鹭水芗南－闽南语部落

(翻譯／Limkianhui)

當今國際關系啲基本道理，會使講是純粹啲利益交關，無永遠啲朋友，嘛無永遠啲敵人，只有永遠啲利益。雖然真儕中國儂透底了解即个基本道理，不而過有時仔總是會受著感情因素啲纏絆，可比講，對待新加坡，真儕中國儂往往因為感情方面放bōe離，soah將怹當做是遠親來咧看待。中國儂定定有即款想法，認為講既然全世界啲猶太儂攏為猶太儂，安呢，全世界啲華人嘛應該為華人chiah-tio̍h。新加坡是一个華人佔多數啲國家，國土摻中國也無交插(kau-chhap)，應該無啥物利益啲沖突。過去，因為中國鬧“極左”、鬧“輸出革命”，確實捌因為安呢來影響著兩國啲關系。不而過，遐攏古早時代啲代誌嘍。“階級鬥爭為綱”早著已經過去，現此時，中國是全力來咧拼經濟，改革開放，歡迎外資。亦新加坡佮中國共文共種，佫平平用簡體字，怹不但是有了解西方，而且又佫熟似中國，定著會成做”中国改革开放、经济发展啲受益者”。所以，中國儂一貫真自然著共新加坡當做是朋友，對怹一再吞忍，一再優惠。中新建交以來，兩國貿易額、投资额大幅度增長，亦中國甚至猶佫聘请新加坡一寡仔有頭有面啲儂來做國策顧問；將海峽兩岸啲“汪──辜会谈”安排佇新加坡來舉行…應該講，中國已經真顧新加坡面子嘍。呣若安呢爾，佇東南亞金融危機啲時，中國無顧家己咧食虧，堅持人民幣呣貶值，佇關鍵啲時陣，替東南亞各國穩定貨幣行情，實際是直接來咧幫助新加坡。逐个攏知影，金融業是新加坡啲支柱產業之一。中國犧牲自已，穩定金融，即中間新加坡得著啲利益上吤儕。中國為新加坡所做的，實際上已經超越國際關系啲基本原則，一再為伊犧牲家己啲利益。中國是真真正正將新加坡當作是朋友佇咧看待。不而過，新加坡又佫是安怎來咧對待中國咧？

>新加坡早著聲明，佇東南亞，一定beh等遘最後一个chiah摻中國建交，亦建交了後照原beh維持hām臺灣啲軍事合作關系。對對，伊有影講會遘，做會遘。

> 李光耀、吳作棟一再講起：中國啲成長是世界上大啲挑戰，將來亞洲會穩定bōe穩定，噯看咱安怎對待中國啲崛起。李光耀甚至佫講，作為中國儂啲後代，伊知影中國儂真敖吞忍，嘛知影中國儂爆發力真強，真敖抾恨…東亞、東南亞啲國家咔早攏捌得失著中國，一旦中國沖起來，遮个國家必然會受著中國強烈啲報復…所以噯永遠互中國做二流國家。

>新加坡一再鼓吹美國是東南亞重要啲平衡力…美軍退出菲律賓基地了後，新加坡趕緊表示講伊願意補即个空缺(khang-khiah)，現此時，新加坡已經成做美軍佇東南亞唯一啲據點。

> 中國代先表示beh摻東盟(東協)合作。不而過新加坡為著beh平衡中國啲力量，下命主張東盟佮印度啲合作。原底，印度佇東南亞根本無法度插骹，攏是新加坡硬共拖入來啲。新加坡是東南亞頭一个佮印度實行聯合軍事演習啲國家。西元2000年啲時，印度因為堅持beh核試驗，本然猶佫暫時互儂孤立。東盟對印度啲核試驗不但無譴責，顛倒soah表示允准佮支持。即中間，新加坡啲出bōe少力。核試驗了後，印度外長上代先去啲東盟國家著是新加坡。

