鹭水芗南－闽南语部落

譯文：闽南：Limkianhui

　　(原文——華文:《反击“我曾是一名丑陋的中国人”》 作者:中国深圳 伍 2005-06-23)
　　前几日，伫早报(注:联合早报)顶面看著一篇号做”《我捌做过下路(kē-lō·)啲中国侬》”(華文:《我曾是一名丑陋的中国人》)啲文章，看了感觉真bōe爽。本然想讲犯勢无侬会同意即款糞扫(pùn-sò)文章，無疑悟路尾soah收著幾若张共款啲转发邮件，看勢是有必来回手一下，咔bōe互侬白白布染遘乌。为著方便起见，下底用《下》文来代表迄篇代替迄篇文章。

　　《下》文作者写kah躼躼长，讲kah喙角全波，结无非著是：中国侬四界呸痰、呣排队、乱矴糞扫、呣捌字兼無卫生、素質真害…所以是下路啲中国侬；当中又佫掩勘著另外一个结论：即个侬（作者本身）以早共款是一个下路啲中国侬，呣佫即陣bōe下路喽。（呣知即擺伊是呣是将家己当作是一个飘撇、高尚、有素质啲中国侬？若精實安呢想，伊啲脸皮著有影咔厚屎礐梆！）

　　讲遘中国侬乌白呸痰、呣排队、无卫生即款不良习惯，咱食认，有影，啥物侬也bōe當诤讲無。若看bōe著事實，自欺欺人，有影吤可耻，不而过伫《下》文作者眼内，中国侬soah因此行遘十足下路啲地步，按即个侬吐出來啲话屎当中，互侬产生即款啲印象：全世界，整个啲地球，四界(sì-kòe)告示满满是，而且拢全写中文，写中国侬啲见笑代！即个侬有影是hàm kah bōe穿蠓罩！若像全世界拢咧用中文，中文已经普及遘地球上啲任何一个角落，连臭水沟嘛拢有tah中文告示！先mài讲中文敢有影已经全世界通侬咧用，中国侬敢有影一四界拢有tè拄——若精實安呢来讲，中国呣著沖kah無tè比喽！干凋beh讲hiah个标语，即个侬啲观点是全世界即款啲标语，干凋用中文来写，干凋beh写互中国侬看啲！有影譀古兼离經！略仔有淡薄仔智識啲侬拢嘛知影，中国以外啲国家，共款嘛常在(chhiâng-chāi)用怹本国啲文字来写、来警告侬“呣通乱矴糞掃”、“保持安靜”等等。日文写啲、英文写啲敢讲著無呣？伫中国国内，hiah-ê用英文写啲警告标语敢讲是beh中国侬看啲呣？即个侬若是食饱閒閒無代誌，嘛聽好(thèng-hó)用baidu去chhiau看嘪咧！

　　《下》文作者伫文中捷捷讲一寡侮辱人格啲语词：丑陋(下路)、呣知廉耻(呣知见笑)、弱智(愠忳、無头壳)、低贱(爛chōaⁿ)等等——白纸乌字，讀者聽好去看，犹佫真儕伫咧。伊共家己pûn kah偌仔文明、偌仔缘投、偌仔巧、偌仔高尚，其實咧，ùi chiah-ê语词拄拄互咱看出伊本底啲性素：一个真正下流、无耻、假君子真小人啲術仔，比hiah-ê互伊看做下路啲中国侬佫咔下路！（本底無想beh 用即款语词，为著回手，孤不而将！）

