鹭水芗南－闽南语部落-在地料理 http://blog.roodo.com/limkianhui/archives/cat_108045.html      -[網站簡介]有狀元學生,無狀元先生。@世間,我佮汝……留話簿仔||學閩南語||笑詼譀古||龜挪鱉趖||在地歌詩||在地料理||言語文字||文化民俗||外國童話（闽南语版）||白話字正字法母語消息||講經説道||廈語文音||古册古典||時事開講||技能技巧||闽南俗語||闽南漢字||泉州講古||閩南歌謠||聽歌學閩南語 zh-tw Roodo Blog System All Rights Reserved 我恁父！！汝三八！（508-238） 汝三八啦，我恁父啦（2386 5086）……

火車漸漸teh起行，再會，我的故鄉佮親情。 心愛的父母再會吧，鬥陣的朋友告辭啦……
廈門開西安，編號0806449-305（恁父啉尿嗍嗍叫——駛恁母！）的火車頂。

一个 chhēng插 襒扎，面肉 幼秀，二八青春 的 諸姥囡仔嬰。伊 是 乘務員。
一个 破衫 疊（tha̍h） 破褲，無 chhēng 裡底褲，佫bái 佫老，中年的 諸夫（cha-po·）。聽講 伊 是農民工。

「喂喂喂，汝kā 我擋咧！」、「佫走、佫走……」
……
　　
「乜代kā我掠tiâu-tiâu？我是有犯法hiō·？」

「有犯法無犯法，恁兜的代誌啦。Ah呣佫hò·ⁿ，阮即mái咧『查票』啦。『查……票』，安呢聽有無？！歹勢，票摕出來我看māi。」

「Hò·ⁿ……查票哦。我…我，汝小等咧，我隨互汝看。」
　
七iam八iam，東jîm西jîm；頂懸抄（chhiau）了，抄下骹；尻川摸無，摸膦脬；規身搓（so）thàng-thàng，chhōe 無 kah 半个死儂。　

「Chhōe著啊！chhōe著啊！佇chia，佇chia……」哭夭，票 tēⁿ 咧 手兮。

「嚶，汝這啥物票啊？汝大儂neh！佮我來即套……像汝即款的hò·ⁿ，我拄過幾落千擺啊啦。」　　

「我、我……」

「汝啥物汝！佫諍……明明 著 看汝 大儂大嬸、好骹好手，汝kā 我 拆chit-lō囡仔票， 想講 安呢 著卜 『圍烏閃疏』准拄煞啊 呣？……無啊，Ah汝 呣捌『二』（字），嘛 著噯 捌『三』……真正 tìⁿ 痟兮……」

「我……無啦…Ah 這 囡仔票，敢呣是chhām hit-lō 殘障票 共款價數？」

「Ah無借問一下，汝是叨位咧『殘障』hâⁿ ？Ah汝有『殘疾證』無？摕出來我看māi咧。」

「我無證件啦……我拆票hit陣，賣票兮噯我kā殘障證iam互伊看，我著是無，呣才會去買著即張囡仔票。」

「嗤……著無咧笑死儂咯！無證，汝憑啥物會當證明講汝是一个破相的儂？」

中年儂無做聲，勻勻仔àⁿ 落去 kā 倒骹 的 破布鞋仔 褪掉，順紲 佫 kā 褲骹 略仔 giú 咔懸淡薄。阿娘喂！即支骹kan-na 半个骹盤niā。　　

「好啦！我也無叫汝褪衫褪褲啦！我kā汝講，我卜ti̍h的是證件！中華人民共和國殘疾人聯合會有kàm鐵印的證件！安呢汝聽有無？」

「我嘛呣是超工無卜摕互汝看，ah著有影 無。In講我呣是在地戶口，呣kā我辦。阮chit-lō庄骹儂，呣捌見過勢面，呣知影一箍芋仔番薯，當初戇戇互儂倩做粗重的，啥知影tòe呣著頭家，出代誌了後，kā我tàn咧，儂做伊落跑……我啥物攏無得著，kan-taⁿ 趁即支骹，佫無錢通去醫館檢查做鑒定……」

列車長聽聲，行過來。

中年儂佫一擺將情況講互列車長聽。講家己是一个破相兮，姑衷無奈 才去買著一張hām殘障票平價錢的囡仔票……
　　
「嗯。Nā安呢，汝 殘障證 咧？」

中年儂講伊無殘障證明，局不局 佫再 褪鞋、襒褲骹，kā 半tn̂g骹盤 伸出來互伊看。

「Ah好啊好啊好啊……汝kā我聽互清楚，阮kan-na認證件無咧認儂！有殘障證，汝著是殘疾人，若無，汝著是一个正常儂！正常儂，汝著噯補票！安呢聽有啊hò·ⁿ ？！」
　　
「恁父聽無！汝咧講啥siô，恁父聽無！」噹時仔是邊頭一个閒儂teh掠狂。

「喂，喂，ah無 汝是叨位來的 青仔叢 hàⁿ ？」乘務員小姐雖然看著súi-súi，性地 是有夠 土公。

「恁父路見不平，氣死閒儂，安呢 bē使 hiō· ？」
　　
「即位先生，歹勢啦，我列車長，有啥物代誌小等 咱ta̍uh-ta̍uh-á才來會，安呢好無？」

「恁父bē-giàn啦！恁父著是卜講！我chhap-siâu汝 車長 抑 校長，我問汝，汝是呣是諸夫儂？」

「我當然嘛是諸夫儂。」

「汝憑啥物講汝是諸夫儂？汝有啥物證據無？」

哈，哈，哈，哈……四箍螺仔 的 閒儂 kho̍k-kho̍k 笑……列車長 雄雄 soah 戇一下。
　
「這……我一个堂堂男子漢，徛佇chia，敢會假呣？」
　　
「無nò·！我佮恁共款，kan-na認證據無咧認儂。有『男子證』著是諸夫儂；無證，著呣是諸夫儂！」
　　
列車長一時soah啞口（é-káu），chhāi佇hia，面仔liâm-mi 紅、liâm-mi青。
　　
「我呣是諸夫儂，汝 若卜 唱聲，做汝對我來好啦！」乘務員小姐 趕緊 倚來 佔。
　　
「汝？笑破阿嬤的喙！汝敢是儂？」
　　
「無汝即mái是咧講啥？」　

「恁父講汝『呣是儂』啦，ah汝是無讀冊、呣捌字，『普通話』bē曉 聽 hiō· ？」

「汝 上好 喙 kā 我漉咔清氣的！恁祖嬤呣是儂，無是啥？」

「5086-238！（我恁父啦，汝三八！） ……痟諸姥，汝講汝是儂，有證明無？摕出來我看māi。」
　　　
哈哈哈……邊頭的閒儂佫再大聲笑起來。
　　
Kan-na 一个儂無笑，著是hit-ê 散赤的中年儂。伊tiām-tiām 徛佇hia，聽 in 咧póe-hōe，目屎含目墘，呣知是感激、委屈，抑是怨恨！

ps. 本故事純粹是譀的，是根据網路頂懸咧流傳的華文短篇《火车上的遭遇！！！ 深思》來改編的。原作者呣知啥儂，是limkianhui我改編做閩南文。改編後的小文，所産生的責任，某儂我願意來擔。 ]]> http://blog.roodo.com/limkianhui/archives/1249736.html http://blog.roodo.com/limkianhui/archives/1249736.html 在地料理 Mon, 13 Mar 2006 12:58:27 +0800 用笑容面對生活 看全文，線頂聽錄音~）

一个儂的面部表情，有時比伊的穿插（chhēng-chhah）咔重要。笑容會當感染著咱身軀邊的儂，親像日頭光 鑽過厚thut-thut 的烏雲，溫暖著每一个儂。
今仔日，咱beh來介紹的即个故事，主角 號做 倪清遠（Gê Chheng-oán），是一个四十捅歲的查甫儂。倪先生結婚beh二十年囉，chiah 儕年來，熟似伊的儂，攏講伊是一个孤倔（ko·-khu̍t）又佫 閉思（pì-sù）的儂。倪先生自底是北頂儂，大學畢業了後，通過儂介紹，熟似著伊的家後，無偌久了後，兩个儂著結成連理囉。Hit當時，猶佫徛佇北京，路尾，是因為工作的關係，規家口仔chiah搬搬來廈門tòa。二三十年來，倪先生攏罕得佮牽手兮坐落來練仙、開講，佫咔是呣捌滾笑，兩个儂一工遘暗，攏講無三句話。的家庭生活，不時著互儂感覺加真鬱悶。

最近即暫仔，倪先生決定beh來改變即个呣好的狀況。有一工透早，伊起來洗頭面。伊按鏡裡看著家己hit支冷冰冰、全無笑容的面腔（bīn-chhiuⁿ），伊choăⁿ 對著家己講：「遠仔遠仔，無論如何，汝今仔日一定噯kā汝即支慪臭面（àu-chhàu-bīn）展開（thián--khui），摕出汝的笑容，對即陣開始，汝噯做一个快樂 佫 隨和的儂。」坐落來食早頓的時陣，伊的面，已經有帶輕鬆的笑容，伊主動佮太太相借問：「太太，早！」

太太呣知是gông-ngia̍h一下，抑是傷過感動，一時soah戇去（gāng--khì），汝會當kā想看咧，hit-ê時陣伊是lōa-n̄ī-á歡喜。倪先生又佫kā太太講，以後咱厝，逐工攏會像今仔日chiah-nī輕鬆佮快樂。此去，即个家庭的氣氛，自安呢發生了大變化。

現子時，倪先生每一工去公司上班，拄著樓骹hit-ê顧電梯兮，著會向對方眯眯仔笑，kā伊講「早」；伊nā去櫃臺換錢的時，對著裡底的夥計（hóe-kì），伊嘛是面帶笑容。伊佇咧交易所佮儂交關，對著hiah-ê呣捌見過面的生份儂，伊oân-á保持著輕鬆又佫眯眯仔笑的面腔。

無偌久了後，伊嘛發現講，逐个儂佮伊相拄面的時陣，oân-á會笑笑佮伊相借問。對hiah-ê來向伊訴苦的儂，伊總是用一款關懷又佫致重，又佫輕鬆的氣氛佮交陪、接接（chih-chiap）。Iah事實有真儕代誌著是佇咧即款輕鬆的氣氛之下，自安呢化解了了。笑容，的確有影為倪先生帶來儕儕的機會佮財富。

倪先生自早著有倩（chhiàⁿ）一个中人（tiong-lâng）teh替伊做一寡雜項khang-khòe。這是一个誠古錐、誠活潑的少年家。即个少年家ta̍uh-ta̍uh-á對倪先生有好的印象，伊佮倪先的對話，嘛比往早時加誠儕。有一擺 中晝（tiong-tàu）落班，兩儂佇咧辦公廳兮話仙，倪先生對即个少年家講起家己最近即暫的成就，講kah真正歡喜、喙笑目笑。伊講家己會成功，除去骨力拍拼以外，完全是因為家己有好的「人際關係」。Hit-ê少年儂choăⁿ kā伊講，拄拄來chia上班的時陣，就掠准倪先生穩是一个性地暴燥（po̍k-sò）的儂。Ah呣佫，最近即暫，伊發現講，代誌佮想的完全攏無共款。伊呵咾（o-ló）倪先生的笑容，互儂感覺足有人情味的。

當然，倪先生嘛已經改掉自底愛摳削（khau-siah）別儂的歹習慣，伊總是將批評的話含（kâm）落腹，換做對儂的鼓勵、肯定佮建議。伊呣捌佫對儂講，伊想beh安怎、beh ti̍h啥，顛倒是儘量去適應佮接受別儂的觀點。伊的工作佮生活，變kah chhām以早完全攏無共款，伊的家庭嘛充滿著幸福佮和諧。
議論：咱講，笑容會當改變咱本身的面貌，互咱無論行遘叨位，著會受著歡迎佮接納。咱儂nā咧笑的時陣，精神狀態上kài放鬆，心理狀態嘛加誠穩定；善意的笑容，會當互對方感覺著咱的親切佮友好，咱歡喜，對方嘛歡喜，iah咱著當得著佫咔儕的友誼佮快樂。
咱即个故事就講遘chia，暫告一个段落。今仔日是二OO六的一月一日，也著是咱儂所講的「番仔正」，各位鄉親序大，各位天涯海角的朋友，伫咧新的一年開始的時陣，我beh佇咧chia，祝願逐个：合家平安趁大錢；身體健康食百二，年年富貴，萬事如意。

聽聲，請用下底的播放器：→↓

]]> http://blog.roodo.com/limkianhui/archives/942760.html http://blog.roodo.com/limkianhui/archives/942760.html 在地料理 Sun, 01 Jan 2006 14:14:50 +0800 珍惜汝的愛情 看全文，線頂聽錄音~）

愛，是雙方面的代誌，呣是單方面的付出。愛情，需要用心去栽培佮疼惜，設使kan-na想beh享受愛情的甘甜，呣情願去付出、去回報，安呢，愛情的火，咔旺嘛會hoa去。
有一个當咧悲傷的查某囡仔，去拜訪莎士比亞。

「莎士比亞先生，汝寫過hiah儕美妙又佫感動儂的愛情故事，即陣，我有一層代誌想beh請教汝，是佮我的愛情有治代，望汝會當共（kā）我鬭相共（tàu-saⁿ-kāng）。」

「噢，我可憐的囡仔，是啥代誌咧？」莎士比亞對伊真正關心，鼓勵伊講出來聽看（khoàⁿ-māi）咧。

即个少年查某囡仔停一tiap久仔，傷心來講出著互儂心碎的話：「我愛伊，iah呣佫，伊……伊真緊著beh離開我囉。」

「可憐的囡仔，汝對頭沓沓仔（ta̍uh-ta̍uh-á）講互我聽，敢好？」

「阮兩个相愛，已經真久真久囉。伊是hiah-nī-á愛我。伊用著滿腹的熱情，逐工送花表示伊對我的愛。每工透早，伊著會送我一束又佫芳，又佫嫷的花；每一个暗暝，伊攏會為我唱一條好聽又佫感動儂的情歌。」

「安呢誠好啊！」莎士比亞 tìm頭 呵咾（o-ló）。

「Iah 呣佫……iah 呣佫 最近一月捅日，伊有噹時仔 幾落工 chiah送一束花，有時根本著無愛佫唱歌互我聽！逐擺花nā送來了後，伊著緊狂beh越頭做伊倒轉去囉。」

「咦？Ah是叨位仔出問題咧？是講，伊愛汝愛kah chiah-nī-á辛苦，為汝做chiah-nī儕的代誌，ah汝有對伊表示過啥物無？伊敢瞭解汝oân-á 有咧愛伊？」