>中國佮東盟建立自由貿易聯盟啲時陣，新加坡定定三不五時著警告東盟國家噯團結，噯注意中國是競爭啲對手。

> 中國儂佇新加坡受著無公平啲對待，會使講呣是啥物新奇啲代誌嘍。中國女運動員佇新加坡旅游啲時，無代無誌，集體受著店頭家啲摳洗佮詈罵。新加坡啲輿論界一時soah bōe記得“儂客是上帝”、“儂客永遠是tio̍h啲”啲生理經，顛倒是趁機會放肆來咧經體(keng-thé)佮摳洗中國儂，替hit个鱸鰻店頭家辯护。
……
經歷過hit擺啲“SARS”災祸了後，中國實在是噯感謝新加坡chiah tio̍h。第一，即層災難，互儕儕中國儂看分明安呢啲一个基本問題：啥儂是中國啲敵人，啥儂是中國啲朋友；亦第二，等於是咧共中國儂補課，提醒中國儂呣通bōe記一寡國際關系啲基本常識，知影講beh摻儂交陪，一定噯細膩、噯張弛，呣免啥物代誌攏看hiah重，有啲代誌一定噯嚉反面看倒來chiah bōe食虧；第三，這嘛幫助中國放心矴掉(tàn-tiāu)一擔重擔，此去會當規心滿腹來思量本國家己啲利益，呣免佫咧“家己睏桌骹，煩惱別儂厝漏”、煩惱這，煩惱he，煩惱十三代囝孫無米通食。會使講，通过“SARS”災禍，中國儂對新加坡身上上少會當得著三條啲結論：一是呣成囝，二是呣是朋友，三是呣免共伊客氣。

所有遮个代誌攏是發生佇“SARS”爆發進前啲代誌，真儕中國儂往往共新加坡儂當作朋友弟兄，佇關鍵啲時陣出面共怹鬥相幐(thīn)，助怹渡過難關。不而過，當當(tng-tong)中國遭受著“SARS”災難啲時，新加坡又佫是咧做啥咧？

──4月6日(2003年)，新加坡总理吴作栋响应美国华盛顿邮报“封杀中国”啲号召，竟然公開表示拒絕訪問中國。《联合早报》論壇寫講“吴作栋啲作為得著东南亚国家啲訶咾kah欢迎”。

──5月2日(2003年)，吴作栋接受媒体采访啲时，公开對中国治理SARS啲能力表示懷疑，放風講中国會用兩、三年啲時間來治理SARS，鼓吹外资噯趕緊退離中國，講呣通“將所有啲鸡卵攏下(hē)佇共一奇(kha)篮仔內”。

──東盟防SARS峰會本然有考慮中國啲，是新加坡堅持講he是東盟家己啲家內事，沒必要請別儂來插一骹。會後吳作棟風龜講其他東盟國家啲頭儂攏噯看伊啲態度，是伊chhōa頭拒絕中國，講kah無輸伊著是東南亞國家啲英雄。

新加坡今仔日會做出即款啲代誌，絕對呣是單純“看汝bōe爽”遐簡單，也嘛是凊采講講無准算。會使講he是真正狼毒啲傷害，是怨汝bōe緊死，趁汝落難 beh做一困互汝無命啲敵對行動。怹計劃啲目標：第一，佇全球制造一場新啲反華風波，重新封鎖中國，徹底變歹(pìⁿ-pháiⁿ)中國改革開放、發展經濟啲環境；第二，鼓吹外資離開中國，造成中國經濟啲大災難，互伊崩盤；第三，減少中國百姓對政府抗災治國啲信心，使蛇弄鼠，互中國政府指揮失靈，引起社會動亂，最後亡國。