　　即个侬竟然替日本仔讲话，讲中国咧干涉日本。看遘遮，我开始僥疑伊敢真正是中国侬。伊那咧訶咾韩国侬如何注心国家建设，佫那咧呸相(phì-siùⁿ)中国侬放蕩樂畅，呣涨志(chiáng-chì)，磕bōe著beh干涉日本侬。敢讲伊拢呣知影韩国侬是上吤怨恨、上吤討厌、chheh日本chheh kah 入骨啲呣？咱承认“共侬侵略”佮“去互侬侵略”是无论过去、现在、抑是未来拢有可能发生啲代誌，敢讲因为咱以早比侬咔软汫(nńg-chiáⁿ)、别侬比咱咔勇健(ióng-kiāⁿ)，怹著应该来共咱侵犯、亦咱著应该互怹侵犯呣？敢讲因为東條英機是日本侬啲英雄，咱就应该bōe記伊是咱啲冤仇侬呣？敢讲連beh詈骂侵略者也bōe使得呣？——安呢咱参亡国奴有啥分别？敢讲讉責日本了後咱soah呣知通建设国家，呣知通拍拼奮鬥呣？實在想無即个侬头壳是安怎咧想！即个侬佫讲遘日本侬、美国侬是安怎拄安怎咧紀念怹啲戰爭英雄，我颠倒想beh问伊，伊是了解幾个中国抗日英雄咧？

　　即个侬佫讲著中国啲经济。认为讲外国侬不時咧麻醉中国侬，有時暗勘中国啲成績，有時佫假意訶咾。咱食认确實有即款啲外国侬伫咧，国内确實也有一寡侬，略仔出淡薄仔成绩著畅kah 逐项bōe记了了！不过，看即个侬啲意见，若像全世界伊上知势，bōe输除了伊，著無侬了解代誌啲真相。是讲，伊啲真相又佫是啥貨咧？是中国根本無任何进步，無任何成功，干凋偆“落後”佮“下路”。真正有够厚面皮汝看！我想大多数啲侬拢会客观看待中国啲经济，有成绩嗳肯定，做呣著啲嗳改正，做无够啲嗳提悬。烏白樂畅無咔cho̍ah，磕bōe著悲观失志、看輕家己佫咔是呣通！

　　即个侬佫讲遘中山市有一个护士小姐去印度旅游啲代誌。凭he，伊就认定中国伫亚洲比bōe著日本侬、韩国侬，连泰国侬嘛咔赢咱。若中国咧？“哼！散kah鬼beh掠去！！”……連印度侬也呣相信去旅游啲黄种侬竟然是中国侬。讲著這，干凋会当说明一个问题：即个侬oân仔佮hit个印度侬共款：古井水鷄，呣捌食过猪肉佫呣捌看过猪行路！

　　即个侬又佫讲遘世界顶啲三个民族，伊认为he是上吤优秀啲三个民族：德国侬、犹太侬佮韩国侬——當然bōe包括中华民族——佳哉伊犹呣敢共日本侬算在内。咱無beh議论别啲民族安怎拄安怎，不过咱知影，凡物(mi̍h)拢bōe使脱离各自啲环境，干凋用个别数字來做断定佮评判。也著是讲咱bōe使用即款步数來判定叨一个民族咔优秀、叨一个民族咔無路驶。可比讲，即个侬摕(the̍h)德国ＧＤＰ佮中国啲ＧＤＰ來相比了後，竟然得出“德国侬比中国侬咔优秀”即款啲譀古代！咱實在呣知伊讀册讀伫叨位。亦若(iah-nā)讲遘“诺贝爾奖”，咱beh请伊先去了解一下仔诺贝尔奖啲背景佮世界政治局势啲背景，了後chiah佫來讲。若讲著战争，输赢佫咔是平常代誌，是啦，中国有影互侬拍败过，是讲世间是叨一个国家呣捌互侬拍败过？亦是安怎呣讲汉唐盛世咧？巴勒斯坦侬受以色列犹太侬啲压迫，遘taⁿ犹咧为建国大業拍拼奮鬥，無beh认输，亦若照即个侬啲思路，巴勒斯坦侬呣soah比犹太侬咔优秀？！伊佫放風讲韩国侬啲国际地位咔赢过中国侬，犯勢有影啦，不过he拢嘛靠實力咧做保证？亦佫会当算啥？敢讲這soah会使當做韩民族（朝鲜族）比中华民族咔优秀啲理由呣？亦若(iah-nā)日後换中国侬啲地位比韩国人咔悬高，安呢呣著嗳佫扳(péng)过來讲？朝鲜佮韩国敢呣是共民族啲，這又佫怎样解说？干凋希特勒、日本仔会去鼓吹(kó·-chhui)啥物“德意志民族是上优秀啲民族、大和民族是上优秀啲民族，别啲民族拢總是糞掃！……”遘尾咧？结果呣免我讲，逐家拢知！就使是安呢，無…上起码怹佫算讲是咧鼓吹家己啲民族，亦若即个侬咧，伊soah咧鼓吹别侬啲民族！真正赦死赦衆！