「我心裡只愛伊一个，我當無伊。Ah呣佫，我從來呣捌共（kā）我的愛表達互伊知，佇伊面頭前，我攏 kek kah真平靜，我一直咧掩崁（am-khàm）我對伊的愛慕。即陣，我感覺伊對我的熱情soah開始咧減退，我足驚的，我驚講有一工，我會失去伊。先生，我拜託汝共（kā）我講，我應該安怎做chiah好？」

莎士比亞聽即个查某囡仔講煞，soah按厝裡底攑（gia̍h）一盏（chi̍t-choáⁿ）燈仔火出來，先共（kā）添淡薄土油，了後chiah共（kā）添伊點互著（to̍h）。

「這是啥？」查某囡仔問伊。

「燈仔火咯。」

「汝乜代（mih-tāi）點燈仔火？」

「咱攏tiām-tiām，據在伊著（to̍h），看會當著（to̍h）偌久。」莎士比亞叫hit-ê查某囡仔暫時（mài）講話。

火愈來愈旺，火舌伸長長，燈芯頭 著（to̍h） kah 煏煏叫 （piak-piak kiò），一時，滿厝間 chhiō kah 光豔豔。

佫過有--唸咪仔，火舌soah慢慢仔hê落來，燈油那來那少，ná像 強強 beh hoa去 的 款勢。

「啊！噯添油囉！」查某囡仔出聲來「提醒」。

不而過，莎士比亞soah照原「老神在在」，伊共（kā）即个查某囡仔搖手，講呣免管汰伊。自安呢，遘尾仔，燈油攏著（to̍h）了了囉，連燈芯嘛著（to̍h） kah 變成 火灰（hóe-hu）。火熄去囉，kan-na chhun 一chōa 彎彎長長 的 火煙（hóe-ian）浮佇空氣中，liâu-liâu-á 四散去。

即个查某囡仔目睭金金相著空氣的一絲絲仔煙霧，一時soah戇戇（gāng-gāng），呣知beh講啥。

莎士比亞開喙囉，伊講：「愛情，著親像即葩燈仔火，燈芯nā燒kah變火灰了後，燈火自然著會hoa去。Taⁿ 汝應該知影sòa落來，汝著噯安怎做啊 ho· ?」

查某囡仔雄雄有覺悟。伊真正歡喜，應（ìn）講：「我知影啊！我即陣著beh來去共（kā）伊講『我愛伊，我無噯伊離開我』，我beh共（kā）我的愛情燈 添油 添互伊 tīⁿ-tīⁿ-tīⁿ。」

議論：愛情著親像是一葩燈仔火，油nā添有夠飽，骨力添，火定定嘛真旺。假使咱nā無用心看顧，無認真對待，愛情的火，著無法度久久長長直直著（to̍h）落去。愛情是雙方面的代誌，當當（tng-tang）咱咧享受愛人仔對咱的情愛佮關懷的時陣，咱嘛呣通記得越頭去照顧佮疼惜咱的愛人。愛情需要雙方用心經營，用心看顧，不斷共（kā）伊添柴添火，chiah會當愈hiâⁿ愈旺，愈熱（jia̍t），愈久長（kú-tn̂g）。


]]> http://blog.roodo.com/limkianhui/archives/935097.html http://blog.roodo.com/limkianhui/archives/935097.html 在地料理 Fri, 30 Dec 2005 21:49:30 +0800 珍惜咱內在的價值 提供：全文語音檔案下載；看全文，線頂聽录音～）
內在的價值， bē 為著外部環境的變換 soah 來消蝕（ siau-si̍h ）去。金仔著是金仔，永遠嘛 bē 變臭鐵仔。
有一个出名的講演者。有一擺，伊佇咧做講演。伊 ùi lak袋仔裡 iam 出 一張 二十箍銀 的 紙字，問在場的聽眾講：「即張是啥物紙？伊有價值無？」

臺骹有一个儂攑手回答講：「我知影， he 是一張二十箍銀的美鈔，這著是伊的價值。咱會當用即張紙字，佇國裡外的市場頂面換著等值的貨幣。」

講演者聽伊講煞，頭 tìm-tìm 咧，無做聲。伊 soah kā hit 張 紙字摕起來搦（ jio̍k ）， kāi lia̍p-lia̍p 做一丸；了後，伊佫 kā 紙字展開，想 beh kā 捋（ lo̍ah ）互平，呣佫 soah 任捋也捋 bē 平，咔安怎挲(so)， 都（ to ） oân-á jiâu-pe-pe 。講演者 choăⁿ 佫問臺骹的聽眾：「即 mái ，我手頭的即張紙，敢猶有價值？」伊話著猶未講煞，臺骹的儂 著攏大聲 kā 應講「有……」

「真好。安呢 看 pān 勢 是我出手無夠粗殘的款!」講演者笑笑咧，佫 kā hit 張 紙字 ka̍k 落去 土骹兜兮，佫用骹 那 chàm 、那 géng 、那揉（ jôe ）……一直 chhio̍k kah la-sâm-bí-lô 又佫 破糊糊……略仔（lio̍h-á ）徛咔遠咧， soah 認攏 bē 出來。了後，講演者佫問逐个：「即陣，啥物儂會當 kā 我講，即張紙字的價值 chhun 偌儕？」後壁一个小姐徛起來，面仔紅紅， ná 像小可歹勢歹勢，伊講：「我感覺即張破紙字的價值原在，照原 值咧 二十箍。」停一 tiap 久仔，佫補一句講「即張紙字，照原會得買著一件價值二十箍美金的商品。」 iah 即个時陣，在場的儂著開始咧議論啊，逐个攏講 hit 个 小姐儂 講了有道理。

講演者叫逐家安靜落來，伊最後 kā 逐家做一个總結，伊講——朋友啊，咱頭拄仔佮逐个做夥上一堂真正有意義的課。 Hit 張破紙字，雖然有夠破，呣佫在咱看來，伊變化的只是外形， iah nā 內在的價值照原猶佫佇咧；也著是講，無論汝安怎 kā 揉、 kā 淩遲，攏無法度降低伊的價值，伊照原會當滯市場流通，照原是一張價值二十箍銀美金的紙字。

咱儂可比是一張紙字，有咱家己的價值。呣通將咱家己的價值放 bē 記。
議論：假使汝 nā 是「千里馬」，汝著呣免煩惱講汝拄 bē 著「伯樂」。咱儂內在的價值，無應該受著外界環境的影響，咱只 beh 堅持家己的風格，照起工 做咱的頭路，咱的才情早晏（ chá-oàⁿ ）會得著別儂的肯定。呣免怨歎，也呣通 tàm 志，咱 beh 做 著噯 做 hit-lō 有價值的珍珠，呣好做 hit-lō 無路駛（ bô-lō·-sái ）的鳥鼠仔屎。


]]> http://blog.roodo.com/limkianhui/archives/887759.html http://blog.roodo.com/limkianhui/archives/887759.html 在地料理 Tue, 20 Dec 2005 13:14:03 +0800 賜互儂有一个好的名聲 提供：看全文，會通聽錄音，線頂現聽哦～）

顧名聲，咔好顧性命。為著名聲，歹儂有時也會覺悟變好儂。互儂一个好的名聲，等於賜互儂另外一个奮鬥的機會。


吳太太滯佇鼓浪嶼，三工前，伊倩一个女傭，按算beh倩來鬭拼掃，鬭洗蕩，鬭顧厝裡底。吳太太吩咐（hoan-hù）對方，佫過--兩工仔（讀輕聲）chiah來上班。

吳太太做代誌，在來攏誠細膩、誠慎重。為beh瞭解即个傭人（iong-jîn）的性素佮底系，吳太太專工撽電話去互即个女傭以前的主儂。不料對方soah 嫌kah無一塊著（bô chi̍t-tè tio̍h），攏講伊實在是 「pīn-toāⁿ 又佫 lām-nōa」。

兩工後，女傭照約束來上班。吳太太 見面 著 笑咍咍（chhiò-hai-hai），不但無kā 女傭以前hit-ê主儂的話 學（o̍h：學舌）互伊聽，顛倒 是 kā 伊 呵咾 kah。吳太太kā女傭講，伊早前的主儂呵咾伊 踏實、可靠、骨力，會曉煮食，gâu chhōa 囡仔，佫會顧家；唯一的欠點著是 有咔凊采，有噹時仔 teh 洗蕩、拼掃，無講 kài 清氣。不而過，吳太太講伊 bōe 相信對方講的，因為看女傭的穿插（ chhēng-chhah ）著知影講，伊定著是一个骹手伶俐、佫愛清氣的儂，伊穩當會 kā 厝裡外拼掃 kah 清氣溜溜，款 kah 四序（ sù-sī ）仔四序。吳太太佫講，伊相信即个女傭一定是一个真好儂緣，真好鬭陣的儂。

後來，吳太太佮即个女傭聖聖（ siàⁿ-siàⁿ ）有影好鬭陣，女傭人為著 beh 顧家己的名聲， hoān-nā 進前吳太太有呵咾伊的優點，伊 soah 精實攏全做 kah 遘遘。伊逐工都（ to ）誠骨力咧做、咧操，厝裡底 不時 都 安呢金噹噹、佫新點點。伊甘願家己咔操勞--淡薄，也無願意互吳太太産生啥款呣好的印象。
議論：「名聲」，對咱儂來講，真正重要。儂講「儂死留名，虎死留皮」，啥物儂嘛無愛家己的名聲受著損害；啥物儂攏會維護家己佇咧別儂心中的形象。想 beh 改變某物儂，幫助伊糾正欠點，有一个 kài 好的步數，著是先替伊造一个好名聲，鼓勵伊去「維持」、去爭取。往往，為 beh 互儂好印象，伊會比進前佫咔拍拼。
]]> http://blog.roodo.com/limkianhui/archives/874524.html http://blog.roodo.com/limkianhui/archives/874524.html 在地料理 Sat, 17 Dec 2005 12:14:15 +0800 好膽的，摕去食 提供：全文語音檔案下載；看全文，着有通聽錄音，是線頂現聽的哦～）
「做牛著拖，做儂著磨」。咱佇咧社會上佮儂 盤nóa，目的 著是 beh 走（cháu-chhōe）一項適合咱家己的穡路。現子時的社會，第一欠的，是 hiah-ê 敢 挵破 時代佮歷史約束的英才。
敢衝敢拼、敢輸敢贏，敢做別儂呣敢做的代誌，即款的氣魄，實在是當今社會進步不可欠缺的動力。

咱儂生成有一款心理，買物件，透底愛揀hit-lō「俗佫大碗」的。普通的儂，總是希望商品的價數（kè-siàu）愈俗愈好。不而過，有一間皮革廠，的經營理念soah拄好 倒反，專途咧出産高檔的皮衫，逐領的價數都（to）超過成萬銀。Nā kan-na看的原材料佮手路，其實也無啥物特別的所在，呣佫，的生理soah直直旺起來。這關鍵著是食伊的「品牌」。物件貴，檔次懸（koân），自然著愈排祉（pâi-chí）,品牌效應著愈明顯，當然銷路嘛愈好。

佇咧四川省成都市 上kài 繁華、儂氣 上kài 旺的地段，有一个名叫王波的儂，佇hia稅一坎店面，挂一塊（tè）排仔，號做「剪報服務公司」。初起先，伊的 親chiâⁿ朋友 攏笑伊（khám）。剪報是啥貨？伊的性質著親像ná「集郵」，算講是個人的一款興趣。有的學生囡仔、文化儂、抑是講社會人士，閒時為著消磨時間，有噹時仔 加少 會 粒積 一寡 ùi 報刊 雜誌 頂頭 剪落來 的 消息、信息。著是安呢的一款業外的活動，soah也成做一項正規的職業，佫挂牌成立公司來咧經營。話nā無講透機，實在互儂想攏無。敢講 連 hiah-ê 家己 都（to）有咧 收集 剪報 的 儂，oân-á佫噯去買來看？規叢好好——無錯（剉）！事實證明，剪報公司行即條路完全有通（ū-thong）。儂講「共生理，無共財利」，即陣，呣管是做叨一項生理，市場的競爭是有夠厲害，商場ná戰場。中國古早的《孫子兵法》講，「知己知彼，百戰百勝」，即mái真儕大公司、大企業攏真看重信息、資訊的收集。Beh坫生理場佮儂車拼，佮儂輸贏，眼光著噯看互遠，著噯去瞭解外口的世界，呣通勼滯家己的箍箍仔裡，beh做「古井水雞」，ah無, 早慢會互社會淘汰。nā 講做生理親像行棋，安呢，信息粒積著是頭一步棋。話是安呢講啦，不而過，有的規模猶無夠大的公司，nā beh 專門成立一个部門來負責信息的採集佮管理，hoān-sè 成本會傷懸，算和。剪報公司的出現，拄好合（ha̍h）著的意，開小錢，趁大錢，真正「俗佫有kio̍k」。Ah-nā 對剪報公司來講，這算講薄利多銷啦，iah嘛免thiām偌儕母本，只beh服務 點陳（tiám-tîn）、周致，生理 自然 著 紅phàⁿ-phàⁿ 。

剪報公司著是靠即款「敢死敢活」、敢衝敢拼的膽量佮氣魄，達著成功的目的。
議論：別儂想都呣敢想的代誌，汝nā勇敢蹽落去做，准講失敗煞尾，汝共款值得儂的尊敬佮呵咾（o-ló），因為正正是汝伐出即个「第一步」，chiah有日後別儂的第二步、第三步……現代的社會kā咱講，風險愈大的，回報率嘛愈懸。修路艱苦，開路佫咔艱苦，總是，無行過寒冷的冬天，哪通有溫暖的春天？古早儂講「敢，著緊做阿嬤」，簡單的一句話，講出人生的大道理。好膽的，摕去食；無膽的，餓死做乞食。

]]> http://blog.roodo.com/limkianhui/archives/858125.html http://blog.roodo.com/limkianhui/archives/858125.html 在地料理 Tue, 13 Dec 2005 12:10:22 +0800 天公幫贈自力更生的儂
拿破侖用獵銃逼落水者爬上岸，是想 beh kā 伊講，家己的性命本然著噯家己來負責。連家己的性命著無才調負責的儂，不但無法度自救，別儂嘛無法度救伊。天公伯仔 kan-na 會當救助自力更生的儂。

做儂難免會拄著困難，不而過，嘛呣是逐擺攏行遘「進無步、退無路」，不可挽回的地步。有噹時仔，是咱咧面對困難的時陣，家己傷過頭青驚，未曾未（ bōe-chêng-bōe ）先落軟；抑無 著是將希望寄托佇別儂的身上， ǹg 望別儂來解救。咱從來攏無去想看咱家己是呣是有能力自救？戰鬥著猶未開始，咱家己 soah 先認輸，安呢永遠嘛 bōe 贏。

