鹭水芗南－闽南语部落

華視8點檔電視連紲劇《舊情綿綿》搬百幾集啊，自舊年8、9月仔搬遘taⁿ，猶佫未煞，聽講已經是換第三代演員囉。會記得，頂擺的頂擺（舊年啦），我倒去廈門，注死tn̄g著即齣《舊情綿綿》拄好開始佇咧搬，hit擺，拄好我請 成禮拜的假期，嘛拄好是阮牽手兮 佮 阮丈姆婆仔in兩个母仔囝一工遘暗咧看台灣的電視，我「局不局」趁in直直看，攏總看差不多卜5~6集。初初看即齣戲，感覺hàm-hàm niā、普通普通啦，總是，無通真好，也呣是講偌bái--安呢。這是我對即齣戲，上頭仔的印象。

路尾，佫過久久，差不多有一月日hiah-ni̍h久，我佫轉去廈門，無疑悟 即齣戲soah猶佫佇咧搬。呣佫，即擺，我並無注神坐落來斟酌kā欣賞，原因是，第一，hit擺倒去，有足儕代誌噯做，確實真無閒，當然嘛無心情（sim-chiâⁿ）好好坐落來看電視；第二，是我家己的思想咧作弄，我想講像即款戲搬chiah久，穩當又佫是hit-lō「漚戲咧gâu拖棚」，mài看也罷！因為有安呢想，所以，佫咔無可能tiām-tiām-á 坐落來觀賞……等我代誌chhiâu好勢，著做我佫轉去工地做工囉。

最近即擺，是拄好sòa著春節假期，通好佫一擺轉去閩南過新正。想bōe遘，真正想bōe遘，想bōe遘 即箍「華視」猶佫佇hia咧「舊情綿綿」……阿娘喂，擋chiah久，真正無簡單！

逐个hoān-sè會小可佇咧起誤會，當做講我是存辦咧摳削儂，其實呣是。我顛倒是卜來講好話nah。儂講「親年頭、舊年尾，著講好話」，我汰討（thài-thó）敢講「歹話」，著無咧「破格」、「歹吉兆」咯！真正的，我即擺真正是去即齣戲迷去啊，去趿著（sahⁿ--tio̍h）啊 to̍h tio̍h啦！

雖然講，戲齣的劇情設計、安排，oân-á 佫有 bōe少 無講 kài 合情理的所在，不而過，總的來講，即齣戲soah愈搬愈合我的氣口，愈哺愈有味。我咧觀賞閩南語戲曲抑是講電視劇，自來攏呣是將伊的劇情看kah真重，我攏咔致重伊的語言佮口白，看he語言運用有端的(toaⁿ-tiah)無，講了有趣味無。

即齣《舊情綿綿》會互我感覺「倒尾甜」，會直直想卜佫看紲落去，這證明伊的語言、對白有去互我憶著（it--tio̍h），會當吸引著我，互我感覺有趣味。當然，我安呢講，無代表講即齣戲的語言安插、對白對談完全攏無欠點佇咧（准講朋友汝oân-á有咧看，相信汝嘛會當定定chhōe著一寡有tāⁿ 誤，抑是講無夠水氣的字眼）。是講，我是感覺講，安呢著已經算講bōe歹啊。我看即个導演定著有用苦心佇咧。尤其是「顔麗貞」即腳（kioh：角色）（席曼寧 裝的）佮「汪邦雄」即腳（龍邵華 裝的），he閩南語真正講kah足讚的，足滑溜、足輦轉的，用著kài儕漳泉俗語話，像講：「pê床khàng席」、「拖屎連」、「歹心烏漉肚，卜死，著初一十五；卜埋，著風佮雨」、「洗面礙著耳」（嘛有儂講「洗面礙著鼻」）、「惡馬惡儂騎」、「火燒林投——bōe死心」、「越奸越巧越貧窮、奸奸巧巧天不從」、「火燒豬頭——面熟面熟」……其他兮，佫比論講hit个「阿源」、進前hit个「海豬仔」等等，嘛攏誠趣味、誠gâu講笑詼。

儂講「材料遘，呣是新婦gâu」，雖然，導演hoān-sè有斟酌佇咧設計臺詞，不而過，演員本身的素質應該 hàm-hàm 懸（koân）。龍邵華，我是常在（chhêng-chāi）有看伊咧搬「本土劇」，瞭解伊閩南語講了hàm-hàm讚。Ah nā 席曼寧即个諸姥（cha-bó·）演員，我著有影咔無瞭解（阮某咔知），不而過，我聽伊咧講話的屈勢，hoān-sè講了比龍邵華 有咔贏 無咔輸neh，即个席小姐應該是台南腔。

－－－－－－－－－－－－－－－－－－－
◎《舊情綿綿》片尾曲 唱：林姍

若 暎暗，我來離開汝，我呣知卜行叨位去 我以後，心情若稀微，身邊攏無汝通安慰 無論雨來抑好天，呣管海角抑天邊 深深思念汝，我對汝情綿綿 呣知是苦抑是甜 夢中叫著汝名字，夢醒心頭暗傷悲 烏雲烏雲，緊過去，汝我重新佫開始

Nā eng-àm, góa lâi lī-khui lí, góa m̄-chai beh kiâⁿ tó-ūi khì Góa í-āu, sim-chêng nā hi-bî, sim-piⁿ lóng-bô lí thang an-ùi Bô-lūn hō·-lâi ia̍h hó-thiⁿ, m̄-koán hái-kak ia̍h thiⁿ-piⁿ Chhim-chhim su-liām lí, góa tùi lí chêng mî-mî M̄-chai sī khó· ia̍h-sī tiⁿ Bāng-tiong kiò-tio̍h lí miâ-jī, bāng-chhíⁿ sim-thâu àm siong-pi O·-hûn o·-hûn, kín kòe--khì, lí góa tiông-sin koh khai-sí