鹭水芗南－闽南语部落

草蜢公，chhēng 紅裙。

卜叨去？卜搭船。

路頂拄著姊妹仔群。

木屐仄，摕來格；

骹帛頭，放煙火。

Chháu-mé-kong, chhēng âng-kûn.

Beh tó khì ? Beh tah-chûn.

Lō·-téng tú-tio̍h chí-bē-á-kûn.

Ba̍k-kia̍h-cheh, the̍h-lâi keh;

Kha-pe̍h-thâu, pàng ian-hé.

草蜢公，chhēng 紅裙。

卜叨去？卜等船。

船叨去？船挵破。

船柴梆，卜燒灰。

灰叨去？灰賣銀。

銀叨去？銀娶姥 。

姥叨去？姥生囝。

囝叨去？囝生孫。

孫叨去？孫趁鴨。

鴨叨去？鴨生卵。

卵叨去？卵請客。

客叨去？客放屎。

屎叨去？屎沃菜。

菜叨去？菜開花。

花叨去？花結籽。

籽叨去？籽榨油。

油叨去？油點火。

火叨去？火 互 老公仔 食薰 pûn-pûn--hoa。

老公仔死佇芎蕉骹。

用甚物貯？用破豬槽貯。

用甚物khàm ? 用破米籮khàm。

甚物儂拜？老囝婿拜。

甚物儂哀？老婆仔哀。

甚物儂埋？天地出來埋。

Chháu-mé-kong, chhēng âng-kûn.

Beh tó khì ? Beh tán-chûn.

Chûn tó khì ? Chûn lòng-phòa

Chûn-chhâ-pang, beh sio hu.

Hu tó khì ? Hu bōe gûn.

Gûn tó khì ? Gûn chhōa-bó·.

Bó· tó khì ? Bo· siⁿ-kiáⁿ.

Kiáⁿ tó khì ? Kiáⁿ siⁿ sun.

Sun tó khì ? Sun thàn-ah.

Ah tó khì ? Ah siⁿ-nn̄g.

Nn̄g tó khì ? Nn̄g chhiáⁿ-kheh.

Kheh tó khì ? Kheh pàng-sái.

Sái tó khì ? Sái ak-chhài.

Chhài tó khì ? Chhài khui-hoe.

Hoe tó khì ? Hoe kiat-chí.

Chí tó khì, chí chà-iû.

Iû tó khì, iû tiám-hé.

Hé tó khì ? Hé hō· lāu-kong-á chia̍h-hun pûn-pûn--hoa.

Lāu-kong-á sí tī keng-chio-kha.

Ēng sím-mi̍h tóe ? Ēng phòa ti-chô tóe.

Ēng sím-mi̍h khàm ? Ēng phòa bí-lôa khàm.

Sím-mi̍h lâng pài ? Lāu kiáⁿ-sài pài.

Sím-mi̍h lâng ai ? Lāu-pô-á ai.

Sím-mi̍h lâng tâi ?　Thiⁿ-tōe chhut-lâi tâi.