設使咱的雙骹是踏佇一个真不利的位置，安呢咱著呣通佫去數想（ siàu-siūⁿ ）別儂鬭幫贈（ tàu-pang-chān ），咱噯將一切的戇想（ gōng-siūⁿ ） tàn 掉，萬事靠家己。無米拄著儂 hēng 粿，世間親像即款的代誌，實在是真少。咱 nā 堅強，別儂 hoān-sè 愛來鬭相 thiāⁿ ；反倒轉，咱 nā lām 爛兼軟，儂著愈無愛插（ chhap ）。性命的戰場無同志，只有觀眾。 Hiah-ê 按困境行出來，最後出頭天的儂，的本事實在無比普通儂咔贏偌儕，不而過，比普通儂咔相信家己，靠家己的雙手去拍拼，最後得著成功。
議論：《國際歌》有唱講：「自來著無 hit-lō 救世主，也免靠神仙佮皇帝， beh 創造人類的幸福，全靠咱家己。」有影，咱只有對家己負責，別儂 chiah 會對咱負責，相信家己的儂 chiah 會通得著別儂的信任。佇茫茫的人世間，每一个儂攏有家己的性素，只 beh 骹踏實地、照起工做代誌，總有一工，會得展出家己的本領， show 出家己的風采。
]]> http://blog.roodo.com/limkianhui/archives/853817.html http://blog.roodo.com/limkianhui/archives/853817.html 在地料理 Mon, 12 Dec 2005 12:18:33 +0800 超越自我，天下咱的 看全文，線頂聽錄音~）

咱 nā 想 beh 得著別儂的肯定，上好的辦法著是贏過對方，靠咱的實力來講話，呣通tok-tok 想beh ǹg望 別儂來牽成，真正會當 kā 咱鬬牽成的，呣是別儂，正正是咱家己。
有一个儂，伊真怨歎家己的穡路，對頭家的安排真無滿意。伊對朋友講：「阮頭家自來攏看我真無目地，另日，等恁父 nā 出頭天，絕對會坫伊的面頭前 kā tah 桌頂，大聲 kā 伊講『汝免佫hia-pai，恁父 bōe-giàn 做啊啦』！」

伊的朋友聽聽咧，soah kā 倒問講：「即間貿易公司汝敢完全瞭解清楚啊？ In 咧做 hit 款國際貿易的秘決佮一寡步數，汝瞭解偌儕咧？」

「這……我無甚物瞭解！」

「儂講『小人報仇三工，君子報仇三冬』，汝 nā 誠實感覺講一口氣無法度吞忍，一定 beh 將汝的老主顧車落底，我建議汝先 mài hiah-nī 莽chhóng ，汝不如先將公司的貿易手段、in安怎咧佮儂 拍phún……hiah-ê撇步，包括 in 的商業文書、公司的組織機構……攏總瞭解清楚了後， chiah 來辭頭路。」朋友又佫講遘，「汝暫時著噯將即間公司當做免費鍛煉的所在，等汝逐項攏學kah全，翼股（ si̍t-kó· ）凋（ ta ）囉，汝隨時聽好（ thèng-hó ）離開。 Hit 个時陣，汝不但感覺替家己出了一口氣， iah 事實汝嘛已經學著真儕本事啊，相信汝講話會加真 āng聲，膽頭嘛會加真在。」

即个儂斟酌考慮誠久，伊感覺朋友講了真有理，決定 beh 順朋友的建議去做。此去，伊坫貿易公司裡底作 khang-khè ，著呣捌佫再烏白抱怨（ phāu-oàn ）。伊真正骨力咧拍拼，注神咧研究，有噹時仔儂攏落班倒轉去，伊猶佫坫佇辦公廳咧加班。同事看伊安呢犁頭戴鼎，認真作sit，攏呵咾 kah 會 tak 舌。

一年後，伊的朋友佫拄著伊的時陣，就 kā 伊講：「 Taⁿ 汝本事攏學全啊，哪會無去 kā 恁頭家 tah 桌頂……」

即个儂 soah 歹勢歹勢，伊 kā 朋友講，即半年來，頭家顛倒 soah 愈對重伊，即暫仔又佫將真要緊的任務交代互伊，對伊加官進爵（ ka-koaⁿ-chìn-chiok ）,薪水嘛直直升…… Taⁿ 已經是公司裡底的排祉儂。

伊的朋友笑笑 kā 講，即款結果伊早著算好好咧，「當初時汝頭家無對重汝， he 是因為汝無夠拍拼，不而過，路尾汝改頭改面，無暝無日佇咧骨力做，佫罕得計較，安呢恁頭家自然看在眼裡，感覺汝是一个真踏實，有法度擔重擔的儂。」
議論：儂講「在職怨職」。儂活佇世間，無論做叨一途，攏有家己的苦楚。設使 bōe-hiáng 定定檢討家己，呣知通改進家己的欠點，規工 kan-na 會曉哭父哭母，怨天恨地，安呢是永遠 bōe chiáng志，事業嘛bōe 得著成功。

做任何一款頭路，攏噯用競爭的態度去佮儂輸贏，歡喜做，骨力拼，發揮家己的裡才，展出家己的本事佮才情，自然會當得著別儂的尊敬佮呵咾。咱 nā 工作佇咧 bōe 順利的時陣，呣好去怨歎別儂，咱噯先伸手摸心肝，問家己做了是好抑是呣好。噯拼 chiah 會贏， 只有拍拼chiah 會得實現咱的理想佮人生的價值。

]]> http://blog.roodo.com/limkianhui/archives/847285.html http://blog.roodo.com/limkianhui/archives/847285.html 在地料理 Sat, 10 Dec 2005 20:58:13 +0800 命運bōe等待lám-kha-siàu 看全文，線頂聽錄音～ )

人生等待lám-kha-siàu。等待的結果只會當是放棄或者死亡。
有兩个儂做伴beh chhoáⁿ過一片大沙漠。水lim了啊，其中有一个（代號：A）著痧破病，倒佇塗骹的，振動。Chhun一个（代號：B），雖然好骹好手，soah也共款喙凋喉渴（chhùi-ta âu-khoah），枵kah 強強beh chih-chài bōe-tiâu。B心肝裡咧想「nā無趕緊想辦法，免偌久，兩个儂攏噯死佇咧chia」。伊按算beh佮天公伯仔輸贏一下。伊對A講遘：「咱用（bōe-ĕng）佫安呢坐咧等死，我決定beh來去（chhōe）看有水通lim無。汝噯佇chia等我倒來。」B將身軀頂hit支駁殼拔出來交互A，佫kā交代講，「手銃裡猶chhun五粒銃子，呣通記哩，按即陣算起，三點鍾後，kiàn-nā過一點鍾，汝著對天頂放一銃。有聽著銃聲，我著知影汝佇啥物所在，呣管有抑是無，我攏會倒來佮汝會合。」

了後，兩个儂拆分開，一个信心滿腹去咧水，另外一个照原瘟佇咧塗骹兜等待。去的儂做伊去啊，iah等待的儂soah咧起多疑心。A看著時表仔，照點聲放銃。伊感覺誠無望，除了伊家己以外，伊實在呣敢相信猶佫有啥物儂會當聽著銃聲。伊愈想愈傷心，愈想愈驚心，心肝lû-chháng-chháng。伊想來想去，反起反倒，唸咪煩惱 B 呣知有著水無，呣知會出代誌；唸咪又佫驚講 B nā 著水了後，會kā伊放記，做伊離開。

時間慢慢過去囉，8點鍾後，猶chhun最後一粒銃子。即个時陣，A已經完全無向望（ǹg-bāng），伊的心泠kah親像寒天的凊（chhìn）水泉。伊心裡咧想，「這是上尾一發銃子啊，我nā kā彈出去，我著啥物攏無啊，kan-na會當等死niā……Ah萬不二，佇我beh死呣成死的時陣，飛來一群鶓鴞（bā-hio̍h），kā我啄目睭，kā我 拆食落腹……」伊愈想心愈寒（hân），伊將銃口對准著家己的鬢邊……

過無偌久，B摜著一罐清溜溜又佫 tīⁿ 滿滿的清水倒來囉。伊是聽著銃聲，一路倒來的，佮伊鬭陣來的，是一陣騎駱駝的生理儂。Ah呣佫， kan-na看著一柩死kah 硬chhiàng-chhiàng 的死體niā-niā...
議論：人生講長無講，講短無算短，總是會拄著真儕的不如意，呣通定定想講別儂是永遠無煩無惱，無苦無ló·。Khêng實，每一个儂攏有 家己的苦楚。是幸福也好，是不幸也罷，關鍵是咱噯用啥物款的態度來面對生活。佇咱拄著困難的時陣，設使咱逐擺未曾未（bōe-chêng-bōe）著來認輸，安呢咱著永遠失去成功的機會囉。


]]> http://blog.roodo.com/limkianhui/archives/791885.html http://blog.roodo.com/limkianhui/archives/791885.html 在地料理 Mon, 28 Nov 2005 12:57:27 +0800 Blog會佮E-mail平俗
「這是一个通儂blogging的時代，汝nā無blogging，汝著tè儂著啊！」……有儂甚至認為講，BLOG已經成做「第五媒體」。進前佇中國，博客网、博客中国會使講是「chhèng kah lia̍h-bōe-tiâu」，不而過，chêng國內第一門戶網站「新浪」雄雄ùi半路殺出來了後，整個的局面soah攏chiâu變。「新浪博客」出來無偌久niā，隨佇咧今年（2005）9月來舞一齣「頭一屆中國博客大賽」。「新浪」畢竟是老牌，一開始著sì-kòe招兵買馬，佇短短的兩月日裡，招著一大堆的名儂來咧鬭讚聲、鬭-sio-kēng。一目，「新浪博客」成做全國第一排祉的blog網站……有儂teh堯疑，敢講新浪按算beh改途啊？

日前，記者佇杭州採訪著來參加「第五屆中國網絡媒體論壇」的新浪網站總編輯陳彤先生。伊是安怎看待blog的呢——

新浪哪會想beh來做blog

陳彤見面著講：siáng講blog是「第五媒體」？……阮自來無愛 轉彎踅角，blog著是blog，汰討（thài-thó）有 hiah儕 齣頭（chhut-thâu）！伊講，新浪做blog理由真簡單，因為一sì-kòe攏咧寫blog，所以新浪必須提供即款的服務。新浪做代誌自來有家己的原則，無做無話講，nā beh做，一定噯做上好的。即陣有誠儕趁食網路生理的儂，講起來一套一套，謗kah 山懸（koân）水牛大，正經代誌做無一箍死儂骨頭，無瞭解網民真正beh ti̍h的是啥，代誌汰討做會好勢？……市場既然有blog即款的需求，iah新浪作為全國第一讚的門戶網站，定著噯滿足網友的需要。

Blog著是「互儂寫字的所在」

「新浪博客」佇咧短短兩月日的中間，佇全國紅kah會著（to̍h）火。陳彤介紹講，即陣 「新浪博客」一工著有15000篇的數額（sò·-gia̍h）……Ah呣過，自使是安呢，blog也是永遠無法度成做主流……Blog著是「互儂寫字的所在」，佫咔安怎，也無可能逐个攏呣去看新華網、呣去看新聞，soah kan-taⁿ 佇blog 頂面咧走chhē資訊，永遠無可能安呢。

Taⁿ，博客网的开基祖方兴东當咧下力chhiâⁿ-keh伊的「博客門戶」。不而過，陳彤soah認為講，blog真正無偌儕物件佇咧，弄來弄去，咔弄著是hit幾套戲文，伊的根底著即簡單……Nā硬斗beh kā 舞kah hiah複雜，he正經呣是真正的blog囉……陳彤佫講，方興東 創安呢傷大攤啊啦……有寡仔代誌，傷斟酌是顛倒害……blog即葩火燒了傷過頭「旺」啊，感覺有淡薄走choa̍h去啊。

寫blog，事實是「真thiám」

博客成做主流。陳彤的另一理由講，寫blog實在不止仔thiám頭。伊倒問記者講，「汝嘛是逐工噯寫，汝敢講感覺thiám？」記者 tàm頭 講「有影」。「所以，真少儂有法度tù咧三月日，逐个 透底 頭興興、尾冷冷，寫無三日著隨勼（kiu）起來，虎頭鳥鼠尾……Beh知影安呢，不如（mài）去póe-hōe 咔好，因為beh堅心做一項代誌，往往是足艱苦的。」

「有的儂想講 寫blog著會當一名thàng京城、閹雞變鳳凰。這哪有可能咧？Nā beh求名求利，我看冗早（liōng-chá）收煞咔穩……想beh好額，遘尾做乞食。有寡物件實在無hiah萬能，普通普通niā啦。」

Blog 會像 E-mail hiah 普遍

呣佫，陳彤嘛承認講，三五後，blogger會比現階段的佫咔儕……遘hit陣，blog完全成做一款粗俗物仔，著新像E-mail hiah-nī普遍……即mái，咱逐个攏咧用電郵，總有一工，汝oân-á會將家己的blog頭頁寫滯名片的……Ah呣佫，咱猶有真儕其它的溝通方式，nā chiah-ê，是blog無法度代替的。

ps. 原作（華文）：《博客会像E-mail一样普及》（博客网）. ]]> http://blog.roodo.com/limkianhui/archives/784080.html http://blog.roodo.com/limkianhui/archives/784080.html 在地料理 Sat, 26 Nov 2005 16:13:34 +0800 Canada 唐儂，汝敢有瞭解？ ……有的唐儂，自頂沿的開基祖 過番 算起，遘taⁿ 已經 佇 Canada 徛 幾nā代 儂 啊，論真講， 的文化認同、教育背景，工作、生活習慣hām在地 的 Canada儂 完全 無 精差。Chiah-ê「唐儂」，咱kā號做「在地唐儂」， 認為家己是真真正正的Canada儂；時，Canada社會嘛有kā當做家己國家的公民佇咧看待。在地唐儂 會使講 是 咔 早期 的 老番客。比起老番客，hiah-ê 咔 倒尾 去 的 唐儂，的命運，又佫無共款囉。

