鹭水芗南－闽南语部落

公元2005年4月4號啲下晡時，台湾团结联盟（简称"台聯党"）啲党主席苏进强，踙(chhōa)一篷(phâng)儂，去东京参拜"靖国神社"，成做有史以來，頭一个参拜靖国神社啲台湾政党頭儂。

下底是媒体报道"苏进强发表啲言论"——

>>苏进强当场面对记者发表讲话，呼吁亚洲人民"将历史啲恩怨佮仇恨放一邊，注心來追求未来啲和平佮安全"。

>>苏进强讲，伊本儂是"徛在台湾儂佮台湾本土政党啲立场，对着二战期间，去互日本军队招去前線战场，路尾失去性命，现主時又佫供奉伫靖国神社内底，量其约2万8000个台湾儂，佮遐个(hiah-ê)为国牺牲啲日本儂表示敬意"。

>>伊（苏）表示，"全世界任何国家啲人民拢会当自由來表达对遐个为国牺牲啲军人、政府官员佮老百姓啲尊敬，日本儂对靖国神社啲看法该當得着尊重"。

>>讲遘"以中国为主啲亚洲国家反对日本首相小泉纯一郎参拜靖国神社"辷層代誌，苏进强指出，"中国啲观点無法度代表全世界人民啲观点，嘛朆當代表台湾啲观点"。

>>伊（苏）讲，"中国是用仇恨啲观点来咧看待靖国神社，伊個人佮台联党、以及多数啲台湾儂拢無认同（中国）啲看法"。

紲落來(Sòa--lo̍h-lâi)，各界对苏进强言行啲反应——

>>伫台北，台湾原住民立法委员高金素梅昨昏去台联总部，抗议苏进强参拜靖国神社。

高金素梅指出:"苏进强今日仔若是日本儂來讲，伊走去参拜靖国神社，安呢我無话通讲，不而过伊苏进强明明是台湾儂，竟然做出辷款离经(lī-keng/荒谬)啲代誌，實在互儂無法度理解佮吞忍"。高金素梅做一个比论，伊讲"换做叫犹太人去祭拜纳粹统治者，呣知会出现啥物款啲情形？"

>>宋楚瑜: "苏进强参拜神社伤害台湾儂啲尊严"

对着台联党主席苏进强昨昏参拜靖国神社辷层代誌，亲民党主席宋楚瑜今仔日顶晡是严厉来咧批评佮摳洗。宋啲讲"苏进强走去靖国神社拜日本儂，这呣若(m̄-nā)是伤害着台湾儂基本啲尊严，佫咔是徹底丧失民族立场"、"靖国神社内底确实有台湾儂啲灵位，呣佫遮个(chiah-ê)台湾儂呣是为着卟保卫台湾來战死，怹拢是殖民时代啲時，去互日本仔招去战场替怹拼命拼死啲，苏进强啲行为该当受着全民做夥來呸臭瀾(phùi-chhàu-nōa)"。

>>郁慕明(新党主席): "台联敢讲已经成做日本军国主义伫台湾啲替身仔？"

郁慕明发布新闻稿，谴责"台联"的行为。郁慕明指出，"苏进强乌白弹(o·-pe̍h-tōaⁿ)、乌白讲，讲供奉伫靖国神社啲"台籍军人"是"为国牺牲"......事實根本呣是安呢，当時日本仔强强lia̍h台湾人民替怹去拍中国佮其他国家，這"为国捐躯"是咧捐安怎？"郁慕明呼吁台联党嗳真真正正來爱台湾人民，呣通做日本军国主义在台湾啲替身仔(华语:附庸)。

>>国民党发言人张荣恭表示，"靖国神社透底供奉一寡仔二次世界大战啲甲级战犯，是日本军国主义啲代表，伫亚洲人民心目中一贯是‘臭莶莶'(chhàu-hiam-hiam)。苏进强用台湾政党主席啲身份去参拜，互儂看出"台联"崇敬日本军国主义啲心理。设使台独势力佫想卟勾结日本右翼势力对抗中国大陆，安呢对台湾来讲并無好处，该当受着谴责"。

>>民进党: 苏进强应当说明参拜靖国神社真正啲目的

民主进步党立法院党团干事长赖清德表示，"苏进强有必要对民众做一个交代，讲清楚是安怎卟去拜？真正是咧拜啥儂？" 赖清德又佫指出，"虽莽台湾佮日本算讲亲兄宝弟（华文：唇齒相依），不而过，日本过去发动战争、占领台湾，台湾民众遘昑犹原佫有‘朆快活'啲经验"。赖清德表示，"苏进强有必要交代清楚，到底参拜啲目的是啥？是干凋咧拜2万8000外个台湾儂啲神主牌仔，抑是佫有其他啲想法伫咧？"