鹭水芗南－闽南语部落

Lâi Chiat-kang-séng oân-á nî-gōa--a, kàu taⁿ iu-gôan thiaⁿ bô chāi-tē-lâng kóng--ê oē. Hôai-ti̍t kui-kang lóng-kè-sī khut-tī kang-tē, mê-ji̍t chhām âng-mô·-hoe (âng-mô·-thô·) leh kau-pôe, si̍t-chāi bô hit-ê êng-kang khì chhī-lāi se̍h, mā bô se̍k-sāi kah pòaⁿ-ê chāi-tē-lâng. M̄-koh, sam-put-gō·-sî, mā sī ū kah tông-sū sio-chio khì chhī-lāi bóe chi̍t-kóa-á seng-o̍ah iōng-phín lah...Chóng--sī, sǹg-sǹg--ê, chi̍t-go̍eh-ji̍t oat (chhī-lāi) bōe-hiáng chhiau-kòe nn̄g-chōa. Hán-leh kah chāi-tē-lâng kau-koan, tiāⁿ-tio̍h thiaⁿ-bô lâng leh kóng siáⁿ.

Chiu-san-chhī chit-ê só·-chāi, sī chi̍t-ê tē-kip-chhī, thiaⁿ-kóng khah-chá sī sio̍k-î Lêng-pho leh kóan, m̄-koh he lóng kái-hòng-chêng ê tāi-chì--a, lâng Chiu-san chit-chūn í-keng ka-kī to̍k-li̍p chiâⁿ-chòe chi̍t-ê tē-kip-chhī--a. Chiu-san sī khò hái ê siâⁿ-chhī, kéng-lāi lóng-chóng ū 3,000 gōa ê tó-sū, chi̍t-ê sòa chi̍t-ê, pâi kah ba̍t-ba̍t-chiù-chiù.

Nā sī kan-na kóng-khí Chiu-san, hōan-sè bô lōa-chē lâng chai-iáⁿ, put-jî-kò nā kóng-khí Pó·-tô-soaⁿ, chai-iáⁿ ê lâng ún-tàng ke-chin chōe. Pó·-tô-soaⁿ sī Hu̍t-kàu sèng-tē, Tiong-kok bîn-kan thôan-soat tiāⁿ-tiāⁿ kóng--tio̍h ê "Lâm-hái Koan-sè-im phô·-sat" to̍h sī kèng-hōng tī chia. Kóng--khí-lâi mā ū khah kî-kòai--chi̍t-kóa-á, Phó·-tô-soaⁿ bêng-bêng sī tiàm-tī Tang-hái chit-tah, m̄-koh chū-kó·-í-lâi Tiong-kok-lâng soah lóng kóng-chòe "Lâm-hái Koan-sè-im".

Pó·-tô-soaⁿ oân-á sī chi̍t-ê tó, lī Chiu-san-tó ū chi̍t-chat-á chúi-lō·, taⁿ tah khòai-théng liōng-kî-iok ài saⁿ-jī-kù ê sî-kan. Pó·-tô-soaⁿ-tó téng-thâu lóng-chóng ū chiâⁿ-pah keng sī-biō, hun-sòaⁿ tī tó-siōng bô siâng ê hong-ūi. Lán sio̍k-gú-kóng "saⁿ kha-pō· chi̍t khám tiàm", nā chit-tah sī "saⁿ kha-pō· chi̍t keng biō". Múi kang, lóng ē-tàng tī Pó·-tô-soaⁿ khòaⁿ-tio̍h chin-chōe chin-chōe ùi Tiong-kok kok-tē, sīm-chì ùi gōa-kok piàⁿ lâi pài-pài ê hiuⁿ-kheh.

Bân-lâm-lâng siōng-kài sìn hu̍t. Tī Pó·-tô-soaⁿ, put-kóan-sî lóng ē-tàng tú-tio̍h kóng Bân-lâm-gú ê hiuⁿ-kheh. Pó·-tô-soaⁿ ki-tiûⁿ chêng 1980 nî-tāi to̍h khai-thong poe Ē-mn̂g ê hâng-pan, chi̍t-ji̍t lâi-hôe poe chi̍t-chōa. Saⁿ-nî-chêng iū-koh ke khui chit-pan poe Chìn-kang--ê. Taⁿ Bân-lâm í-keng chiâⁿ-chòe Pó·-tô-soaⁿ koan-kong lú-iû siāng tiōng-iàu ê kheh-gôan-tē.

Tû-liáu Pó·-tô-soaⁿ, Chiu-san-chhī iáu-koh ū chi̍t-ê kài chhut-miâ ê só·-chāi, kāng-khóan sī chi̍t-ê sió-tó, hō·-chòe "Tô-hoe-tó". Ē-sái-kóng, chí-beh sī Tiong-kok-lâng, chí-beh ē chai-iáⁿ Kim-iong seng-siⁿ siá--ê hit-chhut 《Siā-tiau Eng-hiông-tōan》 ê kò·-sū, to̍h thàu-té ē chai-iáⁿ Tô-hoe-tó. Tô-hoe-tó pún-jiân chí-sī chi̍t-ê sàn-chhiah koh iap-phiah ê hái-tó niâ, kin-pún mā m̄-bat hoat-seng kòe jīm-hô kám-tāng lâng ê thôan-kî kò·-sū, kèng-ka bô hit-lō "hong-tōng bú-lîm, kiaⁿ-tōng bān-kàu" ê thôan-soat. Put-jî-kò chêng 《Siā-tiau Eng-hiông-tōan》 chhèng--khí-lâi liáu-āu, Tô-hoe-tó má lóng tòe i chhut-miâ--khí-lâi. Éng-kòe, kui-sì-kè lóng-sī kng-thu̍t-thu̍t ê soaⁿ-tē, kah o·-chhàu-chhàu ê hái-phiâⁿ; chit-mái lóng pìⁿ-chòe âng-phà-phà ê tô-á-nâ kah kim-sihⁿ-sihⁿ iū-koh súi-tang-tang ê hái-soa-pho. Hiān-chú-sî tī Tô-hoe-tó, ū chi̍t-chō "Siā-tiāu Iáⁿ-sī-siâⁿ", choan-tê leh siâⁿ kok-lāi-gōa ê iáⁿ-sī thôan-tūi kòe-lâi hip tiān-iáⁿ. Múi-chi̍t-tang, lâi chit-tah hip-hì lo̍k-iáⁿ kah koan-kong lú-iû ê lâng-kheh sī chōe kah that-tó-ke.