郁郁貢的爆牙

兩隻爆牙囡之中，燒賣條脷一定係長啲，點解？每次麻煩飲完水，個下巴直情濕到滴得出水，燒賣就乾乾爽爽。

為免攪到週圍濕晒，我通常都幫麻煩抹下巴；為怕燒賣妒忌，佢唔濕我都同佢抹兩吓。本來俾佢地啜走珠水樽可以解決呢個問題，不過每啖得好少，排隊啜水都成日喇！我又咁鬼得閒，抹就抹啦！

n年前喺香港住嗰陣，我係吊個差不多1公升玻璃走珠水樽喺個大籠度，真係幾好，又乾淨又容易洗。不過喺吉隆玻我未見到有一樣咁正嘅款囉。

燒賣極之鍾意梳毛。

佢一見到個刷或者聽到少少聲就會飛身到我腳邊。若果麻煩擋住佢前面，佢就會用絕招「狗頭槌」去「擂」個位番嚟。

因為佢細粒，所以「攝」位好叻。

大多數狗都畏高，要經過訓練先至夠膽從「高處」跳落地，當然總有例外，尤其係嗰啲唔識死嘅狗仔。

曾經有一次：我擺麻煩上一張BAR櫈，同佢影張「大特寫」；諗住櫈面細，佢唔會週圍走，方便我捕捉趣緻神態。我見佢個頭有啲亂，就攞把梳同佢執執，點知我未轉完身佢就由櫈度跳落嚟，我眼尾見到而又超乎我平時嘅反應咁捉到佢背脊一「執」毛。張櫈離地起碼三尺而佢就唔夠一尺長。

唔知係唔係試過「瀕死滋味」，佢依家非常怕高，擺佢上枱面，佢成隻硬晒唔敢行，好乖咁，非常方便我同佢梳毛或者沖完涼吹頭。