廣東移民、香港移民、中國內地移民……無共時代、無共所在的唐儂移民，相互之間的文化背景oân-á有精差。

19 世紀中期遘kah 20世界60年代，過番 去 Canada 的唐儂，差不多 攏全 廣東儂。即段時間，會當kā看做 唐山過Cannada 的第一个階段。Hit-ê時陣，坫 中國 內地 佮 北頂 所在，去過番的儂，猶原真少。第二次世界大戰以後，Canada废除《排華法案》，一寡仔 咔 早期 的 老番客chiah通 有 機會 佫 hām 故鄉 的 親儂 團圓。咔早 的 老番客 透底 是 一寡仔 散兇儂。過去 Canada了後，拄頭仔，往往 是 互儂 倩 雜工 渡生活；iah一寡咔有本事的儂，著 會曉 招儂 相合（saⁿ-kap），經營民族企業。1947年以後，hiah-ê 老番客的第二代、第三代，已經 佇 Canada 的 主流社會 徛tiâu骹，各行各業 攏 看會著 。只不過，老番客 照原 佫 滯佇 唐儂街的 咔儕。Hit當陣（1960 年前後），佇咧Canada國內的大學裡底，猶原罕得看著唐儂的囝孫。

1967年，Canada政府改變移民政策，此去，真儕 外國儂 靠本身的技術能力移民來遘Canada。20世紀60年代～90年代移民Canada的唐儂，透底 著是 chit-lō 「獨立技術移民」。即个階段，會當講是 歷史上 唐儂 過 Canada 第二个高蜂期。 即段時間的移民，大多數是香港儂，講廣州話，嘛有 一寡仔 講 北京話 的 台灣儂（台灣儂敢有算唐儂？）。總是，中國大陸來的hoān-sè無三个。嘛因為chiah-ê 新客，透底 有 咔懸（khah koân） 的 文化程度， 現來 著 會當 用 英語 佮 儂 交陪，所以，儕儕 Canada 在地的 商業團體 攏 真正 對重，相爭 beh 來招聘。

老番客、新客，的文化背景 精差 不止仔大、誠明顯。相互 之間 罕得 有 相交插（kau-chhap）。

頭拄仔 有 講過，從（chêng）20世紀中期遘kah 1990年代初期的唐儂移民大多數攏是ùi香港來的。逐个攏知，香港自來受英國殖民統治，百姓透底有瞭解、有熟似西方的政治體系、社會制度 佮 價值觀念。所以，chiah-ê香港移民，事實免偌久，著會當適應Canada即个歐美社會，佫而且，佇咧日後生活、工作方面，定著 那 來 那 西化。

唐儂過Canada，第三个高峰期，是20世纪90年代以後，尤其是1995年。即个階段移民遘Canada的，差不多攏是中國大陸的儂。即篷（chit-phâng）ùi中國大陸來的儂，透底攏少年輩的，接受過優秀的教育，當中有少儂 是 （chhōa） 幼囝 做伙 遷過去的。Kiám-chhái是早前經歷過「文革」的關係，chiah-ê 拄拄chiah ùi中國「飛」出來的「海鳥」，的生活方式、生活經驗 hām 頂面講的hiah-ê「老番客」、「香港客」完全無相共。Chiah-ê中國大陸的新客，透底攏真清楚頂沿的親儂 佇 當時中國政治經濟發生大變化的年代 捌 遭受著啥物款的鬥爭佮酷刑。所以，kán-ná攏無相信政府。不而過，透底又佫擁護中國的政權，硬斗 主張中國統一。Chiah-ê中國大陸的新客，主要講普通話，一般來講 攏咔擁護社會主義制度。

這以外，即幾年來，講北京話的台灣移民嘛有增加的勢頭。台灣移民往往自稱「台僑」（比論講，滯佇美國的「台美人」），用即款字眼來佮「中國儂」、「華僑」的講法做區別，加少會當看出台灣移民對政治、國家 佮 種族的態度。Chiah-ê台灣移民 透底 攏 滯佇 卑诗省（British Columbia）， 雖然佮中國移民 共款 平平 攏是 講 北京話（普通话／Mandarin），不而過，其它方面的來講，二比 完全 無 相共。因為台灣佮中國，各儂行的是無的社會制度，雙方的政治環境、教育生態、人文背景.會當講是「差足儕的」。

事實上，Canada的唐儂，呣kan-kan-ná是中國佮香港來的niā，佫有一寡 是 ùi 南洋、南美洲、印度，甚至南非來的。雖罔 叫一聲「唐儂」，不而過，有的 自來 滯佇 番邦的，hoān-sè 根底 早早 脫漢，完全呣知影「漢文明」是圓抑扁，佫咔無瞭解「中國話」、「中國字」究真 是 啥物 碗糕。所以講，Canada的唐儂 群體，實在是 有夠 複雜，絕對當 簡單 kā 劃劃 做一挂。

ps. 自《每日文摘》取材。 ]]> http://blog.roodo.com/limkianhui/archives/776657.html http://blog.roodo.com/limkianhui/archives/776657.html 在地料理 Thu, 24 Nov 2005 18:10:19 +0800 唐詩嘛笑詼
來講 有一工，阿肥仔 拄好 行過 學堂 門衛室 的 門骹口，雄雄 聽著 裡面 好親像 有儂 咧 唸 歌詩。阿肥仔 一下 好玄，choăn 行 入去 beh kā 看 咧。夭壽哦！噹時仔 是 老胡 咧 唸詩 啦！真正「烏矸仔貯豆油——看 出來」，想 遘 即个 老大儂——一个 呣捌字 的 青盲牛 ûn-á 會曉 唸詩！即聲 阿肥仔 感覺 愈 趣味，決心 beh 來 聽看 伊 到底 是 咧 唸 啥物 碗糕。無聽 無打緊 啊，一下 聽落去 kàu-tè，害 阿肥仔 笑kah 強beh 落下骸 ＾○＾。Taⁿ 汝 kā 聽看 咧，看 即个 老胡 是 咧 唸 啥貨——
春眠不覺曉，（春眠不覺曉）
處處蚊子咬，（半暝蠓吵潲(chhá-siâu)）
一瓶「敵敵畏」，（一矸「敵敵畏」）
蚊子死多少。（蠓仔死了了）
老胡 唸咧 唸咧，看見 阿肥仔 行 入來，choăn 停落來，順sòa 佫 問 肥仔，「這 唐詩 作了 啥款？有讚無？」阿肥仔 笑咍咍（chhiò-hai-hai），直直 喝好 兼 呵咾。老胡 歡喜kah，問肥仔，「莫非 汝 嘛 合意 唐詩？」阿肥仔 猶原 笑笑，倒問「敢講 這詩 呣是 汝 家己 編的？」老胡 實實 kā 講，「我無文化，汰討 會曉 編詩？」 「Ah無，汝 這 『唐詩』 是 啥儂 教 汝 的？」阿肥仔 知影 老胡 定著 是 去 hông 怵去。自安呢 一問一還，一來二去，阿肥仔 chiah 知影 是 學校 附小 hiah-ê 學生 囡仔 教 老胡 唸的。

阿肥仔 心裡 起愛笑，就 kā 老胡 講 「這 唐詩 有 問題」。老胡 聽 伊 安呢 講， gōng-ngia̍h 一下，問講 問題 佇 叨位。阿肥仔 對喙 就 kā 抵（tú）：汝想看 咧，chit-lō「敵敵畏」算講 現代 的 殺蟲劑 nē，這 是 工廠 生産 的 化學産品 nē…古早儂 汰討 知影 即款 物件？」老胡 想想咧，感覺 正經 有 道理，怨歎 家己 老天tho̍h、老番癲，一時 無 張弛，chiah會 去 互 hiah-ê 呣成囡仔 騙kah 溜溜去。阿肥仔 勸 老胡 免 受氣，講 伊 ûn-á 有 一首 唐詩 聽好（thèng-hó） 唸 互 老胡 聽：
春眠不覺曉，（春眠不覺曉）
鄰里賭博吵，（隔壁儂跋繳(poa̍h-kiáu)）
夜來麻將聲，（半暝麻雀聲）
輸贏知多少。（輸贏siáng明了）
阿肥仔 唸煞，佫 kā 老胡 展 講，這 chiah是 正港 的 唐詩。老胡 聽kah 信鬥鬥（sìn-tàu-tàu），不但 用心 記憶，佫 直直 呵咾 阿肥仔 「有學問，大學生 有影 著是 無共款！」

此去，儂 佇咧 學校 門衛室 附近，著 常在（chhiâng-chāi） 會得 聽著 老胡 咧 唸 伊 hit首 「唐詩」：春眠不覺曉，隔壁儂跋繳……過路的 聽kah 笑咍咍；知空的 攏 罵 死肥仔 傷 失德，創治 古意儂 實在 不應該。

阿肥仔 soah 諍講 伊 有理，上無 有比 附小 hiah-ê 猴囡仔 咔 實在。逐个 問 伊 為啥物？阿肥仔 應講：唐朝 無 hit-lō「敵敵畏」，這 是 事實，不而過，唐朝 有咧 跋麻雀，這 嘛是 事實。逐个 soah 靜靜…… ]]> http://blog.roodo.com/limkianhui/archives/755896.html http://blog.roodo.com/limkianhui/archives/755896.html 在地料理 Sun, 20 Nov 2005 20:56:28 +0800 上紅的樹箬
雖罔 逐工 攏會 看著 真儕 真儕 的 樹仔，呣佫，ka-taⁿ hit 叢，我 呣 知影 he 是 啥物 樹。因為 hit叢 樹 的 箬仔 生做 誠 古錐，chiah 會 互 我 安呢 記牢牢（kì tiâu-tiâu） 。

秋天 遘 啊，樹箬仔 開始 咧 反紅。Hit 叢 樹 的 箬仔 呣是 一睏頭 攏總 反紅，伊 是 一箬 一箬 聊聊仔 變 紅去。樹箬仔 猶佫 青青 的時，著 有夠 嫷 啊，無疑悟 反紅 了後 soah 愈 嫷，比 未紅 hit陣 加咔 好看 成百 倍！

平平 發佇 共 一叢 樹仔頂，有的 箬仔 代先 紅，有的 倒尾 紅。Hiah-ê 冗早（liōng-chá） 紅 的 樹箬 確實 有 才調 展大曳（tāi-ia̍t），佇咧 規片（kui-phiàn） 青lin-lin 、旺 phè-phè 的 樹林 裡，hiah-ê 數量 無儕 的 紅箬仔 是 hiah-nī-á 顯目（hiáⁿ-ba̍k）。

我咧想，猶 未赴 通 轉紅 （tńg-âng）的 青箬，一定 咧 怨妒、咧 khoeh-choe̍h （kheh-che̍h）hiah-ê 代先 換色 的 紅箬。青箬 凡勢 看 無夠 遠，soah 呣 知影講，上紅 上紅 的 樹箬仔，往往 嘛 上代先 落落（lak-lo̍h）土骹。

是啦，上代先 紅 的 樹箬，定著 上代先 落。這 是 自然 的 規律，啥物儂 嘛 無法度 改變，包括 樹叢 本身。 ]]> http://blog.roodo.com/limkianhui/archives/753489.html http://blog.roodo.com/limkianhui/archives/753489.html 在地料理 Sun, 20 Nov 2005 08:51:53 +0800 露螺
普通時仔，露螺 透底 覕佇 厝裡底，因為 普通時 咱 攏 看 著 。咱 看著 露螺 的 時陣，he 說明 已經 離家 出走 啊，而且 當咧 旅途 當中。

一陣 sap-sap仔雨 落過 了後，原底 凋硞硞 的 土骹兜 變kah 重倍（têng-pōe）澹 佫 溡（chhî）。烏灰路（紅毛灰仔路） 頂，嘛 因為 雨水 的 關係，bok出 一窟一窟、淺淺（khín-khín）的 水窟仔。

水，有儂 講 he 是 露螺 的 路，嘛是 的 目標。為著 水，露螺 寧可 無惜 任何 的 代價，無顧 性命 危險，按 石縫ê、土空ê 趖 出來，順著 水路 那 趖 那 遠。露螺 嘛有 家己 的理想 佮 追求。

不幸 的 代誌，總是 來 發生 囉—— 烏雲 散了 無偌 久，天 慢慢 開去。日頭公 並無 帶念 地骹下 萬物 生靈 猶 未赴 通（thang） 食水 止渴（chí-khat），一陣（chūn）無情 的 大日 又佫 chhiō 滯 大地 的 面頂。土骹底 的 積水 ta̍uh-ta̍uh-á 凋去，雨後 澹濕 的土地，又佫 變 凋燥（ta-sò）起來，烏灰路 頂 的 水窟仔，真緊 嘛 無無去 囉。

可憐代！誠儕 露螺 猶佫 未赴 通 食著 水，to̍h 去 互 曝死 佇 半路ê……

一陣 毛毛仔雨——雖罔 是 毛毛小雨 niā，to̍h 聽好（thèng-hó）互 露螺 為 伊 無惜 性命。

一陣 毛毛仔雨，露螺 soah 記哩 家己 的 身份， 記哩 只不過 是 一粒 露螺 niā-niā。

PS. 露螺： lō·-lê，華語「蝸牛」。 ]]> http://blog.roodo.com/limkianhui/archives/751001.html http://blog.roodo.com/limkianhui/archives/751001.html 在地料理 Sat, 19 Nov 2005 22:01:49 +0800 婚姻佮睏眠 "婚姻可比是睏眠，婚外恋可比是ná睏ná眠梦。nā咔好斗的，凡势是一场美梦；咔歹手尾的，注定着是一场的恶梦。"

"先结婚，尾仔离缘，这可比是半暝精神；nā佫再结，着bōe输 精神了后佫睏去，继续做眠梦；单身可比是规暝无眠……"
"网路恋爱咧？这beh算啥？"网友佫问我。

我小可想一tiap久仔，共伊讲，
网路恋爱着亲像hit-lō梦游。

"nā安呢，网路恋爱 上kài完满的结局，该当是啥款咧？"对方又佫问。

我顺喙应讲，
睏kah静静，ná睏ná咧做美梦。

我讲煞，雄雄想beh 知影即个网友当今是啥款的情形。我choǎⁿ倒问伊。

伊应讲，伊是睏去了后，做一个恶梦，即摆当咧失眠……过有唸咪仔，soah讲一句，
"敢讲失眠的时oân-ná会梦游？"


〖添注〗
①讲爽笑，kóng-sńg-chhiò
②气努，khì-ló·.