　　即个侬佫遘著“AA制”。伊用“討厌”來比论中国侬啲作風，说明讲伊有影怨中国怨kah入骨！咱讲，中国侬佮美国侬，各侬啲文化無共，“AA制”無一定 to̍h拢適合中国侬。美国侬beh安呢做原在有怹啲因端。不而过，因为安呢soah互咱看出即个“土番仔”啲虚伪，伊根本呣捌中国侬啲人情关怀、呣捌中国侬啲情感、伊看bōe著中国侬伫咧互相帮赠(pang-chān)、互相悿痛(thiàⁿ-thàng)；伊干凋看著伊本身佮伊啲利益；伊干凋会曉有样学样！當然，话讲倒转來，咱呣是讲中国侬啲做法有偌好，不过起码咱嘛应该嗳實事求是！Tio̍h著是tio̍h，呣tio̍h著是呣tio̍h！

　　讲遘有一个中国啲技工咧学習德文啲時，即个侬得出一个结论：漢语伫英语面頭前认路输啲時，嘛共款嗳向德語认输，讲13亿中国侬拢是一陣茬骹数(lám- kha-siàu)，创造啲财富比bōe著8000萬德国侬，所以汉语局不局(kio̍k-put-kio̍k)嗳食認咔输侬德语。這是啥款啲理路？實在譀kah無譜！若照安呢讲，he美国侬嘛咧学中文，安呢英语呣著嗳自认咔输汉语？！亦美国侬啲素質呣soah佫咔害？！總讲一句，即个侬不但看bōe起中国侬、看bōe起中华民族，連中华民族啲语言伊嘛看bōe起！咱真正想無中国犹有啥物物件伊bōe討厌啲——我看，犯勢干凋bōe討厌家己爾！

　　即个侬竟然佫讲遘计划生育，佫咔互侬生氣！英国番仔讲hit句“中国有上吤讚啲节育措施，因为中国查某全世界上吤下路兼愠忳！”這明显是經體佮侮辱侬。著是即句话，即个侬竟然认为he只不过是一句咔特别啲言语爾爾(niā-niā)！是安怎特别，伊無解释。颠倒soah共(kā)国民啲愤怒讲做是“神經过敏”！对即款啲话，伊当然是無咧佮侬“敏感”，拍pho̍k仔著驚bōe赴咧，哪会敏感？！即个侬竟然用“下路、爛chōaⁿ”來咧蹧蹋hiah-ê超生啲母亲！呣知即个侬敢犹有做侬上吤起码啲道德佮尊重！伊無了解hiah-ê母親是安怎beh超生，無了解怹啲生活佮想法！竟然佫用hiah-nī仔恶毒啲話來經體怹！就使讲(chiū-sú-kóng)hiah-ê母親生佫咔儕，he嘛不过是怹一時想無遘、受環境影响，或者讲暂時無了解飼囝艱难 chiah会安呢！怹啲頭脑犹佫真傳统、真閉四(pì-sù)，呣佫he绝對呣是“下路、爛chōaⁿ”，按無共啲角度來看，怹嘛真伟大！即个侬用即款啲言话來共侬抠洗，颠倒互侬感觉真正下路啲侬是伊本身！

　　Ā好ah！我實在無想beh佫写落去喽。即个作者伊話屎咔儕狗毛，佫写kah不答不七，無影無一迹，若beh一條仔一條宽宽仔(khoaⁿ-khoaⁿ-á)來共伊thuh，來共伊giah，實在是拍爽(phah-sńg)我啲烏墨、了我啲喙水。

