鹭水芗南－闽南语部落

俺公（阿公）攑鋤頭，巡水路。

巡著一尾鯽仔魚，咧娶姥。

鮕鮘做媒儂，土虱做諸姥。

龜擔燈，鼈拍鼓 ；

墨賊仔攑火弄；

鎖卷（小卷）放銅貢；

美蝶仔攑彩旗；

蠓仔pûn噠啲；

蝦姑送嫁目吐吐；

田蛤仔扛轎叫艱苦（水雞扛轎大腹肚）。

Án-kong (a-kong) gia̍h tî-thâu, sûn chúi-lō· .

Sûn-tio̍h chi̍t-bé chit-á-hî, leh chhōa-bó· .

Ko·-tāi chòe hm̂-lâng, thô·-sat chòe cha-bó· .

Ku taⁿ teng, pih phah-kó· ,

Ba̍k-cha̍t-á giâ hóe-lōng,

Só-kńg (sió-kńg) pàng tâng-kòng,

Bóe-ia̍h-á gia̍h chhái-kî ,

Báng-á pûn ta̍h-ti,

Hê-ko· sàng-kè ba̍k thó·-thó· ,

Chhân-kap-á kng-kiō kiò kan-khó·（Súi-ke kng-kiō tōa pak-tó· ）

阿公仔踏水車，阿嬤仔攑戽桸。

戽著一尾三板魚。

阿公卜煮鹹；

阿嬤卜煮chiáⁿ；

兩儂相拍挵破鼎。

鼎片猶未抾，

翁婆咧相惜。

A-kong--á ta̍h chúi-chhia, a-má gia̍h hò·-hia

Hò·-tio̍h chi̍t-bé sam-pán-hî

A-kong beh chú kiâm；

A-má beh chú chiáⁿ；

Nn̄g-lâng sio-phah lòng-phòa tiáⁿ.

Tiáⁿ-phìⁿ iá-bē khioh，

Ang-pô leh sio-sioh.

阿公仔攑鋤頭，清水路。

清著一尾竹甲魚，五斤五。

阿嬤掠去煮，

阿公食一碗；

阿嬤食兩碗。

阿公食了卜佫添，

阿嬤攑煎匙去搧阿公的喙邊。

A-kong--á gia̍h tî-thâu, chheng chúi-lō· .

Chheng-tio̍h chi̍t-bé tek-kah-hî, gō·-kin-gō·

A-má lia̍h-khì chú；

A-kong chia̍h chi̍t-oáⁿ；

A-má chia̍h nn̄g-oáⁿ.

A-kong chia̍h-liáu beh koh thiⁿ，

A-má gia̍h chian-sî khì siàn a-kong ê chhùi-piⁿ.

阿公仔攑鋤頭，卜掘芋。

掘啊掘，掘著一尾旋鯔鼓。

阿公仔卜煮鹹；

阿嬤卜煮chiáⁿ；

兩个相拍挵破鼎。

A-kong--á gia̍h tî-thâu beh ku̍t ō· .

Ku̍t ah ku̍t, ku̍t-tio̍h chi̍t-bé soân-liu-kó· ,

A-kóng--á beh chú kiâm；

A-má beh chú chiáⁿ；

Nn̄g-ê sio-phah lòng-phòa tiáⁿ.