PS.编译，材料源头——《读者》杂志。 ]]> http://blog.roodo.com/limkianhui/archives/741602.html http://blog.roodo.com/limkianhui/archives/741602.html 在地料理 Fri, 18 Nov 2005 11:53:46 +0800 《數念兩尾中國活龍》（作者：阿天） 數念兩尾中國活龍》。經過 阿天兄 本人 tàm頭 同意了後，taⁿ刊出來互眾網友做夥分享——

《數念兩尾中國活龍》

臺灣英雄，中國心：chit款例ná像bē少．譬喻蔣介石，心佇唐山，相片soah佇臺灣每一間教室內底掛懸懸（koân-koân）ê，chhām飛機場mā號做中正機場．毋koh hit款ê英雄佇chia先mài講啦．既然逐ê 見nā 聽著伊ê名攏真bē爽，lán會tàng kā lâng掛保證，官方ê"英雄"無定著是百姓ê英雄．

講著臺灣百姓ê英雄，第先 免想mā著提起著鄭成功．Chit位唐山公是毋是英雄，我猶原無清楚，hoān-sè愛問美麗島原住民問hō· khah詳細，了後chiah-koh報逐ê chai，án-ne毋chiah khah公平．橫直伊已經是神明，是毋是英雄其實亦無差．囡-á-lâng ê課本ho·ⁿh，khah早ê 、上新ê我to̍h毋chai啦──khah早ê是講chit ê lâng真gâu，真bē-bái，kā紅毛ê趕走，替大中國收復臺灣．轉大lâng了後chiah chai影 he是騙痟ê，其實美麗島本底to̍h毋是伊ê，mā無屬佇中國，抑koh再講，國姓爺真早to̍h有去穢著（oè-tio̍h）中正病，船插蹛鹿港 kah鹿耳門，海霸王ê心內soah是 teh思慕閩南，手下派lâng占領廈門、金門、舟山群島，眠望中teh計謀後pái進攻南京beh án-choáⁿ pháng chiah好，死chìn前koh寫phoe hō·蹛Manila ê Epania-lâng，講："荷蘭lâng我已經處理好勢矣，紲落去beh來chhōe lín"，看款伊真驚拍lâng ê無張持．

講kàu尾á，雖罔伊是中國ê國姓爺，雖罔伊ê口號是反清復明，鄭成功是án-choáⁿ變做臺灣lâng ê英雄其實mā bē pháiⁿ瞭解──鄭成功有志氣，抑伊所chhōa頭ê時代 kiám-chhái是Holo-lâng族群歷史kàu taⁿ上hiau-pai ê 一 khám站．

講實在，鄭成功mā足pháiⁿ命ê．In爸無志氣，in囝mā攏無出脫，伊本身企（khiā）臺灣企無kài久to̍h去惹著寒熱á（koâⁿ- jia̍t-á）過身矣，反清復明ê鄭家政權遂崩盤，致使二百年後佇宜蘭出世ê Holo-lâng簡大獅，chhōa lâng抗日本ê時，毋是以Holo-lâng ê身分抗日ê，mā毋是以臺灣lâng ê身分抗日ê，soah是以大清國人民ê身分抗日ê．

一句廣東話啦："有冇搞錯啊？"

簡大獅ê下場是真淒慘ê．Tòe伊teh反抗ê lâng投降ê真chē，伸ê攏khì hō·日本兵á thâi了了矣，路尾大獅有影無法度，趖出海口，過烏水溝，改企漳州hit角勢，無疑悟 偉大ê中國政府soah kā掠出來送hō·日本官方判死刑．

Chit款lâng，應該會使講是Holo-lâng ê英雄．抑臺灣英雄leh？伊kám是？

抑是講像簡大獅chiah條直ê憨英雄，根本to̍h毋是英雄？歷史kám是teh kā lán教示：khah小人淡薄á mā無所謂啦，橫直男子漢愛ùi辜顯榮hit陣lâng學，金á 顧hō·好 chiah上要緊？

上尾我beh提起上kài勇ê幾nā尾，毋koh in是毋是英雄（會siuⁿ憨--bē?），是毋是臺灣英雄，我仝款毋敢講．He to̍h是霧社ê Mona Rudao及in kui族ê lâng．有lâng bat kā我講過："汝想看māi，日本占領臺灣ê時陣，臺灣lang攏真溫循neh，攏無反抗．"

我連鞭（liâm-mi）應講："哪有？無，霧社是án-choáⁿ ？"

伊講："汝teh起痟hioh？霧社hit tah ê毋是臺灣lâng neh！"

伊講ê mā有小可á道理啦．佇Mona Rudao ê族群意識頂面kám有疊一重臺灣意識？Nā無，lán會使講伊是臺灣英雄bē？

Chit種問題 ，複雜koh激情，假使來問十 ê lâng，愛聽八種講法．Hoān-sè che 是英雄kah憨英雄所kā lán chah來 ê等路（tán-lō·） ： lán佇 teh lim水，poa̍h-kiáu，過日子 ê普通時，不時mā 會tàng 來suh一口別尾活龍所吐出來 ê氣． ]]> http://blog.roodo.com/limkianhui/archives/623174.html http://blog.roodo.com/limkianhui/archives/623174.html 在地料理 Sat, 22 Oct 2005 16:42:20 +0800 因為Blog，改變拄拄開始      十幾年前，大概無儂知影啥物是"Blog"。
     Blog的出現，改變的大概呣干凋是歷史。

     往過，若講作文寫字，真儕儂往往是『攑筆鋤頭重』。從(chêng)有blog了後，會安呢想的儂，會用講是愈來愈少啊。
     憖(giàn) beh寫啥著寫啥，想beh安怎寫著安怎寫……
     進前有「BBS」。BBS本底是bōe歹啦，不而過，汝定著噯寫kah真讚真水氣，才會當互版主感動，才有儂thiāⁿ汝，ah汝若「三鋤頭兩糞箕」，chhìn-chhái chu̍t-chu̍t--leh，往往無儂會插汝，有時佫共汝當做「惡意灌水」，動著 共汝siak-sau 佮 keng-thé，甚至共汝詈罵。
     「留言簿」呣？本底嘛bōe歹啦。是講，無彩咱寫kah beh死，貼(tah)佇hia，soah親像石頭thiām海，那沈那落去…無閒規晡，連 工soah了去。
     佫有hit號「QQ」、「MSN」。若beh談情說愛，開講練仙，是kài好；若beh佇hia講經說道，傳教佈施，he著親像咧搬一齣「戇儂的故事」，車盤規暝，不但「损神」，佫咔是呣值。
     Blog，共汝想的、寫的，攏變成別儂的行動計劃，汝無法度瞭解佇啥物時陣、是啥物儂來量過汝的骹蹟(kha-jiah)。汝的收成佮粒積，攏囥佇hia，照月聲、照點聲排kah hiah-nī sù-sī，khêng kah hiah-nī chiâu-chn̂g。汝若翻頭去chhē家己行過的路，汝會感覺一切攏真齊整(chôe-cháⁿ)，汝會發現一路行過來，有hiah儕 生份儂 佇hia共汝捧場，共汝鼓勵。怹攏是為著汝，自頭遘尾，獨獨汝是主角。汝會感覺電腦加真古錐，網路加真可愛。生份儂變熟似儂，成做汝的朋友，總有一工，汝雄雄發現怹竟然是查某的、是查甫的、是囡仔兄、是老大儂……汝的舞臺變kah重倍闊曠。汝定著真想beh安呢直直blogging落去，一工無blogging，汝著鬱卒、踅神(se̍h-sîn)，感覺對不住hiah-ê來行踏的朋友，汝會想beh佫來寫寡啥物，來證明汝猶佫佇咧，猶佫咧種作，汝是活kah hiah-nī 頂真，hiah-nī chhio-tiô……
     逐个儂咧寫攏無共款，有的寫這，有的寫he……總是，有激情，有鬱悶，有歡喜，嘛有怨歎。有一工，汝會發現講，佇Blog的世界，無啥物代誌會當àm-khàm，無啥物問題bōe當解答，真實的 愈來愈儕；假空的 愈來愈少。這著是民主，著是自主。做一个blogger，假使有話呣敢講、歹勢講，或者講白賊，講無影話，he攏bōe久長，煙火好看無偌久，真緊著會寫bōe落去。安怎？因為 講白賊話khêng-si̍t 是艱苦又佫thiám頭的代誌。講空 講白賊，這原在噯修練，呣是chhìn-chhái儂攏有即號本事。
     寫，著是beh hông看的，無儂敢講伊呣是。有儂寫，著有儂看；看的愈儕，寫的著愈儕。這是社會生産佮消耗的基本定律；是儂佮儂相交關，上起碼、上公平的條件。
     現子時，中国的博客（Blog）透底真無重視“Trackback”（引用），失去即項上吤重要的吸引力，Blog的魅力隨减少一半。設使有儂願意來改善，開發一寡咔好用的軟體家俬，安呢中國的Blogger會佫咔儕。
     Blogging，著ná像運動場咧賽車，油門噯直直催，千萬呣通停。油門催愈thiám，汽車愈gâu走。
     Blog的文字，ná散文詩詞、ná日記隨筆、ná新聞紀錄、ná長篇大論、ná話屎雜念……Beh安怎變弄，隨在儂愛。
     今仔日，因為Blog，中國儂寫作的傳統當咧改變。眠仔再，佫有啥物無法度改變的？ ]]> http://blog.roodo.com/limkianhui/archives/549418.html http://blog.roodo.com/limkianhui/archives/549418.html 在地料理 Mon, 03 Oct 2005 08:29:13 +0800 两年後，網民攏咧blogging 方興東是中國網路評論界 真正 有名的排祉人（pâi-chí-lâng）。最近即兩三年來，是伊互「博客」（blog）即个詞變kah真時行，變kah愈來愈樸實(phoh-si̍t)。即chām，即位互人叫做「中國博客教父」的少年人，又佫再咧製造另一場大規模的blog推廣運動。伊的目標是兩年後網民攏有家己的部落閣*，的確是beh互部落閣按「貴氣」成做「普通」。

　　部落閣不再是「gâu人」、「排祉人」的專利

　　方興東的辦公室真大間，內底kan-taⁿ排一tè桌仔、一隻冊櫃佮三四隻沙發椅（膨椅），看著加真闊曠（khoah-khǹg）。伊佇chia接受采訪。

　　代先是按「博客中國」（blogchina / bokee）來講起（目前，方興東經營的blogchina是中國第一大的部落閣網站（託管））。三月日前，blogchina有做過一擺規模咔大的改版，改版的方向，著是beh帶動 部落閣 按高貴變做普通。改版了後，方興東 kā 伊 的 部落閣網站 加 號一个不哩仔 好記的新域名——bokee.

　　「拄頭仔，thit-thô部落閣的，攏是一寡網路英才，這算是（部落閣發展史）第一个階段；sòa落來第二階段著開始出現誠儕愛趁時行的blogger，怹透底咔看重blogging所帶來的趣味性；第三階段，咔主要的腳數（kioh-siàu），猶原是早前的hit-phâng人，現白講，怹攏是一寡仔實用主義者，認為blogging會當kā怹 扎來 真儕的利益；第四階段來講，是hiah-ê咔晚(bńg)動手的blogger，chiah-ê人透底是看著儕儕人寫，『鴨仔趁sōng』、『攑香tòe拜』， 才想beh來趁人寫的。」

　　方興東認為講，現taⁿ 部落閣佇中國差不多是行遘「第二階段向第三階段過渡」即个坎站。「現子時，佇韓國，量基約1/3的民眾有家己的部落閣；我咧想，佫過咧兩三冬，中國的網民oân-á攏總有家己的部落閣…遘hit陣仔，部落閣 定著 會比電子批咔普遍。」

ps1. 「blog」，華文翻譯做「網誌」、「博客」（中國）、「部落格」（台灣）。若漳泉語來講，Beh趁華語叫做「網誌」原在會合(ha̍h)，不而過，若beh「音義chiâu顧」，hoān-sè 佫chhē也無通比「部落閣」咔有合的囉（2005年9月29號中晝12點11字修改）。《教育部國語辭典》的解釋，「閣」的意思起碼有：

　　1、古代一種類似樓的建築物。比如：樓閣。
　　2、古代一種在住宅屋內所隔出的夾室或夾層。如：閣樓。
　　3、特指古代國立的藏書樓。如：文淵閣、天祿閣、文瀾閣。
　　4、女子的房間。如：出閣、閨閣。

若將「blog」（其實嘛算是網站）比論做「閣」，實在有匹配，佫誠雅氣。

ps2. 即篇「blog」PO了後，得著冬冬（GnuDoyng）的指點，才發覺講我嘛去中著「北毒」啊！冬冬佇伊的blog寫講：
像“blog”這樣的詞，把最後的“-g”音素譯成一個字，還是受了華語的影響。閩南語是一個區分了“-m”、“-n”、“-ng”、“-ⁿ”、“-p”、“-t”、“-k”和“-h”韻尾的語言，我們要充分利用這個優勢。爲什麽大家還是趨向于把“blog”裏的“-g” 譯作“客”或是“格”呢？因爲大家還是受了華語的影響：華語沒有入聲，這樣的音素只好用一個累贅的漢字表示出來。……所以嘛，讓我來考慮的“blog”音譯的話，我希望它能被譯作“Bx-lok”或是“Px-lok”（聲調任意，元音“x”代表“u”、“o”和“o•”三者之一）。如何找合適的漢字倒是件值得商榷的事。如果我有權力的話，我會叫它“寳樂”（Pó-lo̍k）——會不會太下里巴人了？不會不會：“blog”這個事物對大多數網民而言，本身就奠基于世俗文化，用“寳樂”稱呼它無甚不妥的。
真好！是安怎我攏無致意咧？？第一，代先是噯怪我無夠頂真，攏無斟酌去思考“blog”即个番仔話的讀音（可憐代，我的英語水平兩光kah即款地步～）；佫來，傾實是我真正去穢(oè)著『華語病』啊（悲哀，這才是真正互我感覺悲哀的代誌，連我家己嘛無法度原諒家己kong...）

冬冬講了真著（tio̍h）。伊有講著「寶樂」即詞來翻「blog」，有影是bōe歹的建議。受伊的啟發，我雄雄「發現」講，網易敢呣是kā「blog」叫做「部落」？！部落（pō·-lo̍k），blog…有影 是 不哩仔 對同。人 珍珠排現現，咱soah bōe-hiáng通去抾，有影kài頇顢，真正 目睭去糊著蜊仔肉。 ]]> http://blog.roodo.com/limkianhui/archives/533868.html http://blog.roodo.com/limkianhui/archives/533868.html 在地料理 Wed, 28 Sep 2005 22:57:34 +0800 《日出》（第三葩） >Tâi-oân gín-á / TWKID Khí-kho-i Chhìn-chhái-siá / Lianbu Linguistics Paradise ™ / GnuDoyng(福州語，試看māi....) ? (欠一骹哦～～，啥人自願來報到？有賞銀通領哦～) ]]> 相招來寫母語文。遊戲規則：[1]、[2]）

