鹭水芗南－闽南语部落

頭先語法用呣著，即陣改好勢囉～～(by limkianhui)

遊子san，多謝汝補充解說。我進前佇中國有自即个主題，hām一寡中國儂、馬來西亞儂、台灣lâng做夥討論過。薟佮辣，所代表的涵義，有影無共。薟，nā用來表示佮「辣」有tī-tāi的涵義的時陣，伊是形容詞，不而過，有分兩種構詞形式。一種是偏正式的構詞，比論講「薟椒仔」，這會當用辣來代替（辣椒仔）；佫另一種是形容詞當補語，比論講「辣薟薟」，按構詞性質的角度來看，這中間的“薟”著bōe當用“辣”來代替。所以，薟、辣無完全sio-siâng。

佫來，我佇即篇“呣成文”裡底，hoān-sè講了呣是真 bā搭，我應該換講「『薟』，佫會當用來表示『味真重』（北方話：氣味濃烈），佫定定直接互儂用來表示『臭味』、『漚味』……」

中國1982年出版的hit本《普通話閩南方言詞典》（台灣有咧賣，《普通話閩南語辭典》），是hit當時福建省裡（主要是廈門大學）成十个siōng-kài排祉的閩南語學者做夥用心編寫出來的，在來，互儂看做是一phō不止重要的閩南語詞典。可惜，我從來攏呣捌看過即本辭典，不而過，我聽儂講，即本詞典oân-á認為「薟」是本字。(by limkianhui)

Taokara 兄：即本線頂國語辭典確實是台灣教育部出的hit本。即本，佇中國攏嘛真時行~~~多謝汝提供另外即个好用的連結。

《臺灣話大辭典》，khêng實，我手頭oân-á無。即裡底記載的一寡內容，我是聽儂（有買即本詞典的儂）kā我講的。(ｂｙ ｌｉｍｋｉａｎｈｕｉ)

Taokara 兄：安呢看起來，汝的冊佫是少哦～～（欣羡）。。我自幾落年前，著直直想卜加買幾本仔轉來「囥」，soah呣知卜去tó位買。我咧按算講，明年中國nā出版《閩南話大詞典》（漳州話+泉州話），家己骹手一定噯緊，冗早來去交關chiah有影。(by limkianhui)

看勢，是冊佮人咧相爭厝間的款~~我有一个好撇步啦，將hiah-ê咔粗勇的冊，kā疊疊（thia̍p）咧，做眠床睏 嘛是bē bái。半暝nā睏精神，佫聽好順手捎起來罔掀罔看，真正「一兼二顧，摸蜊仔兼洗褲」。

遊子 san: 多謝多謝。汝hit句 孽khiat仔話「一盤魚脯仔——全全頭」，講了真好，確實是安呢。用字的問題，呣知卜佫拖 tī-tang時 chiah有法度定型落來……咽氣！