鹭水芗南－闽南语部落

三不五時，看見一寡中國ê網民佮對岸ê網民佇網頂咧冤（像這、這、這……），透底是為著政治信念無共款，見擺戰kah烏煙乒乓①，刣kah血流血滴……看著實在真艱苦，心肝頭久久攏bōe快活。

進前，家己直直咧強調講無beh póe會（póe-hōe） 政治，嘛罕得坫家己ê Blog議論政治（有是有，無儕啦，涉及中台關係ê，佫咔是少）。Soah呣知影即个世界本底著是hiah-nī仔狹②，愈驚愈著骹脊骿③，愈無合意ê代誌，串串④定定會拄著。

政見無siâng，信念無siâng，信仰無siâng，人生ê態度嘛無siâng。汝有汝ê想法，我有我ê看法，實在無必要強求逐个攏sio-siâng。不而過，雖然想法無siâng，若是逐个攏會當互相尊重、互相體諒，凡勢即个世界著無hiah-nī儕拗橫⑤佮抗爭，社會嘛會 加咔 安和樂利。

做呣著代誌，噯有擔當ê勇氣；講呣著話，噯知通檢討家己。儂講「是呣是，罵家己」，各儂若會當退讓一步，著無hiah-nī儕 銃煙 佮 火藥味。

即mái 有寡仔中國儂有夠 無路幹⑥，khang-khè呣去做，規工 食飽閒閒 四界趖，beh 去插⑦儂ê閒仔代，煩惱儂「建國」、煩惱儂「加入聯合國」、煩惱儂「選總統」……Kâng管hiah儕 beh乜代⑧？食飽換枵 咧 討皮疼。He攏儂ê家內事，hām汝soah有治代nih?

好啦，準講過去、過去ê過去；古早、古早佫古早，怹確實捌互汝管有份，安呢是佫會當安怎呣？儂即mái 呣佮汝好啊，bōe-giàn認汝啊，ah汝soah面皮厚厚 硬beh佮儂 牽 麵線親，安呢敢好意思？敢bōe傷過 自是？敢呣驚儂愛笑？佫講啥物「主權」、啥物「同胞」、啥物「統一」，真正會笑死儂！He攏空ê啦、冇ê⑨啦，是會食得呣？一斤值偌儕？所以講，為著即款無意義、無任何意義ê代誌，也佮儂諍kah頷管筋⑩大條細條，佫 hông 詈kah、譙kah、幹kah、肏kah，有影 咔衰若（ná）膦鳥！

總是，kâng罵也呣好，hông罵也呣好。Beh佮儂冤家，噯看是為著啥物代誌，有價值抑無？有一款中國儂，生成 著是 手咔賤，「狗無吠，撓(lā)狗喙」；好死呣死，beh講儂ê閒仔話，佫kâng訕siâu⑾，才來hông蹧躂，佫害咱chiah-ê無辜ê儂，嘛soah互儂罵摻落去。

我講chiah-ê中國儂，實在真bōe曉通想。講一句咔現實ê，taⁿ家己本國嘛呣是講真好過，插插儂hiah儕 是beh含膦，「家己睏桌骹，煩惱別儂ê厝漏」，真正「戇giàn頭」！咱希望chiah-ê厚話ê中國儂，會當冗早⑿來覺悟：中國現子時上要緊做ê代誌，是拼經濟、拼建設，呣是beh佮拼喙舌，嘛呣是beh佮儂 搭戰棚。

〖添注〗
①.烏煙乒乓：o·-ian phīn-phōng。華語，烏煙彌漫。
②.狹：oe̍h / e̍h（漳腔）
③.骹脊骿：kha-chiah-phiaⁿ。華語，後背。
④.串串：chhoàn-chhoàn。恰恰。
⑤.拗橫：àu-hoâiⁿ，拗蠻。華語，蠻橫。
⑥.無路幹：bô-lō·-kàn，無路用、無路駛。華語，沒出息。
⑦.插：chhap，管。
⑧.乜代：mih-tāi。華語：幹嘛、幹什麽。
⑨.冇：phàⁿ，空冇（khang-phàⁿ）。華語，空泛不實。
⑩.頷管筋：ām-kún-kin。華語，頸部血管。
⑾.訕siâu：soan-siâu，「摳洗」。華語，訕笑。
⑿.冗早：liōng-chá，趁早。