現此時，中國社會算講穩定，犯勢有儂會認為講頂面所講啲“傷譀”、是“無話咧講栲栳”。亦呣佫，呣通bōe記咧，正正因為新加坡是華人佔多數啲國家，嘛正正因為中國一貫共伊當做朋友，儕儕儂想講新加坡對中國啲情形上了解、上實在、上無偏見、嘛上吤權威。所以，新加坡對華啲態度如何，對其他國家影響真大。拄著災難啲時，四界攏誠青狂、誠恐慌，一句無影無跡啲無影話仔，有時聽好(thèng-hó)互儂性命無去， he著若像股市當咧危機啲時，小可仔風聲著有可能崩盤，引起股民跳樓、自殺。共款啲道理，hit陣仔SARS危機，全世界偌儕國家猶咧目睭金金、捎無頭縂 (thâu-cháng)，亦新加坡串串(chhòan-chhòan)著是佇hit時代先跳出來“軍”中國一棋，chhōa頭起來反中國，所造成啲負面影響實在比平常時加大成千倍，好話一萬句不抵歹話講一句。佳哉中國政府及時穩定局勢，佳哉中國儂會共心消滅災禍；佫佳哉國際社會呣相信中國會亂，若無，外口hit寡仔佮中國有怨仇啲儂定著會順應新加坡啲號召，燃(hiâⁿ)柴添火著(to̍h)。安呢，伊新加坡想beh利用SARS危機來舞亂中國啲臭心著有可能會實現。新加坡佇關鍵啲時陣、關鍵啲所在，共中國揬(tu̍h)即刀，這千真萬確，永遠拭bōe去。即擺中國無倒落去，he呣是新加坡手下留情，嘛呣是怹功夫學無倒，he串串是因為中國儂靠家己啲實力，靠儼硬啲個性，佮團結啲意志拍敗災難，互新加坡啲臭心毒行(chhàu-sim to̍k-hēng)破產去。

路尾，新加坡發現勢面呣著，趕緊千方百計beh共放出來啲食食倒轉去。怹動用各項輿論工具，硬拗硬拗，硬beh共關鍵時陣hit款“惡面腔”解說(kái-soeh)講是“滿面啲溫純”。就安呢，一時仔，咧替伊掩勘、替伊辯解啲文章、評論滿天颺颺飛。啥物“新加坡是独立啲主权国家，没有必要考虑中国啲利益”啦，“無歹意”啦，“國家細，孤不將”啦，“法制国家，令出必行”啦，“一貫對中國友好”啦， “平平華人國家，計較無事使”啦（taⁿ嘛好啊，當初時汝新加坡攑刀仔共中國揬落啲時，汝有nih目無？即陣chiah想著講“平平是華人”？！）。亦嘛有儂想beh趁即个時陣倒咬一喙，拍儂喝救儂，佫再搬出“民主自由”即款漚古調來譴責中國，比論有《我為新加坡辯》、《為啥物beh惩罚新加坡》、《中國噯家己來反醒》等等。（賊咔惡儂，真正是“面皮咔厚屎礐梆”！）當然，怹又佫變弄一寡小步數，想講beh來糊涂焦點，可比講，共一條報道“吳作棟佇東盟防 SARS峰會上會見中國總理溫家寶”啲消息，中文報紙報道講，吳作棟為伊進前取消訪問中國解釋並道歉；不而過英文報紙卻是連講也無講“道歉”啲代誌。表面來講，是beh互汝中國儂咔爽淡薄，亦實際根本無任何意義，因為英文chiah是新加坡真真正正啲官方語言。

新加坡即款水氣啲搬弄，實在互中國儂看kah會飽，對頭遘尾，一出國際關系啲文明戲，按拄頭仔啲“雄介介、惡劇劇(ok-khia̍t-khia̍t)”，遘路尾，變kah若 “挹尾狗仔”；按“忘恩背義”遘kah“bōe見bōe笑”；按“hiau-pai鬖鬚”遘kah“假仙假觸(tak)”…bōe輸hit號戲臺頂咧搬大戲，各種骹數(kha-siàu)攏齊備、無漏溝。即款教儂如何看儂辯儂啲教材，實在有錢無tè買。干凋憑即點，中國儂著應該好好仔向新加坡學習、共儂說多謝。

不而過，真儕中國猶原捎無：新加坡是安怎beh反華？中國到底是啥物時陣得失伊咧？（犯拄勢古早時陣蹛佇美洲啲印地安儂也有共款疑問：白儂為啥物beh刣怹，連投降了佫呣放怹煞？印地安儂到底是得失白儂啥貨？？是講，也莫怪印地安儂有hit款啲疑問，因為怹可能佫呣知影啥物號做 “刣儂放火”；呣捌聽過啥物是“豬刀”，啥物是“肉砧”。）這著是東方文明無法度理解西方文明啲原因。汝呣通想講無得失儂、對儂好，安呢著會當天下太平，現實啲世界根本無咧信奉汝即套。

