April 8,2006
啾啾啾（閩南囡仔歌）
Chhiu, chhiu, chhiu...啾啾啾1……
A-kong hoat chhiù-chhiu.
阿公發喙鬚。
Keng-chêng bē tāu-iû, tāu-iû phòe kiâm-chiáⁿ.
宮前賣豆油，豆油配鹹chiáⁿ。2
Keng-chêng bē hiuⁿ-piàⁿ, hiuⁿ-piáⁿ so· kah phang.
宮前賣香餅3，香餅酥佮芳4。
Keng-chêng bē bí-phang, bí-phang chhè koh tiⁿ.
宮前賣米芳5，米芳脆佫甜。
Keng-chêng bē gû-ni, gû-ni ū gû hiàn.
宮前賣牛ni，牛ni有牛hiàn。6
Keng-chêng bē ke-kiān, ke-kiān kā bōe tn̄g.
宮前賣雞腱7，雞腱咬bōe斷。
Keng-chêng bē iû-pn̄g, iû-pn̄g chin hó-chia̍h.
宮前賣油飯，油飯真好食。
Keng-chêng bē chhâ-kia̍h, chhâ-kia̍h hó kiâⁿ-lō·.
宮前賣柴屐，柴屐好行路。
Keng-chêng bē ah-mô·, ah-mô· bô lâng ti̍h.
宮前賣鴨毛，鴨毛無儂挃8。
Keng-chêng bē hoe-ki, hoe-ki hái-lāi siû.
宮前賣花枝9，花枝海裡泅10。
Keng-chêng bē siā-liû, siā-liû ē khui-hoe.
宮前賣榭榴，榭榴會開花。
Keng-chêng bē si-koe, si-koe tōa koh âng.
宮前賣西瓜，西瓜大佫紅。
Keng-chêng bē thô·-lâng, thô·-lâng bí lâi cheng.
宮前賣土礱11，土礱米來舂。
Keng-chêng bē sî-cheng, sî-cheng ē se̍h-kho·.
宮前賣時鍾，時種會踅箍12。
Keng-chêng bē cha-bó·, cha-bó· chin khiap-sì.
宮前賣諸姥，諸姥真怯勢13。
Keng-chêng bē ku-pih, ku-pih hiâm chho·-phôe.
宮前賣龜鼈，龜鼈嫌粗皮。
Keng-chêng bē hoat-kóe, hoat-kóe sio-kún-kún.
宮前賣發粿，發粿燒滾滾。
Keng-chêng bē bí-hún, bí-hún chhiáⁿ lâng-kheh.
宮前賣米粉，米粉請儂客。
Keng-chêng bē cha̍p-sè, cha̍p-sè ū si-soàⁿ.
宮前賣雜細14，雜細有絲線。
Keng-chêng bē mī-soàⁿ, mī-soàⁿ liâm koh tn̂g.
宮前賣面線，面線粘佫長。
Keng-chêng bē tōa-tn̂g, tōa-tn̂g chhàu-sái-bī.
宮前賣大腸，大腸臭屎味。
Keng-chêng bē tōa-mī, tōa-mī soah ti-kha.
宮前賣大面，大面撒豬跤。
Ti-kha chham hó·-ka, hó·-ka ē chia̍h-pó·.
豬跤摻虎膠，虎膠會食補。
Keng-chêng bē tōa-kó·, tōa-kó· phong-phong-phong.
宮前賣大鼓，大鼓嘭嘭嘭。
Sûi-lâng pài chó·-kong, chó·-kong ū lêng-siàⁿ, pó·-pì tn̂g sèⁿ-miā.
隨儂拜祖公，祖公有靈聖15，保庇16長性命。
【注解】（普通話）
1、啾：用手指刮臉頰，嘲笑小孩。即華語的「羞、羞、羞」。
2、鹹chiàⁿ：鹹與淡，指飯菜的調味。
3、香餅：閩南地方糕點，也叫馬蹄酥，同安的香餅最出名。
4、芳：香。
5、米芳：米香，爆米花制成的茶點。
6、牛ni：牛奶。hiàn：腥味。
7、雞腱：雞肫。
8、無儂挃：沒人要。
9、花枝：烏賊、墨魚。
10、泅：遊水。
11、土礱：舊時用來舂米、去穀皮的土臼。
12、踅箍：繞圈子。
13、怯勢：長相難看、醜陋。
14、賣雜細：走街串巷賣雜貨。
15、靈聖：靈驗。
16、保庇：保佑。
引用URL
http://cgi.blog.roodo.com/trackback/1386090
![[Syndicate this site]](http://cdn.rimg.tw/images/blog/rss.gif "Syndicate RSS feed"){kind=small}
![[Syndicate this site]](http://cdn.rimg.tw/images/blog/atom.gif "Syndicate ATOM feed"){kind=small}
