鹭水芗南－闽南语部落

A-giâu hiaⁿ thê-kiong "Movable Type ê pang-bô·, kek-sek, chó·-kiāⁿ" hō· sú-iōng "Movable Type" ê iōng-chiá lâi-teh chhì-iōng, nā ū teh sú-iōng "Movable Type" chit-thò hē-thóng ê pêng-iú, iu-kî sī siá Bân-lâm-gú-bûn bāng-chì ê lâng, taⁿ thèng-hó piàⁿ khì A-giâu ê blog hia, kā tòng-àn lia̍h tǹg-khì chhì-iōng khòaⁿ-māi.

Pún-jiân góa téng chi̍t-chām-á sī oân-á ū tiàm Tâi-gí-bûn Bāng-chì Tiong-sim hit-tah sin-chhéng tio̍h chi̍t-ê blog, put-jî-kò, si̍t-chāi chiâⁿ put-hēng, iōng bô kúi kang sûi chhut būn-tôe--a. Che tiān-náu ki-su̍t, thiah-pe̍h kóng, góa sī bô-pòaⁿ-phiat lah, siáng chai-iáⁿ bô bí kiam lūn-go̍eh(無米兼闰月), hó-sí-m̄-sí, góa án-ne sió-kóa-á chhiâu liáu bô tùi-têng niâ, hē-thóng to̍h kā góa kéng-kò, kóng chhut-hiān chit-khóan ê chhò-gō·:"Can't use an undefined value as a SCALAR reference at lib/MT/ObjectDriver/DBM.pm line 373"...Taⁿ che mā m̄-chai siáⁿ-mi̍h óaⁿ-ko? Hôaiⁿ-ti̍t góa to̍h khòaⁿ-bô. Góa chit-ê lâng ū 1-pō· bái, he bêng-bêng bōe-hiáng sńg, a̍h-sī kóng m̄-bat sńg--kòe ê tong-tong, góa to̍h ngē-beh khì kā pìⁿ-lāng. He kah kòai--a...Bóe--a soah koh bú kah o·-ian phēng-phōng, sòa-lo̍h-lâi "thái-ko i kah pìⁿ si-lô"(癩膏醫及變尸癆), taⁿ chit-mái kui ê Blog í-keng m̄-sī "lû-chháng-chháng" ū hoat-tō· pí-lūn niâ, he ē-sái kóng sī bē-tín-bē-tāng, beh sí á m̄ chiâⁿ sí, tàm hia leh hioh-chhóan. Chin-chiàⁿ khó-liân-tāi !!