東南亞各國透底有久長啲歷史、傳統佮文化，干凋新加坡無爾(niā)。新加坡原底著呣是一个國家，伊只是馬來西亞啲一部分，是因為馬來亞反對華人chiah 共怹一骹踢出來啲。雖然華人佔多數，呣佫認同中國傳統文化啲華人一貫攏是社會第一下階層(kē-chân)啲散赤儂，亦若hiah-ê“國家精英”，透底是接受過英國、抑是講西方名校全套精心教育啲“高等華人”。遮个“精英”，著是俗語講啲“芎蕉儂”──黃皮白心，雖然怹生做是華人啲范(pān)，不而過心肝內上吤看bōe 起中國文化佮中國儂，怹上敖啲一步功夫，著是踮白儂啲面頭前搖尾、扶LP；斡頭(oa̍t-thâu)佫來經體(keng-thé)、siak-sau華人同胞。（這摻中國國內hit篷“XXXX精英”會使講是共父各母──共一个種族(chéng-cha̍uh)。）所以雖然是華人佔多數，呣佫主流文化卻是東西交插(kau-chhap)，有影“貓peh樹——呣成猴”。亦hit-ê所在不但無資源，無歷史、無傳統，嘛無文化特色，真真正正是一个靠儂去造出來啲雜種、怪胎。

講怹怪胎是怪胎，不而過儂怹攏嘛種(chéng)有著大英帝國啲hit款“hiau-pai佮鬖鬚，三不五時著膨風(phòng-hong)講怹咔早是大英帝國佇亞洲上大啲軍事基地。Hit時，怹看著白儂bōe輸若看著怹祖公，驚kah呣敢講話攏呣敢大細聲；不而過怹對待亞洲各國啲人民，又佫是hiah-nī大曳(tāi-ia̍t)。佇怹啲心肝內，亞洲各國啲人民攏是一寡“土公仔儂、倯儂、無路用儂”。不而過，花無百日紅，真緊大英帝國著來落衰，新加坡嘛無法度佫再“踏馬屎傍官氣”，孤不而將，噯家己去討趁。中國啲經濟猶未沖起來進前，新加坡拄著好狗運， “貓仔無在家，鳥鼠仔咧khiau骹”，怹啲金融業、出口加工業、旅游業、航運業等等各行各業攏舞kah鏘鏘滾，一時互儂比喻做亞洲啲一尾龍，日子嘛過 kah真四序、佫真chhiaⁿ-iāⁿ。不而過，自中國啲經濟沖起去了後，新加坡hiah-ê“二步七仔”著變kah愈來愈無路幹。

東南亞其它國家透底有家己啲歷史、傳統佮資源優勢，怹佮中國啲經濟有互補啲關系，面對中國發展，怹除了看著挑戰以外，嘛會當看著真儕有利啲機會。怹beh適應中國啲發展，呣免傷努力(ló·-la̍t)。相比來講，新加坡著無即款啲機會，怹有做會遘啲，中國早慢嘛會當，甚至做了佫比怹咔讚。利用共文共種、中西通食啲優勢，抾中國發展經濟啲白肉油仔，對新加坡來講，本底應該是簡單kah親像桌頂拈柑，不而過，假使若beh安呢做，新加坡定著噯先收煞“二總管” 啲氣頭(khùi-thâu)，公平來對待一貫互怹看無目地啲中國儂。亦實際上，這對新加坡hiah-ê“國家精英”來講，咔慘ti̍h怹啲性命。李光耀啲言論清楚表達出新加坡統治“精英”啲心聲，he著是“一定噯永遠互中國做二流啲國家”。只beh中國永遠做二流，安呢怹新加坡著是一流，永遠懸汝一級，永遠蹛汝啲頭殼尾頂咧放屎放尿。莫怪東南亞有遐儕國家，串串只有新加坡規工咧哭父“中國威脅論”；也莫怪新加坡狂beh請美國啲海軍倒轉來駐點，牽豬哥仔 ——趁暢！（有影“一世婊，萬世婊”，“牛牽遘北京嘛是牛”。）新加坡真清楚，只beh中美對抗，美國儂著肯出錢維護軍事基地。所以，透白講，新加坡呣是咧驚汝中國亂，是咧驚汝中國呣亂！新加坡規工se̍h-se̍h唸，幫助中國佮厝邊頭尾結冤仇，互中國佮厝邊之間關系愈來愈緊張，怹唸咪招來美國軍艦，唸咪餳(siâⁿ)來印度兵仔，亦動著佫噯唱一葩仔“中國威脅論”，目的無非是為著beh提懸怹國內軍事基地啲地位佮行情。