第1葩：Phīⁿ 著露水兮香味，擱行差不多一百公尺著是山頭囉……

第2葩：電腦銀幕 ta̍uh-ta̍uh-á hoa--去，tńg烏金ê銀幕浮出一個人面ê影，未從明iu-koh tiuh 一下變 DVD 選單……

第3葩：

隔轉工，拄好是禮拜日。一透早，天 拄 拍phú光，Jenny著出門囉，hit時，阿嬤佮小弟仔阿泉猶咧睏。伊出門無愛騎機車，伊感覺踏 骹踏車加真活動、加真快活。將軍山離怹厝呣是真遠，大概過咔無三字久，Jenny著來遘了山骹。雖然天猶未光，路頂的過路人soah那來那儕。Jenn y坫(tiàm)停車場將骹踏車pha好勢，越頭拄beh行過路口的時，好朋友Rose嘛遘啊。
「Rose，恁姊仔哪會無佮汝來？昨昏呣是講好beh做陣去？」Jenny看Rose家己一个，開喙就問伊。
「阮姊喔...有好空的咧等伊。」Rose假做誠神秘的款。
「啥物好空的？講來聽看māi」Jenny牽著Rose的手，那行那問。兩个手牽手，順著 石khat仔ta̍uh-ta̍uh-á行按山頂去。
「攏嘛阮阿姨啦，無代無誌講beh chhōa阮姊去市內看啥物『帥哥』...哼，碗糕啦，『帥哥』....」Rose講煞，喙角仔猶原khiau-khiau。
「Beh去看親chiâⁿ的款哦～？是叨一个『帥哥』咧？」Jenny感覺誠好玄。
「拜託ê，人 即擺 攏嘛 講hit-lō『相親』～～叨一个『帥哥』哦，歹勢，我oân-á呣知...」
「恁姊有福氣哦！……啊，Rose，咱遘山頂啊neh!!」
「哇～足媠，足媠的！Jenny，汝看頭前，hit chōa雲，紅記記 佫 烏khâm-khâm，若(ná)火，若樹林，若火焰山，媠kah……」
「哇～～日頭beh出來啊！」
「緊的，緊的，相機緊iam出來……」
……
正是——

Soaⁿ-thâu koân-niá àm-bong-bong, hoân-chhiⁿ thiⁿ-téng kho̍k-kho̍k-chông
山頭懸嶺暗矇矇，繁星天頂硞硞踨‧
Ge̍h-niû chiām siám sóa piⁿ bih, niū-ūi oāⁿ góa thâu lâi thóng
月娘漸閃徙邊覕，讓位換我頭來捅‧
Giâ-thâu o·-hûn kek kui têng, Hong-iâ hui-bú kè-lâi chham
攑頭烏雲激歸層，風爺飛舞過來參‧
A̍h-bô in lâi chng o·-bīn, beh kìⁿ kong-bêng chiâⁿ kán-tan
抑無in來裝烏面，欲見公明誠簡單‧
Liông-sîn kiat-sî thǹg khùn-phâu, kim-kong siám-sih sì-kòe sàu
良辰吉時褪睏袍，金光閃熠四界掃‧
O·-hûn chhiong-ji̍p hûn-hái tàu, chèng-lâng khoàⁿ góa chin thiám-thâu
烏雲衝入雲海鬥，眾人看我真悿頭‧
Hoaⁿ-hoaⁿ-hí-hí lâi chhut-tiûⁿ, hun-hun biáu-biáu chiâⁿ tōa-kiû
歡歡喜喜來出場，分分秒秒成大球‧
Thiⁿ-tōe ba̍k nih bô kāng-iūⁿ, kî-kiû hó-tang ū pì-iū
天地目﹝目聶﹞無共樣，祈求好冬有庇佑‧

（* 頂頭即首七字仔詩，是《遊子的網路日誌》的頭家jimmylin92先生所寫的）

***********

佫來講即个阿泉，怹阿姊早早出門伊猶咧睏，一直睏遘八、九點，日頭曝(pha̍k)尻川才起床。可能是 暝時 厚眠夢 睏無落眠的款，起來了後，阿泉感覺人誠ià-siān，頭殼重重，骹手肉軟sô-sô。
「阿泉ê！緊起來食糜o·h，糜冷冷去啊......」衫褲拄long好勢，阿泉to̍h聽著 阿嬤 佇 食飯廳 hia咧喝(hoah)。
「好啦…隨來啊啦……」阿泉ná應ná行出睏房。
「嚶(èⁿ)…ah哪會 一个人 看著 se̍h神se̍h神。泉ê，阿嬤問汝，昨暗 汝 是呣 佫chhām hiah-ê呣成囡仔 鬥陣...」
「阿嬤！無啦，無啦！汝是噯我講幾遍才beh相信啦！」阿嬤話講猶未soah，阿泉著隨tú伊一句。
「鵝（無），鵝咔大隻鴨咧！若汝的性素，阿嬤知勢知勢咧。」阿嬤ná講ná beh去捧碗khat糜互孫食。即個時陣，阿泉聽著客廳的電話咧giang，choăⁿ行去接電話。
「喂̂̂…喂…喂！汝啥人？！汝beh chhē啥人啦？」拄hông念煞，阿泉略仔bōe爽bōe爽。
「三骹ê，我阿強啦，無汝是咧哭枵啥siâu啦！」對方oân-á無好聲嗽。
阿強是阿泉怹換貼的，伊交代阿泉半點鍾內趕遘「市體育中心」邊頭的三角公園仔，講beh tiàm hia等伊。阿泉問伊啥代誌。阿強叫伊先mài問伊hiah儕，時遘著會知。阿泉佫問，chiah知影講有人beh約阿強tiàm三角公園仔「chhiâu」代誌。阿強有講對方名號做「大頭仔」。
「幹！呣成囝！三工五工to̍h共恁父變(pìⁿ)一个 出頭，是咧驚恁父傷閒呣……」阿泉當咧肏niā，聽見阿嬤的骹步聲，趕緊tiām去。
「Ah..ah是啥人khà電話啦，七早八早…」
「無啦，朋友啦。」阿泉驚阿嬤佫se̍h-se̍h念，念bōe煞，趕緊chhìn-chhái編一个藉口kā騙騙的。
……
咚！咚！咚！O·-to·-bai起動囉。
阿泉出門的時，猶佫呣知「大頭仔」是啥人。厝內底攏無人佇咧，chhun阿嬤一个人，神神chhāi tòa戶碇邊仔。「即个囡仔，呣知 tī-tang時 才 會曉 想……」

p.s. 先寫遘chia。Sòa落來，換我來點名。互我點著的是啥人咧....
]]> http://blog.roodo.com/limkianhui/archives/525495.html http://blog.roodo.com/limkianhui/archives/525495.html 在地料理 Mon, 26 Sep 2005 18:34:45 +0800 《泉州晚報》頂面ê閩南語文 >風情）的文章，題目號做《泉州上元丸》。斟酌(chim-chiok) kā看咧，夭壽，佫是用閩南語（泉州）白話文寫ê neh！Taⁿ真正精神來啊，目睭嘛做一下金起來。這敢精實（chiaⁿ-si̍t）ê？我實在有淡薄仔呣敢相信家己ê目睭。É，遮中國neh！正港大間報社neh！有影 無簡單…… 我真正有好玄，一睏頭 讀遘煞。雖然講，作者佇文中透濫著誠儕「華語」ê成分，總是，罕罕有趣味。拈(ni)來互逐个bāi一下—— 正月十五，叫做上元。做上元丸吃上元丸是咱中国人的风俗，各地的风俗不同，上元丸的做法也没同，咱泉州人爱吃自己做的泉州上元丸。 　　泉州上元丸是用糖、炒土豆、葱头油、麻、冬瓜糖、桔仔皮、香蕉油还有绍兴酒做腹，原本是用手捏，现在是用钢模敲。上元丸腹捏了敲了，用术米，有的想省工就用手包。水滚上元丸才落鼎，煮几滚上元丸浮起来就熟。咱泉州有一句歇后语叫做：“上元丸包沙——浮。”这字“浮”字现时很少人说，“浮”的意思是说衫裤穿很，人显得很轻浮。这是原本生活水平低，缺吃少穿，正月才有一身新衫倘穿，平时若穿较好较才会让人说，现时逐个穿呀一个比一个好，输时装展览比赛，穿穿好显得很自信，自我感觉良好，没一个会让人说是“浮”、“浮呛呛”、“浮刮刮”。咱不是咧讲穿，还是原来讲吃。吃上元丸，有的上元丸汤落几粒红枣，大粒的白上元丸，细粒的红枣浮在顶面，很美很好看，吃红枣，逐项好，吃上元丸，庆祝团圆，大吉大利。上元丸汤一般没人爱落糖，是的，上元圆腹已经很甜了，配汤原是甜的，会较逆喉不清甜。也有人将上元圆落鼎去炊，没煮汤也有人炸上元丸，不过要炸的上元丸一定得包好势，内面不倘有空隙，若没内面有空气，炸了上元丸腹受热澎胀会炸开；皮也不倘包没密，炸才会裂开。 　　咱泉州上元丸历史也是很悠久。宋元时代，泉州的对外贸易很发达，主要是靠港脚行船去番邦，泉州刺桐港当时是世界东方最大的贸易港口，西方最大的港口是亚历山大。咱中国陆路的贸易是向西行，过甘肃新疆去中东和西方国家，这条路是历史上有名的丝绸之路。咱泉州行海路去和外国做生意，就叫海上丝绸之路，泉州算做是起点站，刺桐港经常停很多外国来的番船，街路摆很多番货，很多胡须罗目托鼻的番仔煞在咱泉州住落来，生子传孙。 　　南宋的时节，泉州来一个太守叫做真清秀，伊是咱福建浦城人，在泉州做过二任太守，对振兴泉州刺桐港，发展海外贸易，搞活经济起很大的作用，做很大的贡献。伊廉政勤政，爱民如子。有一年上元，泉州原是大放花灯，一世界很热闹，太守真清秀就将官服脱索，穿平常的衫裤，上街游赏花灯，与民同乐。伊看见泉州城内大街小巷人马挤挤，古灯照时举，享受太平盛世，繁荣昌盛的好日子，心里很欢喜。 　　但是作为泉州百姓的父母官，伊心里欢喜是欢喜，还记心记肝有一些出外行船的人。咱中国人自古以来就有传统，很重视过年过节一家大小团圆。上元象征团圆，若是没团圆就会产生几家欢乐几家愁。这一年番邦的船来咱泉州，番货卸了，就装咱泉州的土特产：什么泉州缎啦、德化瓷啦、永春漆篮、安溪茶叶等等。原本没机器，再大的船也是竖帆的帆船，行船靠风。热季东南风，船行入来，寒季西北风，船行出港。西北风一起，番船要行了，哪知有几个船员水手来咱泉州水土不服破病，脚软手，真太守就共伊倩几个好角色的泉州人落船去相帮，泉州南门有一个林圆也在内。 　　真太守过上元，挂念林圆厝内有老母嫫囝，就迢工行来南门林家，看见林圆厝门口摆一摊丸仔汤，都是林圆的老母和嫫在上元节咧卖丸仔。丸仔丸仔，足见林圆老母和嫫是咧盼望一家团圆啊！真太守心里很不过意，就近前说：“林圆去行船得倘倒来过年，实是下官之过！”林家大家新妇认得是真太守，赶紧请伊坐坐吃丸仔汤。林圆老母说：“我囝行船出外，不单倘多讨趁，还给咱泉州带来好名声，一时没倒来要紧，要紧！”真德秀听见这样说，感慨万千：“人说泉州人很‘四海’，果然是深明大义，胸襟广阔，泉州港才会成为出名一世界的大港脚。”就共安慰说：“林圆是咱泉州的好汉，伊很紧就会倒来。”举笔替题一对联：“泉郡千秋庆，林家上元圆。”祝愿一家团圆。真太守赠联，林家卖的丸仔叫就做上元丸。没偌久，林圆也行船倒来，一家团圆。从此了后，泉州人就爱在上元做丸仔吃，上元丸愈做愈好吃，不单是节日的习俗，也成为泉州有名的美食。 　　作者：黄锡钧　（根据李辉良原作改编） PS. 注意：文中個別所在拍字有重誕(têng-tâⁿ)，有ê字拍kah漏溝去。（佮網頁製作有治代？） ]]> 《泉州晚報》（海外版>>風情）的文章，題目號做《泉州上元丸》。斟酌(chim-chiok) kā看咧，夭壽，佫是用閩南語（泉州）白話文寫ê neh！Taⁿ真正精神來啊，目睭嘛做一下金起來。這敢精實（chiaⁿ-si̍t）ê？我實在有淡薄仔呣敢相信家己ê目睭。É，遮中國neh！正港大間報社neh！有影 無簡單……

我真正有好玄，一睏頭 讀遘煞。雖然講，作者佇文中透濫著誠儕「華語」ê成分，總是，罕罕有趣味。拈(ni)來互逐个bāi一下——
正月十五，叫做上元。做上元丸吃上元丸是咱中国人的风俗，各地的风俗不同，上元丸的做法也没同，咱泉州人爱吃自己做的泉州上元丸。

　　泉州上元丸是用糖、炒土豆、葱头油、麻、冬瓜糖、桔仔皮、香蕉油还有绍兴酒做腹，原本是用手捏，现在是用钢模敲。上元丸腹捏了敲了，用术米，有的想省工就用手包。水滚上元丸才落鼎，煮几滚上元丸浮起来就熟。咱泉州有一句歇后语叫做：“上元丸包沙——浮。”这字“浮”字现时很少人说，“浮”的意思是说衫裤穿很，人显得很轻浮。这是原本生活水平低，缺吃少穿，正月才有一身新衫倘穿，平时若穿较好较才会让人说，现时逐个穿呀一个比一个好，输时装展览比赛，穿穿好显得很自信，自我感觉良好，没一个会让人说是“浮”、“浮呛呛”、“浮刮刮”。咱不是咧讲穿，还是原来讲吃。吃上元丸，有的上元丸汤落几粒红枣，大粒的白上元丸，细粒的红枣浮在顶面，很美很好看，吃红枣，逐项好，吃上元丸，庆祝团圆，大吉大利。上元丸汤一般没人爱落糖，是的，上元圆腹已经很甜了，配汤原是甜的，会较逆喉不清甜。也有人将上元圆落鼎去炊，没煮汤也有人炸上元丸，不过要炸的上元丸一定得包好势，内面不倘有空隙，若没内面有空气，炸了上元丸腹受热澎胀会炸开；皮也不倘包没密，炸才会裂开。

　　咱泉州上元丸历史也是很悠久。宋元时代，泉州的对外贸易很发达，主要是靠港脚行船去番邦，泉州刺桐港当时是世界东方最大的贸易港口，西方最大的港口是亚历山大。咱中国陆路的贸易是向西行，过甘肃新疆去中东和西方国家，这条路是历史上有名的丝绸之路。咱泉州行海路去和外国做生意，就叫海上丝绸之路，泉州算做是起点站，刺桐港经常停很多外国来的番船，街路摆很多番货，很多胡须罗目托鼻的番仔煞在咱泉州住落来，生子传孙。

