鹭水芗南－闽南语部落

儂點燈，汝來看。

看甚物？看新娘。

新娘懸抑下？娶姥拜老父。

老父無chhēng襖，娶姥拜兄嫂。

兄嫂無chhēng裙，娶姥拜龍船。

龍船phu̍h-phu̍h飛，娶姥拜茶鍋。

茶鍋嗆嗆滾，肉炒筍。

炒幾tè，炒三tè。

一tè請儂客；

一tè家己食；

一tè拈互諸姥鬼仔食。

食乜代？食卜做月裡。

生甚物？生虼蠽。

抱出來，悾悾跋；

抱入去，救bōe活。

一斗鹽，一斗米，

救 kah 活活活。

Lâng tiám-teng, lí lâi khoàⁿ.

Khoàⁿ sím-mi̍h, khoàⁿ sin-niû.

Sin-niû koân ia̍h kē, chhōa-bó· pài lāu-pē.

Lāu-pē bô chhēng-ó, chhōa-bó· pài hiaⁿ-só.

Hiaⁿ-só bô chhēng-kûn, chhōa-bó· pài liông-chûn.

Liông-chûn phu̍h-phu̍h-pe, chhōa-bó· pài tê-oe.

Tê-oe chhiāng-chhiāng-kún, bah chhá sún.

Chhá kúi-tè, chhá saⁿ-tè.

Chi̍t-tè chhiáⁿ lâng-kheh;

Chi̍t-tè ka-kī chia̍h;

Chi̍t-tè hō· cha-bó·-kúi-á chia̍h.

Chia̍h mih-tāi, chia̍h beh chòe goe̍h-lāi.

Seⁿ sím-mi̍h ? Seⁿ ka-choa̍h.

Phō--chhut-lâi, khōng-khōng-poa̍h;

Phō--ji̍p-khì, kiù bōe oa̍h

Chi̍t-táu iâm, chi̍t-táu bí,

Kiù kah oa̍h-oa̍h-oa̍h.