鹭水芗南－闽南语部落

小泉 照时照顿 去咧 拜鬼，诚侪 中国侬 气kah phut-phut-tiô，一腹火 强beh 忍 bōe 落来。我讲中国侬实际免hiah紧张，若会当暂时先将道义放一边，换一个角度，泠静来看待小泉即出小鬼仔步，形势 hoān势 soah拢变倒过来，变kah对中国真有利。敢有影安呢？看māi 汝着知：

　　日本军国主义阴魂不散，着若像「互汝跋倒」（哈利伯特）即出故事内面 hit箍 伏地魔，不管时着咧走找机会，数想beh借尸还魂。侪年来，关于日本政客朝拜靖国神社的问题，一直是东亚地区和平佮安定的一粒定时炸弹。Nā即点，中、韓、朝三国拢诚清楚，呣佫世界真侪国家拢看无、想无。即摆，好佳哉 是 日本仔数想beh做联合国常任理事，想kah beh起痟，又佫车盘hiah-nī thiám，才来引起中朝韩三国民众强烈反弹，几落千万侬相争签名顿印起抗争，着是安呢，世界才通了解日本万恶、卑耻的真面腔，才通了解日本侬无影咧改过自新。即mái 拄好遘kah世界各国纪念反法西斯战争60周年的流摆，iah日本侬偏偏beh伫咧即款敏感时期硬斗拜神祭鬼。中国 本成 有空着咧找无榫啊，即摆拄好趁着机会，顺sòa无加工，tiàm联大kā修理理的，tu̍h一个互去哀父叫母。这敢讲呣是好代誌？Iah nā即阵，上无， 白当大日 无侬敢讲日本政府拜靖国绝对hām往早罪恶的历史无牵碍。会用讲，中国阻挡日本入常，不但代表着本国佮侪侪厝边国家的民意，又佫是有效来约束着日本国内愈来愈chhàng鬚的军国主义。中国即mái手头攑的即叢旗，讲咔水气的，he是表示讲咱全心全意咧维护反法西斯战争的胜利成果，咧维护联合国的宪章，咧保卫地区佮全世界的和平！咱是咧替天公伯维护正义！这叢旗当然嘛嗳攑，攑愈悬愈好。

　　即叢旗，着亲像照妖镜，呣管伊日本仔道行偌悬，见着镜总是嗳现原形。伫国际场合，面对着正义的压力，碍膦 kah 无天无地的日本仔——小泉，孤不而将 嘛着嗳 假空 道歉 会失礼。伊nā 假忏悔、假收骹洗手，暗静咧招兵买马，只要中国chang bōe着尾，找无借口，结果嘛是无伊法。不而过，伊偏偏着是bōe忍性，生成着是chiah hiau-pai 兼 碍膏，昨日拄才会失礼niâ，今仔日随反面 佫再 去咧 拜鬼。小泉稳当想讲，好啦，有心beh chhiâu 着咔大摊的，伤 sán摊 是 歹看相。这着是日本仔的传统。安呢当然真好，证明伊小泉进前的道歉拢是咧搬戏讲鬼话。像即款讲一套做一套，敢做呣敢担当的国家，中国当然bōe使 互伊做常任理事。　　

　　小泉定著有伊家己的借口——横直中日关系嘛无可能变kah真好，ah我小泉做好做歹拢无啥要紧。小泉 即个 侬 nā准 无 阴琛，我看伊 定著 是 一条肠仔thàng尻川——直lòng-sòng，伊佮 hit阵（tīn） 右翼死党 可能犹佫无想着安呢的一条道理：虽然“bōe真好”，不过嘛无一定会变“真害”。Ah事实上，中日关系恶化对日本造成的伤害hoān-sè咔大过中国。现白讲啦，伊小泉一再chhōa头去kā 战犯亡魂磕头（kha̍p-thâu），中国靳膦（gīn-lān）歸靳膦，实际根本嘛无损失着啥货，iah汝日本咧？日本自战後遘今（kàu taⁿ）thūn几落萬億美金，嘛 了60外年的时间，真无简单才伫国际上chhāi即支「正面招牌」，soah为着汝小泉一时的愚图（gû-tû）佮莽撞（bóng-chōng）来毁毁掉。这叫做「造铳拍家己」，中国实在应该替伊感觉欢喜，呣好挡伊。像即款出头，舞愈侪摊是愈好，对中国加真有利。

　　中国 即阵 thèng好 放心仔修理日本：阻挡伊「入常」、mài佮伊谈东海问题（时机未遘，谈 嘛是无彩工）、六方会谈的时mài佮伊协调（nā谈无结果，thèng好 使弄 美国去找伊 出水）、拒绝高层会晤、使弄朝韩佮伊 对khia̍t……横直，伊nā一工呣改邪归正，咱着永远mài佮伊好。中国现阶段beh出招，步数是真侪，政治、经济拢免靠伊。想beh找中国的麻烦，恐惊是找呣着时阵囉。

　　中国永远嗳会记得：呣通想讲日本即mài无做歹，着来奖赏伊。一定嗳等遘伊真心悔改，表现良好，才通hiù一枝骨头互伊囓。小泉为着即摆谈判，kán-ná有心beh格屎，按算讲beh用停止拜鬼来交换东海利益，或者要求中国 手势攑悬 放伊 入常过关。小泉会安呢考虑，并呣是完全无根据，因为咱中国自来oân-á诚糊涂，捌算呣捌除，常在咧食chit-lō亏。

　　日本侬 生成 鸡仔肠、鸟仔肚，爱小贪、爱计较，nā讲起外交，实在是 顸颟 kah 准ná 牛。Tng-tang时，想beh 讨 北方四岛，看着 俄国侬 bōe-giàn，伊soah提出八项条件，想讲安呢做 上起码 会当 保tiâu 四项……这实在会互侬笑死。M̄-nā安呢niā，汝看伊beh拼「入常」进前，开钱ná liah纸，银票（纸字）sì-kòe掖；不而过，一下看见无望，赶紧喝讲beh来减会费……按头遘尾，着ná像戏棚顶的小醜仔。中国对付日本的策略，上好上好是嗳定定kā使弄、kā刺激，互伊加做一寡戆代誌，呣免佮伊对面起冲突，佫咔呣通佮伊咧军事对抗。

　　中国的外交官，脑筋实在呣好 缚緪緪（pa̍k ân-ân）！