　　南宋的时节，泉州来一个太守叫做真清秀，伊是咱福建浦城人，在泉州做过二任太守，对振兴泉州刺桐港，发展海外贸易，搞活经济起很大的作用，做很大的贡献。伊廉政勤政，爱民如子。有一年上元，泉州原是大放花灯，一世界很热闹，太守真清秀就将官服脱索，穿平常的衫裤，上街游赏花灯，与民同乐。伊看见泉州城内大街小巷人马挤挤，古灯照时举，享受太平盛世，繁荣昌盛的好日子，心里很欢喜。

　　但是作为泉州百姓的父母官，伊心里欢喜是欢喜，还记心记肝有一些出外行船的人。咱中国人自古以来就有传统，很重视过年过节一家大小团圆。上元象征团圆，若是没团圆就会产生几家欢乐几家愁。这一年番邦的船来咱泉州，番货卸了，就装咱泉州的土特产：什么泉州缎啦、德化瓷啦、永春漆篮、安溪茶叶等等。原本没机器，再大的船也是竖帆的帆船，行船靠风。热季东南风，船行入来，寒季西北风，船行出港。西北风一起，番船要行了，哪知有几个船员水手来咱泉州水土不服破病，脚软手，真太守就共伊倩几个好角色的泉州人落船去相帮，泉州南门有一个林圆也在内。

　　真太守过上元，挂念林圆厝内有老母嫫囝，就迢工行来南门林家，看见林圆厝门口摆一摊丸仔汤，都是林圆的老母和嫫在上元节咧卖丸仔。丸仔丸仔，足见林圆老母和嫫是咧盼望一家团圆啊！真太守心里很不过意，就近前说：“林圆去行船得倘倒来过年，实是下官之过！”林家大家新妇认得是真太守，赶紧请伊坐坐吃丸仔汤。林圆老母说：“我囝行船出外，不单倘多讨趁，还给咱泉州带来好名声，一时没倒来要紧，要紧！”真德秀听见这样说，感慨万千：“人说泉州人很‘四海’，果然是深明大义，胸襟广阔，泉州港才会成为出名一世界的大港脚。”就共安慰说：“林圆是咱泉州的好汉，伊很紧就会倒来。”举笔替题一对联：“泉郡千秋庆，林家上元圆。”祝愿一家团圆。真太守赠联，林家卖的丸仔叫就做上元丸。没偌久，林圆也行船倒来，一家团圆。从此了后，泉州人就爱在上元做丸仔吃，上元丸愈做愈好吃，不单是节日的习俗，也成为泉州有名的美食。

　　作者：黄锡钧　（根据李辉良原作改编）

PS. 注意：文中個別所在拍字有重誕(têng-tâⁿ)，有ê字拍kah漏溝去。（佮網頁製作有治代？） ]]> http://blog.roodo.com/limkianhui/archives/495131.html http://blog.roodo.com/limkianhui/archives/495131.html 在地料理 Sat, 17 Sep 2005 23:39:35 +0800 廈門啲老仙覺——講古仙：范壽春
今仔日，咱卟來記录一个規世儂為閩南語咧走chông、咧拍拚啲老大儂——一个真正無簡單啲廈門儂，伊著是范壽春老先生。


講起范壽春老先生，誠儕廈門啲在儂犯勢to有瞭解，嘛知影伊是本地有名啲「講古仙」。老先生今年七十七，講古是伊即世儂上主要啲職業。老先生出世佇鼓浪嶼，自細漢，伊to̍h合意著「講古」即途，拄開始是踮「講古場」聽儂講，聽久ná興(hèng)、ná綿精(mî-chiⁿ)，有時lak袋若無錢，著走去覕蹛(bih-tòa)壁角仔偷聽（往早時，講古是一種行業，卟聽講古噯開小錢）。根據老先生伊家己咧介紹講，伊做囡仔啲時代（量其約佇頂世紀三、四十年代），全廈門拢總差不多有十外位專業啲講古場。往过啲講古，透底講一些「中國歴史故事」佮「民間傳奇」，比論：《水浒傳》、《羅通掃北》、《包公案》、《施公案》、《三國演義》、《封神演義》等等。儂講「一年新婦，两年師傅」，久，自然著會出師。尾仔，范先生家己oân仔行入「講古」即途，並且一下開喙著是一世儂。伊出世佇舊社會，自少年，伊著亲身佮下階層啲做工仔儂來做交陪。伊瞭解身軀邊hiah-ê勞動大眾啲心聲佮艱難，知影怹咧想啥，beh-ti̍h啥。當然，遮个經歴，拢成做當時范老講古啲能源佮動力。

「講古仙仔喙，胡镭镭(hô·-lùi-lùi」，即句話雖然有咔歹聽淡薄，不而过，颠倒會當看作是社會對講古仙「喙水一粒一」啲呵咾(o-ló)佮肯定。卟有「一粒一」啲喙水，呣是在來生成啲，嘛呣是三工五工有法度激出來啲，he定著噯經过久長啲煅練，佮不断啲總結。即款「一粒一」啲喙水，本身著是一款真正高明、真正了不起啲語言能力。有才調出來講古，絕對無簡單，定著噯瞭解儕儕过去所發生啲正史、野史；瞭解當今啲時政，大遘國家大條代誌，細遘水牛相挨相tak，會使講是「知天文，捌地理」，「天頂知一半，地骹下全知」。

1991年，范老先生退休。無偌久了後，伊接受邀請，行入廈門人民廣播電臺啲演播室，通过電波继續向在地啲鄉親序大、囡仔序細來奉獻伊啲講古藝術。「電臺放送」畢竟hām「現場講古」真無共款，影响力嘛加真大。一時陣仔，范老啲講古录音，捷捷(chia̍p-chia̍p)送去遘中央臺、國際臺、省台、海峽之聲廣播電臺等等儕儕啲電臺播出；省内省外各種媒體嘛常在(chhiâng-chāi)有咧報道即位廈門啲老講古仙，連對岸啲《金門日報》嘛有登出專欄來咧介紹。

自2000年年底開始，范老先生又佫重新倒轉去「現場」講古。即擺，范老選擇踮咧廈門市「金榜公園」，將公園内底啲「老儂之家」當做伊啲講古場。算算咧，范老佇hia講古，遘taⁿ已經tih-beh满五年，完全拢是做義務啲。在范老啲心中，講古已經呣kan-na是語言藝術，佫咔是hām在地閩南文化啲生存相牽連。范老講，「講古啲目啲，著是卟推捒(thui-sak)閩南文化」、「閩南文化啲根底是閩南語」。是啦，閩南語若直直無去，閩南文化敢有可能佫佇咧？范老認為講，講古oân仔會當挽救(bán-kiù)閩南語，是推捒閩南語佮閩南文化啲一步棋。伊佇咧講古啲時陣，常在濫摻(lām-chham)著儕儕閩南在地啲歌謡、俗語話、笑詼譀古（chhiò-khe hàm-kó·）等等。伊不但講古，又佫研究閩南語，將儕儕吤高深啲閩南語理論，通过講古啲形式，用輕鬆兼笑詼啲言語介紹互儂知。即款啲「講古」，事實已經呣是單純啲「練牙、hap仙」，正港會使看做是咧「傳授文化智識」佮「搶救母語運動」。

不而过，一个儂啲力草，實在真有限。雖然，咱相信一定猶有儂，佮范壽春老先生相siâng抱著共款啲意志，為著鄉土語言佮文化啲生存，直透咧貢獻怹啲能量，呣佫，即个「變相」(pìⁿ-siùⁿ)兼「致病」啲社會，並無因為安呢，來放慢伊本成to̍h直直咧「改變」啲骹步。 ]]> http://blog.roodo.com/limkianhui/archives/297324.html http://blog.roodo.com/limkianhui/archives/297324.html 在地料理 Sat, 23 Jul 2005 13:58:04 +0800 Don’t stand between me and my Blog！ 六月無善北”(blog)雄雄拍bōe開a，真不幸，佫著衰a！這是發生伫“六月”啲故事，伫即个熱kah强beh hiauh殻啲火燒埔，一陣臭凊風过後，雄雄起西北，一tiap久仔，沃kah tâm糊糊、泠吱吱……六月無善北！六月無善北！！六月無善北！！！

"天公伯仔"啲安排，早早著注定，互汝走bōe去、嘛閃bōe離。中國儂咔福氣，有两个“天公伯仔”，比儂加一个。

伫“马乐伯乐谷”hia看著一篇真讚啲文字，那看那肏(chhò)，那看那喝好！在下無才，家己無才調寫，只好去共翻譯，tah 出來做伙鼻芳一下—— 希腊哲学家 Diogenes定定睏佇甕底。有一工，皇帝亚力山大去探訪伊。皇帝用一贯英威啲口氣问哲學家，“汝有啥物代誌beh求（拜托）我無？”即位生性樂暢放蕩啲哲學家聽了随péng白目，共皇帝應講，“我求（拜托）汝咔邊仔啲，mài共我閘著日頭光。”

即个小故事真儕儂拢知，有何涵义，犯勢噯在儂去理解。Diogenes凊采講出喙啲一句話，若像已經包含著足吤高深啲大道理。根據Mr.Rain(注：華文版啲原作者,一个blogger)啲調查發現，kan-na即句話，著有足儕款英文啲版本：

Don’t stand between me and the sun.
Stand a little less between me and the sun.
Stand from between me and the sun.
I would have you not stand between me and the sun.
I would have you stand from between me and the sun.
Stand out of my sun.
You may stand from between me and the sun.
I want only one thing Alexander. You stand in front of me, and you’ re hinding the sun, so, don’ t take from me, the thing that you can not give me!

咱減采kan-na是想講，hit位哲學家無咧稀罕榮威權貴，榮華富貴在伊看來，著親像若草鞋牛屎。雖然來者是君王至尊，在伊啲眼内，佮普通儂無精差，不但對 伊無所求，佫咔無想beh佮伊计较。真好，請逐个注意上尾仔hit半句啲内涵：日頭光呣是汝皇帝有法度赏賜啲，所以拜托汝呣通共汝“無法度赏赐啲”也拢佔去。即个请求吤普通，呣佫意義無平凡。

咱若翻頭去看歴史，像即款啲例，儕kah算bōe離。壓霸啲儂、壓霸啲政党、壓霸啲国家，總是将怹啲意志强强硩(teh)咧hiah-ê無辜者啲身軀顶，欺骗啲也好，强迫啲也罷，一定噯舞kah互汝露家散宅，最後國破人亡，四界徛旗造反。

後人bōe曉通反省，暴行呣知影收煞，悲剧猶佫咧公演。

前幾日國内啲朋友來共Mr.Rain報：講国内已经連bōe遘Space Odyssey囉，看勢Blogsome是去互GFW（注：Tiong-kok ê Bāng-lō· Tn̂g-siâⁿ）清著a。路尾又佫去探聽，是正實啲。無法度，蹽！無蹽會衰潲。过免偌久，一四界拢咧無閒搬厝。不而过，身在日本啲Mr.Rain，因為呣甘放捒Space Odyssey，遘taⁿ猶原是勼(kiu)伫hia咧拖老命，總無hiah衰，一定噯hông赶kah去徛踮外太空chiah有准煞！

外口啲世界猶原hiah-nī繁華。天，猶原是hit个天；地，嘛猶原是hit片地。網路社區真緊又佫恢复遘往時啲平靜，一半聲哭夭啲猫仔聲，真緊著消失佇芙蓉姐姐嬈kah無尾溜啲風流古内底。佫咔恶毒啲咒讖(chiù-chhàm)嘛已經詈(lé)煞，總是無儂會當走閃。自使汝無插(chhap)政治，政治共款會掠汝去辦。

Blogsome 是爱爾蘭一間公司chhiâⁿ-keh啲免付费blog托管，自開辦遘taⁿ，得著全球儕儕blogger啲歡迎佮喜愛。會使講，怹正正是代表先進生產力發展啲需求，代表先進文化前进啲方向，代表上廣大blogger啲根本利益。串串著是即款贯徹“三ê代表”啲網站，佇國内查封起來。噯查封著共汝查封，呣免共汝講偌儕理由。汝kā看，“防止非法網站骗錢(pián-chîⁿ)、防止虚假信息亂谤(Pòng)……”，安怎？聽著若像真公道是無？看勢，咱做百姓啲噯佫共怹說多謝，順紲感動kah目屎流、目屎滴，大聲感嘆“我皇萬嵗,萬萬嵗”！這著是咱Tiong-kok儂啲福氣呣？

佇即款流擺查封Blogsome，可比是将一个拄出世啲紅嬰仔tēⁿ死佇o·籃内底；将一个完全無碍、無任何危險性啲新性命刣死佇生長啲初起先。判死免證據，拽手(ia̍t-chhiù)頭落地。君噯臣死，臣一定噯死。

佇choan-chè啲國度内底，自使錯杀一千，也不可漏洩一个。
佇bîn-chú啲國度内底，甘願放過一千，也呣願错杀一个。

咱合該然(ha̍p-kai-jiân)生活佇即款啲國度，死公道啲！

Don’t stand between me and my Blog！

 P.S.
原文——華文；出自《马跃伯乐谷》、《Space Odyssey》；華文原作者：Mr.Rain（梁实秋對該文也有贡献）。
譯：閩南/LimKianhui 2005年7月17號 ]]> http://blog.roodo.com/limkianhui/archives/277933.html http://blog.roodo.com/limkianhui/archives/277933.html 在地料理 Sun, 17 Jul 2005 20:13:20 +0800 金门踅一lìn
我呣捌做過兵，呣知影中着“金馬獎”有偌凄惨。往過台灣佮大陸戰争，对我即款少年侬來讲，透底拢無了解，無法度体会。我干凋知影金門為台灣付出真侪真侪，戰爭造成啲「空喙」一直遘及即阵拢猶朆(iáu-bōe)过皮。

去金門出差，顺绁(sūn-sòa)趁佚佗(chhit-thô)。亲目看着即阵啲金門，互我改变以早对即垛(tè)土地啲印像，共款啲天佮地，無共款啲景致。金门啲人、金门啲文化、金门艺术、金门啲光景……互我产生一种新啲概念：小福爾摩沙——金门。

去金門，上烦恼班機是呣是会當按時起降，我地理读無出业(chhut-gia̍p)，實在想無是安怎遘及热侬(jo̍ah–lâng)金門会定定罩茫(tà-bông)，致遘(tì-kàu)飞机拢無法度准点起降。