總講一句，新加坡過去的繁榮是建立佇中國落後散赤、軟汫好偏(nńg-chiáⁿ hó-phiⁿ)啲基礎上。因為中國崛起，形勢有所改變，阻礙著新加坡啲利益，亦新加坡又佫無願意適應新的形勢，家己想beh好過，佫bōe別儂好額。所以，新加坡chiah會千方百計beh來阻擋、破害、乾擾中國啲發展。這著是新加坡為啥物beh用即款歹失德啲步數對待中國啲根本原因。這佮“是呣是華人”無治代。無雄萬代窮！面對著新加坡啲破害佮陷害，中國一定噯佇必要啲時陣回敬對方，絕對呣通軟心，手頭佫咔bōe當落軟。真簡單，因為安呢符合中國啲國家利益，免了偌儕工，beh chhōe理由嘛真簡單。中國代先噯看分明，新加坡對中國啲傷害是透根透底啲傷害，除非汝中國家己甘願beh看衰家己，甘願beh自動破產，若無，實在無理由互新加坡踮hia咧好食睏。這呣是汝中國有得失伊無得失伊啲問題，是儂伊根本著是beh食汝三注遘(saⁿ-tù-kàu)。講咔透白啲，按算beh 欺負汝，呣免等汝得失伊。

逐个嘛噯清醒，對待新加坡啲破害，中國實在是bōe當據在伊去。因為即款惡質啲影響實在有夠厲害，臭柑過籠，過kah規大片，變成“烏鴉鑿石螺”(眾矢之的)，遘尾仔，是非烏白分bōe清，白白布硬互儂染遘烏，安呢著害a。新加坡不時著咧展講“其他東盟國家頭儂攏噯新加坡對華啲態度來確定怹啲對華政策”。假使真正有影安呢，著聽好(thèng-hó)證明新加坡是東南亞反華勢力啲根底，擲(tēⁿ)死一个新加坡，順紲佫兼鎮煞。亦若假使無影安呢，he證明新加坡只不過是“蟑蜍展氣功——膨風”爾。對付即款行江湖啲“老仔”(láu-á)，一定噯徹底liah 破怹啲假面腔，咔免佫四界去共儂術。新加坡啲騙術，上根本啲一招，著是互儂認為講是中國家己將怹當朋友，亦怹反華可以呣免受處罰。伊拍汝十下，汝上無嘛噯還伊五下，若無，新加坡啲無影話仔著會那來那儕儂相信，日後對中國啲危害嘛會那來那大。即个世間，本成(pún-chiâⁿ)著是賊咔惡儂；飯照食、鷄照掠；汝噯伊死、伊噯汝無命。beh對付小人，其實嘛吤簡單，因為小人透底博(po̍ah)軟無博硬。汝今仔日放過一个，伊眠仔再著會bok出一堆。拍死一个，教乖一陣。所以講對付小人一定噯用小人步，有仇報仇，呣免驚伊無命，割頭割遘斷。

