鹭水芗南－闽南语部落

(Limkianhui編譯)

最近伫民意論壇，有看著幾若篇文章，透底是咧強調“漢文化對台灣來講真正重要”即款啲主题，除去進前蘇菲亞講遘台語（譯者注：闽南语）著是文言文以外，6月11號，踮民意論壇，又佫看著（台北市台語漢文教學研究會會長）陳殿冠先生發表啲文章。伫即篇题目號做“擴大支持人數才是保台獨之道”啲文章内底，猶原是會當來鼻著“不可割断漢文化”即款啲氣味，不而过，文中所透露啲訊息，筆者實在是無法度認同。

頭起先，陳先生講遘怹院啲內底，儕儕長老级啲，透底拢幐(thīn)綠營，有啲儂看著台日（譯者注：台灣日報）啲讀者咧評論講「大多數台灣儂啲祖先是百越人」了後，竟然當場掠狂起來：「看bōe落去也，唉 (hé)…講恁父是番仔！」……陳先生伫文章内底佫寫講，共款啲情形，一年外來，伊是定定有咧拄著。

文中另外有一段佫講：「即擺有儂講台灣儂是『百越人』，鼓吹台灣儂著噯放捒『漢人情結』……這拄好違背人類『認同高尚』啲天性」。

看遘遮，筆者實在完全無法度相信家己啲雙目，taⁿ啥物時代也，猶佫有儂用即款漚古啲眼光，看bōe起「番仔」、看「番仔」無目地。設假怹家己啲祖公祖嬷確實呣是漢人，是真真正正啲百越人，安呢是叨位咧可耻？是叨位咧呣好？敢講百越著一定是番仔，敢講番仔著咔無路駛呣？平平拢是出世來做儂，敢講汝漢人著咔高貴，亦番仔儂著咔低路呣？

何況講，在筆者目前所瞭解，講遘台灣儂啲血脈，到底佮所謂啲漢人有啥款啲關係，佫需要學界進一步來分明﹔往過透底食認家己是漢人、祖先全部拢是唐山儂，這犯勢有真大啲問題。手咧寫中文漢字，喙咧講中原古音啲台语、客语，實際無一定是漢人。数十年來，台灣啲變化吤緊，頂缘啲序大儂，客话、台语透底猶佫诚輪轉，不而过少年囡仔诚儕拢bōe曉通講也，怹啲「母語」，事實已經變成華語。照即款笵勢（pān-sè）佫过一代，若准無儂講起，我看迄陣啲台灣儂，定著會認定怹家己啲家族本底著是華語族群。強食弱，勝者為王，佫加政治勢力鬥推捒，遘尾仔強勢文化完全食掉、完全改造弱勢文化，實在呣是啥物怪巧啲代誌。所以，現此時，認定講家己著是正港啲漢人，應該是猶chhōe bōe著硬拄硬啲理由佮根據，講咔透白啲，只不过是“家己講家己話”爾爾。

用筆者家己啲經歴來做一个比論，細漢時接受國民（黨）教育，直直當做家己是中國儂，有時佫會去比照一寡課外册，注心卟伫家己啲身躯頂揣出“正港漢人”啲特徵，若有揣著相共啲著歡喜kah、畅kah。這以外，因為教科書啲「介紹」，頭壳内一直透存在著一寡错误啲歷史印象，定定想講（認為）伫中國即塊土地上，除去漢人以外著無别啲族群，其他族群拢踮伫中國以外啲所在咧哼呻(hàiⁿ-chhan)﹔又佫相信講，台灣四百外年前是無儂徛起啲孤島，島上四界拢焦一寡野獸精牲，一直遘kah漢人來台開荒(khui-hng)了後，台灣chiah開始脫離hit款“穢世（è-sè）” 佮“野蠻”，chiah真正“活起來”。後來，慢慢仔瞭解著佫咔儕啲课外智識，原底hiah-ê錯誤的觀點，自安呢沓沓仔(ta̍uh-ta̍uh-á) 拚拚擜捒(hìⁿ-sak)，開始重新來思考家己啲根源，思考咔早呣捌思考过啲事事项项。遘尾仔，chiah知影講以早硬互儂灌落“漢人沙文主義”啲迷魂藥，實際是“家己看bōe著耳仔”，著親像古井底啲水雞，bē佫厚性地。

路尾，嘛是序大儂來講起，筆者chiah知影講，家己啲阿嬷是平埔番，iah自使講筆者啲阿公啲阿公真正是按中國福建某一个所在蹽过來啲，he嘛干凋代表筆者有一部份漢人啲血脈而己，假使若硬卟照搬頭先hit个 “掠狂啲”啲理路，安呢，筆者知影講家己有透濫平埔族血統了後，呣著噯開喙幹三代：「啥物仔碗糕！經體我番仔著准煞也，佫kā恁父詈雜種仔！」

相信講儕儕認同台灣國家主體性啲朋友拢有共款啲看法，強調血統實在無啥意義，陳殿冠先生啲文章嘛有講遘，無論種族、文化、語言、風俗，只要認同台灣即个國家就是台灣儂。不而过，筆者卻是伫hit个起狂啲朋友身上，鼻著真重真重啲“漢人沙文主義思考模式”啲氣味，bōe輸只要有儂講汝呣是漢人、呣是正港啲漢人，汝著講儂呣著、講儂無尊重汝（在筆者對中國歷代變遷啲認識，認為講台灣並無正港啲漢人）。即款啲思考模式，敢講bōe龜怪？

當然，去中國化呣是卟放捒中國文化，前者是咧講政治、後者是咧講文化，漢文化伫台灣文化當中佔重要地位，這是事實，不而过，萬项拢卟强求正統漢族文化，絕對無健康，對台灣啲國家正常化嘛無任何啲幫助。若卟讲漢文化對台灣有啥呣好啲，筆者啲觀點是：死守正統、重古輕今，正正是漢文化束縛台灣正常發展啲一个真不利啲因素。

PS.
原文：華文，作者：阿君仔，發表伫“台灣日報民意論壇（2005/06/12 ）”，標頭：是番仔何辱之有？（原標頭：是番仔又如何？）