拜托天公伯仔鬥保庇(pó·-pì)！我想卟去金門想真久也。

◎畅(thiòng/快活)！！

金门机场传来好消息！無问题，即阵着出發。

空中飞行啲時间虽然干凋短短10字久，呣佫保证会互汝爽及叫呣敢。像我即款爱冒险佫爱刺激啲侬，若凖無來飞一chōa仔，实在真無采。咧卟(leh- beh)遘金门岛啲時阵，飞机是强强卟uh着海面，安呢直lu直去；飞入金门本岛了後着更加驚险，雄雄180度啲斡弯(oat-oan)……目睭前啲山、塍(chhân/田)、水、厝，连當咧(tng-leh)草埔仔食草啲水牛嘛拢看及清清楚楚。偌爽汝敢知！

◎對岸，照過來——馬山觀測站

金門过去是正港啲前線、戰场。现主时虽然兩岸關係亲像“後母面”，三不五時着來咧變面。不而过，伫金门，汝完全鼻朆著一屑屑仔火藥味。塍照犁、狗照吠；阿兵哥猶原嘛是hiah呢仔熱情。一行侬(chi̍t-kiâⁿ-lâng)行來遘戰争時代出名啲馬山觀測站，hit工拄好红天赤日頭，会當清楚啲看着對岸迄爿啲景致：两岸啲漁船仔來來去去、驶出驶入……一四界“安和樂利”、“国泰民安”啲情形……“统一”？？無知是啥侬咧食饱换枵(chia̍h-pá-oāⁿ-iau)，閒閒無代誌咧烏白彈(tōaⁿ)、凊采講講！

◎閩南建築精華—山后民俗村

開放了後，除了『戰地』旅游咔有销以外，金門在地啲閩南建築oân仔互侬放朆离(pāng-bōe-lī)。山后啲大厝是清朝旅日華僑、大好额侬王敬祥起啲。拢总18座雙落式啲閩南建築，听讲建筑材料拢是用船仔按泉州、漳州载來啲，有啲甚至是按福州载來啲，遮个大厝拢总起卟20年才起完成。即阵，咱看着啲大厝,有啲虽然已经是lap-chih-lap-che̍h, 不而过，徛踮古厝内啲侬，原在是hiah-nī-á清闲佮自在，有啲侬佫伫门口兜排担仔賣雜细(kui-khì tiàm mn̂g-kha-kháu pâi tàⁿ-á bōe cha̍p-sè), 生活嘛是共款过活真四序。

金門啲閩南建築有一种古樸之美，正門透底设计及真幼路、又佫雅氣；翹脊(khiàu-chit)嘛做及尖溜溜、翹te-te……一家一户，門斗顶、簾簷骹，拢嘛吊迄啰鼓仔灯（燈籠），干凋看即款笵 (pān)啲,着若親像往过啲大门户、大好额侬兜。设使汝對建築有興趣，根本嘛呣免去别位，干凋金門啲閩南建築着聽好(thèng-hó)互汝看及饱。

◎“北山番仔樓”，做历史啲見證

呣免堯疑，這绝对呣是翕电影啲道具，這拢是真真正正啲戰爭遺跡。位伫古寧頭附近啲即座北山，有一thōng起及真正lè-táu啲番仔楼,外墙是枪子空注及密密是。听侬讲即棟著名啲番仔樓是往當時(éng-tong-sî)，在地一个好额啲生意侬起啲。古寧頭戰役(国共内戰)爆发迄阵仔，听讲捌有『共匪仔』（阿共仔啲兵仔）覕(bih)入去楼仔内，路尾chhām国军（KMT兵仔）伫遮发生激烈啲槍戰。现主时，咱干凋会当按即半爿mi-mi-mauh- mauh、li-li-lap-lap啲外墙，來想起往當時金門啲青颺(chhiaⁿ-iāⁿ)，以及戰争啲凶陷(hiong-hām)。

往時啲番仔樓，可惜即阵soah变做在地侬心中啲鬼仔厝。昑，即座番仔樓，已经去互枪子佮海風凌迟(lêng-tī)及呣成够鬼(m̄-chiâⁿ-kàu-kúi)。

◎金門第一悬啲山—太武山

第一擺來金門啲侬，若無去太武山行行看看咧，實在讲，是一种罪過。

太武山啲石质是花岡岩，外口看去，互侬感觉山顶啲石頭是遐呢仔橂、树林遐呢旺，實际国军(台军)伫遐ó·磅空、建基地、起病院，差不多是規粒山頭ó·卟thàng也。不而过，有寡关系軍事機密啲所在并無開放互儂客参观。

Peh上太武山,一路有诚儕光景通看，介绍儂罔参考：

1. 國軍公墓—經過綠化啲國軍公墓，伫“古寧頭”；八二三戰役死去啲國軍將士拢tâi伫遮，若無怹來牺牲，现白讲，無今天仔啲台湾。
2. 延平郡王博奕處—古早时阵，鄭成功起兵,“反清復明”，金門是郑军啲一个根据地。听讲郑成功常在(chhêng-chāi/chhiâng-chāi)徛踮太武山顶,觀察敵情，着是安呢才來發現着即个天然啲磅空(pōng-khang)。昑，行入去裡面，着若亲像看着规心反清復明啲国姓爷伫遐行棋、思考。
3. 毋忘在莒—若這，着呣免佫介紹也，蔣先生伫民國41年提字勉勵國軍。

◎海印寺啲梵音

海印寺是太武山啲上尾一站，也是金門第一大廟，供奉如來佛、觀世音、十八羅漢等等，数百年來保庇著金門人啲幸福與希望（海印寺是國家三級古蹟，听說遘昑有八百外年啲歷史）。日頭卟落山啲時，伫海印寺合手求平安，拄好嘛是寺廟行佛禮啲時阵，梵音纯纯仔，雄雄想着伫西班牙舊王城Toledo大教堂啲望彌賽 (bōng-bí-sài)。

宗教本身敢呣是噯有包容、噯相存咧？無共款啲宗款，目标敢呣oân仔共款咧？所有啲宗教拢是咧净化侬啲心靈，互侬得着心灵啲寄托，金門啲海印寺佮Toledo啲大教堂共款，守護着伊啲乡里佮人民，保庇平安、健康佮幸福。

◎中央公路，绿色通道。

金門有高速公路？無呣着，着是即條过去侬叫做“伯玉路”啲中央公路。若卟去游赏各个景緻，透底拢噯行過這條兩爿木麻黃栽及旺帕帕(ōng-phè-phè) 啲綠色通道。我雄雄想卟伫遮踏骹踏車，這绝对真享受。中央公路沿路有足儕拢無開發啲土地？汝若安呢想，著呣着也，事實呣是安呢。

过去，伫金門，为着戰争，伫靠海墘啲所在，地雷tâi及密密啁啁，不而过，一直遘及即阵，地雷嘛拢清無离。有時仔，咱定定会看着一半隻仔赤牛伫遐四箍辗转 (sì-kho·-lìn-tńg)伫食草，可見農地佮地雷區實际干凋是隔一排铁網仔爾。這会当互汝体会着金門在地做穡儂是偌呢仔艱苦，嘛会当理解是安怎金門拢無法度發展海上運動。讲遘遮，顺紲共逐个報告一下，來金門踅佚佗(se̍h-chhit-thô)仙仙着呣通走去無侬行踏(kiâⁿ-ta̍h)啲草埔四界爽(sńg)、四界搤(iah)！

◎畅畅大食神(thiòng-thiòng tōa-chia̍h-sîn)—金門食好料啲

金門好食啲物件吤出名，凊采介绍幾项仔互各位罔参考：

1. 王阿婆蚵仔麵線—覕伫山后民俗文化村內底。金門啲蚵仔比台灣出产啲咔细面(mī)，不而过品质诚讚，價数(kè-siàu)又佫實在。站長認為這是金門第一好食啲物件，無來食会怨叹規世侬！昑，顺紲鬥吹销一下。
2. 太祖貢糖—专题來咧製作各种口味无共啲貢糖，当中上吤有名啲是豬腳貢糖，稳定会互汝愈食愈绁喙，站長共款呵咾(o-ló)及会触舌(tak-chi̍h)!
3. 馬家麵線—完全手工製作，麵khiū紧煮，干凋攪芳油(phang-iû)、soah蔥花着好食及(hó-chia̍h kah)……這實在真適合亲像站長即款pīn-tōaⁿ侬啲氣口。造址咧？呣免致意(tì-ì)，若有心卟去试一个仔咸chiáⁿ，伫金門市區（金城鎮）四界拢嘛有tè探聽。

金門啲人文、光景，生本(seⁿ-pún)着佮台灣略仔無亲像（雖然開放後着愈來愈siâng），樸實(phoh-si̍t)佫雅氣啲闽南建築、戰爭遺跡、復古兼古锥啲免費巴士，闹热chhih-chhih啲滨海夜市…….

伫“英雄岛”猶未完全變做“台湾”晉前，赶紧嗳去踅踅哦！ ]]> http://blog.roodo.com/limkianhui/archives/474779.html http://blog.roodo.com/limkianhui/archives/474779.html 在地料理 Fri, 22 Apr 2005 13:03:59 +0800 Chiu-san liû-liōng-kì
Chiu-san-chhī chit-ê só·-chāi, sī chi̍t-ê tē-kip-chhī, thiaⁿ-kóng khah-chá sī sio̍k-î Lêng-pho leh kóan, m̄-koh he lóng kái-hòng-chêng ê tāi-chì--a, lâng Chiu-san chit-chūn í-keng ka-kī to̍k-li̍p chiâⁿ-chòe chi̍t-ê tē-kip-chhī--a. Chiu-san sī khò hái ê siâⁿ-chhī, kéng-lāi lóng-chóng ū 3,000 gōa ê tó-sū, chi̍t-ê sòa chi̍t-ê, pâi kah ba̍t-ba̍t-chiù-chiù.

Nā sī kan-na kóng-khí Chiu-san, hōan-sè bô lōa-chē lâng chai-iáⁿ, put-jî-kò nā kóng-khí Pó·-tô-soaⁿ, chai-iáⁿ ê lâng ún-tàng ke-chin chōe. Pó·-tô-soaⁿ sī Hu̍t-kàu sèng-tē, Tiong-kok bîn-kan thôan-soat tiāⁿ-tiāⁿ kóng--tio̍h ê "Lâm-hái Koan-sè-im phô·-sat" to̍h sī kèng-hōng tī chia. Kóng--khí-lâi mā ū khah kî-kòai--chi̍t-kóa-á, Phó·-tô-soaⁿ bêng-bêng sī tiàm-tī Tang-hái chit-tah, m̄-koh chū-kó·-í-lâi Tiong-kok-lâng soah lóng kóng-chòe "Lâm-hái Koan-sè-im".

Koan-sè-im phô·-satPó·-tô-soaⁿ oân-á sī chi̍t-ê tó, lī Chiu-san-tó ū chi̍t-chat-á chúi-lō·, taⁿ tah khòai-théng liōng-kî-iok ài saⁿ-jī-kù ê sî-kan. Pó·-tô-soaⁿ-tó téng-thâu lóng-chóng ū chiâⁿ-pah keng sī-biō, hun-sòaⁿ tī tó-siōng bô siâng ê hong-ūi. Lán sio̍k-gú-kóng "saⁿ kha-pō· chi̍t khám tiàm", nā chit-tah sī "saⁿ kha-pō· chi̍t keng biō". Múi kang, lóng ē-tàng tī Pó·-tô-soaⁿ khòaⁿ-tio̍h chin-chōe chin-chōe ùi Tiong-kok kok-tē, sīm-chì ùi gōa-kok piàⁿ lâi pài-pài ê hiuⁿ-kheh.

Bân-lâm-lâng siōng-kài sìn hu̍t. Tī Pó·-tô-soaⁿ, put-kóan-sî lóng ē-tàng tú-tio̍h kóng Bân-lâm-gú ê hiuⁿ-kheh. Pó·-tô-soaⁿ ki-tiûⁿ chêng 1980 nî-tāi to̍h khai-thong poe Ē-mn̂g ê hâng-pan, chi̍t-ji̍t lâi-hôe poe chi̍t-chōa. Saⁿ-nî-chêng iū-koh ke khui chit-pan poe Chìn-kang--ê. Taⁿ Bân-lâm í-keng chiâⁿ-chòe Pó·-tô-soaⁿ koan-kong lú-iû siāng tiōng-iàu ê kheh-gôan-tē.

Tû-liáu Pó·-tô-soaⁿ, Chiu-san-chhī iáu-koh ū chi̍t-ê kài chhut-miâ ê só·-chāi, kāng-khóan sī chi̍t-ê sió-tó, hō·-chòe "Tô-hoe-tó". Ē-sái-kóng, chí-beh sī Tiong-kok-lâng, chí-beh ē chai-iáⁿ Kim-iong seng-siⁿ siá--ê hit-chhut 《Siā-tiau Eng-hiông-tōan》 ê kò·-sū, to̍h thàu-té ē chai-iáⁿ Tô-hoe-tó. Tô-hoe-tó pún-jiân chí-sī chi̍t-ê sàn-chhiah koh iap-phiah ê hái-tó niâ, kin-pún mā m̄-bat hoat-seng kòe jīm-hô kám-tāng lâng ê thôan-kî kò·-sū, kèng-ka bô hit-lō "hong-tōng bú-lîm, kiaⁿ-tōng bān-kàu" ê thôan-soat. Put-jî-kò chêng 《Siā-tiau Eng-hiông-tōan》 chhèng--khí-lâi liáu-āu, Tô-hoe-tó má lóng tòe i chhut-miâ--khí-lâi. Éng-kòe, kui-sì-kè lóng-sī kng-thu̍t-thu̍t ê soaⁿ-tē, kah o·-chhàu-chhàu ê hái-phiâⁿ; chit-mái lóng pìⁿ-chòe âng-phà-phà ê tô-á-nâ kah kim-sihⁿ-sihⁿ iū-koh súi-tang-tang ê hái-soa-pho. Hiān-chú-sî tī Tô-hoe-tó, ū chi̍t-chō "Siā-tiāu Iáⁿ-sī-siâⁿ", choan-tê leh siâⁿ kok-lāi-gōa ê iáⁿ-sī thôan-tūi kòe-lâi hip tiān-iáⁿ. Múi-chi̍t-tang, lâi chit-tah hip-hì lo̍k-iáⁿ kah koan-kong lú-iû ê lâng-kheh sī chōe kah that-tó-ke. ]]> http://blog.roodo.com/limkianhui/archives/79457.html http://blog.roodo.com/limkianhui/archives/79457.html 在地料理 Sun, 17 Apr 2005 14:50:17 +0800 十外年也，福州...... (繼續閱讀...) ]]> http://blog.roodo.com/limkianhui/archives/62421.html http://blog.roodo.com/limkianhui/archives/62421.html 在地料理 Tue, 05 Apr 2005 22:07:14 +0800