鹭水芗南－闽南语部落

設使汝常在(chhêng-chāi)有咧寫閩南文，汝定著需要一套好用啲“漢字輸入法”，佮一套好用啲“POJ”輸入法（假使汝有咧寫POJ）。這是上起碼啲傢俬，若汝無這套傢俬，我實在想無汝卟用啥來做工課(khang-khòe)。
閒閒無代誌，我想卟共逐家報告一寡仔普通時仔咔有咧用啲“閩南語輸入法”，若是叨位講呣著去，請知影啲前輩來指教。

一、【漢字輸入法】
漢字輸入法，我揀“方旻五筆”。“方旻”有足儕版本，攏差無儕，透底支持“GBK漢字擴大字元集”。只卟汝會曉普通啲五筆輸入法，汝著會曉用“方旻五筆”。簡單講啦，汝若是用普通啲五筆輸入法（比論講“Microsoft Windows”系統有合(kah)啲“王碼五筆86版”），安呢，我共汝講，真不幸，汝干凋有法度拍（輸出）一寡仔咔簡單啲漢字，對著遐个略仔咔複雜啲字，抑是繁體字，汝根本無法度拍出來，“看有食無干凋憖(kan-ta-giàn)，親像佛祖咧蒸油煙”，即款“艱苦兼氣努(khì-ló•)”啲滋味，相信汝穩當有真深啲體會。親像“王碼五筆86版”、“智慧拼音ABC輸入法”、“微軟拼音輸入法”……即款“兩光兼無路用”啲輸入法，正正著是互汝郁悴啲兇手。
現主時，線頂有足儕真讚真好用啲漢字輸入法，實在“俗佫大碗”。“方旻五筆”是其中啲一種，尤其適合中國儂啲氣口。凖講汝遘昑猶未chhē著合意啲輸入法，若安呢，我加婆介紹汝來試用“方旻五筆”。頭前有講過也，“方旻五筆”啲用法（拍字啲撇步）佮“普通啲五筆輸入法”（比論講“王碼五筆86版”）差不多完全共款，增差怹啲功能無sio-siâng。干凋即點來講，著會當看做是“天佮地”啲差別。“方旻”支持GBK，呣若(m̄-nā)會當真簡單來拍出所有啲簡體漢字（簡化字）佮繁體漢字（正體字），上重要啲，伊佫會當輕鬆拍出一寡複雜，罕得看著、罕得用著啲“古早字”（普通話叫做“生僻字”），這著是“方旻”互我憶著(it--tio̍h)啲原因之一。汝用別款啲輸入法，犯勢無法度拍出“俍、肏、墘、朆、憖、辷、覅、墘、覕、嘅、険……”即款互汝感覺誠龜怪(ku-kòai)啲字，不而過，我共汝報告，若用“方旻五筆”，是真輕鬆著攏拍出來也。安怎？啥款？有想卟試看嘪無？這是用“百度”chhiau著啲，有夠儕，凊采揀一个，lia̍h轉去用。
二、【白話字(POJ)輸入法】
“白話字”（POJ）啲輸入法，定著會少。

1. keyman poj_v0.6

現主時，上吤交易(ka-ia̍h)啲是一套名號做“keyman poj_v0.6” ê 東東（最新版本“keyman poj_v1.00”嘛已经上線，详细请看"第2條"）。“Keyman poj_v0.6”有支持“Unicode”（著是“萬國碼” / “統一碼”啦！），實在tah心佫四序(sù-sī)！我是用及真慣勢啦，憑良心講，感覺bōe歹用。若有興趣啲朋友，會當去lia̍h轉去（下載）試看嘪咧，有關的「拍字方法」請參看說明。

2. keyman poj_v1.00

最近“keyman poj”輸入法啲開基祖陳柏中先生，伫伊個人啲BLOG公布最新版本”Keyman POJ_1.00"（試用版，正式版本），現子時當咧提供互儂试用。有按算卟去试用啲朋友，嗳會记先安装舊版啲”keyman poj_v0.6"。"Keyman POJ_1.00"比起"Keyman POJ_0.6"：加设计“第九聲”（请参考"第3條"）、安装啲時，會自動鬥"Doulos SIL"佮"Taigi Unicode"即两套Unicode标凖字型。站長我熱情鬥吹銷！！卟装啲朋友，會得去陳先生啲網誌看使用说明兼lia̍h檔案(下載)，嘛會使直接chhi̍h""即搭lia̍h檔案"(此處下載)。

3. Taiwanese Package2.0

除了頂面所講啲“keyman poj_v0.6”，猶佫有另外一套，oân仔有支援“Unicode”編碼，嘛是朆歹用，著是“Taiwanese Package2.0”(簡稱“TP2.0”，呣是TP1.5哦！)。 “TP2.0”呣但仔會當拍閩南白話字，佫會當拍客語(Hakka)羅馬字佮臺灣原住民語羅馬字！就閩南白話字來講，“TP2.0”比“keyman poj_v0.6”加設計一个“第9聲”啲聲調——用“ ˇ ”即个聲調符來表示(比論講：ă , ĕ , ŏ, ŏ• , ĭ , ŭ , n̆g, m̆......)。這以外，TP2.0設計啲“葫蘆點”（著是“O•”正爿頂懸迄點！）佮“keyman poj_v0.6”oân仔無共款，TP2.0啲“葫蘆點”咔懸，Keyman啲“葫蘆點”咔下(kē)。會造成即款啲差別，完全是“字型”咧作弄，這怹兜啲代誌，呣是咱卟講啲主題。
佮“keyman poj_v0.6”共款，“TP2.0”嘛是完全免費互儂使用（免錢啦）。有興趣啲朋友，去試看嘪，佇遮(共款會得download，嘛有教儂安怎拍字)。

4. MSKLC POJ 輸入法
   
   本站家己開發啲。詳细啲情形，請看即頁

三、【“漢+羅”輸入法】
順紲佫kâng報告一下（犯勢儂已經知影！），有通lia̍h閩南語漢羅（漢字+羅馬字）輸入法啲所在：

• 廈門音漢字輸入法
佇遮：http://www.phahng.idv.tw/ ,按算卟用即套啲朋友噯注意，即套若像猶未支持“Unicdoe”。

• “OpenVanilla”輸入法

“OpenVanilla”（開放香草輸入法），這是一套配合“Mac OS X”作業平臺（作業系統）來咧使用啲輸入法，佇遮：http://openvanilla.org