鹭水芗南－闽南语部落

POJ嘛會通!!!

泉州儂、漳州儂、同安儂、漳浦儂、永春儂、长泰儂、雲霄儂、平和儂、晉江儂、金门儂……呣管咱是叨位來啲，辷擺拢聽好(thèng-hó)鬥陣來寫POJ。

冤枉、冤枉，冤枉无地讲！白話字(POJ)的确是一垛(tè)宝，逐个呣通目睭覷覷(chhuh-chhuh)假看無，迄啰(hit-lō)金银财宝共阮當做是路邊粪扫(pùn-sò)。呣是讲我某儂幐(thīn)白话字，超工伫遮咧讲好话，家已呵咧朆臭騒(ka-kī o leh bōe chhàu-chho)。各位若現時犹佫咧堯疑(giâu-gî)，请恁才聊聊仔(liâu-liâu-á)看紲落去——

白话字是安怎有法度擋遮久(tòng chiah kú)，会得按清朝擋及(kah)现主時？白话字佫有啥物秘訣，有法度湠(thòaⁿ)及對惠安、對漳浦去？各位，he呣是干凋厦门、干凋台湾尔 (niâ/niā)哦，听互详细，是惠安、是漳浦呢(neh)！朋友啊，这呣是简单一句"凑拄巧"、一句"注死啲" 着有法度来共伊车及倒呢。

各位，恁敢有想卟知影，是安怎往过白话字有法度湠去遘惠安、湠去遘漳浦咧？古井水鷄辷擺着卟踙(chhōa)恁来去看详细。先交代一下，卟去晉前，请逐个先噯會记得辷句话：白话字是一种文字，一种有法度做拼音用的文字；文字本身佮拼音有本性的区别。记好势呣？真好! 昑，着tòe我行——

茶啉一杯，先来看这-->http://blog.roodo.com/limkianhui/archives/62705.html

歇睏一下，佫来噯看这-->http://blog.roodo.com/limkianhui/archives/62699.html

各位，看好抑未？若犹未，做汝匀匀仔看；若好势，咱继续佫来讲(káng)。

頭拄仔，古井水雞有交代逐家卟看晉前，噯會记得"白话字是一种文字"。无呣着，白话字從(chêng)发明了後，一百外年来，透底互儂当作文字伫咧用，当然白话字本身嘛具备拼音啲功能。卟分明"文字"佮"音标"啲差别，嗳看：

第一，发明啲目的。看伊到底是发明卟做文字来用，抑是干凋卟做音标尔尔。

第二，實際伫社会顶使用啲情形。看辷种"符号"（文字佮音标拢是属于符号）是互使用者当作文字用，抑是讲干凋当做注音啲工具尔尔。

真明显，白话字是一种文字，呣是音标。

佫举一个例来说明。1982年厦门大学中国语言文学研究所汉语方言室出版《普通话闽南方言词典》有合(kah)拼音方案(简称"普闽式")；台湾语文学会伫1990年代初期发明"TLPA" (全稱 "台灣音標方案", 讀做"Tho·-lú-pà")；1990年代末期余伯泉先生发明"通用拼音"......辷三套符号来讲，发明者啲目的拢真单纯，着是当音标用；實際伫社会上共款只是互使用者摕来(the̍h-lâi)注音尔，拢无做文字使用啲历史。所以，咱讲"TLPA"、"通用拼音"佮"普闽式"(只是三个代表，其它犹佫真侪）拢算是拼音(音标)，怹佮白话字上大啲无共款，是"拼音"佮"文字"的增差。

台湾一寡仔母语人士啲看法：一种语言会当有幾若套無共啲音标，不而过文字上好干凋一种。十外年来，伫台湾母语界，各派系因为"拼音、文字"啲争议佮恩怨，不管時着来咧"搭戰棚"，實在严重来损害着母语资源。辷暂仔，为着卟重头抾和(khioh-hô)各界啲力量，有儂提出辷款啲主张，着"文字"佮"音标"同時存在啲策略，比论讲，承认白话字做文字；承认"TLPA"(或者其它啲音标方案)做音标。

古井水鷄差不多會认同辷款啲建议，安呢做啲好处上無嘛有：

第一，化解各派系中间啲恩怨，做夥為母語拍拚，"三儂共一心，烏土變成金"。

第二，抾和了後，互相之問，拢會當用家己啲优去修補對方啲欠点。比论讲，白话字的优点是"有做文字啲历史"、"写法咔简便、咔水氣"；TLPA啲优点是 "照顾會着各种腔口"。若是摕TLPA来替白话字注音，实在讲oân仔真讚。这着亲像古井水雞摕国际音标来咧共白话字注音共款。