　　即个侬ùi骨底看中国侬無目地，拍死呣做中国侬！因为中国侬犹未完全进化，垃圾(lap-sap)兼愠忳(ùn-thùn)！呣知即个侬敢有了解：伫中国上吤茬骹(lám-kha)啲時陣，尊敬啲吉鸿昌将军伫国外啲时，胸前定定爱吊一tè有写“我是中国侬”啲牌仔，he是为beh互天下间啲侬拢知影讲伊是一个堂堂啲中国侬、有志氣啲中国侬！伫国家遭受强摃(kiông-kòng)蹧蹋佮踳踏(thún-ta̍h)啲時，有hiah儕英勇啲华夏囝孫，为 beh做一个有志氣、有氣魄啲中国侬，甘願性命放呣挃(m̄-ti̍h)，也beh佮敌人拼生死！

　　即个侬写文章写kah长躼sò，按内底，咱聽好了解伊根底著是一个無民族自尊、無民族自爱、無民族自重啲侬；一个食認衰bái、看bōe起家己、将外国侬当做怹祖宗咧奉侍啲侬，伊啲人格是hiah-nī歪cho̍ai、失常！

　　即个侬将家己讲出kah bōe输若“真gâu，真排祉(pâi-chí)，真了不起”，好親像全世界伊上文明啲款。不而过，伊soah用“愠忳(ùn-thùn)、下路”即款卑耻佫恶質啲字眼来經體(keng-thé)中国侬；伊声声句句讲言论自由，呣佫soah共别侬啲批评讲做是“有空咧chhōe無榫”！有喙讲别侬，無喙讲家己。若像伊讲chiah著，别侬讲啲拢总呣著！有影是号做“也beh做婊囝，也beh装婌女”，bōe見bōe笑！即个侬kán-ná佫因為家己 chông bōe著錢，咧bōe爽，竟然也佫讲出来，佫共責任在(chhāi)蹛别侬啲身上，膦鳥歪牽拖尿桶漏，牛母bōe生牽拖厝邊，可見伊啲面皮有偌厚，厚 kah三粒铳籽也拍bōe迵(thàng)。即个侬认为讲中国侬若拢讲究卫生、拢讲文明，安呢中国著随强起来、随勇起来，soah bōe曉通想讲，自开世地(khai-sì-tē)以来，hiah-ê出賣国家、出賣民族啲漢奸、糞掃侬，拄好嘛是hiah-ê穿kah齊斩斩(chôe -cháⁿ-cháⁿ)、水噹噹啲侬（親像讲“汪精卫”、“李登輝”即款侬）。咱讲安呢并無代表讲咱著会使呣免讲究卫生佮文明，這是两回事，魚還魚、蝦還蝦。国民素質beh好，beh提悬，he需要国家啲经济、文化等各方面同齊、共步來发展！国家beh强、beh勇，he需要咱嗳有自尊、嗳有志氣、嗳共心，嗳有为国牺牲、奉献啲意志佮勇氣！亦外国侬上惊著是即款啲中华民族！

　　是啦，现taⁿ中国侬确實有真儕欠点伫咧，比論hit个作者所讲著hiah-ê毛病。咱每一个中国侬嘛定著嗳不断改进、不断提悬！做呣著啲，咱嗳改；做无够啲，咱嗳用心做。不而过，咱无需要自卑，无需要看輕家己，咱嗳有志气。这呣是大曳(tāi-ia̍t)，咱需要用客观啲态度来看待咱家己！

　　咱需要别侬的批评佮漏氣，嘛嗳自我批评佮检討，不而过咱无需要侮辱！亲像即种侬，用即款”东方不败式”啲批评——“beh练拳頭，先割裤頭”，这咱需要！中国侬无hiah下路！无hiah爛 chōaⁿ！中华民族自三皇五帝开始，中华文化傳湠(thn̂g-thòaⁿ)五千年，呣是一半个仔恶質兼无才、狡怪(káu-kòai)兼诙諧(khe -hâi)啲讀册侬，凭三两篇仔糞掃文章著会当共车倒啲！中华民族一屑仔也bōe输侬！中国历史上，分分合合，有汉唐啲興旺，也有四散五路(sì- sòaⁿ-gō·-lō·)時啲衰败，亦呣佫幾若千年过去喽，中国侬嘛犹原伫世界顶徛在在。虽然讲即一外百年來，咱一再去互侬侮辱佮凌迟，不过這拢算是小插曲，早慢会过去。优秀啲中华民族犹原会佫再徛起，向前行去！最後實现民族复興！