想咧想咧，choăn soah 吐一口大氣，哼（haiⁿ）講：「孤仔孤仔，汝命哪會chiah歹！」

　來講即个蔡骞，有一个老某仔，姓陳，oân-á 是晉江儂，十捅歲著互蔡騫即个夭壽仔kā掠來做某，幾nā十年攏無佮厝裡的親儂見著面，kan-na 瞭解講 父母兄弟攏總過身去囉，獨獨猶佫chhun 一个 孫仔（侄仔） 活佇即个世間。陳厝姑 伊tòe蔡騫坫（tiàm）海頂浪蕩數十年，攏無儂通做伴講話，暝日咔想也是厝裡底的親儂。伊雄雄聽見船肚（chûn-tō· ）裡有儂咧叫「姑啊、姑啊」，佫講「汝哪會chiah歹命」，伊soah nā准 hit-ê儂是咧叫伊。趕緊走出來一下看，看見陳孤的面模有淡薄佮家己的兄弟相親像，一下問 佫是siâng姓陳，講話又佫晉江腔。即siaⁿ佫咔無懷疑，陳厝姑choăn soah認即个陳孤講是孫仔（侄仔）。陳孤知影老阿婆認呣著儂，choăn將錯就錯，佮伊戇戇（gōng-gōng）認，性命咔要緊。（呣認，著無咧戇咯！）蔡騫聽著講老某仔認著一个外家侄仔，就叫伊來相見，發落（hoa̍t-lo̍h）款酒桌請伊。Hiah-ê賊頭土匪兵，逐个攏來kā會失禮，敬燒酒。蔡騫ko·-chiâⁿ 陳孤留落來佮伊做夥「拍拼」，陳孤siàu-liām家己的查某囝，講伊beh轉厝，呣做海賊。蔡騫無伊法，只好吩咐（hoan-hù）下骹手儂，kā頂日 劫官船搶來的一船載 鹹鮭（kiâm-kôe / kiâm-kê）透底送伊陳孤，佫互一支令旗，講日後行船，有即支令旗，佇海頂著無儂敢擋路（tòng-lō·），無儂敢kā伊安怎。

　魚蝦nā sīⁿ 鹽，號做「鹹鮭」，這算講散兇儂chiah有咧食的，iah-nā有錢儂是無咧食即款粗俗物啦。蔡騫佇海頂，哪著煩惱無大魚大蝦通食咧？Nā劫著官船，伊攏嘛搶 hit-lō 金銀財寶、珍珠瑪瑙、soān石（鑽石）佮水查某，汰討（thài-thó）beh ti̍h 粗俗的鹹鮭？所以，hiah 幾nā十甕的鹹鮭，伊本然是按算講beh kā tàn落去thiām海，taⁿ 換摕來送伊陳孤，算講是做一个人情，順sòa無加工，橫直囥咧身軀邊也食得，iah嘛無才調孝孤（hàu-ko·）。Ah陳厝姑，伊從（chêng）互夭壽蔡騫掠來做某，幾十年來坫佇海頂，錢銀咔儕也無路用，所以身邊空空，一時 也 無啥 好物 通（thang）送 伊 即个 拄才 相認，又佫隨beh分開的「孫仔」（「侄仔」）。

陳孤落難無死，即條命算抾（khioh）的。鹹鮭載倒來了後，代先著去探查某囝。想講也無啥伴手（phoāⁿ-chhiú）通互查某囝，choăn擔兩甕鹹鮭去相送，將情況講講互查某囝佮囝婿聽。

　老父有想查某囝，查某囝soah無管汰老爸是死抑是活。儂講，「尪、囝nā好勢，管後頭去絕（che̍h）」。陳孤查某囝看著老父擔兩甕鹹鮭來，soah抿喙抿舌，無歡無喜，也無煮點心，也無留老父食日晝。陳孤看查某囝「冷水仔燙蜇（thē）」，家己oân-á感覺無意無意，坐無一tiap久仔，就做伊轉去囉。陳孤轉去了後，查某囝 想講 普通時仔 厝邊頭尾 攏嘛 安呢「三雙來六塊（tè）去」，今日「抾」著即兩甕鹹鮭，家己是 穩當 食煞了，不如 khat 淡薄來去分厝邊兜……Choăn 斡（oat）入去灶骹（chàu-kha）捎（sa）一塊破碗礓出來。鹹鮭甕掀開，一下挖（iah）落去，咦？哪會挖得落去？按頂面佫kā搦搦（jio̍h）hiau-hiau 咧，頂面薄薄一重（têng）鹹鮭niā，下底浮出來的物件，是安怎哪會khok-khok，佫白皙皙（pe̍h-siak-siak）？斟酌看咧，阿娘喂！規甕 soah 攏全 白銀 哩！陳孤查某囝看一下險險大心氣，又佫驚，又佫歡喜，心肝頭吡噗筅（phi̍h-pho̍k-chháiⁿ），骹手肉ka̍uh-ka̍uh-chhoah，一塊碗公soah落落去（lak-lo̍h-khì）土骹底，鏘喨（khiang-liang）一聲，必做兩爿。伊趕緊佫kā另外hit甕撬開，oân-á saⁿ-sâng saⁿ-sâng （相共相共），頂面 鹹鮭 下底 囥 白銀。