用君子之道對付小人，現白講，正港目睭糊著蜊仔肉——青瞑。中國beh收拾新加坡其實吤簡單，呣免動刀動銃(chhèng)，嘛呣免起鑼動調。只beh中國儂日後mài佫將怹當朋友，公事公辦，安呢怹自然會真歹食睏。呣通想講這是簡單啲一句話，過去中國著是因為安呢，呣知受過偌儕冤枉代，食過偌儕虧！呣免講傷遠啦，干凋進前亞洲金融危機，中國為beh 穩定亞洲金融，家己食虧無講，扎有著啲，香港掠外，佫來著是新加坡。中國是驚講新加坡經濟若崩盤，會愈哭父“中國威脅論”。因為安呢，本然有寡仔對中國有利啲代誌，驚講對新加坡會造成阻礙，最後中國soah攏來放棄。可比講，泰國咧央(ang)中國合作修建克拉地峽運河，技术佮财政來講，這並無啥物難度，亦一旦工程完成，日後著呣免定定倚靠馬六甲海峽。這對中國佮泰國啲經濟來講，攏嘛有好無bái，不而過對新加坡啲航運業來講是大大啲不利。亦事實上，中國正正著是顧慮著新加坡啲利益soah一直無做最後啲決定。佫比論講，有儂建議中國噯摻緬甸合作開發输油管道、陸路運輸，安呢一下來，著會當減少中國對東南亞各國啲依賴。亦呣佫中國最後嘛無安呢做，這嘛是帶念著hām新加坡啲關系。

即擺，新加坡變面kán-ná狗，完全無共中國看在眼內。所以，此去中國咧考慮chiah-ê經濟建設項目啲時，嘛會使完全呣免插潲伊新加坡會安怎。安怎想，著安怎做，啥物儂也免佫來比手劃刀、比手弄蹄。這對中國來講，可比“放牛擔”，絕對呣是歹代誌。佫來，若beh摻東南亞國家交關，中國聽好(thèng-hó)直接chhōe怹各國著好a，無需要通過 “東盟”。東盟實際只是新加坡弄嘉禮戲啲戲臺，是助新加坡脹懸身價啲戲臺，實在對中國佮其它國家無任何利益可言。此去中國聽好直接摻各國拍交關，共東盟 hiù蹛邊頭，拆新加坡啲臺仔，互即箍術仔囝無機會通佫再“術”落去。中國安呢做，對任何儂攏bōe造成傷害，除了新加坡以外。這以外，假使中國完成克拉地峡运河工程或者緬甸陆路运输工程，美国利用新加坡做基地來封鎖中國啲可能性著會降下(kàng-kē)。安呢，准講新加坡有心beh做婊賣肉，犯勢著無儂beh買。有tè賣是上好，不而過真正遘kah hit个時陣，犯勢伊新加坡上吤想beh對付啲儂，已經呣是中國，顛倒是厝邊兜hiah-ê穆斯林國家。Hiah-ê厝邊兜一定bōe放新加坡煞尾，因為怹oân仔有生目睭，怹攏呣是khám–ê。安呢，呣免中國動手，新加坡自然著會死kah真歹看。

正正因為新加坡是華人為主要啲國家，又佫是反華啲先鋒，所以中國beh對付國際反華勢力，實際應該刣鷄教猴，先共新加坡捎(sa)起來刣，安呢咔無副作用。新加坡定定想講伊咔懸儂一級，磕bōe著，beh共比骹比手，實際上，佇國際社會中間，肯對伊死忠、願意幐(thīn)伊遘tè啲儂實在真少，亦佫咔無儂願意犧牲家己啲利益來保全伊新加坡。所以，收拾新加坡不但bōe加大“中國威脅論”啲聲說(siaⁿ-seh)，佫會當真好來教示hiah-ê專題靠反華食半暝仔飯啲華人“精英”：呣通想講規工踮hia咧咒懺(chiù-chhàm)中國有儂喝好，時遘若真正著衰是無儂會插潲汝！中國安呢做，對家己有利，對其它國家嘛有利，只有對新加坡無利。新加坡呣是定定愛講“新加坡是主權獨立啲國家，bōe當為中國啲利益犧牲新加坡啲利益。”真好！中國嘛會使講“中國是主權獨立啲國家，無法度為著新加坡犧牲中國啲利益”。Hiah-ê新加坡啲“精英”，敢呣是上吤看無起中國文化？安呢嘛好，即招號做，“以其人之道，還治其人之身”，福建話叫做“用伊涂糊伊啲牆”。中國只有安呢做，無選擇！！！