　陳孤查某囝，趕緊喝（hoah）尪婿來參詳，攏ioh（猜）講老父定著是得著hit-ê老賊婆仔的大注（tōa-tù）錢銀，遘即陣猶佫呣知影，無彩 珍珠互伊當做鳥鼠仔屎。「一儂智，呣值兩儂議」，尪仔某兩个抾和（khioh-hô），相合（saⁿ-kap）思量（su-niû），決定趁即陣老父猶呣知空（chai-khang），冗早（liōng-chá）設法來去全部kā伊賺食（choán-chia̍h）轉來！

　陳孤查某囝、囝婿，choăn 假介紹一个魚販（hî-hoàn）去kā陳孤 貿（ba̍uh）hit幾十甕鹹鮭。陳孤拄咧苦講 hiah儕鹹鮭，也飼咧豬，也飼咧貓，beh銷 佫銷離……看見有儂講beh來貿，趕緊beh kā俗俗賣、減價削削咧。買賣雙方，現講現成。假魚販仔叫儂將鹹鮭，一甕一甕，扛扛出來深井咧，準備beh倩車載轉去。儂儕插雜，陳家 厝裡底 一時 咬咬滾、嘩嘩叫，驚kah狗吠、雞飛、鳥四散。陳厝 自底 著有 飼一隻老豬母，即siaⁿ 著青驚，起狂出來，無疑悟soah 來犁倒一甕鹹鮭。甕挵破，裡面的白銀四散去，掖kah規深井 滿滿是。陳孤看一下戇去（gāng--khì），假魚販仔嘛做一下戇去。Chiah知影講陳孤查某仔佮囝婿用即步，實在是雄佫無天良。陳孤看即款勢面，趕緊喝（hoah）講：「我賣鹹鮭，無賣白銀！」

　路尾，儂chiah瞭解著chiah-ê白銀的來路。原底是一个食錢官，想beh將伊做官所摳剝（khau-pak）的錢財用船載轉去鄉里，無疑悟，「賊劫賊，鎖管仔劫墨賊」，注定伊beh衰運，船遘半路，「銃籽拍著肚臍空」，注死呣死，去拄著大海賊蔡騫，真正有影「去（khì）講去（khù）啊」，規船載的物件，攏總互蔡騫搶kah空空無半項。當初時，hit-ê食錢官為著beh運即條偏財，驚儂知，只好kā囥佇鹹鮭甕咧，chiah搬落船。銀重，鹹鮭嘛重，儂攏無疑悟，連蔡騫chiah-ê海賊也攏無發現。陳孤得著即筆橫財，變大富翁，原底hiah-ê 破厝桶仔 滯落去囉，自安呢 新起五落大厝，佫造九十九隻大船，做大生理。因為手頭有當初時海賊王蔡騫互伊的令旗，陳孤咧行船，在來攏嘛直來直去，出入平安，無掠無閘，無風無湧。伊的生理愈做愈旺，愈做愈大，錢銀thàng海。陳孤自安呢佮hit-ê 查某囝「攑石頭斷路」，各儂無來去，「田無溝，水無流」。尾仔，陳孤佫再娶某生囝，栽陪囝兒讀冊做官，有錢有勢，紅炎幾落代。

　來講Hit隻老豬母，因為挵破鹹鮭甕，算講替主儂立大功，陳孤choăn 共伊起一間足嫷足chhiaⁿ-iāⁿ的猪椆互伊滞。聽講陳孤起hit間豬椆，oân-á開重本，有鋪花磚，佫有 格 花（kek hoe-thang）。為著即隻老豬母，陳孤專工倩兩个奴才，規工kā 顧tiâu-tiâu，豬母行遘叨，儂tòe遘叨；食飽睏，睏飽食，豬母比祖嬤咔好命。老豬母死後，戴鳳冠，穿霞帔（hê-phi），挂金耳墜，落全成板（chn̂g-siâⁿ-pán：棺材），佫請師公、和尚，做七七四十九日的大功德。出山的時陣，陳孤發落規家口仔大細，來拔（pu̍ih / pe̍h）龍鬚，佫超持用紅毛灰，倩儂做一个真大、真派頭的風水。聽講hit-ê風水佫比普通儂的風水咔大，儂攏kā號做「豬母墓」。

　即个故事，嘛有儂kā叫做「豬母犁倒鹹鮭甕」，講的儂呣是陳孤，是叫做周仰（Chiu Gióng），oân-á 是做生理儂。伊發覺「查某囝賊」，咒chōa講周家beh飼豬母，永世也呣飼查某囝。


p.s.即篇文章，是按《泉州人民广播电台听友互动BBS论坛》登出來的作品《查嫫仔賊》做梆模chiah落去改寫的。原作《查嫫仔賊》用在地的泉州腔，篇幅略仔有咔短淡薄。改寫是用廈台腔（本文），篇幅嘛有小可仔增加。